މިދިޔަ މަހު މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް ޓެކްސްގެ ގޮތުގައި އެއް ބިލިއަން ރުފިޔާ ބަލައިގެންފައިވާ ކަމަށް އެތަނުން ވިދާޅުވެއްޖެއެވެ.
މީރާއިން ވިދާޅުވެފައިވަނީ މިއީ އެމަހު ލިބޭނެ ކަމަށް އަންދާޒާކުރި އަދަދަށްވުރެ 10.6 ޕަސެންޓް އިތުރު އަދަދެއް ކަމަށެވެ. އެހެން ނަމަވެސް އެއީ މިދިޔަ އަހަރުގެ މެއި މަހު ލިބުނު އަދަދަށް ވުރެ 14.6 ޕަސެންޓް ދަށް އަދަދެއް ކަމަށްވެސް ވިދާޅުވެފައިވެއެވެ.
އަންދާޒާކުރިވަރަށްވުރެ އިތުރަށް މެއިމަހު ފައިސާ ލިބިފައިވަނީ ޓެކްސް ދެއްކުމަށް ދީފައިވާ ސުންގަޑީގެ ކުރިން ބައެއް ބޭންކުތަކުން ބޭންކް ޕްރޮފިޓް ޓެކްސް ދެއްކުމުން ކަމަށްވެސް މީރާ އިން ވިދާޅުވެފައިވެއެވެ.
ހުސްވިމަހު މީރާއަށް ބަލައިގެންފައިވާ އާމްދަނީހގެ އެންމެ ބޮޑު ޕަސެންޓެއް ހިއްސާ ކޮށްފައިވަނީ މުދަލާއި ޚިދުމަތުގެ އަގުން ނަގާ ޓެކްސް (ޖީއެސްޓީ) އިންނެވެ. އެއީ 58.2 ޕަސެންޓެވެ. އެއީ 610.43 މިލިއަން ރުފިޔާއެވެ. ދެވަނައަށް އެންމެ ގިނައިން ލިބުނީ ބޭންކް ޕްރޮފިޓް ޓެކުހުންނެވެ. އެއީ 9.4 ޕަސެންޓެވެ. އެއީ ރުފިޔާއިންނަމަ 98.71 މިލިއަނެވެ. އަދި ގްރީން ޓެކްސްގެ ގޮތުގައި 64.16 މިލިއަން ރުފިޔާ، އެއާޕޯޓް ޑިވެލޮޕްމެންޓް ޓެކްސްގެ ގޮތުގައި 57.64 މިލިއަންރުފިޔާ، އެއާޕޯޓް ސާވިސް ޗާޖުގެ ގޮތުގައި 57.34 މިލިއަން ރުފިޔާ ވަނީ ލިބިފައެވެ. އެހެނިހެން ޓެކުހާއި ފީގެ ގޮތުގައި 161.24 މިލިއަން ރުފިޔާ ލިބުނު ކަމަށްވެސް މީރާއިން ވަނީ ވިދާޅުވެފައެވެ.
މީރާ އިން ވިދާޅުވެފައިވަނީ މެއި މަހު އާމްދަނީގެ ގޮތުގައި ލިބުނު އެއްބިލިއަން ރުފިޔާގެ ތެރޭގައި 38.22 އެމެރިކާ ޑޮލަރު ހިމެނޭ ކަމަށެވެ.
