ޖުމްހޫރީ ޕާޓީގެ އަސާސީ ގަވައިދަށް ގެނައި ބަދަލާއެކު އެޕާޓީގެ ރައީސަކު އިންތިޚާބު ކުރުމަށްޓަކައި އެމަގާމަށް އިއުލާން ކުރުމާއެކު އެމްޑީޕީގެ ކުރީގެ ޗެއާޕާސަން އަލީ ވަޙީދު ޖޭޕީގެ ރައީސް ކަމަށް ކުރިމަތި ލައްވައިފިއެވެ.
ދާދިފަހުން ޖަރުމަނުގައި އޮތް ރަސްމިއްޔާތެއްގައި ޖޭޕީއަށް ސޮއި ކުރެއްވި އަލީ ވަޙީދު ޖޭޕީގެ ރައީސް ކަމަށް ކުރިމަތިލެއްވިކަން އޭނާ ވަނީ ކަށަވަރު ކޮށްދެއްވާފައެވެ. އަލީ ވަޙީދު ދާދި ދެންމެއަކު ކުރެއްވި ޓްވީޓެއްގައި ވިދާޅުވީ ރައީސް ކަމަށް ކުރިމަތި ލެއްވުމަށް ފަހު ޖޭޕީގެ އާންމު މެންބަރުންގެ ލޯތްބާއި ތާއީދާއި ހެޔޮއެދުމަށް އެދިވަޑައިގަންނަވާ ކަމަށެވެ.
"އެންމެންނަށް ހަމަހަމަ، ގޮފިތަކުގެ ބާރުވެރި، އިންތިޒާމުވެވިފައިވާ ކޮމިޓީތަކާއެކު ރައްޔިތުންނަށް ޚާދިމް މަސައްކަތެއް ކޮށްދޭނަން" ޖޭޕީގެ ރައީސް ކަމަށް ކުރިމަތި ލެއްވުމަށް ފަހު އަލީ ވަޙީދު ވިދާޅުވިއެވެ.
އެމްޑީޕީގެ ޗެއާޕާސަން ކަމުގައި ހުންނެވުމަށް ފަހު އެމަގާމުން އިސްތިއުފާ ދެއްވި ނަމަވެސް އޭނާ އެމްޑީޕީން ވަކިވެވަޑައިގަތީ ވަރަށް ފަހުންނެވެ. އަމިއްލައަށް އަރުވާލެވިގެން ލަންޑަނުގައި ދިރިއުޅުއްވާ އަލީ ވަޙީދު ޖޭޕީއަށް ސޮއި ކުރެއްވުމާއެކު އޭނާ ހަމަޖައްސަވާފައި ވަނީ ޕާޓީގެ ލީޑަރު ގާސިމް އިބްރާހިމްއަށް ސިޔާސީ ލައްވާ ދެއްވާ މުޝީރަކަށެވެ.
ޑީއާރުޕީން ސިޔާސީ ހަޔާތް ފެއްޓެވި އަލީ ވަޙީދަކީ ރައްޔިތުންގެ މަޖިލީހުގެ ތޮއްޑޫ ދާއިރާގެ މެމްބަރުކަންވެސް ކުރައްވާފައިވާ ބޭފުޅެކެވެ.
