އަންނަ ހޯމަދުވަހު އިޔޫއިން ރާއްޖެއާ ދެކޮޅަށް ފިޔަވަޅު އަޅަން ތައްޔާރުވަމުން ދަނިކޮށް ހޯމްމިނިސްޓަރުގެ ނާއިބު އެކަމަށް ދެކޮޅަށް ވާހަކަ ދައްކަވައިފިއެވެ.
ހޯމްމިނިސްޓަރުގެ ނާއިބު އަހުމަދު ސިއްދީގު ވިދާޅުވީ އީޔޫއިން ރާއްޖެއާ ދެކޮޅަށް ފިޔަވަޅު އަޅަން މަސައްކަތް ކުރަނީ ރާއްޖޭގައި އިސްލާމްދީން ނޫން އެހެން ދީންތަކަށް ފުރުސަތު ނުދިނުމާއި، މަރުގެ ހުކުމް ތަންފީޒު ކުރަން އުޅޭތީ ކަމަށެވެ.
އޭނާ ވިދާޅުވީ އީޔޫން ބިރުދައްކައި ދަތިކުރުމުގެ ކިތަންމެ ފިޔަވަޅެއް އެޅިޔަސް ނަސާރާ ދީނަށް ރާއްޖެއިން ފުރުސަތުދީ އެއް ޖިންސުން ކައިވެނި ކުރުމުގެ ފުރުސަތު ދުވަހަކުވެސް ނުދެއްވޭނެ ކަމަށެވެ. "ރައީސް ޔާމީންގެ ޒައާމަތުގައި މިގައުމުން އިސްލާމްދީން ނޫން އެހެންދީނަކަށް ޖާގައެއްނެތް" ކަމަށް ވެސް އޭނާ ކުރެއްވި ޓްވީޓެއްގައި ވިދާޅުވެފައިވެއެވެ.
މިކަމާ ގުޅިގެން ފިޝަރީޒް މިނިސްޓަރ ޑރ. މުހައްމަދު ޝައިނީ މީޑިއާގައި ވިދާޅުވެފައިވަނީ އީޔޫއިން ރާއްޖެއާ މެދު ފިޔަވަޅު އަޅަނީ ނުބައި މައުލޫމާތުތަކަށް ބުރެވެ ތިބެ ކަމަށެވެ. އެހެންކަމުން އެނިންމު ބަދަލުކުރެވޭނެ ކަމަށް އުންމީދު ކުރައްވާ ކަމަށް އޭނާ ވިދާޅުވިއެވެ. އިދިކޮޅު ފަރާތްތަކުން ވަނީ އީޔޫގެ ސަފީރުންނާ ބައްދަލު ކުރައްވައި ދޮގު މައުލޫމާތު ތަކެއް ދެއްވައިފައި ކަމަށެވެ.
