ބޮލީވުޑް ޚަބަރުތަކަށް ބަލާއިރު މަޝްހޫރު މީޙުންގެ ހަޔާތުގެ މައްޗަށް ފިލްމު އުފެއްދުން މިވަނީ އާއްމުވެފައެވެ. ކޮންމެ ޕްރޮޑިއަުސަރަކުވެސް ބަލަނީ މަޝްހޫރް ޝަޚްޞިއްޔަތު ތަކުގެ ހަޔާތުން އާއްމުންނަށް އެހާބޮޑަށް ނޭނގޭ ކޮންމެވެސް ވާހަކައެއް ކިޔައިދޭށެވެ. އެގޮތުން ފިލްމު ޕރޮްޑިއަުސަރު ކަބީރް ޚާންގެ ހޮވުން ތަފާތެވެ. އޭނާ އުފައްދާ ބަޔޯޕިކްގައި ކިޔައިދޭން ބޭނުންވަނީ 1983ވަނަ އަހަރު ދުނިޔޭގެ ތަށްޓަށް ކުޅުނު ކްރިކެޓް މުބާރާތް އިންޑިއާއަށް ކާމިޔަބު ކުރެވުނު ވާހަކައެވެ.
'ސަންޖޫ' އަށް ފަހު ގިނަ ބަޔަކު އިންތިޒާރު ކުރާ އެއްބަޔޯޕިކް އަކީ މިއީ އެވެ. '83 ގައި އައިކޯނިކް ކްރިކެޓަރު ކަޕިލް ދޭވްގެ ރޯލު ކުޅެނީ އެތައްބައެއްގެ ހިތްތައް އަތުލާފައިވާ މަޝްހޫރް ތަރި ރަންވީރް ސިންގހް އެވެ. މި ފިލްމުގެ ތައްޔާރީތައް ބުރާސްފަތި ދުވަހު ލަންޑަންގަިއ ވަނީ ފަށާފައެވެ. ކްރިކެޓަށް ލޯބިކުރާ މީހުންނާއި އިންޑިއާގެ ކޮންމެ ރައްޔިތަކަށްވެސް މިއީ ވަރަށް ޚާއްޞަ ފިލްމަކަށް ވާނެއެވެ. އެއީ އިންޑިއާއިން ފުރަތަމަ ފަހަރަށް ވޯލްޑްކަޕް އުފުލައިލި ވަގުތުކޮޅު ސްކީރަނަށް ގެނެސް އާ ޖީލުތަކާއި ހިއްސާކުރާ ފިލްމެވެ.
ކަބީރް ޚާން މި ފިލްމުގެ މަސައްކަތް ފަށަން ނިންމީ ތަށި އުފުލައި ކުޅިވަރުގެ ތާރީޚުގައި އިންޑިއާގެ ނަން ލިޔެވުނު ސްޓޭޑިއަމް ގައެވެ. އެއީ ލަންޑަންގެ ލޯރޑްސް ސްޓޭޑިއަމް އަށެވެ. ފިލްމުގެ ތައްޔާރީތައް ފަށަމުން ކަބީރްވަނީ އިންސްޓެގްރާމްގައި ފޮޓޯއެއް ހިއްސާކޮށްފައެވެ. ފޮޓޯ އިން ފެންނަނީ ސަޗަިން ތަނދުލްކަރް އާއި ކަބީރް އަދި ރަންވީރް އެވެ. އިންޑިއާއަށް ތަށި ލިބުނު އިރު ސަޗިންގެ އުމުރުން 9 އަހަރެވެ. އޭނާ އިނީ ޓީވީއިން މެޗު ބަލާށެވެ، ކްރިކެޓަށް ސަޗިން ޝައުގެވެރިވީ އެމެޗަށްފަހު ކަމަށް ކަބީރް ބުނެފައިވެއެވެ.
ފިލްމަށް ތައްޔާރު ވުމުގެ ގޮތުން '83ގެ ޓީމު ބޫޓް ކޭމްޕެއްގައި ބައިވެރިވެ ކްރިކެޓް ކުޅެން ތަމްރީނު ހޯދާނެއެވެ. ތަމްރީން ސެޝަންތައް ކުރިއަށްދާއިރު 1983ަވަނަ އަހަރު މުބާރާތް ކަމިޔާބު ކުރި ޓިމުގެ ބައިވެރިންގެ އެހީތެރިކަން ލިބޭނެއެވެ. އެކުޅުންތެރީން އެހީ ފޯރުކޮށްދޭނީ ކޮންސަލްޓެންޓުން އަދި ކޯޗުންގެ ގޮތުގައެވެ.
