ކޮންމެ އަހަރަކު 40 މިލިއަން ރުފިޔާގެ ބަޖެޓެއް ކަނޑައަޅައިގެން ޒުވާނުންނަށް ދޫކުރާ ގެޓް ސެޓް ލޯނުގެ މިއަހަރުގެ ޕްރޮގްރާމުގައި ބައިވެރިވުމުގެ ފުރުސަތު މިއަދު ހުޅުވައިފިއެވެ.
މި ޕްރޮގްރާމުގައި ބައިވެރިވެވެނީ އުމުރުން 18 އަހަރާއި 35 އަހަރާ ދެމެދުގެ މީހުންގެ ތެރެއިން އަލަށް ވިޔަފާރިއެއް ފަށަން ބޭނުންވާ ޒުވާނުންނަށެވެ. މިއީ ކުދި އަދި މެދުފަންތީގެ ވިޔަފާރިވެރިން އުފެއްދުމަށް ސަރުކާރުން ހިންގާ ޕްރޮގްރާމެކެވެ.
މި ޕްރޮގްރާމުގައި ބައިވެރިވާން ބޭނުންވާ ޒުވާނުންނަށް އެޕްލިކޭޝަން ފޯމް ހުށަހެޅުމަށް ދީފައިވާ މުއްދަތަކީ ޖޫން 24 އިން 28 އަށެވެ. މި ޕްރޮގްރާމުގެ ދަށުން ދޫކުރުމަށް ހަމަޖެހިފައިވަނީ ހަތަރު ލައްކަ ރުފިޔާއި އަށްލައްކަ ރުފިޔާއާ ދެމެދުގެ އަދަދެއްގެ ލޯނެކެވެ.
ގެޓްސެޓްގެ ޕްރޮގްރާމުގެ މެނޭޖަރ މަހީލް ޢަލީ ޖަލީލް ވިދާޅުވެފައިވަނީ ލޯނަށް އެދުން ލަސް ކުރުމުގެ ބަދަލުގައި އަވަސް ކުރުން ވަރަށް މުހިންމު ކަމަށެވެ. އެންމެ ފަހުވަގުތު އެޕްލިކޭޝަން ހުށަހަޅަން މަޑުނުކޮށް ވީހާވެސް އަވަހަށް ހުށަހެޅުމަށް އޭނާ އެދިވަޑައިގެންނެވިއެވެ.
