ކުރިޔަށް އޮތް ރިޔާސީ އިންތިޚާބުގައި އިދިކޮޅު އިއްތިހާދުން އެއްކެންޑިޑޭޓް ނެރެން އެވަނީ ނިންމައި އެކަން ރަސްމީކޮށް އިއުލާނު ކޮށްފައެވެ. އަދި އިދިކޮޅު ރިޔާސީ ކެންޑިޑޭޓަކީ ރައްޔިތުންގެ މަޖިލީހުގެ ހިންނަވަރު ދާއިރާގެ މެމްބަރު އިބްރާހިމް މުޙަންމަދު ސޯލިހް (އިބޫ) ކަމަށް އެވަނީ މިހާރު ސިއްކަވެސް ޖަހާފައެވެ.
މިހިސާބުން ދެން އޮތް ހަމައެކަނި ސުވާލަކީ އިދިކޮޅު ރިޔާސީ ކެންޑިޑޭޓް އިބޫއާއެކު ރަނިންމޭޓަކަށް ނުކުމެވަޑައިގަންނަވާނީ ކޮން ބޭފުޅެއްތޯއެވެ. އެ މަގާމަށް ނުކުންނަވާނީ ޖުމްހޫރީ ޕާޓީގެ ބޭފުޅެއްކަން ޔަގީންވިޔަސް ޖޭޕީން ދައްކާނެ ރަނިންމޭޓެއް އަދި އޮތީ ސާފު ނުވެއެވެ. ނަމަވެސް ޖޭޕީން ބުނަނީ ރަނިންމޭޓްގެ ކަންތައް "ދަންމަދަންމައި" ނުތިބެ ވަރަށް އަވަހަށް ގޮތެއް ނިންމާނެ ކަމަށެވެ.
ޖޭޕީގެ ކައުންސިލުން ރަނިންމޭޓެއް ކަނޑަނޭޅި ނަމަވެސް ޖޭޕީގެ ބަޔެއް އިސްވެރިންނާއި ކައުންސިލް ބަޔެއް މެމްބަރުންނާއި ޖޭޕީގެ ބަޔެއް އާންމު މެމްބަރުންގެ ދުލުކުރިޔަށް ތިން ނަމެއް އައިސްގެން އެބައުޅެއެވެ. އެކަން ބަޔެއް ބޭފުޅުން ވަރަށް ސާފުކޮށް ދަނީ ވިދާޅުވަމުންނެވެ. ޖޭޕީގެ ބާނީ ގާސިމް އިބްރާހިމް އަދި މިހާތަނަށް ވަކިއެއްޗެއް އެކަމާމެދު ވިދާޅުނުވިޔަސް ދާދިފަހުން ޖޭޕީގެ ރައީސް ކަމުގެ މަގާމަށް އިންތިޚާބު ކުރެވިގެންދިޔަ އަލީ ވަޙީދު ގެންގުޅުއްވާ ނަމަކީ ސިޔާސީ ދާއިރާއަށް ޖޭޕީގެ ކޮންގްރެސްއާ ހަމައިން ނުކުމެވަޑައިގެންނެވި ޖޭޕީގެ ބާނީ ގާސިމް އިބްރާހިމްގެ ހަނގު އަނބިކަނބަލުން އައިޝަތު ނަހުލާ (އައިޝާ) އެވެ.
އަލީ ވަޙީދު ވަނީ އައިޝާއަށް ރަނިންމޭޓްކަންދޭން އޭނާ ތާއީދު ކުރައްވާ ކަމަށް ވިދާޅުވެފައެވެ. ސަބަބެއް ކަމަށް އަލީ ވަޙީދު ވިދާޅުވީ ގާސިމަށް ފުރުޞަތު ނެތުމުން ގާސިމްގެ އާއިލާ ބޭފުޅަކަށް އެ މަގާމު ދިނުން މުހިންމު ކަމަށް އަލީ ވަޙީދު ދެކެވަޑައިގަތުމެވެ.
ޖޭޕީގެ ރައީސްގެ މިވާހަކަފުޅަކީ ގާސިމްގެ ތާއީދު އޮތް ވާހަކަފުޅެއް ކަމެއް ނުވަތަ ނޫންކަމެއް ނޭނގެއެވެ. އަލީ ވަޙީދާއި ބަޔެއް އެހެން ބޭފުޅުންވެސް އައިޝާގެ ނަން ގެންގުޅުއްވައެވެ. ނަމަވެސް ޖޭޕީގެ ކައުންސިލުގެ ބަޔެއް މެމްބަރުންނާއި ބަޔެއް އާންމު މެމްބަރުން ސޯޝަލް މީޑިޔާގައި އެންމެ ބާރަށް ކެމްޕޭން ކުރަމުންދާ މަންޒަރު ފެންނަނީ ކެންދޫ ދާއިރާގެ މެމްބަރު އަދި ގާނޫނީ ވަކީލް އަލީ ޙުސައިންއަށެވެ. އަލީ ޙުސައިން އެކަމަށް ޝައުގުވެރިކަން ފާޅު ނުކުރެއްވިނަމަވެސް ޖޭޕީގެ ބަޔަކު ދަނީ އިބޫއާއެކު އަލީ ޙުސައިން ރަނިންމޭޓަކަށް ނެރުމަށް ތާއީދުކޮށް ކެމްޕޭން ކުރަމުންނެވެ. އަލީ ޙުސައިން އަލީ އެކަމަށް "ފައްކާ" ބޭފުޅެއް ކަމަށް ދަނީ ބުނަމުންނެވެ.
ޖޭޕީގެ ތެރޭގައި ދެން ރަނިންމޭޓުގެ ލިސްޓުގައި އުޅެނީ ޖޭޕީގެ ނައިބު ރައީސް ޑރ އަބްދުﷲ މައުސޫމެވެ. ޑރ މައުސޫމަށް ތާއީދުކޮށްވެސް ބަޔެއް ފަރާތްތަކުން ދަނި ސޯސަލްމީޑިޔާގައި ފޮޓޯއާއެކު ކެމްޕޭން ކުރަމުންނެވެ. ޑރ މައުސޫމްވެސް އަދި މިހާތަނަށް އެކަމާމެދު ވަކިއެއްޗެއް ވިދާޅުނުވެއެވެ.
ފެންނަ މަންޒަރުތަކާއި އިވޭ އަޑު ތަކަށް ބަލާއިރު އެންމެ ކައިރީ ރަނިންމޭޓްގެ ޓިކެޓް މި ތިންބޭފުޅުންގެ ތެރެއިން ބޭފުޅަކަށް ދިނުމެވެ. ޖޭޕީގެ ކައުންސިލު މެމްބަރުންގެ ތެރޭގައި އުޅެނީ މި ތިންބޭފުޅުންގެ ނަން ކަމަށްވާތީއެވެ.
