އަނަސު ބުން މާލިކު رضي الله عنه ގެ އަރިހުން ލިބިގެން ވެއެވެ. އެކަލޭގެފާނު ވިދާޅުވިއެވެ. ރަސޫލުﷲ صلَّى الله عليه وسلَّم ޙަދީޘުކުރެއްވިއެވެ. ތިޔަބައިމީހުން ހުރިހާ ވަގުތެއްގައި ވެސް ހެޔޮ ޢަމަލުކުރާށެވެ. އަދި މާތް ﷲގެ ރަޙްމަތުގެ ރޯޅިތަކަށް ތިޔަބައިމީހުން ހުށަހެެޅޭށެވެ. ފަހެ، ހަމަށަވަރުން މާތް ﷲއަށް އެކަލާނގެ ރަޙްމަތުގެ ރޯޅިތަކެއް ވެއެވެ. އެކަލާނގެ އަޅުތަކުންގެ ތެރެއިން އެކަލާނގެ އިރާދަކުރައްވާ ބަޔަށް އެ ރޯޅި ފޯރައެވެ. އަދި ތިޔަބައިމީހުންގެ ސިއްރުތައް ވަންހަނާކުރައްވައި، ބިރުވެރިކަމުން ތިޔަބައިމީހުން އަމާންކުރެއްވުމަށް ތިޔަބައިމީހުން މާތް ﷲ އަށް އެދި ދަންނަވާށެެވެ. (ރިވާކުރެއްވީ އައްްޠަބަރާނީ، އަލްކަބީރުގައި)
އަހަރަކު އެެއް ފަހަރު މުސްލިމުންނަށް ހުޅުވާލެވޭ ރަމަޟާން މަހުގެ މަދަރުސާ މިވަނީ ބަންދުވާން ކައިރިވެފައެވެ. އެ މަދަރުސާއަށް ވަދެ އުނގެނެން ބޭނުންވި އެންމެނަށް ފިލާވަޅުތަކެއް ލިއްބައިދީފައެވެ. ނަަމަވެސް ހިތާމަ ހުރި ކަމަކީ އެ މަދަރުސާއިން ނުކުތުމަށް ފަހު، ލިބުނު ހުރިހާ ފިލާވަޅެއް ހަނދާންނައްތާލުމެވެ. އެގާރަ މަސް ފަހުން އަނެއްކާވެސް ހުޅުވައިލެވޭ އިރު ހަމަ ކުރިން ތިބި ހިސާބުގައި ތިބުމެވެ.
މި މަތިވެރި ޙަދީޘު ބަސްފުޅުގައި ކީރިތި ރަސޫލާ صلَّى الله عليه وسلَّم އަންގަވާފައި މިވަނީ ހެޔޮ ޢަމަލުކުރަން ޖެހެނީ ވަކި މޫސުމެއްގައި ނޫންކަމާ، ހުރިހާ އިރެއްގައިވެސް އެކަމުގެ މަތީގައި ދެމި ތިބެން ޖެހޭ ކަމެވެ. އެގޮތަށް ދެމި ތިބެވޭނީ ރަމަޟާން މަހުން ލިބުނު ފިލާވަޅުތަކަށް އެމަސް ފާއިތުވެ ދިއުމަށް ފަހުވެސް ޢަމަލުކުރުން މަތީ ދެމި ތިބެގެންނެވެ.
ރަމަޟާން މަހުގެ މަދަރުސާއިން މުސްލިމުންނަށް ލިބުން އެންމެ މަތިވެރި ފިލާވަޅު ތަކަކީ:
- ތަޤްވާވެރިކަން: ފަހެ، ރަމަޟާން މަހު ރޯދަ ފަރުޟުކުރެއްވުމުގެ މަޤްޞަދަކީ އެއީ އެވެ. އެހެންކަމުން އެމަހު ތަޤްވާގެ ފިލާވަޅު ލިބިގަނެ އެކަން ނަފުސުގައި ހަރުލާފައި ހުރި މީހާ އެމަސް ފާއިތުވެ ދިއުމަށް ފަހު އެގޮތަަށް ހުންނާނެއެވެ.
- ދޫ ރައްކާތެރިކުރުމާއި، އަނެކުންނަށް ގޯނާކުރުމުން ދުރުހެލިވުން: ރޯދައިގެ ދަރުމަ ހަމައަށް ދެެއްވާނީ މިކަންކަމުން ދުރުހެލިވެގެންކަން އަންގަވާފައިވާތީ، ހެޔޮ ގޮތުގައި ރޯދައަށް ހުރި މީހަކު މިކަން ނުކުރާނެއެވެ. އަދި ރަމަޟާން މަސް ނިމުނަސް އެގޮތުގަައި ހުންނާނެއެވެ.
- ދީލަތިވެ މުދަލުން ހޭދަކުރުމުގައި އެކަކު އަނެކަކަށް ވާދަކުރުން: މިއީ ރަމަޟާން މަހުގެ އެންމެ މުހިއްމު އެއް ފިލާވަޅެވެ. އެމަހުގައި އެކަމުގެ މަތީގައި ދެމިހުރިި މީހާވެސް އޭނާގެ ދީލަތިކަމާއި ހޭދަކުރުން ކުރިއަށް ގެންދިއުމަކީ ދީނުގައި އަންގަވާ ގޮތެވެ.
- ނަފުސު ކޮންޓުރޯލުކުރުން: ކެއުން ބުއިމާ އެދުން ފުއްދުމުން އެެއްކިބާވުމުގެ އިތުރަށް ދުންފަތުގެ އިސްތިއުމާލުކުރުން ފަދަ ބައެއް ނޭދެވޭ ކަންކަން ވެސް އަހަރުމެން ރޯދައަށްޓަކައި ހުއްޓާލައިގެން ތިބެމުއެވެ. އެހެންވީމާ، ރަމަޟާން މަހު އެކަމުން ދުރުހެލިވާން ނަފުސުގެ މައްޗަށް ބާރު ފޯރުވުނު ފަދައިން، އެމަސް ނިމުމަށް ފަހުވެސް އެގޮތުގައި ދެމި ތިބުމަކީ މުހިއްމު ކަމެކެެވެ.
- ނިކަމެތިންނާއި ފަގީރުންގެ ހާލު އަމިއްލައަށް އިހުސާސުކުރުން: ރޯދައަށް ހުރެ ބަނޑުހައިހޫނުކަން އިހުސާސް ކުރެވުމުން، އަތްމަތި ދަތިކޮށް އުޅޭ ނިކަމެތި ފަގީރުންގެ ހާލަތު ތަސައްވަރުކުރެވޭނެއެވެ. އިސްލާމްދީން އެދޭ ގޮތަކީ ރަމަޟާން މަސް ނިމުމަށް ފަހުވެސް އެކަން ހަނދާން ނައްތާނުލައި، ތިމާ ބަނޑުފުރާ ކައިގެން ހުރެ އެބައިމީހުންނަށް އެހީތެރިވެ ދިނުމެވެ.
