ދިވެހިންގެ މިނިވަންކަމާއި، މާތްވެގެންވާ އިސްލާމީ ޝަޚްސަށް އެއްވެސް ގެއްލުމެއް ވެދާނޭ ކަމަކަށް ފުރުޞަތު ނުދިނުމަށްޓަކައި ހޭލާތިބެގެން އަންނަ ގޮންޖެހުންތަކަށް ވަރަށް ސާބިތުކަމާއެކު ކުރިމަތިލާންޖެހޭ ކަމުގައި ރައީސް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް މިރޭ ވިދާޅުވެއްޖެއެވެ.
އެމަނިކުފާނު މިހެންވިދާޅުވީ ދިވެހިރާއްޖޭގެ 53 ވަނަ މިނިވަންދުވަހުގެ މުނާސަބަތާ ގުޅިގެން މިރޭ ބޭއްވެވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.
ޖުމްހޫރީ މައިދާނުގައި ބޭއްވި މިޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ ދުނިޔޭގެ މައިދާނުގައި މިހާރު ރާއްޖެ ކުރަމުންމިދާ ދަތުރަށް ބަލާއިރު، ރާއްޖެއާ ބައްދަލުކުރާނީ ޢަރަބި އިސްލާމީ ފިކުރުތަކާއި، ހުޅަނގުގެ މިނިވަން ފިކުރުތަކާއި، ދުނިޔޭގެ ބާރުވެރިކަމަމާއި ސަރަޙައްދީ ބާރުވެރިކަމަށް ބިނާވެގެން ޤާއިމުކޮށްފައިވާ އަދި ޤާއިމުކުރަމުންދާ ފިކުރުތައް ފަދަ އެކި ފިކުރުކަން ދިވެހިން ދަންނަންޖެހޭނެ ކަމަށެވެ.
ރާއްޖެއާ ކުރިމަތިކުރުވާ ނިންމުންތަކާއި ސިޔާސަތުތަކަކީ، އެ ނިންމުންތައް ނިންމާ ގައުމަކަށް ނުވަތަ ބަޔަކަށް އެންމެ އެކަށޭނަ އަދި އެންމެ ބޭނުންތެރި ނިންމުންތަކަށް ވާނޭކަމާއި، މަދު ފަހަރަކުނޫނީ މިފަދަ ކަންކަމަކީ ހާމަޔަށް ފެންނަން ހުންނާނޭ ކަންކަން ނޫންކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. އެހެންކަމުން ރާއްޖެއިން މިފަދަ ކަންކަމުގައި ޢަމަލުކުރެވޭނީ ރާއްޖެއަށް އެންމެ ފައިދާ ހުރިގޮތަށްކަން ރައީސް ވިދާޅުވިއެވެ.
އެމަނިކުފާނު ވިދާޅުވީ ރާއްޖޭގެ މިއަދުގެ ޚާރިޖީ ގުޅުންތަކަކީ، ދުނިޔޭގެ ތަރައްގީއާއި ތަމައްދުނުގައި ދިވެހިންގެ ފައިތިލަ ސާބިތުކޮށް، ދުނިޔޭގެ މައިދާނުގައި ހަމައިސްކޮޅަށް ދެމިލުމަށް ގާއިމުކުރެވޭ ގުޅުންތަކެއް ކަމަށާއި، މިއީ ދިވެހިންނަކީ ބަޔަކު ފުރުޞަތު ދިނީމާ ބަސްބުނާ ބަޔަކަށްވުމުގެ ބަދަލުގައި، އަމިއްލަ ހައިސިއްޔަތުން ދިވެހިންގެ ބަސް، އެހެންމީހުންވެސް ހޯދާނޭ ބަޔަކަށްވުމަށް ކުރެވޭ ދަތުރެއް ކަމަށެވެ.
ރައީސް ވިދާޅުވީ ގައުމާއި ރައްޔިތުންނަކީ ވަކި ނުކުރެވޭނޭ އެއްޗެއް ކަމަށާއި، މިނިވަންކަމާއި ދައުލަތަކީވެސް ވަކިނުކުރެވޭނޭ އެއް މަފްހޫމްކަމަށެވެ. އެމަނިކުފާނު ވިދާޅުވީ ގައުމުގެ މިނިވަންކަމުގައި ހުރި ވަރުގަދަކަން ބިނާވެފައި އޮންނަނީ ދައުލަތުގައި ހުރި ފަންވަރެއްގެ މައްޗަށް ކަމަށެވެ. ރައީސް ވިދާޅުވީ ދައުލަތް ބާރުވެރިކޮށް، ދައުލަތުގެ މުއައްސަސާތައް ވަރުގަދަ ކުރުމަކީ، ގައުމުގެ މިނިވަންކަން ރައްކާތެރިކޮށް، ގައުމީ ސަލާމަތްކަން ކަށަވަރުކުރުމުގެ އެންމެ މުހިންމު އަސާސް ކަމަށެވެ.
މިރޭ ރައީސުލްޖުމްހޫރިއްޔާ ދެއްކެވި ވާހަކަފުޅުގައި އެމަނިކުފާނުގެ ރިޔާސީ ދައުރުގައި ދިވެހިރާއްޖޭގެ ތަރައްޤީއަށް ކުރެވިފައިވާ އަދި ކުރެވެމުންދާ ބޮޑެތި މަޝްރޫއުތަކަށް ބައްލަވައިލެއެވިއެވެ. ރައީސް ވިދާޅުވީ މި ސަރުކާރު އައުމުގެ ކުރީގެ 5 އަހަރުދުވަހުގެ ތަރައްގީގެ މަޝްރޫޢުތަކަށް ހޭދަކޮށްފައިވަނީ 8.3 ބިލިއަން ރުފިޔާކަން ބަޔާން ކުރައްވަމުން މިސަރުކާރުގެ ވޭތުވެދިޔަ 4 އަހަރުދުވަހުގެ ތެރޭގައި 87.6 ބިލިއަން ރުފިޔާ ޚަރަދުކުރެވިފައިވަނީ އެއަރޕޯޓުގެ މައްސަލައިގައި ބޭރުގެ ކުންފުންޏަކަށް 5.8 ބިލިއަން ރުފިޔާ ދެއްކުމަށްފަހުގައިކަން ފާހަގަކުރައްވާފައިވެއެވެ.
މިހުރިހާ ކާމިޔާބީތަކަކާއެކު ވެސް ބޯހިޔާވަހި ކަމުގެ މައްސަލައަކީ އަދި ހައްލެއް ނުހޯދި އޮތް މައްސަލައެއްކަން ފާހަގަކުރައްވަމުން ރައީސުލްޖުމްހޫރިއްޔާ ވިދާޅުވީ މިމައްސަލައަށް ހައްލެއް ހޯދުމަށް ގިނަމަސައްކަތަކެއް ކުރެވި، ހުޅުމާލޭ، ހިޔާ މަޝްރޫއައެކު މިހާރު ވިލިމާލެ 2 ތަރައްޤީ ކުރުމަށް އެކުލަވާލެވިފައިވާ ޕްލޭނަކީ ބޯހިޔާވަހިކަމުގެ މައްސަލައަށް ލިބިގެންދާނެ ފުރިހަމަ ހައްލެއް ކަމަށެވެ.
