ހުޅުލެއާއި މާލެއާ ދެމެދު ސަރުކާރުން އަޅައިފައިވާ ބްރިޖުމަތީގައި ކައިވެނިކުރަން ބޭނުންވާ ޒުވާނުންނަށް އަންނަ އާދީތަ ދުވަހުން ފެށިގެން ފޯމު ދޫކުރައްވަން ފަށްޓަވާނެ ކަމަށް ހައުސިން މިނިސްޓަރ ޑރ. މުހައްމަދު މުއިއްޒު ވިދާޅު ވެއްޖެއެވެ.
މުއިއްޒު ކުރައްވައިފައިވާ ޓްވީޓެއްގައި ވިދާޅުވެފައިވަނީ މިކަމަށް ބޭނުންވާ ފޯމުދޫކުރުމާއި ބަލައިގަތުން މިމަހު 5 އިން ފެށިގެން 13 އަށް ކުރިއަށްދާނެ ކަމަށެވެ. ފޯމުދޫކުރުމާއި ބަލައިގަންނާނީ ހައުސިން މިނިސްޓްރީގެ ކައުންޓަރުންނެވެ.
ބްރިޖުމަތީގައި ކައިވެނިކުރަން ބޭނުންވާ މީހުންނަށް އެފުރުސަތު ދެއްވުމަކީ ރައީސް ޔާމީން ކުރައްވައިފައިވާ ވައުދެކެވެ. "ރައީސް ޔާމީންގެ ވައުދެއް ކަމަށްވާ ބްރިޖުމަތީގައި އަލަތު ކައިވެނިކުރަން ބޭނުންވާ ފަރާތްތަކަށް އެކަމަށް އެދި ހުށަހެޅުމުގެ ފުރުސަތު 5 އޯގަސްޓުގައި ހުޅުވާލެވޭނެ. ހައުސިން މީނިސްޓްރީގެ ކައުންޓަރުން ފޯމު ދޫކުރުން އަދި ބަލައިގަތުން މިމަހުގެ 13 ގެ ނިޔަކަށް ކުރިއަށްދާނެ،" މުއިއްޒު ވިދާޅުވެފައިވެއެވެ.
ސިނަމާލެ ބްރިޖު ނިމި މިހާރު ގެންދަނީ ތާރުއެޅުމާއި ލައިޓް ހަރުކުރުން ފަދަ ފިނިޝިންގެ މަސައްކަތް ކުރަމުންނެވެ.
