އެމަނިކުފާނުގެ ވެރިކަމެއްގައި އަމަލު ކުރައްވާނީ ކޯލިޝަންގެ މެދުގައި ހެދިފައިވާ އެއްބަސްވުމާއި ގާނޫނުއަސާސީއާ އެއްގޮތަށް ކަމަށް އިދިކޮޅު ރިޔާސީ ކެންޑިޑޭޓް އިބްރާހީމް މުހައްމަދު ސާލިހު (އިބޫ) ވިދާޅުވެއްޖެއެވެ.
ރާއްޖޭޓީވީން މިހާރު ގެނެސްދެއްވަމުން ގެންދަވާ "ގެޓް ޓު ނޯ އިބޫ" ޕްރޮގްރާމެއްގައި މީހަކު ކުރި ސުވާލެއްގެ ޖަވާބުގައި އިބޫ ވިދާޅުވީ އެމަނިކުފާނު ވެރިކަމަށް ވަޑައިގަންނަވަނީ ރައީސް މައުމޫން ހިމެނި ވަޑައިގަންނަވާ ގޮތަށް 4 ޕާޓީއެއް ގުޅިގެން އުފައްދައިފައިވާ ކޯލިޝަނަކުން ކަމަށެވެ. އެހެންވީމާ އެ މަނިކުފާނު ވެރިކަން ކުރައްވާނީ އެޕާޓީތަކުގެ މެދުގައި ވެފައިވާ އެއްބަސްވުމެއްގެ ދަށުން ކަމަށެވެ.
އެ އެއްބަސްވުމާ އެއްގޮތަށް ވެރިކަން ކުރައްވާއިރު އެމަނިކުފާނުގެ ކުރިމަތީގައި ގާނޫނުއަސާސީ އޮންނާނެ ކަމަށާއި އެއާ ޚިލާފަށް އެއްވެސް ކަމެއް ނުކުރައްވާނެ ކަމަށް ވިދާޅުވިއެވެ.
އިބޫ ވިދާޅުވީ އެމަނިކުފާނު 4 ޕާޓީއެއްގެ ކެންޑިޑޭޓެއް ގޮތުގައި ނުކުންނަވާއިރު ސީދާ އެމަނިކުފާނު ނިސްބަތްވާ އެމްޑީޕީން ބޭނުންވާ ގޮތަށް އެކަނިވެސް ކަމެއް ނުކުރެވޭނެ ކަމަށެވެ.
