ޔޫރަޕިއަން ޔޫނިއަން (އީޔޫ) ގެ ޚާރިޖީ ވަޒީރުން އެކުލެވޭ ކައުންސިލުން މިއަދު ރާއްޖެއާ ދެކޮޅަށް ފިޔަވަޅު އަޅަން އޮތް ނަމަވެސް ފިޔަވަޅު ނާޅައި އެ ކައުންސިލުގެ ބައްދަލުވުން މިއަދު ނިންމާލުމަކީ ސަރުކާރަށް ލިބުނު ކާމިޔާބެއް ކަމަށް ސަރުކާރުގެ ފަރާތުން އީޔޫއާއެކު ވާހަކަ ދެއްކެވުމަށް ކަނޑައަޅުއްވާފައިވާ ފިޝަރީޒް މިނިސްޓަރ ޑރ މުޙަންމަދު ޝައިނީ ވިދާޅުވެއްޖެއެވެ.
ޑރ ޝައިނީ މިވަގުތުވެސް ހުންނެވީ ބްރަސެލްސްގައެވެ. އެއީ އީޔޫގެ އިސްވެރިންނާއެކު ސަރުކާރުގެ ފަރާތުން މަޝްވަރާ ކުރެއްވުމަށް ވަޑައިގެންނެވެ. ޑރ ޝައިނީ ވިދާޅުވީ މިއަދު އީޔޫއިން ރާއްޖެއާ ދެކޮޅަށް ފިޔަވަޅު ނޭޅީ ސަރުކާރަށް ކުރެވުނުގެ ރަނގަޅު މަސައްކަތުގެ ސަބަބުން ކަމަށެވެ. ޝައިނީ ވިދާޅުވީ މިއަދު އީޔޫއިން ރާއްޖެއާ ދެކޮޅަށް ފިޔަވަޅު ނޭޅީ އިދިކޮޅު ފަރާތްތަކުން އީޔޫއާ ހަމައަށް ގެންގޮސްފައިވާ ދޮގު ވާހަކަތަކުގެ ހަގީގަތް ސަރުކާރުން ސާފުކޮށް ދިނުމުން ކަމަށެވެ.
ޑރ ޝައިނީ ވިދާޅުވީ އިދިކޮޅު ލީޑަރުން އީޔޫއާ ހަމައަށް ގެންގޮސްފައި ވަނީ ދޮގު މައުލޫމާތެވެ. އެކަންކަން އީޔޫއަށް ރަނގަޅަށް އޮޅުން ފިލުވައި ދެއްވާފައިވާ ކަމަށް ޝައިނީ ވިދާޅުވިއެވެ. ޝައިނީ ވިދާޅުވީ އިދިކޮޅު ލީޑަރުން އީޔޫގައި ބުނެފައި ވަނީ ރާއްޖޭގައި އިންތިޚާބެއްވެސް ނުބާއްވާނެ ކަމަށާއި، އިންތިޚާބަށް ކުރިމަތިލާ ކޮންމެ ކެންޑިޑޭޓެއް ސަރުކާރުން ގެންގޮސް ޖަލަށް ލާނެކަމަށެވެ. ނަމަވެސް އެއީ އެކަން އޮތްގޮތް ނޫންކަން އީޔޫއަށް މިހާރު ސާފުކޮށް ދެވިފައިވާ ކަމަށް ޝައިނީ ވިދާޅުވިއެވެ.
ޑރ ޝައިނީ ވިދާޅުވީ ރާއްޖޭގެ ޙާލަތު މިހާރަށްވުރެ ގޯސްވެގެން ނުދާނެ ކަމުގެ ޔަގީންކަން އީޔޫއަށް ސަރުކާރުގެ ފަރާތުން ދީފައި އޮންނާނެ ކަމަށެވެ. އީޔޫއިން މިއަދު ބޭއްވި ކައުންސިލް ބައްދަލުވުމުގައި ރާއްޖެއާ ދެކޮޅަށް ފިޔަވަޅު އަޅާނެކަމުގައި ވަރަށް ބޮޑަށް އޮތީ ބެލެވިފައެވެ. ނަމަވެސް މިއަދު އީޔޫއިން ނިންމީ ރާއްޖޭގެ ޙާލަތު އިތުރަށް ގޮސްވެއްޖެނަމަ ފިޔަވަޅު އެޅުމަށާއި ފިޔަވަޅު އަޅާނެ ގޮތުގެ ފްރޭމް ވޯކެކެވެ.
