ފާއިތުވި 18 މަސް ތެރޭގައި ރާއްޖެއިން ވަނީ 893 ޓަނުގެ ޕްލާސްޓިކް ރީސައިކަލް ކުރުމަށް ރާއްޖެއިން ބޭރަށް ފޮނުވައިފައި ކަމަށް ތިމާވެއްޓާބެހޭ މިނިސްޓަރު ތާރިގު އިބްރާހީމް ވިދާޅުވެއްޖެއެވެ.
މިއަދު ފާހަގަ ކުރަމުންދާ ދުނިޔޭގެ ތިމާވެށީގެ ދުވަހާ ގުޅިގެން ދެއްވި ޚިތާބުގައި އެމަނިކުފާނު ވިދާޅުވީ އެ ޕްލާސްޓިކްތައް އެކްސްޕޯޓު ކޮށްފައިވަނީ ރާއްޖޭގެ މަދަނީ ޖަމިއްޔާއަކުން ކަމަށެވެ. އެމަނިކުފާނު ވިދާޅުވީ މިއިން ދައްކުވައި ދެނީ ރާއްޖޭގެ ކުންފުނިތަކާއި އަމިއްލަ ޖަމާއަތްތަކާއި ވަކި ފަރުދުން ވެސް އަމިއްލައަށް އިސްނަގައިގެން ޕްލާސްޓިކް ކުނީގެ މައްސަލަތައް ހައްލު ކުރުމަށް މަސައްކަތް ކުރާކަން ކަމަށެވެ. މިފަދަ މިސާލުތައް އަޅުގަނޑުމެންގެ ތެރެއިން ފެންނަމުންދާތީ އެފަރާތްތަކަށް މިނިސްޓަރ ވަނީ ޝުކުރު ދަންނަވައިފައެވެ.
އެމަނިކުފާނު ވިދާޅުވީ އެއްފަހަރު ބޭނުންކޮށްފައި އެއްލާލެވޭ ޕްލާސްޓިކްގެ ބަދަލުގައި ދެވަނަފަހަރަށް ވެސް ބޭނުންކުރެވޭ އެއްޗެހި ދިރިއުޅުމުގައި ބޭނުން ކުރުން މުހިންމު ކަމަށެވެ. "ގޭތެރޭގައާއި އޮފީސް އަދި އާންމު ދިރިއުޅުމުގައި ވެސް މިފަދަ ހައްލުތަކަށް ސަމާލުކަމް ދިނުން މިއަގުބޮޑު ރީތިވެށީގެ ހައްގުގައި މުހިންމެވެ." އެ މަނިކުފާނު ވިދާޅުވިއެވެ.
ޒަމާނާއެކު ލިބިފައިވާ ފަސޭހަތަކަކީ ތިމާވެއްޓާ ރައްޓެހި ފަސޭހަތަކަށް މިހާރު މިވަނީ ބަދަލު ކުރަން ޖެހިފައި ކަމަށް ވެސް މިނިސްޓަރ ވިދާޅުވިއެވެ. އެއީ ފަރުދީ ފެންވަރުން ފެށިގެން ގޮސް ބައިނަލް އަގުވާމީ ފެންވަރުގައި ކުރަންޖެހިފައިވާ ކަމެއް ކަމަށްވެސް ވިދާޅުވިއެވެ.
"އަޅުގަނޑުމެންގެ ދިރިއުޅުމުގެ ގިނަ އަސާސީ ބޭނުންތަކުގެ އާސާރުތައް މި ބިންމައްޗަށް މިއަދު ދޫކުރެވިގެން މިދަނީ ކުނީގެ ސިފައިގައެވެ. މީގެ ތެރޭގައި އަމިއްލަ ޒާތުގައި ނެތި ފަނާވެނުދާ ޕްލާސްޓިކް ކުނީގެ ހިއްސާ ބޮޑުކަން ފާހަގަ ކުރަމެވެ." މިނިސްޓަރ ތާރިގު ވިދާޅުވިއެވެ.
