ވެރިކަމުގެ ދެވަނަ ދައުރެއް ދެއްވައިފި ކަމަށްވާނަމަ ރިޓަޔަރ ކުރާ އުމުރު 65 އަހަރުން 74 ނުވަތަ 75 އަހަރަށް ބަދަލު ކޮށްދެއްވުމަށް މަޖިލީސްތެރެއިން މަސައްކަތް ކޮށްދެއްވާނެ ކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް މިއަދު ވިދާޅުވެއްޖެއެވެ.
އެމަނިކުފާނު މިގެން ވިދާޅުވީ ހުވަދުއަތޮޅަށް ކުރައްވަމުން ގެންދަވާ ދަތުރުފުޅުގައި އެއަތޮޅު ފަރެސްމާތޮޑާއަށް ވަޑައިގެން އެރަށު ރައްޔިތުންނާ ބައްދަލު ކުރައްވައި ދެއްކެވި ވާހަކަފުޅުގައެވެ.
ރައީސް ވިދާޅުވީ ރާއްޖޭގެސިއްހީޚިދުމަތުގެ ފެންވަރާއި އެޚިދުމަތް ކުރިއަރައިފައިވާ މިންވަރަށް ބައްލަވާއިރު ރިޓަޔަރ ކުރުމުގެ ޢުމުރަކީ 65 އަހަރު ކަމަށް ޤަބޫލުފުޅު ނުކުރެއްވޭ ކަމަށެވެ.
އެހެން ކަމުން އެމަނިކުފާނުގެ ރިޔާސީ ދެވަނަ ދައުރުގައި އެކަމަށް ހައްލެއް ގެނެސް ރިޓަޔަރކުރާ އުމުރަކީ 74 ނުވަތަ 75 އަކަށް ހައްދަވައި ދެއްވާނެ ކަމަށް ވިދާޅުވިއެވެ. އެމަނިކުފާނު ވިދާޅުވީ މިހާރު ރިޓަޔަރ ކޮށްފައިވާ މީހުންނަށް ވެސް ސަރުކާރުން ގޮތްތަކެއް ހޯއްދަވައި ދެއްވާނެ ކަމަށެވެ.
މީގެ ކުރިން ރައީސް ވިދާޅުވެފައިވަނީ ރިޓަޔަރ ކުރާ މީހުންގެ ތެރޭގައި ސިއްހަތު ރަނގަޅު މަސައްކަތެރި މީހުންވެސް ވަރަށްގިނަ ކަމަށެވެ. އެފަދަ މީހުންނަކީ ގައުމުގެ ތަރައްގީއާ ކުރިއެރުވުމަށް މަސައްކަތް ނުކުރެވޭނެ ވަރުގެ ބައެއް ނޫންކަމަށް ވެސް ރައީސް ކުރިން ވިދާޅުވެފައިވެއެވެ.
ފަރެސްމާތޮޑާގައި ވާހަކަފުޅު ދައްކަވަމުން ރައީސް ވިދާޅުވީ އެމަނިކުފާނުގެ ދެވަނަ ދައުރުގައި ޓުއަރިޒަމްދާއިރާއިން އެއަތޮޅުގައި 6000 އެނދު ތަރައްގީ ކުރައްވާނެ ކަމަށެވެ. އޭގެ ތެރެއިން ފަރެސްމާތޮޑާ، ވާދޫ، ފިޔޯރީ، ރަތަފަންދޫ ހިމެނޭ ސަރަހައްދުގައި 15 ރިސޯޓު ތަރައްގީކޮށްދެއްވާނެ ކަމަށް ވެސް ވިދާޅުވިއެވެ.
