ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުޙައްމަދު ސާލިޙް (އިބޫ) ބ އަތޮޅަށް ފުރާވަޑައިގެންފިއެވެ.
އެމަނިކުފާނުގެ މި ދަތުރުފުޅުގައި ބ.އަތޮޅުގެ އެކިއެކި ރަށްތަކަށް ވަޑައިގެން، ރައްޔިތުންނާއި ބައްދަލުކުރެއްވުމާއި، ކެމްޕޭން ޖަގަހަތައް ހުޅުވައިދެއްވުމާއި ރަށްތަކުގައި އިންތިޒާމްކޮށްފައިވާ އެހެނިހެން ޙަރަކާތްތަކުގައި ބައިވެރިވެވަޑައިގަންނަވާނެ ކަމަށް އެމްޑީޕީން ބުންޏެވެ.
އެމަނިކުފާނު މިދަތުރުފުޅުގައި ދަރަވަންދުއަށް ވަޑައިގެންނެވުމުން އެރަށު އެއާޕޯޓުން ވެސް ވަނީ ހޫނު މަރުހަބާއެއް އެމަނިކުފާނަށް ދަންނަވައިފައެވެ.
މިދަތުރުފުޅުގައި އެންމެ ފުރަތަމަ ވަޑައިގެންނެވުމަށް ހަމަޖެހިފައިވަނީ ބ އަތޮޅު ގޮއިދޫއަށެވެ. މިއަދު މެންދުރު ފަހުގެ ވަގުތެއްގައި އިބޫ ތުޅާދޫއަށް ވަޑައިގަންނަވާނެއެވެ. ގުޅިފައިވާ ސިޔާސީ ޕާޓީތަކުން ތުޅާދޫގައި މިރޭ ބޭއްވުމަށް ހަމަޖެހިފައިވާ ކެމްޕޭނު ޖަލްސާގައި އެމަނިކުފާނު ބައިވެރިވެ ވަޑައިގަންނަވާނެއެވެ.
އިބޫ މާދަމާ ވެސް އެއަތޮޅުގެ އެކި ރަށްރަށަށް ވަޑައިގެން ކެންޕޭން ކުރައްވާނެއެވެ. އެމަނިކުފާނުގެ އަރިހުގައި ސިޔާސީ ޕާޓީތަކުގެ އިސް ބައެއް ވެރިން ބައިވެރިވެ ވަޑައިގަންނަވައެވެ.
މިދަތުރުފުޅު ނިންމަވާލެއްވުމަށްފަހު އިބޫ އެނބުރި މާލެ ވަޑައިގަތުމަށް ހަމަޖެހިފައިވަނީ ހޯމަ ދުވަހުގެ ވަގުތެއްގައެވެ.
