ރާއްޖޭގެ 24 ރަށެއްގައި ގާއިމްކުރި އޮޓޮމެޓިކް ވެދަރސްތޭޝަންތައް ނިމި ބޭނުން ކުރަން ފަށައިފިއެވެ.
މިއީ މޯލްޑިވްސް މީޓިއޮރޮލޮޖިކަލް ސާރވިސްއިން ދެމުންގެންދާ މޫސުމާބެހޭ މައުލޫމާތުތައް އިތުރަށް ފުޅާކޮށް ހަރުދަނާ ކުރުމަށްޓަކައި ގާއިމްކުރު ސްޓޭޝަންތަކެއް ކަމަށް ތިމާވެއްޓާ ބެހޭ ވުޒާރާއިން ވިދާޅުވިއެވެ.
އެ މަޝްރޫއަކީ އިޓަލީގެ ސަރުކާރުގެ ހިލޭ އެހީގެ ދަށުން ކުރިޔަށް ގެންދިޔަ މަޝްރޫއެކެވެ. އެއީ ރާއްޖޭގެ މޫސުން ބެލުމާއި، މެޓް އޮފީހުގެ އިދާރާއެއް ގާއިމްކުރެވިފައިނެތް ސަރަހައްދުތަކުގެ މޫސުންވެސް ސީދާ ކަމާއިއެކު ފުރިހަމައަށް ގެނެސްދިނުމުގެ މަގުސަދުގައި ހިންގި މަޝްރޫއެކެވެ.
މެޓް އޮފީހުގެ ފަރާތުން ދިވެހި ރައްޔިތުންނަށް ފޯރުކޮށްދޭ މޫސުމާއިބެހޭ މައުލޫމާތު ހޯދާ ދެނެގަތުމުގެ ގާބިލުކަން އިތުރަށް ފުޅާކޮށް، މުޅި ރާއްޖެ ކަވަރު ކުރެވޭގޮތަށް "މޫސުމީ ވިޔުގަ" އެއް ގާއިމު ކުރުމަކީވެސް މި މަޝްރޫއުގެ އަމާޒެއް ކަމަށްވެސް ތިމާވެއްޓާ ބެހޭ ވުޒާރާއިން ވިދާޅުވެފައިވެއެވެ.
މި ސްޓޭޝަން ތަކުން މޫސުމީ އެތައް މައުލޫމާތެއް ލިބިގެންދާނެއެވެ. އޭގެ ތެރޭގައި، ވައި ޖެހޭ ބާރުމިނާ ވައި ޖެހޭ ފަރާތް، ވާރޭ ވެހުނު މިންވަރު، ވައިގެ ތެތްކަމުގެ އެވަރެޖް ނިސްބަތް، ފިނި ހޫނުމިން އަދި އެޓްމޮސްފަރިކް ޕްރެޝަރ ހިމެނެއެވެ.
މި މަޢުލޫމާތު ތަކުގެ ސަބަބުން މެޓް އޮފީހުން ދެމުންގެންދާ ޚިދުމަތްތަކުގެ ފެންވަރު މަތިވެ، އާންމުން ގަބޫލުކުރާ އިތުބާރުހުރި މަޢުލޫމާތު ލިބުމަށް މަގުފަހިވާނެ ކަމަށްވެސް ވުޒާރާއިން ވިދާޅުވެފައިވެއެވެ. މި މަސައްކަތް ނިންމާފައިވަނީ މިއަހަރު ޖުލައި މަހުގެ 4 ވަނަ ދުވަހުއެވެ. މި 24 ސްޓޭޝަނާއެކު ރާއްޖޭގެ ހަރުކުރެވިފައިވާ އޮޓޮމެޓިކް ވެދަރ ސްޓޭޝަން ގެ އަދަދު 54 އަށް އެރީ ކަމަށް ވެސް ތިމާވެއްޓާބެހޭ ވުޒާރާއިން ވިދާޅުވެފައިވެއެވެ.
އިޓަލީ ވިލާތުގެ ސީ.އޭ.އީ. ކުންފުންޏާއި ޙަވާލުކުރެވިގެން ކުރިޔަށް ގެންދިޔަ މި މަޝްރޫޢުގެ ޖުމްލަ އަގަކީ 11،877،684.92 ރުފިޔާ (އެގާރަ މިލިއަން އަށް ލައްކަ ހަތްދިހަ ހަތް ހާސް ހަ ސަތޭކަ އަށްޑިހަ ހަތަރު ރުފިޔާ ނުވަދިހަ ދެ ލާރި) އެވެ. މީގެ ދަށުން ހިމެނެނީ ސްޓޭޝަންތައް ބެހެއްޓުމުގެ ކުރީގައި ބިން ސަރވޭ ކުރުމާއި، ސްޓޭޝަންތައް އުފެއްދުމާއި، ސްޓޭޝަންތައް
ބެހެއްޓުމަށް ހަމަޖެހިފައިވާ ރަށްރަށް ގެންދިޔުމާއި، އިންސްޓޯލްކުރުރުމުގެ އިތުރުން މެޓް އޮފީހުގެ މުވައްޒަފުންނަށް މި ސްޓޭޝަންތަކާއި ބެހޭ ތަމްރީން ދިނުން ކަމަށް ވެސް ތިމާވެއްޓާބެހޭ ވުޒާރާއިން ވިދާޅުވެފައިވެއެވެ.
މި ޕްރޮޖެކްޓުގެ ދަށުން އޮޓޮމެޓިކް ވެދަރ ސްޓޭޝަން ހަރުކުރެވުނު 24 ރަށަކީ
ހއ. ހޯރަފުށި، ކެލާ، ހދ. ކުޅުދުއްފުށި، ށ. ކަނޑިތީމު، ފުނަދޫ، ނ. މާފަރު، ރ. މަޑުއްވަރި، ޅ. އޮޅުވެލިފުށި، ބ. ތުޅާދޫ، ގޮއިދޫ، ކ. ގާފަރު، ދިއްފުށި، ގުރައިދޫ، އއ. ތޮއްޑޫ، ހިމަންދޫ، ވ. ރަކީދޫ، ފ. ނިލަންދޫ، މ. މުލި، ތ. ބުރުނި، ލ. މާވައް، ގއ. ކޮލަމާފުށި، ގެމަނަފުށި، ގދ. ތިނަދޫ، ފަރެސްމާތޮޑާ އެވެ.
މި މަޝްރޫޢުގެ ދަށުން ދ.ކުޑަހުވަދޫގައި ބެހެއްޓުމަށް ހަމަޖެހިފައިވާ ސްޓޭޝަން ހަރުކުރުމަށް ހަމެޖެހިފައިވަނީ ދ.ކުޑަހުވަދޫ އެއާރޕޯޓްގައެވެ. އަދި މި ސްޓޭޝަން ހަރުކުރުމަށް އެއަރޕޯޓުގައި ކަނޑައެޅިފައިވާ ބިން ތައްޔާރުވުމާއިއެކު އިންސްޓޯލްކޮށް އޮޕަރޭޓް ކުރެވިގެންދާނެ ކަމަށް ތިމާވެއްޓާ ބެހޭ ވުޒާރާއިންވިދާޅުވެފައިވެއެވެ.
އޮޓޮމެޓިކް ވެދަރ ސްޓޭޝަން ހަރުކުރުމުގެ އިތުރުން، މި ސަރވިސްގައި ބެކަޕް ޕަވަރ ފެސިލިޓީ އެއް ޤާއިމުކުރުމާއި، ވެދަރ ސްޓޫޑިއޯ އަޕްގްރޭޑް ކުރުމުގެ މަސައްކަތް މިހާރުވަނީ ނިމިފައެވެ. މި 02 މަސައްކަތް ފުރިހަމަކޮށްފައިވަނީ ޖުމްލަ 3،028،141.11ރ (ތިން މިލިޔަން އަށާވިސްހާސް އެއް ސަތޭކަ ސާޅިސް އެއް ރުފިޔާ އެގާރަ ލާރި) ދިވެހި ރުފިޔާ ޚަރަދު ކޮށްގެންނެވެ.
މިހާރު ކުރިޔަށްދަނީ މެޓް އޮފީހުގައި ބޭނުންކުރާ ސިސްޓަމްތައް އިންޓިގްރޭޓް ކުރުމާއި، މެޓް އޮފީހުގެ މޮބައިލް އެޕްލިކޭޝަނާއި ކޮމަން އެލަރޓިން ޕްރޮޓޮކޯލް ސިސްޓަމެއް ގާއިމުކުރުމާއި މުވައްޒަފުންނަށް އިތުރު ތަމްރީނު ދިނުމުގެ މަސައްކަތެވެ. ކުރިޔަށް ގެންދިޔުމަށް ހަމަޖެހިފައިވާ ތަމްރީންތަކުގެ ތެރޭގައި ހިމެނެނީ، ރޭޑަރ މީޓިއޮރޮލޮޖިކަލް، ފޯރކާސްޓް މޮޑެލިންގ އަދި ކްލައިމެޓް މޮޑެލިންގ އާއި ގުޅުންހުރި ތަމްރީންތަކެވެ. މި މަޝްރޫއުގެ ދަށުން ހިންގުމަށް ހަމަޖެހިފައިވާ އެންމެހާ މަސައްކަތްތަށް މި އަހަރު ނިމުމުގެ ކުރިން ނިންމާލެވޭނެކަމަށް ލަފާކުރެވޭ ކަމަށް ވެސް ވުޒާރާއިން ވިދާޅުވެފައިވެއެވެ.
