އަދާލަތުޕާޓީގެ ރައީސް އައްޝައިޚް އިމްރާން އަބްދުﷲ އަށް ސަރުކާރުން "ޑީލެއް" ހުށަހެޅުއްވި ކަމަށް ދެކެވޭ ވާހަކައަކީ ދޮގެއް ކަމަށް ސަންދާނު އިބްރާހީމް ލުޠުފީ ވިދާޅުވެއްޖެއެވެ. މިވާހަކަ އޭނާ ވަނީ މީގެ ދެތިން ދުވަހެއް ކުރިން ފޭސްބުކްގައިވެސް ލިޔުއްވައިފައެވެ. ހުށަހެޅުއްވި "ޑީލެއް" ހުށަހެޅުއްވީ އޭނާ ކަމަށާއި އެއީ ސަރުކާރުގެ އެއްވެސް ހިއްސާއެއް އޮތް ހުށަހެޅުމެއް ނޫން ކަމަށްވެސް ލުޠުފީ ވިދާޅުވިއެވެ..
ރާއްޖެއިން ބޭރުގައި ހުންނަވައިގެން ފޯނުން އާފަތިހަށް ދެއްވި އިންޓަވިއުއެއްގައި ލުތުފީ ވިދާޅުވީ ޝައިޚް އިމްރާނާއި ޝައިޚް އިލްޔާސް ހުސައިނަކީ އޭނާގެ ވަރަށްގާތް ދެއަޚުން ކަމަށެވެ. އަދި ޑރ. މުހައްމަދު ޝަހީމް އަލީ ސައީދަކީ ވެސް ވަރަށްގާތް ބޭފުޅެއް ކަމަށްވެސް ވިދާޅުވިއެވެ. އެހެންވީމާ ޢިމްރާން ޖަލުން ސަލާމަތް ކުރައްވަން މަސައްކަތް ކުރެއްވި ކަމަށް ލުޠުފީ ވިދާޅުވިއެވެ.
އެ ތިން ބޭފުޅުންނަކީ ވެސް ދީނީ އިލްމުވެރިންނަށް ވުމުން އެބޭފުޅުންނަށް ވަރަށް ބޮޑަށް އިހުތިރާކޮށް އިތުބާރު ކުރެއްވި ކަމަށް އޭނާ ވެސް ވިދާޅުވިއެވެ. އެހެންނަމަވެސް މޭޑޭގެ މުޒާހަރާގައި ވާހަކަ ދައްކަވަމުން ޑރ. އަފްރާޝީމް އަވަހާރަކޮށްލީ ރައީސް ޔާމީން ކަމަށް ހަދަން އެކަމުގެ ތުހުމަތު ޝައިޚް އިމްރާން ރައީސް ޔާމީންގެ އިސްތަށިފުޅުގައި އެޅުވި ކަމަށްވެސް ވިދާޅުވިއެވެ. އެކަމުގެ ހެކި އެބަހުރި ކަމަށް ވިދާޅުވެ އެތައް ވާހަކައެއް ދެއްކެވި ކަމަށްވެސް ލުތުފީ ވިދާޅުވިއެވެ.
"އެހެންނަމަވެސް އަދާ ހަމައަށް އެވިދާޅުވި ހެއްކެއް ގަރީނާއެއް ދެއްކިފައެއްނެތް. ހުރިނަމަ ދައްކަވަންވީ ނޫންތޯ. އެވަރުގެ އިލްމުވެރިއަކު ރައްޔިތުންނާ މުޚާތަބު ކުރައްވައި އެވަރުގެ ވާހަކައެއް ދެއްކެވުމުން އެކަން ގަބޫލުވެސް ކުރިން. އަދި ރައްޔިތުންވެސް އެކަން ގަބޫލުކުރުމުގެ ފުރުސަތު ބޮޑު. އެކަމަކު އެކުރެއްވީ މުޅިންވެސް ތުހުމަތު. އެއްވެސް ހަގީގަތެއް އޭގައިނެތް. ޝައިޚް އިމްރާންވަނީ އެއްވެސް އަސަލެއްނެތް އެތައް ތުހުމަތެއް ރައީސްގެ އިސްތަށިފުޅުގައި އަޅުވާފައި،" ލުތުފީ ވިދާޅުވިއެވެ.
އޭނާ ވިދާޅުވީ އިމްރާން ޖަލުން ސަލާމަތް ކުރުމަށް ސަރުކާރުން ޑީލެއް ހުށަހެޅި ކަމަށް ދައްކާ ވާހަކަތަކީކީވެސް ކަނޑައެޅިގެން ދޮގެއް ކަމަށެވެ. އޭގެ ބަދަލުގައި ސަރުކާރަށް ޑީލް ހުށަހެޅީ އިމްރާން ކަމަށްވެސް ވިދާޅުވިއެވެ. އެހެންނަމަވެސް އެކަންކަމަކީ ރާއްޖޭގެ ގާނޫނާއި ގަވާއިދަށް ބަލާއިރު ކުރެވޭނެ ކަންކަމެއް ކަމަށް ގަބޫލު ނުކުރައްވާ ކަމަށް ވިދާޅުވިއެވެ.
"ރައީސް ޔާމީން ބޭނުންފުޅެއްނުވޭ އަދާލަތު ޕާޓީއަށްވެސް ޝައިޚް އިމްރާނަށް ވެސް ދެރަކޮށް އެއްވެސް ކަމެއްވާކަށް. ވަރަށް ލުއިކޮށް ކަންކަން ހަމަޖެހުމުގެ ފުރުސަތުވެސް ލިބިދާނެ. އެކަމަކު ޝައިޚް އިމްރާން ފަދަ ބޭފުޅުންގެ ހުންނަވާނެ މަޝްވަރާ ކުރުމާއި ވާހަކަ ދެއްކެވުމުގެ ހިތްވަރު. އެފެންވަރުގެ އިލްމުވެރިންނަކީ އެގޮތަށް ޖަލުގައި ތިއްބަވަންޖެހޭނެ ބޭފުޅުން ކަމެއް އަޅުގަނޑު ގަބޫލެއް ނުކުރަން،" އޭނާ ވިދާޅުވިއެވެ.
ލުތުފީ ވިދާޅުވީ ފަރަންސޭސި ވިލާތަށް ޝައިޚް އިމްރާން ގެންނަވައިގެން އިންޓަރނޭޝަނަލް ރިލޭޝަން އެންޑް ޑިޕޮލަމަސީ އާއި ޕްރެންޗް ބަސް ކިޔެވުމުގެ ފުރުސަތު އިމްރާނަށް ހޯއްދަވައި ދެއްވުމަށް މަސައްކަތް ކުރެއްވި ކަމަށެވެ. އަދި އެ ބަސް ކިޔަވަން ސީދާ ލުތުފީވެސް ވަކިހިސާބަކުން އިމްރާނާ ގުޅިވަޑައި ގަންނަވާނެ ކަމަށް އެންގެވި ކަމަށްވެސް ވިދާޅުވިއެވެ. މިކަމާ ޝައިޚް އިލްޔާސާ ވެސް މަޝްވަރާ ކުރެއްވި ކަމަށް ލުތުފީ ވިދާޅުވިއެވެ. އިމްރާން ހުންނެވީ އެފުރުސަތުގެ ބޭނުން ހިއްޕަވަން ކަމަށް އިލްޔާސް ވިދާޅުވި ކަމަށާއި އެހެންނަމަވެސް އެންމެފަހު ވަގުތު ޝައިޚް އިމްރާން އެފުސަތަށް ފުރަގަސް ދެއްވި ކަމަށް ލުތުފީ ވިދާޅުވިއެވެ. "އިމްރާން ބޭނުންވީ މިނިވަންވާން. އެކަމަކު ރައީސް ދެއްވާ މައާފެއްގެ ދަށުންވެސް ނޫން ސީދާ ކޯޓު އަމުރެއްގެ ދަށުން މިނިވަންވާ ބޭނުންވީ،" ލުތުފީ ވިދާޅުވިއެވެ. އެހިސާބުން އެމަސައްކަތަށް ހުއްޓުން އައި ކަމަށް އޭނާ ވިދާޅުވިއެވެ.
"ރައީސް ޔާމީނަކީ ވަރަށް ފްލެކްސިބަލް ބޭފުޅެއް. މަޝްވަރާ ކުރެއްވުމުގެ ފުރުސަތު އަބަދުވެސް އޮންނާނެ. މަޝްވަރާ ކުރައްވައިގެން ގާނޫނާއި ގަވާއިދުގެ ތެރެއިން ކުރެވެންހުރި ކަންކަން ކުރެވުމުގެ ފުރުސަތު ރައީސް ދެއްވާނެ. އެންމެފަހުން އިމްރާން ގޭބަންދަށް ދޫކުރެއްވީ ވެސް އަޅުގަނޑާއި ޑރ. ޝަހީމާއި އަދި މަޖިލީހުގެ ބައެއް މެންބަރުންވެސް މަސައްކަތް ކުރައްވައިގެން،" ލުތުފީ ވިދާޅުވިއެވެ. އެކަމުގައި ޑރ. ޝަހީމްގެ ދައުރު ވަރަށްބޮޑު ކަމަށްވެސް ވިދާޅުވިއެވެ. "ޑރ. ޝަހީމް ވަރަށްގިނައިން ވިދާޅުވާނެ ޝައިޚް އިމްރާން ޖަލުން ސަލާމަތް ކުރުމަށް މަސައްކަތް ކުރަމާ ހިނގާށޭ. އިމްރާން ޖަލުގައި އޮންނެވުމަކީ ފަސޭހަ ކަމެއްނޫނޭ،" ލުތުފީ ވިދާޅުވިއެވެ.
މިހުރިހާ ކަމެއްގެ ތެރެއިން ޝައިޚް އިމްރާން ދޫކޮށް ދެއްވުމަށް ސަރުކާރުގައި އަމިއްލައަށް ވެސް އެދިވަޑައިގެންނެވި ކަމަށް އިބްރާހީމް ލުތުފީ ވިދާޅުވިއެވެ. އެ މަސައްކަތުގައި ޝައިޚް މުހައްމަދު ދީދީ ވެސް އުޅުއްވި ކަމަށް އޭނާ ވިދާޅުވިއެވެ.
ލުތުފީ ވިދާޅުވީ މިހާރު ދިމާވެފައިވާ މައްސަލަތަކުގައި ވެސް ޝައިޚް އިމްރާނާއި ޝައިޚް އިލްޔާސް ތެދު ހައްދަވަން އެބަޖެހޭ ކަމަށާއި އެބޭފުޅުންފަދަ އިލްމުވެރިން ޖަލުތަކުގައި ބަންދުވެފައި ތިބުމަކީ އެއްގޮތަކަށް ވެސް ބޭނުންވާ ކަމެއް ނޫން ކަމަށެވެ. ޝައިޚް އިމްރާނަށް ލުއިގޮތްތަކެއް ހޯއްދަވައި ދެއްވުމަށް ސީދާ ރައީސް ޔާމީން ވެސް ބޭނުންފުޅުވާ ކަމަށް ލުތުފީ ވިދާޅުވިއެވެ.
އެހެންނަމަވެސް އެކަން އެގޮތަށް ނުވެގެން އުޅެނީ ކޮންފަދަ ތާށިކަމެއްގެ ތެރޭގައި ޝައިޚް އިމްރާން ހުންނެވުމުން ކަން ބަލަން އެބަޖެހޭ ކަމަށްވެސް ލުތުފީ ވިދާޅުވިއެވެ. އެފަދަ ކަމެއްއޮތް ކަމަށްވާނަމަ އެކަމަށް ވެސް މަސައްކަތް ކުރުމުގެ ފުރުސަތު އެބައޮތް ކަމަށް ވިދާޅުވިއެވެ.
ޝެއިޚް ޢިމްރާން މިނިވަން ކުރައްވަން ސަރުކާރުން ވަކި ޝަރުޠުތަކެއް ހުށަހެޅުއްވީމާ އެ ޝަރުޠުތައް ގަބޫލު ނުކުރައްވައި، އެއަށްވުރެ ޖަލުގައި އޮންނެވުންވެސް މާ ރަނގަޅު ކަމަށް އޭނާ ވިދާޅުވި ކަމަށް އެކި ބޭފުޅުން ވިދާޅުވަމުން އެބަގެންދަވައެވެ. އެކަމަކު ސީދާ ޢިމްރާން އެފަދަ ވާހައެއް އަދި ވިދާޅެއް ނުވެއެވެ.
