ހިޔާ މަޝްރޫއުގެ ދަށުން ފުލެޓް ހޯދުމަށް އެދެން ބޭނުންވާ ބައެއް ފަރާތްތަކަށް ފުލެޓު ދިނުމުގެ ގޮތުން މާލޭގެ ދަފްތަރުގައި އަލުން ރަޖިސްޓްރީ ވުމުގެ ފުރުސަތު ހުޅުވާލައިފިއެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި ހައުސިލް މިނިސްޓަރު ޑރ. މުހައްމަދު މުއިއްޒު ވިދާޅުވީ އެފުރުސަތު އަލުން ހުޅުވާލުމުން ދަފްތަރު ކެޓެގަރީއަށް ފޯމު ހުށަހެޅުމުގެ ފުރުސަތު ދިނުމުގެ ގޮތުން ކަމަށެވެ. "ރައީސް މިނިންމެވި ނިންމެވުމަކީ އެންމެންނަށް ފުލެޓަށް ކުރިމަތި ލުމުގެ ފުރުސަ ދެއްވުމަށް ކުރެއްވި ކަމެއް،" މިނިސްޓަރ ވިދާޅުވިއެވެ.
"މިހާރުހުރި އެއްވެސް ކެޓެގަރީއަކަށް ފޯމުނުލެވޭ ބައެއް ފަރާތްތައް ތިބީމައި އެކަމަށް މަޝްވަރާ ކުރުމަށްފަހު ސަރުކާރުން ނިންމާފައި މިވަނީ މޭލެގެ މުނިސިޕަލްޓީގެ ދަފްތަރުގައި ރަޖިސްޓްރީ ވުމުގެ ފުރުސަތު އަލުން ހުޅުވާލާ ގޮތަށް،" މިނިސްޓަރ ވިދާޅުވިއެވެ. އެމަނިކުފާނު ވިދާޅުވީ ދަފްތަރަކީ ކުރިން އެކިކަން ކަމަށް މާލެއަންނަ މީހުން ރަޖިސްޓްރީވުމަށް ހުޅުވާލި ފުރުސަތެކެވެ.
ދަފްތަރުގައި އަލުން ރެޖިސްޓްރީ ވެވޭނެގޮތް ހެދީމައި ފުލެޓަށް އެދި ފޯމު ލުމުގެ ފުރުސަތު ލިބިގެންދާ ކަމަށްވެސް މިނިސްޓަރ ވިދާޅުވިއެވެ. މި ފުރުސަތު ދިނަސް ރިޔާސީ އިންތިޚާބުގައި ވޯޓު ނުލެވޭގޮތަށް އެއްވެސް ކަމެއް ސަރުކާރުން ނުކުރައްވާނެ ކަމަށް މިނިސްޓަރ ވިދާޅުވިއެވެ. "މިފުރުސަތަކީ ދަފްތަރުގައި ރަޖިސްޓްރީ ވުމަށް އަޅުގަނޑުމެން ހުޅުވާލާ ފުރުސަތެއް. ފޯމުދޫކުރާނެ ދަފްތަރުގައި ޖެހެން. ފޯމު ދޫކުރީމައި އެފޯމްއެކީ ހުށަހަޅަންޖެހޭ ދަފްތާރާ ބެހޭ ގަވާއިދުގައި ހިމެނޭތަކެތި. ރަޖިސްޓްރީ ކުރިޔަސް އިލެކްޝަންގެ ކުރިއަކުން ދަފްތަރު އަޕްޑޭޓެއް ނުވާނެ. އަދި ރަޖިސްޓްރީ ނަންމަރުދޭނީ ވެސް އިލެކްޝަނަށް ފަހު" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ދަފްތަރުގައި ރަޖިސްޓްރީ ކުރަން ފޯމު ހުށަހެޅުމަށްފަހު މިނިސްޓްރީން ދޫކުރައްވާ ސްލިޕްކޮޅު ހިފައިގެން ޖެހިގެން ހުންނަ ކައުންޓަރަށް ދިޔުމުން ދަފްތަރު ހައުސިން ކެޓަގަރީއަށް ފޯމު ހުށަހަޅޭނެ ކަމަށެވެ.
