އެމްޑީޕީގެ ރިޔާސީ ކެންޑިޑޭޓުގެ ގޮތުގައި ހަމަޖައްސަވާފައިވާ އިބްރާހީމް މުހައްމަދު ސާލިހު (އިބޫ) އަށް މަރުހަބާ ވިދާޅުވެ ރައީސް ޔާމީން ސިޓީއެއް ފޮނުއްވައިފިއެވެ.
އިބްރާހީމް މުހައްމަދު ސާލިހަކީ ރައްޔިތުންގެ މަޖިލީހުގެ ހިންނަވަރު ދާއިރާގެ މެންބަރެވެ. އަދި އެމްޑީޕީގެ ޕީޖީ ލީޑަރެވެ. އެމަނިކުފާނަށް އެއްޑީޕީގެ ރިޔާސީ ޓިކެޓް ލިބިވަޑައިގެންނެވީ އެޕާޓީގެ ރިޔާސީ ޕްރައިމަރީ ކާމިޔާބު ކުރެއްވި ރައީސް ނަޝީދުގެ ނަން އިލެކްޝަންސް ކޮމިޝަނުން ގަބޫލު ނުކުރައްވާނެކަން އެނގިވަޑައިގެން އިންތިޚާބުގައި ވާދަ ނުކުރައްވާނެ ކަމަށް އެމަނިކުފާނު ވިދާޅުވުމުންނެވެ. އެމަނިކުފާނު އިންތިޚާބުގައި ވާދަ ނުކުރައްވާނެ ކަމަށް ވިދާޅުވުމުން އެޕާޓިންވަނީ އަސާސީ ގަވާއިދަށް އިސްލާހު ގެންނަވައި ދެވަނަ ބޭފުޅަކަށް ފުރުސަތު ލިބޭނެ ގޮތް ހައްދަވައިފިއެވެ.
އިބޫއަށް މަރުހަބާ ވިދާޅުވެ ރައީސް ޔާމީން ޚާއްސަ ސޓީއެއް ފޮނުއްވި ކަމަށް ވިދާޅުވީ ރައީސް އޮފީހުގެ ތަރުޖަމާނު އިބްރާހީމް މުއާޒު އަލީ އެވެ. އެކަން އޭނާ ހާމަކުރެއްވީ ޓްވީޓަރ މެދުވެރި ކޮށެވެ. އެހެންނަމަވެސް އޭގެ އެއްވެސް ތަފްސީލެއް ހާމަކުރައްވައިފައެއް ނުވެއެވެ.
ށ. ބިލެތްފަހީގައި މިއަދު ބޭއްވި ރަސްމއްޔާތެއްގައި ރައީސް ޔާމީން ދެއްކެވި ވާހަކަފުޅުގައި ވެސް ވަނީ ސަރުކާރުން އިބޫއަށް މަރުހަބާ ދަންނަވާ ކަމަށް ވިދާޅުވެފައެވެ. އަދި އިބޫއާއެކު އެމްޑީޕީއާއި ގައުމުގެ މަސްރަހަށް ހަމަޖެހުން އަންނާނެ ކަމަށް އުންމީދު ކުރައްވާ ކަމަށްވެސް ވިދާޅުވިއެވެ.
