ޖަޕާނަށް ކުރިމަތިވެފައިވާ ގަދަ ވިއްސާރައިގައި އެތައް ބަޔަކު މަރު އެގައުމަށް ބޮޑެތި ގެއްލުންވެފައިވާތީ އެކަމުގެ ހިތާމައިގައި ޖަޕާނުގެ ބޮޑުވަޒީރު ޝިންޒޯ އަބޭއަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ހަމްދަރުދީގެ މެސެޖެއް ފޮނުއްވައިފިއެވެ.
ޖަޕާނަށް ކުރަމުންދާ ވިއްސާރައިގައި ފެންބޮޑުވެ ބިންގަނޑު ކަނޑައިގެންދިޔުމާ ގުޅިގެން ވަނީ 100 އަށްވުރެ ގިނަމީހުން މަރުވެފައެވެ. އޭގެ އިތުރަށް އެތައް ބައެއްގެ މުދަލަށާއި، ގެދޮރަށާއި އިމާރާތްތަކަށް ބޮޑެތި ގެއްލުންތައް ވެސް ވަނީ ލިބިފައެވެ.
ރައީސުލްޖުމްހޫރިއްޔާގެ މެސެޖުގައި، ޤައުމީ ހިތާމައިގެ މި ދަނޑިވަޅުގައި، ޖަޕާނުގެ ބޮޑުވަޒީރަށާއި، ސަރުކާރަށާއި، ރައްޔިތުންނަށް، ދިވެހި ސަރުކާރާއި ރައްޔިތުންނާއި އަދި ރައީސުލްޖުމްހޫރިއްޔާގެ އަމިއްލަ ނަންފުޅުގައި އިޚްލާސްތެރިކަމާއެކު ހަމްދަރުދީ ފޮނުއްވާފައިވެއެވެ. އަދި ޖަޕާނަށް މިހާރު ކުރިމަތިވެފައިވާ ހާދިސާއިން ސަލާމަތްވުމަށް ކުރައްވަމުން ގެންދަވާ މަސައްކަތްތައް ކާމިޔާބުކަމާއެކު ރަނގަޅަށް ކުރިއަށްދިއުމަށް އުންމީދުކުރައްވާ ކަމުގައި ވެސް ވިދާޅުވެފައިވެއެވެ. އެ ޤައުމުގެ ރައްޔިތުންނަށް ކެއްތެރިކަމާއި ސާބިތުކަން ދެއްވުން އެދި ދުޢާކުރައްވާކަމުގައި އެ މެސެޖުގައި ރައީސް ވަނީ ވިދާޅުވެފައެވެ.
މި ހާދިސާގައި މަރުވި މީހުންގެ ޢާއިލާތަކަށް ތައުޒިޔާ ރައްދުކޮށްދެއްވުމަށްވެސް ރައީސުލްޖުމްހޫރިއްޔާގެ މެސެޖުގައި އެދިވަޑައިގެންފައިވެއެވެ.
