ޝަރުޢީ ޙުކުމެއް ތަންފީޒު ކުރަމުންދާ ބައެއް ގައިދީންގެ ފޮޓޯއާއި މަޢުލޫމާތު ބޭނުންކޮށްގެން އެމީހުން ޕްރޮމޯޓު ކުރަމުންދާ ކަމަށްވާނަމަ އެކަން ކުރަމުންދާ މީހުންނާމެދު ފިޔަވަޅު އަޅުއްވާނެ ކަމަށް ފުލުހުން ވިދާޅުވެއްޖެއެވެ.
ފުލުހުން ވިދާޅުވެފައިވަނީ ތާއީދު ހޯދުމުގެ ގޮތުން ބައެއް ސިޔާސީ ޕާޓީތަކާއި، ޚަބަރު ފަތުރާ ވަސީލަތްތައް މެދުވެރިކޮށް އެފަދަ މީހުން ޕްރޮމޯޓު ކުރަމުންދާ ކަމަށެވެ. އެފަދަ ކަންކަން ކުރަމުންދާ ފަރާތްތަކުން އެކަން ނުކުރުމަށް ވެސް ފުލުހުންވަނީ ވިދާޅުވެފައެވެ. ގައިދީންގެ ފޮޓޯތައް ބޭނުންކޮށް އެމީހުން ޕްރޮމޯޓު ކުރުމަކީ ޤާނޫނާއި ޤަވާޢިދާ ޚިލާފަށް ހިންގަމުންދާ ޙަރަކާތެއް ކަމަށް ވެސް ފުލުހުން ވިދާޅުވެފައިވެއެވެ.
"ޝަރުޢީ ޙުކުމެއް ތަންފީޒު ކުރަމުންދާ ފަރާތްތަކުގެ ފޮޓޯއާއި މަޢުލޫމާތު ބޭނުންކޮށްގެން އެފަރާތްތައް ކުރިއަށްނެރެ ޝަޚުސު އޮޅޭގޮތަށް ހިންގަމުންދާ ޙަރަކާތްތަކާއި ޢަމަލުތަކަކީ ޤާނޫނުތަކާ ޤަވާޢިދުތަކާ ޚިލާފު ހަރަކާތްތަކެއްކަން ފާހަގަ ކުރެވިފައިވާތީ އެފަދަ ހަރަކާތްތައް ނުހިންގުމަށް އިލްތިމާސްކުރަން،" ފުލުހުންގެ ވިދާޅުވެފައިވެއެވެ. އެފަދަ ޢަމަލުތައް ހިންގާމީހުން ހޯދައި މައްސަލަތައް ބެލުމަށްފަހު ޤާނޫނީ ފިޔަވަޅު އަޅުއްވާނެ ކަމުގެ އިންޒާރު ފުލުހުން ވަނީ ދެއްވައިފިއެވެ.
ރާއްޖޭގައި މިހާރު ކުރިއަށްދާ ރިޔާސީ ކެންޕޭނުގައި ރައީސް މައުމޫނާއި، ރައީސް ނަޝީދާއި، ޝައިޚް އިމްރާނާއި، ޤާސީމް އިބްރާހީގެ ފޯޓޯތައް ބޭނުން ކުރަމުންދާ ކަމަށް ވެއެވެ. އެބޭފުޅުންނަކީ ޖަލު ހުކުމް ތަންފީޒު ކުރައްވަމުން ގެންދަވާ ބޭފުޅުންނެވެ.
ގައިދީން ޕްރޮމޯޓު ކުރާ ފަރާތްތަކާމެދު ފިޔަވަޅު އަޅުއްވާނެ ކަމަށް މީގެ ކުރިންވެސް ފުލުހުންވަނީ ވިދާޅުވެފައެވެ.
