ކުރިއަށްއޮތް ރިޔާސީ އިންތިޚާބުގައި ރައީސް ޔާމީނާ އެމްޑީޕީން ވާދަކޮށް އެމަނިކުފާނު ބަލުކުރައްވާނެ ކަމަށް އެމްޑީޕީގެ ޗެއާޕާސަން އަލްއުސްތާޒު ހަސަން ލަތީފް ވިދާޅުވެއްޖެއެވެ.
އާފަތިހަށް މައުލޫމާތު ދެއްވަމުން އެމަނިކުފާނު މިރޭ ވިދާޅުވީ ރައީސް ޔާމީން ބަލިކުރައްވާނީ ރިޔާސީ އިންތިޚާބުގައި އެޕާޓީއާއެކު ތިބިބައެއް ގޮވައިގެން ކަމަށެވެ. "އަޅުގަނޑި މިދައްކަނީ ވަކި ބައެއް ނުވަތަ ވަކި ޕާޓީއެއް ނުވަތަ ޕާޓީތަކެއްގެ ވާހަކައެއްނޫން. މިދައްކަނީ އަޅުގަނޑުމެންނާއެކު ތިބިބައެއްގެ ވާހަކަ. އިންތިޚާބުގެ ވަގުތުގައި އަޅުގަނޑުމެންނާއެކު ތިބިބައެއް ގޮވައިގެން ނުކުމެ އިންތިޚާބު ކާމިޔާބު ކުރަން އިރާދަ ކުރެއްވިއްޔާ،" ހަސަން ވިދާޅުވިއެވެ.
އެމްޑީޕީގެ ރައީސް އަދި ރާއްޖޭގެ ކުރީގެ ރައީސް މުހައްމަދު ނަޝީދު ވިދާޅުވީ މިހާރު ޖަލުގައި ހުންނެވި ކުރީގެ ރައީސް މައުމޫން އަބްދުލްގައްޔޫމާއި ސިޔާސީ އެހެން ގައިދީން ޖަލުން ނެރެވުން މިހާރު ބިނާވެފައިވަނީ ރިޔާސީ އިންތިޚާބުގެ މައްޗަށް ކަމަށެވެ. އެހެންކަމުން ގުޅިފައިވާ ޕާޓީތަކުން އެއް ކެންޑިޑޭޓަކުނެރެ އިންތިޚާބު ކާމިޔާބު ކުރުމަކީ ވަރަށް މުހިންމު ކަމެއް ކަމަށް އެމަނިކުފާނު ވިދާޅުވިއެވެ.
ރައީސް ނަޝީދު ވިދާޅުވީ ރިޔާސީ އިންތިޚާބުގައި އެއް ކެންޑިޑޭޓަކު ނެރެވޭނެ ކަމަށާއި އެ ކެންޑިޑޭޓަކު ވަނީ އެމްޑީޕީގެ ކެންޑިޑޭޓަކަށް ކަމަށެވެ. އެހެންވީމާ އެކެންޑިޑޭޓާއެކު މަސައްކަތް ކޮށް އިންތިޚާބު ކާމިޔާބު ކުރެވޭނެ ކަމަށް ރައީސް ނަޝީދު ވިދާޅުވިއެވެ.
ގުޅިފައިވާ ޕާޓީތަކުން ނެރޭ ކެންޑިޑޭޓަކީ އެމްޑީޕީއަށް ނިސްބަތްވާ ބޭފުޅަކަށް ވާންޖެހޭ ކަމަށް ބައެއް ފަރާތްތަކުން ވެސް ބުނެފައިވެއެވެ. ސަބަބަކީ އެމްޑީޕީއަކީ ގުޅިފައިވާ ޕާޓީތަކުގެ ތެރޭގައި ހިމެނޭ ޕާޓީތަކުގެ ތެރެއިން ހުރިހާ ގޮތަކުން ވެސް އެންމެ ބޮޑު ޕާޓީއަކީ ވެސް އެޕާޓީއެވެ.
ގުޅިފައިވާ ޕާޓީތަކުގެ ތެރޭގައި ހިމެނޭ ޖޭޕީ އިން ވަނީ ހިޔަނި ކެބިނެޓެއް ވެސް އެކުލަވާލައްވައިފައެވެ. އޭ ކެބިނެޓުގައި އެމްޑީޕީގެ އެއްވެސް ބޭފުޅަކަށް މަގާމެއް ނެތެވެ. އެހެން ކަމުން އެއީ ޖޭޕީގެ ސަރުކާރެއްގައި އެމްޑީޕީ ބައިވެރި ނުކުރާނެ ކަން ދަލީލު ކޮށްދޭ ކަމެއް ކަމަށް އެމްޑީޕީއަށް ތާއިދުކުރާ ބައެއް މީހުންވަނީ ބުނެފައެވެ.
