ދިވެހިރާއްޖޭގެ 53 ވަނަ މިނިވަންދުވަހުގެ މުނާސަބަތުގައި ރަސްމީ ފުޓުބޯޅަ ދަނޑުގައި މިރޭ ބޭއްވެވި ހަރަކާތްތަކުގައި ރައީސް ޔާމީން ދެކަނބަލުން ބައްލަވައި ލައްވައިފިއެވެ.
މިރޭވަނީ ހެވިކަމާއި، ޝަރަފްގެ ހިނގާލުމާއި، ކުޅިވަރުގެ ޕްރޮގްރާމްތައް ބާއްވައިފައެވެ. މިރޭގެ ރަސްމިއްޔާތަށް، ރައީސުލްޖުމްހޫރިއްޔާގެ ދެކަނބަލުން ރަސްމީ ދަނޑަށް ވަޑައިގަތުމުން، އެދެކަނބަލުންނަށް މަރުހަބާ ވިދާޅުވީ މިނިސްޓަރ އޮފް ހޯމްއެފެއާޒް އަޒްލީން އަހުމަދުގެ ދެކަނބަލުންނެވެ.
ރައީސުލްޖުމްހޫރިއްޔާގެ ދެކަނބަލުން ރަސްމީ ދަނޑަށް ވަޑައިގަތުމާއެކު، އެ ދެކަނބަލުންނަށް ރިޔާސީ ކުރުނީހެއް އެރުވިއެވެ. އަދި ސިފައިންނާއި ސްކޫލްތަކުގެ އެއްކޮށްލެވިފައިވާ ބޭންޑްގައި ގައުމީ ސަލާން ކުޅުނެވެ. އޭގެފަހުން، ދިވެހި ސިފައިންގެ ލަޝްކަރިންނާއެކު ސްކޫލްތަކުގެ އެއްކޮށްލެވިފައިވާ ހެވިކަމުގެ ލަޝްކަރު ޝަރަފުގެ ހިނގުން އޮތެވެ. މިހިނގާލުމުގައިވެސް ރައީސުލްޖުމްހޫރިއްޔާއަށް ރިޔާސީ ކުރުނީހެއް އެރުވިއެވެ.
މިރޭ ހުށަހަޅައިދިން ކުޅިވަރުގެ ޕްރޮގްރާމްތަކުގައި ބައިވެރިވެފައިވަނީ ގަލޮޅު ސުކޫލާއި، ޣިޔާސުއްދީން އިންޓަރނޭޝަނަލް ސުކޫލާއި، ޖަމާލުއްދީން ސުކޫލާއި، މަޖީދިއްޔާ ސުކޫލާއި، ޢިމާދުއްދީން ސުކޫލާއި، ސެންޓަރ ފޮރ ހަޔަރ ސެކަންޑަރީ އެޑިއުކޭޝަން، އަޙްމަދިއްޔާ އިންޓަނޭޝަނަލް ސްކޫލާއި، މޯލްޑިވްސް ނޭޝަނަލް ޑިފެންސް ފޯސްއެވެ.
