ޖުމްހޫރީ ޕާޓީ ނޫން އެހެން ސިޔާސީ ޕާޓީއަކުން ކުރިޔަށް އޮތްތަނުގައި ފެނުން އެކަށީގެންވާ ކަމަށާއި ސިޔާސީ ގޮތުން ދެން ނިންމަވާނެ ގޮތަކާމެދު މިވަގުތު ވިސްނަވަމުން ގެންދަވާ ކަމަށް ޖޭޕީގެ ކުރީގެ ޑެޕިއުޓީ ލީޑަރު އަބްދުﷲ ކަމާލުއްދީން ވިދާޅުވެއްޖެއެވެ.
""އާފަތިސް" ނޫހަށް ދެއްވި އިންޓަވިއުއެއްގައި ރައީސް މައުމޫނުގެ ދައުރުގައި ވަޒީރުކަންވެސް ކުރައްވާފައިވާ ކަމާލުއްދީން ވިދާޅުވީ ނިމިދިޔަ ޖޭޕީގެ ކޮންގްރެސްގައި އެމަނިކުފާނު އެޕާޓީގެ ޑެޕިއުޓީ ލީޑަރު ކަމަށް ވާދަކުރައްވައި އިންތިޚާބުން ބަލިވެވަޑައިގަތުމަކީ މަސައްކަތް ހުއްޓާލަން ޖެހިވަޑައިގަންނަވާނެ ސަބަބެއް ނޫން ކަމަށެވެ.
"އެކަމަކު ވޭތުވެދިޔަ ހަ އަހަރު ދުވަހު އަޅުގަނޑު ޚިދުމަތްކޮށްދިން ޖުމްހޫރީ ޕާޓީން އަޅުގަނޑު ބަލައިނުގެންފިކަން އެނގުމާއެކު ދެން މަސައްކަތް ކުރިޔަށް ގެންދެވިދާނެ ގޮތަކާމެދު މިގެންދަނީ ވިސްނަމުން" ކަމާލުއްދީން ވިދާޅުވިއެވެ.
ހަ އަހަރަށް ފަހު ޖޭޕީ ދޫކުރައްވައި އެހެން ސިޔާސީ ޕާޓީއަކަށް ބަދަލުވެވަޑައިގެންފާނެ ކަމަށް ފުރަތަމަ ފަހަރަށް މީޑިޔާގައި ހާމަކުރައްވަމުން ކަމާލުއްދީން ވިދާޅުވީ މުހިންމީ ވަކި ޕާޓީއަކު ހުރުން ނޫން ކަމަށެވެ.
"މުހިންމީ އަޅުގަނޑުގެ ސިޔާސީ ފިކުރު ހުރި ބަޔަކާއެކު ކުރިޔަށް ދިޔުން ދެއްތޯ، ގައުމު އެބަގޮވާ އިޚްލާސްތެރި ޚިދުމަތްތެރިންނަށް އެދި، މިވަގުތު ގައުމު ދޫކޮށްލާފައެއް ނުދެވޭނެ، އެއީ އިރާދަކުރެއްވިއްޔާ ކުރާނެ ކަމެއްނޫން، އިންތިޚާބަކުން ބަލިވުން އެއީ ގައުމު ދޫކޮށްލަންޖެހޭ ސަބަބެއްނޫން" ކަމާލުއްދީން ވިދާޅުވިއެވެ.
ކަމާލުއްދީން ވިދާޅުވީ ތިމާ ބޭނުންވާ ހުރިހާ ކަމެއް ނުވުމަކީ ގައުމަށްޓަކައި ކުރަމުން އަންނަ މަސައްކަތް ހުއްޓާލަންޖެހޭނެ ސަބަބެއް ނޫން ކަމަށާއި ޖޭޕީން ކަމާލުއްދީން ބަލައިނުގަތުން ނޫން އެހެން އިޙްސާސެއް ނުކުރެއްވޭ ކަމަށެވެ. އަދި އޭނާގެ ޚިދުމަތް ބަލައިގަންނަ މީހުންވެސް ވަރަށްގިނަ ކަމަށް ވިދާޅުވިއެވެ.
"އެއީވެސް އަޅުގަނޑު ކަހަލަ ދިވެހިން، އެލޮބުވެތި މީހުން އަޅުގަނޑު ދޫކޮށެއް ނުލާނެ" ކުރީގެ މިނިސްޓަރު ވިދާޅުވިއެވެ.
ޖުމްހޫރީ ޕާޓީ ދޫކުރައްވައި އެހެން ސިޔާސީ ޕާޓީއަކާ ގުޅިވަޑައިގަންނަވާނަމަ އެންމެ ބޮޑަށް ފެނުން ގާތީ ސަރުކާރު ހިންގާ ޕީޕީއެމުންތޯ ނުވަތަ އިދިކޮޅު އެމްޑީޕީންތޯ އާފަތިހުން ސުވާލު ދެންނެވުމުން ކަމާލުއްދީން ވިދާޅުވީ "މިވަގުތު ސަރުކާރުގައި އުޅުމުގެ ވިސްނުމެއް ނެތް" ކަމަށެވެ. އެމްޑީޕީއާ ގުޅިވަޑައިގަތުމާމެދު ވަކިއެއްޗެއް ވިދާޅެއްނުވިއެވެ. އެމްޑީޕީއާމެދު އެއްޗެއް ވިދާޅުނުވި ނަމަވެސް ޖޭޕީގެ ކޮންގްރެސްގެ ތެރެއިން އެމްޑީޕީގެ ޕާލިމެންޓްރީ ގްރޫޕްގެ ލީޑަރ އިބްރާހިމް މުޙަންމަދު ސޯލިޙް (އިބޫ) އާއެކު ވާހަކަ ދައްކަވަން ހުންނަވަނިކޮށް ނަންގަވާފައިވާ ފޮޓޯއެއް ފަހުން ކަމާލުއްދީން ވައިބާރ ކޮށްލެއްވިއެވެ.
ޖޭޕީގެ ނައިބު ލީޑަރު ކަމަށް ކުރިމަތި ލައްވައި ކަމާލުއްދީނަށް ނާކާމިޔާބީ ކުރިމަތިވެވަޑައިގަތީ ފަސް ބޭފުޅަކު ވާދަކުރެއްވި ރޭހެއްގައެވެ. ހަތަރު ޑެޕިއުޓީ ލީޑަރުން ތިއްބަވާއިރު ޑެޕިއުޓީ ލީޑަރުންގެ ގޮތުގައި އިންތިޚާބުވީ އަނެއް ހަތަރު ބޭފުޅުން ކަމަށްވާ އަމީން އިބްރާހިމް އާއި ޑރ ޙުސައިން ރަޝީދުގެ އިތުރުން އަބްދުﷲ އަމީން އާއި މުޙަންމަދު ފަޔާޒްއެވެ. އިންތިޚާބާ ހަމައަށް ކަމާލުއްދީނަކީވެސް އެޕާޓީގެ ޑެޕިއުޓީ ލީޑަރެކެވެ.
"ނިޝާނުލް އިއްޒުއްދީންގެ އިއްޒަތްތެރި ވެރިޔާ" ގެ ލަގަބު ރައީސް މައުމޫނުގެ ވެރިކަމުގެ ފަހުކޮޅު ދެއްވާފައިވާ 64 އަހަރުގެ އަބްދުﷲ ކަމާލުއްދވީނަކީ ރައީސް މައުމޫނުގެ ވެރިކަމުގައި ދައުލަތުގެ ވަރަށް އިސްމަގާމުތަކެއް އަދާކުރެއްވި ބޭފުޅެކެވެ. އޭގެތެރޭގައި ހޯމް މިނިސްޓަރު ކަމާއި، ފިޝަރީޒް އެންޑް އެގްރިކަލްޗަރ މިނިސްޓަރު ކަމާއި، ހިއުމަން ރިސޯސް މިނިސްޓަރު ކަމާއި، ޕަބްލިކް ވޯރކްސް އެންޑް ލޭބަރު މިނިސްޓަރު ކަމާއި، ބޭންކް އޮފް މޯލްޑިވްސްގެ ޗެއާރމަން ކަމުގެ އިތުރުން ރައްޔިތުންގެ މަޖިލީހުގެ މެމްބަރުކަންވެސް ކަމާލުއްދީން ވަނީ ކުރައްވާފައެވެ. މިނޫނަސް ސަރުކާރުގެ އިސްމަގާމުތައް ކަމާލުއްދީން ފުރުއްވާފައިވެއެވެ.
