ޔޫރަޕިއަން ޔޫނިއަން (އީޔޫ) އަށް ގޮން ޖެއްސެވުމުގެ ބަދަލުގައި ރާއްޖެއާމެދު އެޖަމާއަތުން އަޅަން އިންޒާރުދީފައިވާ ފިޔަވަޅުތަކުން ސަލާމަތް ކޮށްދެއްވުމަށް މޯލްޑިވްސް ޓްރޭޑް ޔޫނިއަން (އެމްޓީޔޫ) އިން ރައީސުލްޖުމްހޫރިއްޔާއަށް ގޮވާލައްވައިފިއެވެ.
އެމްޓީޔޫގެ ނާއިބު ރައީސް ސައުދުﷲ އަހުމަދު ވިދާޅުވީ އީޔޫއިން ރާއްޖެއާމެދު ދަތިކުރުމުގެ ފިޔަވަޅު އަޅުއްވާނެ ކަމުގެ އިންޒާރު ދެއްވުމަކީ ކުޑަކަމެއް ނޫން ކަމަށެވެ. "އެމީހުން ރާއްޖެއާ ދެކޮޅަށް ބަޔާނެއް ނެރުމަކީ ވެސް ވަރަށް ބޮޑުކަމެއް. އެމީހުން އިންޒާރު ދެއްވައިފައިވާކަން ހާމަ ކުރެއްވީ ރައީސުލްޖުމްހޫރިއްޔާ. އެހެންވީމާ އެ ފިޔަވަޅު އެޅުމުގެ ކުރިން އެއިން ސަލާމަތްވުމަށް މަސައްކަތް ކުރެއްވުމަކީ ރައީސްގެ މަގާމުގައި ހުނަވާ ބޭފުޅަކު ރައްޔިތުންނަށްޓަކައި ކޮށްދެއްވަން ޖެހިވަޑައިގަންވާނެ ކަމެއް،" ސައުދު ވިދާޅުވިއެވެ.
އޭނާ ވިދާޅުވީ ރާއްޖޭގެ އިގްތިސާދު ބިނާވެފައިވަނީ ފަތުރުވެރިކަމުގެ މައްޗަށް ކަމަށެވެ. ޔޫރަޕަކީ ރާއްޖެއަށް އެންމެގިނައިން ޓުއަރިސްޓުން އަންނަ ސަރަހައްދަށް ވީހިނދު އީޔޫއިން އަޅާފިޔަވަޅެއްގެ ސަބަބުން އެ ސަރަހައްދުން ޓުއަރިސްޓުން ރާއްޖެ ނައުމަކީ ވެސް ދުރުކަމެއްނޫން ކަމަށް އޭނާ ވިދާޅުވިއެވެ. އެފަދަ ހާލަތުގައި ރާއްޖޭގެ އިގުތިސާދު ހީނަރުވެ ހީވެސް ނުކުރާ ވަރުގެ ދަތިދުވަސްވަރަކާ ކުރިމަލާންޖެހިދާނެ ކަމަށް ވެސް އޭނާ ވިދާޅުވިއެވެ.
"ރާއްޖޭގައި ޔޫރަޕުގެ އިންވެސްޓުމަންޓްތައް މަދެއްނޫންން. އިޔޫއިން ރާއްޖެއަށް ފިޔަވަޅު އަޅައިފިނަމަ އެ އިންވެސްޓްމެންޓް ތަކަށްވެސް އަސަރުކުރާނެ. އެހެންވީމާ އެބަޖެހޭ އެކަންކަމުން ސަލާމަތްވާން. ރައްޔިތުންނަށް ލިބިދާނެ ދެރަކަމަކުން އެއްކިބާކޮށް ދެއްވަން. އެކަން ކޮށްދެއްވުމަށް ރައީސަށް ގޮވާލަން" ސައުދު ވިދާޅުވިއެވެ.
ފެބުރުއަރީ އެކެއްގެ އަމުރުގެ ސަބަބުން ވެސް ބައެއް ގައުމުތަކުން ޓްރެވަލް އެޑުވައިޒަރީ ނެރުމުން ރާއްޖެ އަންނަ ފަތުރުވެރިންގެ އަދަދު ވަރަށް ބޮޑަށް މަދުވެގެން ދިޔަކަމަށާއި އޭރު އެންމެގިނައިން ފަތުރުވެރިން އައި އެއްގައުމަކީ ޗައިނާ ކަމަށްވެސް އޭނާ ވިދާޅުވިއެވެ. އެހެންނަމަވެސް އެގައުމުގެ ފަތުރުވެރިން ވެސް ވަރަށް ބޮޑަށް އެފަހަރު މަދުވެގެންދިޔަ ކަމަށް ސައުދު ވިދާޅުވިއެވެ.
"އޭރުދިމާވި އަޑިގަނޑުން އަދިވެސް އަރައިނުގަނެވޭ. ނުގަނެވިގެން އުޅެނުކޮށް އީޔޫފަދަ ވަރުގަދަ ޖަމާއަތަކުން ރާއްޖެއާ ދެކޮޅަށް ފިޔަވަޅު އެޅުމަކީ އިގްތިސާދީ ގޮތުން ރާއްޖެ އިނދަޖެހޭނެކަމެއް،" ސައުދު ވިދާޅުވިއެވެ.
