ރާއްޖޭގެ ސްކޫލް ދަރިވަރުންނަށް މޫދު އަޑީގެ ފަރުތަކާއި މަސްތަކާއި މުރަކަތައް ހަމަލޮލުން ބަލައިލުމުގެ ފުރުޞަތު ހޯދައިދިނުމުގެގޮތުން އެޑިއުކޭޝަން މިނިސްޓްރީން ކުރިއަށް ގެންދަވާ ފަރުކޮއެ ޕްރޮގްރާމާއި އެޕްރޮގްރާމާބެހޭ މައުލޫމާތު ހިމެނޭ ވެބްސައިޓް ރަސްމީކޮށް އިފްތިތާހު ކުރައްވައިފިއެވެ.
އާޓް ގެލެރީގައި ބޭއްވި ރަސްމިއްޔާތެއްގައި އެޕްރޮގްރާމާއި އެ ޕްރޮގްރާމްގެ ވެބްސައިޓް އިފްތިތާހުކޮށް ދެއްވީ ޓޫރިޒަމް މިނިސްޓަރ މޫސާ ޒަމީރެވެ. ފަރުކޮއެ ޕްރޮގްރާމަކީ މިއަހަރު ފެބްރުއަރީ މަހު ފެށިގެން ރާއްޖޭގެ ހުރިހާ ސްކޫލެއްގައި ކުރިއަށްގެންދަމުން އަންނަ ޕްރޮގްރާމެކެވެ. މިޕްރޮގްރާމްގެދަށުން ރާއްޖޭގެ ސްކޫލްތަކުގެ 35 ހާހަށްވުރެ ގިނަ ދަރިވަރުން ވަނީ ފަރުތަކަށް ފީނައި ރީތިކަން ބަލައިފައެވެ.
" ފަރުކޮއެ " ޕްރޮޖެކްޓްގެ ދަށުން މިއަދު އާރޓް ގެލެރީގައި އެކްޕޯއެއް ވެސް ވަނީ ބާއްވައިފައެވެ، މިރޭ 10 އަށް ބޭއްވި އެކްޕޯގައި ތަފާތު 20 ސްޓޯލެއް ވަނީ ބަހައްޓާފައެވެ. އޭގެ ތެރޭގައި ހިމެނެނީ 8 ސްކޫލަކާއި 12 އަމިއްލަ ޖަމިއްޔާއެވެ.
މި ޕްރޮގްރާމްގެ މައިގަނޑު މަގުސަދަކީ ތިމާވެށީގެ ތެރެއިން ރާއްޖެއަށް ލިބިފައިވާ ނާޒުކު ރީތި ފަރުތަކުގެ ރީތިކަން ދަރިވަރުން އަމިއްލައަށް ތަޖުރިބާކޮށް ފަރުތައް ހިމާޔަތްކުރުމަށް އެކުދިންގެ ހިތުގައި ލޯބިޖައްސުވައި ފަރުތަކާއި ތިމާވެށި ހިމާޔަތްކުރުމަށް އިސްނަގައިގެން މަސައްކަތް ކުރާނެ ޖީލެއް އުފެއްދުމެވެ.
ރާއްޖޭގެ އެއްވެސް ކުއްޖަކު ބާކީ ނުކުރުމަށް އެޑިއުކޭޝަން މިނިސްޓްރީން ގެންގުޅޭ ސިޔާސަތުގެ ދަށުން ސްކޫލުތަކުގެ ހާއްސަ އެހީއަށް ބޭނުންވާ ދަރިވަރުންނަށް ވެސް ފަރުތައް ދައްކާލުމަށް މި ޕްރޮގްރާމްގައި ހިމެނިފައިވެއެވެ.
މި ޕްރޮގްރާމްގެ ޝިއާރު " ފަރުކޮއެ- ވޮއިސް ފޮރ ދަ އޯޝަން " އިން ދޭހަކޮށްދެނީ ފަރުތައް ހިމާޔަތްކުރުމަށް ކޮންމެ ކުއްޖަކީވެސް ޒިންމާދަރުކަމާއެކު މަސައްކަތްކުރާ ކުއްޖަކު ކަމުގައި ވާންޖެހޭ ކަމެވެ. "ފަރުކޮއެ"ގެ ދަށުން ތަފާތު ހަރަކާތްތައް މިހާރުވެސް ދަނީ ހިންގަމުންނެވެ.
