އައްޑޫސިޓީ ކައުންސިލް އިދާރާއަށް ބަޔަކުވަދެ ބައެއް ސާމާނު ވަގަށް ގެންގޮސްފައިވާ ކަމަށް ޑެޕިޔުޓީ މޭޔަރ މުހައްމަދު ޔަސްރިފް ވިދާޅުވެއްޖެއެވެ.
އާފަތިހަށް މައުލޫމާތު ދެއްވަމުން އޭނާ ވިދާޅުވީ އެތަނުން ގެންގޮސްފައިވާ ތަކެތީގެ ތަފްސީލެއް އަދި ބެލިފައިނުވާ ކަމަށެވެ. އެހެން ނަމަވެސް އައިޑީކާޑު ޔުނިޓުގައި ބޭނުންކުރާ ފޮޓޯ ކެމެރާއި، ބައެއް އިލެކްޓްރޯނިކް ސާމާނު ގެންގޮސްފައިވާކަން މިހާތަނަށް ވަނީ ކަށަވެރުވެފައި ކަމަށެވެ.
"ވަންބަޔަކު މަސައްކަތް ކޮށްފައިވަނީ އެއްޗެހި ހާވާލައިގެން ފައިސާ ނަގަން. ތިޖޫރި ހުޅުވަން ވެސް ވަނީ މަސައްކަތް ކޮށްފައި. އެހެންނަމަވެސް އެ ހުޅުވިފައެއްނެތް،" ޔަސްރިފް ވިދާޅުވިއެވެ.
އޭނާ ވިދާޅުވީ އެތަނަށް ވަދެފައިވާ ގަޑިއެއް ނޭނގޭ ކަމަށެވެ. ސިޓީކައުންސިލް އިދާރާއަށް ވަދެފައިވާކަން އެނގުނީ ކުރިއަށްއޮތް ރިޔާސީ އިންތިޚާބުގެ މަސައްކަތްތައް ކުރެއްވުމަށް މިއަދު މެންދުރުފަހު އެތަން ހުޅުވުމުން ކަމަށް ވެސް ޔަސްރިފް ވިދާޅުވިއެވެ.
މިހާރުވަނީ އެ މައްސަލަ ފުލުހުންނަށް ހުށަހަޅައިފައެވެ. ފުލުހުން ގެންދަވަނީ ސިޓީކައުންސިލަށް ވަޑައިގެން އެމައްސަލަ ތަހުގީގު ކުރައްވަން ފަށްޓަވައިފައެވެ.
ޔަސްރިފް ވިދާޅުވީ އެތަނުން ގެއްލިފައިވާ ތަކެތީގެ ތަފްސީލް އެނގޭނީ އަލުން އިންވެންޓްރީ ނަގައި ޗެކުކުރުމުން ކަމަށެވެ. އިންވެންޓްރީ ނަގަން ފަށާނީ ފުލުހުން ބަލަންޖެހޭ ބެލުންތައް ނިމުމުންމުން ކަމަށް އޭނާ ވިދާޅުވޮއެވެ.
