ކުރިޔަށް އޮތް ރިޔާސީ އިންތިޚާބުގައި ވޯޓުލާން ރީ ރަޖިސްޓްރީ ކުރުމުގެ ބޮޑު ހަރަކާތެއް ޕީޕީއެމުން މިއަދު ހަވީރު ހުޅުމާލޭގައި ކުރިޔަށް ގެންގޮސްފިއެވެ.
ހުޅުމާލޭގައި މިއަދު ހަވީރު ހަތަރެއް ޖެހިއިރު މި ހަރަކާތް ފެށީ އަލަށް ދޫކުރި ފްލެޓްތައް ކައިރީގައި ހުންނަ ޕީޕީއެމްގެ މައި ޖަގަހައިންނެވެ. އެއަށް ފަހު ޕީޕީއެމްގެ އިސްބޭފުޅުން ހިމެނޭ ޓީމުތަކުން ވަނީ ހުޅުމާލޭގެ އެކި ހިސާބުތަކުގެ ގެތަކަށް ވޯޓުލާން ރަޖިސްޓްރީ ކުރުވަން "ދޮރުން ދޮރަށް" ހިނގާފައެވެ.
މިއަދު ހުޅުމާލޭގައި ޕީޕީއެމުން ކުރިޔަށް ގެންދިޔަ ރީ ރަޖިސްޓްރީ ކުރުމުގެ ހަރަކާތުގައި އެންމެ އިސްކޮށް އުޅުއްވީ ވަޒީރުންނާއި ރައްޔިތުންގެ މަޖިލީހުގެ މެމްބަރުންނާއި
ބަޔެއް ކުންފުނި ތަކުގެ ވެރިންނެވެ. މީގެއިތުރުން ސްޓޭޓް މިނިސްޓަރުންނާއި މިނިސްޓަރުގެ ނައިބުންގެ އިތުރުންވެސް ޕީޕީއެމްގައި ހަރަކާތްތެރިވާ ސިޔާސީ އިސް ބަޔެއް އެހެން ފަރާތްތަކުންވެސް މިއަދު އިރުއޮއްސުނު ފަހުންވެސް ހުޅުމާލޭގައި ކުރިޔަށް ގެންދިޔަ ރީ ރަޖިސްޓްރީ ކުރުމުގެ ބޮޑު ހަރަކާތުގައި ބައިވެރިވިއެވެ.
ހުޅުމާލޭގައި ރީ ރަޖިސްޓްރީ ކުރުމުގެ ހަރަކާތެއް ގެތަކަށް ޒިޔާރަތްކޮށްގެން ޕީޕީއެމުން މިއަދު ހިންގިއިރު އިދިކޮޅު ޕާޓީ ތަކުންވެސް ދަނީ ރީ ރަޖިސްޓްރީ ކުރުމުގެ ހަރަކާތްތައް އެކިފެންވަރުގައި ހިންގަމުންނެވެ.
