މިއަހަރުގެ ފިތުރު އީދު ދުވަހަކީ އަންނަ ހުކުރު ދުވަސް ކަމުގައި އިސްލާމިކް މިނިސްޓްރީން މިރޭ ކަނޑައަޅައިފިއެވެ.
ފިތުރު އީދު ދުވަހަކީ އަންނަ ހުކުރު ދުވަސް ކަމަށް މިނިސްޓްރީން ކަނޑައެޅީ 1439 ވަނަ އަހަރުގެ ޝައްވާލު މަހުގެ ހަނދު ސާބިތު ކުރުމަށް މިރޭ މިިނިސްޓްރީގައި ބޭއްވި ކޮމިޓީގެ ބައްދަލުވުމުގައެވެ. ކޮމިޓީން ނިންމީ ޝައްވާލު މަހުގެ ހަނދު އިސްލާމީ އެއްވެސް ގައުމަކަށް މިރޭ ފެނިފައިނުވާތީ އާއި އިތުބާރު ހުރި ފަލަކީ ހިސާބުންވެސް މިރޭ ހަނދު ނުފެންނާނެ ކަމަށް އިލްމުވެރިން ބުރަވެފައިވާތީ މާދަމާއަކީ ރަމަޞާން މަހޖުގެ 30 ވަނަ ދުވަސް ކަމަށް ނިންމައި، އީދު ދުވަހަކީ ޖެހިގެން އަންނަ ހުކުރު ދުވަސް ކަމުގައެވެ.
އަންނަ ހުކުރު ދުވަހަކީ ފިތުރު އީދު ދުވަސް ކަމުގައި ނިންމިއިރު ރާއްޖޭގައި އަންނަ އީދު ދުވަހު އީދު ނަމާދު ބޮޑު ޖަމާއަތުގައި ކުރުމަށް ގިނަ ރަށްރަށުގައި ދަނީ ތައްޔާރު ވަމުންނެވެ. މާލޭގައިވެސް ބޮޑު ޖަމާއަތުގައި އީދު ނަމާދު ކުރަން މިނިސްޓްރީން ވަނީ ނިންމާފައެވެ. އެއީ މާފަންނު ސްޓޭޑިއަމްގައެވެ. މީގެއިތުރުން ހުޅުމާލޭގައިވެސް ބޮޑު ޖަމާއަތުގައި އީދު ނަމާދު ކުރުން އޮންނާނީ ސެންޓްރަލް ޕާކުގައި ކަމަށް މިނިސްޓްރީން ވަނީ ކަނޑައަޅާފައެވެ.
