ދެހާސް ސާދަވަނަ އަހަރު ގެއްލިފައިވާ ނޫސްވެރިޔާ އަހުމަދު ރިޟްވާން މަރުވެފައިވާ ކަމަށް ވިދާޅުވެވުނީ އޭނާގެ މަރު ސާބިތު ކުރުމުގެ ގޮތުން ނޫންކަމަށާއި އެން ވިދާޅުވެވުނީ ކުރީގެ ނާއިބު ރައީސް އަހުމަދު އަދީބު ރިޟްވާނާ ބެހޭ ގޮތުން ދެއްކެވީ ދޮގުވާހަކައެއް ކަން ހާމަކުރެއްވުމުގެ ގޮތުން ކަމަށް ރައީސް ޔާމީން ވިދާޅުވެއްޖެއެވެ.
ރިޟްވާން މަރުވެފައިވާ ކަމަށް ރައީސް ވިދާޅުވީ މިއަދު ގދ. މަޑަވެއްޔަށް ވަޑައިގެން އެރަށުގެ ރައްޔިތުންނާ ބައްދަލު ކުރައްވައި ދެއްކެވި ވާހަކަފުޅުގައެވެ. އެހެންނަމަވެސް އެއަތޮޅު ފަރެސް މާތޮޑާއަށް ވަޑައިގެން ދެއްކެވި ވާހަކަފުޅުގައި ރައީސް ވިދާޅުވީ އެއީ ރިޟްވާން މަރުވިކަން ސާބިތު ކުރުމަށް ދެއްކެވި ވާހަކަފުޅެއް ނޫންކަމަށާއި އިރާދަކުރެއްވިއްޔާ ސަލާމަތުން ފެންނާނެ ކަމަށެވެ.
"އަޅުގަނޑަކީ ޝަރުއީ ގޮތުން މީހަކު މަރުވީތޯ ނުވަތަ ނޫންތޯ ނިންމާ މީހެއް ނޫން. އެކަން ފުލުހުން ތަހުގީގު ކުރާނެ. އަޅުގަނޑުގެ މުރާދަކަށްވީ، އަދީބު ދެއްކެވި ވާހަކައަކީ އަސާސެއް ނެތް ވާހަކައެއް ކަން ހާމަކުރަން،" ރައީސް ވިދާޅުވިއެވެ.
