މިއަހަރު ބާއްވާ ސާފް ޗެންޕިއަންޝިޕް މުބާރާތުން ފާހަގަކޮށްލެވޭ ވަރުގެ ކާމިޔާބެއް ހޯއްދަވައި ދެއްވުމަށް އެދިވަޑައިގެން ގައުމީ ފުޓުބޯޅަ ޓީމަށް ރައީސް ހިތްވަރު ދެއްވައިފިއެވެ.
ރައީސުލްޖުމްހޫރިއްޔާ، ޤައުމީ ފުޓުބޯޅަ ޓީމަށް ހިތްވަރު ދެއްވައި ވާހަކަފުޅު ދައްކަވާފައިވަނީ މިރޭ ދަރުބާރުގޭގައި ބޭއްވެވި ސްޕޯޓްސް އެރީނާ ފުޓްސަލް ދަނޑުތައް ހުޅުއްވައިދެއްވުމުގެ ރަސްމިއްޔާތުގައި، ގައުމީ ޓީމުގެ ކުޅުންތެރިންނާ ބައްދަލު ކުރެއްވުމުގައެވެ.
މި ބައްދަކުކޮށްލެއްވުމުގައި އެމަނިކުފާނު ވިދާޅުވެފައިވަނީ ގައުމީފުޓުބޯޅަ ޓީމަކީ މި މުބާރާތް ކާމިޔާބުކުރެވޭނެ ފަދަ ގާބިލުކަންހުރި، ކުޅަދާނަ ކުޅުންތެރިންތަކެއް ތިބި ޓީމެއްކަމަށެވެ. ރާއްޖޭގެ ފުޓުބޯޅަ ޓީމަކީ މި ސަރަހައްދުގައިވެސް ފާހަގަކުރެވޭ އެންމެ ހުނަރުވެރި އެއް ޓީމުކަމަށް ވެސް ވިދާޅުވިއެވެ. ގައުމީޓީމްވަނީ އެކަން 2008 ވަނަ އަހަރު ސާބިތުކޮށްދީ އެއަހަރުގެ މުބާރާތް ކާމިޔާބު ވެސް ކޮށްފައި ކަމަށް ރައީސް ވިދާޅުވިއެވެ.
މިމުބާރާތް ކާމިޔާބު ކުރުމަށް ހިތްވަރާއެކު މަސައްކަތްކޮށް، ރާއްޖެއަށް ރީތި ނަމެއް ހޯދައިދިނުމަށް އެދިވަޑައިގެން، ހުރިހާ ކުޅުންތެރިންނަށް ހިތްވަރު ދެއްވައި، މި މުބާރާތުގައި ކުޅޭ ހުރިހާ މެޗެއްގައިވެސް، އެންމެފަހު ވަގުތާ ޖެހެންދެންވެސް ވަރުގަދަ ހިތްވަރަކާއެކު ކުޅުމަށް އެދިވަޑައިގެންނެވިއެވެ. ހުރިހާ ދިވެހިންވެސް ތިބީ ގައުމީ ޓީމާ އެކީގައި ކަމަށް ވެސް ރައީސުލްޖުމްހޫރިއްޔާ ވިދާޅުވިއެވެ.
