މާލޭ އަލިކިލެގެފާނު މަގައި ހުންނަ ކޭފޭއެއްގެ ތެރޭގައި ބަޔަކު ބަނގުރާން ބޯން ތިބި ކަމުގެ ތުހުމަތުގައި ދެމީހަކު މިރޭ ބަންދުކޮށްފި ކަމަށް ފުލުހުން ހާމަކޮށްފިއެވެ.
ފުލުހުންގެ މީޑިއާއިން ބުނީ ފުލުހުންގެ ބަންދަށް ގެންގޮސްފައިވަނީ 23 އަހަރުގެ ދެ ފިރިހެނުން ކަމަށެވެ. އެމީހުން ބަންދުކުރީ ލިބުނު ރިޕޯޓަކާ ގުޅިގެން އެ ކެފޭ ބަލައި ފާސްކުރުމުގެ ތެރޭގައި ކަމަށްވެސް ފުލުހުން ބުންޏެވެ.
އެ މީހުންނާއެކު އިތުރު އެއްޗެއް ގެންދިޔަ ކަމަށް ފުލުހުން ހާމައެއް ނުކުރެއެވެ. "ފުލުހުންވަނީ ތޭވީސް އަހަރުގެ ދެ ފިރިހެނުން ބަންދުކޮށްފައި. އެ މައްސަލަ ފުލުހުން ގެންދަނީ ބަލަމުން. މިއީ މިވަގުތަށް ލިބިފައިވާ މައުލޫމާތަކީ. އިތުރު މައުލޫމާތު ލިބުމުން ހިއްސާކޮށްލާނަން،" ފުލުހުންގެ މީޑިއާ އިން ބުންޏެވެ.
މާލެއާއި ބައެއް ރަށްރަށުގައި ހިންގާ މިފަދަ ބައެއް ކެފޭތަކުން ބަނގުރާ ލިބޭކަމަށް ވާހަކަ ދެކެވެމުންދެއެވެ. ފުލުހުން ބުނެފައިވަނީ މިފަދަ ކަންކަން ހުއްޓުވަން އެންމެންގެ އެއްބާރުލުން ބޭނުންވާ ކަމަށެވެ.
