ކޯޓުތަކުގެ ފަނޑިޔާރުންނަށް ނުފޫޒު ފޯރުވުމަށް ސަރުކާރާއި ޖޭއެސްސީގައި މިހާރު ތިބި ސިޔާސީ ބޭފުޅުން ހިންގަވާ "ޖަރިމާތަކަށް" އެ ބޭފުޅުންނަށް ހައްގުވާ އަދަބު ދެއްވާނެ ކަމަށް ރައީސް ނަޝީދުގެ ވެރިކަމުގައި ބަންޑާރަ ނާއިބުކަން ކުރެއްވި ހުސްނުއްސޫދު ވިދާޅުވެއްޖެއެވެ.
އޭނާ ކުރައްވައިފައިވާ ޓުވީޓެއްގައި ވިދާޅުވެފައިވަނީ އެކަން ކުރައްވާނީ އެބޭފުޅުން އެދޭ ވެރިކަމެއްގައި ކަމަށެވެ. އެވެރިކަމެއްގައި ސިއްރު ހެކި ބޭނުން ކުރުމާއި، ޝަރީއަތް ސިއްރު ކުރުން ގާނޫނުގައި މަނާ ކުރައްވާނެ ކަމަށް ވެސް ވިދާޅުވެފައިވެއެވެ.
"މިހާރުގެ ސަރުކާރާއި، ޖޭއެސްސީ ގައި މިހާރުތިބި ސިޔާސީ މީހުން ފަނޑިޔާރުންނަށް ނުފޫޒު ފޯރުވުމަށް ހިންގާ ޖަރީމާތަކަށް ހައްގު އަދަބު ދޭނަން،" ސުއޫދު ވިދާޅުވެފައިވެއެވެ.
އޭނާ މިހެން ވިދާޅުވެފައިވަނީ ސިއްރު ރިޕޯޓާއި، ސިއްރު ހެއްކަކީ ހެކި ސާބިތު ކުރުމަށް ނުރައްކާތެރި ދެ ވަސީލަތް ކަމަށް ކުރީގެ އުއްތަމަ ފަނޑިޔާރު އަހުމަދު ފާއިޒު ހުސައިން ވިދާޅުވެފައި ވަނިކޮށްނެވެ. އޭނާ ވިދާޅުވެފައިވަނީ ޖިނާއީ އިޖުރާއަތުގެ ދަށުން އެ ދެވަސީލަތް ބޭނުން ކޮށްގެން ދައުވާ ސާބިތު ކުރަމުން ދިޔުމަކީ ހިތާމަކުރައްވާ ކަމެއް ކަމަށެވެ.
