ޖުމްހޫރީ ޕާޓީ (ޖޭޕީ) ގެ ކޮންގްރެސްގެ ބައެއް މަގާމުތަކަށް ކުރިމަތި ލެއްވި މީހުންގެ ނަންތައް އަނބުރައި ނެގުމަށް އެޕާޓީގެ ލީޑަރު ގާސިމް އިބްރާހީމް އަންގަވައިފިއެވެ.
ޖޭޕީގެ ކައުންސިލް މެންބަރަކު އާފަތިހަށް މައުލޫމާތު ދެއްވަމުން ވިދާޅުވީ ކައުންސިލަށް ކުރިމަތިލައްވައިފައިވާ މެންބަރުންގެ ތެރެއިން 15 މެންބަރުން އަނބުރައި ނަން ނެގުމަށް ގާސިމް އެންގެވި ކަމަށެވެ.
"ކައުންސިލަށް އާންމު މެންބަރުންގެ ގޮތުގައި ހޮވަންޖެހެނީ ފަނަރަ މެންބަރުން. ކުރިމަތި ލައްވައިފައި އެބަތިއްބެވި ތިރީސް ހަތަރު މެންބަރުން. އޭގެ ތެރެއިން ފަނަރަ މެންބަރުންނަށް ގާސިމް އެންގެވީ ނަން އަނބުރާ ނެގުމަށް. އޭގެ ތެރޭގައި ކުރީގެ މިނިސްޓަރަކު ވެސް ހިމެނި ވަޑައިގަންނަވާ،" މަސްލަތަހަށްޓަކައި ނަން ހާމަކުރަން ބޭނުންނުވާ އެ މެމްބަރު ބުންޏެވެ.
އޭނާ ބުނީ ގާސިމް އެގޮތަށް އެންގެވީ ޕާޓީގެ ރައީސަކަށް ކުރިމަތި ލައްވައިފައިވާ ހަމައެކަނި ކެންޑިޑޭޓް އެމްޑީޕީގެ ކުރީގެ ޗެއާޕާސަން އަލީ ވަހީދު ބޭނުންފުޅުވާ ބަޔަކު ކައުންސިލަށް އިންތިޚާބު ކުރެއްވުމަށް ކަމަށެވެ. ކައުންސިލަށާއި ޕާޓީގެ އެހެން މަގާމުތަކަށް ބޭފުޅުން އިންތިޚާބު ކުރެއްވުން އޮންނާނީ މިމަހު 21 އިން 22 އަށް ޕެރަޑައިސް އައިލެންޑް ރިސޯޓުގައެވެ.
ކައުންސިލް މެންބަރު ބުނީ މިއީ ޑިމޮކްރަސީގެ ހަމަތަކުން ބާއްވާ ކޮންގްރެސްއެއް ކަމަށް ބަލައި ނުގަންނަ ކަމަށެވެ. މިއީ ތަހުޒީބު އަދި ޑިމޮކްރަޓިކް ޒަމާނެއްގައި ޖޭޕީފަދަ ޑިމޮކްރަސީއަށް ވަކާލާތުކުރާ ޕާޓީއަކުން ފެނިގެންވާނެ ކަމެއް ނޫން ކަމަށް ވެސް އޭނާ ބުންޏެވެ. "ކޮންމެ މަގާމަކަށް އެކަކަށްވުރެ ގިނައިން ކުރިމަތި ނުލެވޭގޮތަށް ލީޑަރޝިޕުން ކަންތައް ކުރެއްވުމަކީ ގަބޫލުކުރެވޭ އަދި މިގަރުނުގެ ސިޔާސީ ބަޔަކު ކުރާ ޒާތުގެ ކަމެއްނޫން،" އޭނާ ބުންޏެވެ. މިހެން ވުމުން ޕާޓީގެ އެތެރޭގެ އިންތިޚާބުގައި އެއްވެސް ވާދަވެރިކަމާއި ފޯރިއެއް ވެސް ނެތްކަމަށް އޭނާ ބުންޏެވެ.
މިކަމާ ބެހޭ ގޮތުން ޖޭޕީގެ ޗީފް ސްޕޯކްސް ޕާސަން އަލީ ސާލިހު ވިދާޅުވީ ގާސިމް އެފަދަ ގޮތަކަށް އަމަލު ކުރެއްވިނަމަ ކުރައްވާނީ މެންބަރުންގެ ލަބައާއި މަންފާއަށްޓަކައި ކަމަށެވެ. ގާސިމް ބޭނުންފުޅުވަނީ އެ މެންބަރަކާ އެންމެ ގުޅޭ ދާއިރާއަކުން އެ މެންބަރަކަށް ފުރުސަތު ދެއްވުމަށް ކަމަށް ވެސް އަލީ ސާލިހު ވިދާޅުވިއެވެ. "ގާސިމަށް އެނގި ވަޑައިގަންނަވާނެ އަޅުގަނޑަށް އެންމެ އެކަށީގެންވާ ގޮތުގައި ޕާޓީއަށް ޚިދުމަތް ކޮށްދެވޭނީ ކޮންދާއިރާއެއްގައި ހުރެގެންކަން. އެހެންވީމާ އެމަނިކުފާނު ބޭނުންފުޅުވަނީ އެ މީހަކާ އެންމެ އެކަށީގެންވާ ދާއިރާއަކުން ފުސަތު ދެއްވަން،" އަލީ ވިދާޅުވިއެވެ. ކައުންސިލްގެ އެހެން މަގާމެއްގައި ހުންނެވި ބޭފުޅަކު އާންމު މެންބަރަކަށް ކުރިމަތި ލައްވައިފި ކަމަށްވާނަމަ ކައުންސިލުގައި އެމީހެއްގެ މަގާމް ރިޕީޓު ވެދާނެތީ ވެސް އެފަދަ އެންގެވުމެއް އެންގެވުމަކީ އެކަށީގެންވާ ކަމެއް ކަމަށް ވިދާޅުވިއެވެ. ޖޭޕީން ކަންކަން ރާވާނީ އެއްވެސް މީހަކު ބާކިނުވާނެ ގޮތަށް ކަމަށް ވެސް އޭނާ ވިދާޅުވިއެވެ.
އޭނާ ވިދާޅުވީ ޖޭޕީގެ އަސާސީ ގަވާއިދު އިސްލާހުކޮށް ކޮންގްރެސްއަށް ހުށަހަޅައިގެން އެ ފާސް ކުރައްވައިގެން އަމަލުކުރާ ހިސާބުން ޖޭޕީގެ އެކިދިމަދިމާއިން ޒުވާނުންނަށް ފުރުސަތު ހުޅުވިގެންދާނެ ކަމަށެވެ. އެއްވެސް ބޭފުޅަކަށް ފުރުސަތު ގެއްލުވާލަން ގާސިމް ބޭނުންފުޅު ނުވާކަމަށާއި ޕާޓީއާއި މެންބަރުންގެ މަސްލަހަތަށް އަބަދުވެސް ގާސިމް ވިސްނަވާ ކަމަށް އަކީ ސާލިހު ވިދާޅުވިއެވެ.
