ދެ ގައުމުގެ ދެމެދު ގުޅުން ރަނގަޅުކުރުމަށްޓަަކައި، އިސްވެ އެއްވެސް ޝަރުޠެއް ހުށަހެޅުމަކާ ނުލައި އީރާނުގެ އިސްވެރިންނާ ބައްދަލުކުރައްވަން ތައްޔާރަށް ހުންނެވި ކަމުގައި އެމެރިކާގެ ރައީސު ޑޮނާލްޑް ޓްރަމްޕް އިއްޔެ (ހޯމަ ދުވަހު) ވިދާޅުވެއްޖެއެވެ. އޭނާ ވިދާޅުވީ "އެމީހުން ބައްދަލުކުރަން ބޭނުންނަމަ، އަހަރުމެން ބައްދަލުކުރާނަން" ކަމުގައެވެ.
ވައިޓްހައުސްގައި ބޭއްވުނު ނޫސްވެރިންގެ ބައްދަލުވުމެއްގައި، އޭނާ އީރާނުގެ ރައީސު ޙަަސަން ރޫޙާނީއާ ބައްދަލުކުރައްވަން ތައްޔާރުތޯ ނޫސްވެރިއަކު ސުވާލު ދެންނެވުމުން ޓްރަމްޕް ވިދާޅުވީ "އަހަރެން ކޮންމެ މީހަކާވެސް ބައްދަލުކޮށްފާނަން. އަހަރެން މިއީ ބައްދަލުވުން ގަބޫލުކުރާ މީހެއް. ޚާއްސަކޮށް ހަނގުރާމައެއްގެ ބިރު އޮންނަ ހިނދުގައި."
ޓްރަމްޕްގެ މި ވާހަކަފުޅު މިއައީ ދެފަރާތުގެ ދެމެދުގައި ބަހުގެ ހޫނު ހަމަލާތަކެއް ބަދަލުކޮށް، ގުޅުން އިތުރަށް ގޯސްވެފައިވާ ދަނޑިވަޅެއްގައެެވެ.
"އެމީހުން ބޭނުންވާނަމަ އަހަރެން ހަމަ ގައިމުވެސް އީރާނުގެ މަސްއޫލުވެރިންނާ ބައްދަކުރާނަން. އެމީހުން އަދި އެކަމަށް ތައްޔާރަށް ތިބި ކަމެއް އަހަންނަކަށް ނޭނގޭ. އީރާނާއެކު ވެފައި އޮތް ނިއުކުލިޔާ އެއްބަސްވުން އަަަހަރެން އުވާލީ އެއީ ތާކުން ތާކު ނުޖެހޭ އެއްޗަކަށް ވާތީ. އަހަރެން ގަބޫލުކުރާ ގޮތުގައި އެމީހުން އެންމެ ފަހުން ބައްދަލުކުރަން އެދުން ގާތީ. އެމީހުން އެދޭ ކޮންމެ ވަގުތަކުވެސް ބައްދަލުކުރަން އަހަރެން މިހިރީ ތައްޔާރަށް." މިހާރު އެމެރިކާއަށް ޒިޔާރަތްކުރައްވަމުން ގެންދަވާ އިޓަލީގެ ބޮޑުވަޒީރު ޖޫޒެއްޕޭ ކޮންޓޭއާއެކު ވައިޓްހައުސްގައި ބޭއްވި ނޫސްވެރިންގެ ބައްދަލުުވުމެއްގައި ވާހަކަފުޅު ދައްކަވަމުން ރައީސު ޓްރަމްޕް ވިދާޅުވިއެވެ.
އޭނާ އިތުރަށް ވިދާޅުވި ގޮތުގައި ބައްދަލުވުމަށް އޭނާގެ ފަރާުތުން އެއްވެސް ޝަރުޠެއް ނެތެވެ. އީރާނުން ބޭނުންވާ ކޮންމެ ވަގުތަކުވެސް ބައްދަލުކުރެއްވުމަށް އޭނާ ހުންނެވީ ތައްޔާރަށެވެ.
"ކުރީގެ އެެއްބަސްވުން ކުނި ވަށިގަނޑަށް އެއްލާލާ ކަރުދާސްތަކެއްގެ ބަދަލުގައި، އަހަރުމެންނަށް ބިނާކުރަނިވި ކަމެއް ކުރެވޭނަމަ، ހަމަ ގައިމުވެސް އަހަރެން މިހިރީ ބައްދަލުކުރަން ތައްޔާރަށް" ޓްރަމްޕް އިތުރަށް ވިދާޅުވިއެވެ.
ފާއިތުވި މޭ މަހު ރައީސު ޓްރަމްޕް ވަނީ އީރާނާއެކު ކުރިން ވެފައި އޮތް ނިއުކުލިޔާ އެެއްބަސްވުން އުވާލައްވާފައެވެ. އޭރުއްސުރެ ދެގައުމުގެ ގުޅުން އިތުރަށް ގޯސްވެ، އެމެރިކާއިން ވަނީ އީރާނާ ދެކޮޅަށް އަނެއްކާވެސް ދަތިކުރުމުގެ ފިޔަވަޅު އަޅަން ފަށާފައެވެ.
