ޕާކިސްތާނުގެ ސްޕެޝަލިސްޓު ޑޮކްޓަރުން ހިމެނޭ ޓީމަކުން މާލޭގައި މެޑިކަލް ކޭންޕެއް ފަށައިފިއެވެ. "މޯލްޑިވްސް-ޕާކިސްތާން މެޑިކަލް ކޭމްޕު" ގެ ނަމުގައި މިއަދު ފެށި ކޭންޕު ކުރިއަށްދާނީ މާދަމާއިން ފެށިގެން މިމަހުގެ 12 ވަނަ ދުވަހާ ހަމައަށެވެ.
މިޓީމުގައި ކާޑިއޯ ތެރަޕިސްޓް ސާރޖަންއަކާއި، ބްރެސްޓް ސާރޖަންއަކާއި، ނިއުރޯ ސާޖަންއަކާއި، ޔޫރޮލޮޖިސްޓަކު ހިމެނެއެވެ. އައިޖީއެމްއެޗުގެ މިޑީއާ ކޯޑިނޭޓަރ މުހައްމަދު މުފީދު ވިދާޅުވީ މި ކޭންޕު މާލޭގެ އިތުރަށް ބައެއް އަތޮޅުތަކުގެ ރަށްރަށުގައި ބޭއްވުމަށް ވަނީ ހަމަޖެހިފައެވެ. އެބައި ކުރިއަށްދާނީ މާދަމާއިން ފެށިގެން މިމަހުގެ 13 ވަނަ ދުވަހަށެވެ. އެ ގޮތުން އިތުރު ޑޮކްޓަރުން ހއ، ހދ، ތ، ލ، ދ، ފ އަތޮޅުގައި ޚިދުމަތް ދިނުމަށް ވަނީ ހަމަޖެހިފައެވެ.
މިއީ ޕާކިސްތާން އެމްބަސީއާއި، ހެލްތު މިނިސްޓްރީއާއި އައިޖީއެމް ހޮސްޕިޓަލް ގުޅިގެން ބާއްވާ ކޭންޕެކެވެ. ކޭންޕު ފެށުމުގެ ރަސްމިއްޔާތުގައި ޕާކިސްތާނުން ރާއްޖެއަށް ކަނޑައަޅާފައި ހުންނަވާ ސަފީރު ވާހަކަ ދެއްކެވިއެވެ. އަދި ހެލްތު މިނިސްޓްރީގެ ބައެއް ވެރިންނާއި ކޭންޕުގައި ބައިވެރިވާ ބައެއް ޑޮކްޓަރުންވެސް ވާހަކަ ދެއްކެވިއެވެ. އެންމެން ވެސް ވިދާޅުވީ ކޭންޕުގެ ސަބަބުން ފައިދާތަކެއް ލިބިގެންދާނެ ކަމަށް އުންމީދު ކުރައްވާ ކަމަށެވެ.
މި ކޭންޕުގައި ޚިދުމަތް ދިނުމަށް ހަމަޖެހިފައިވަނީ ރާއްޖެއިން ފެރުވާދެވެން ނެތް ބަލިތަކަށެވެ. މިޓީމުން ބެލުމަށްފަހު ރާއްޖެއިން ބޭރަށް ބޭސްފަރުވާއަށް ދާންޖެހޭ ކަމަށް ވާނަމަ "ބޭރަށް ރިފަރކުރާނެ" ކަމަށްވެސް މުފީދު ވިދާޅުވިއެވެ.
