ކުނީގެ ގޮތުގައި ކަނޑަށް ޕްލާސްޓިކު އެޅުން ކޮންޓްރޯލު ނުކުރެވިއްޖެނަމަ ކުރިއަށް އޮތް ދިހަ އަހަރުތެރޭގައި ކަނޑަށް އެޅޭ ޕްލާސްޓިކުގެ މިންވަރު 3 ގުނަ އިތުރުވެގެންދާނެކަމަށް، ކަމާބެހޭގޮތުން ކުރެވުނު ބޮޑު ދިރާސާއެއްގެ ރިޕޯޓުގައި ބުނެފިއެވެ. ޕްލާސްޓިކުގެ މައްސަލައަކީ ދުނިޔޭގެ ކަނޑުތަކަށް ދިމާވެފައިވާ މައްސަލަތަކުގެ ތެރެއިން އެއް މައްސަލައެވެ. ކަނޑުގެ ލޮނުގަނޑު ބޮޑުވުމާ، ޖައްވު ހޫނުވުމުގެ ސަބަބުން ލޮނުގަނޑު ހޫނުވުމާ، ތިމާވެށި ތަޣައްޔަރުވުމަކީވެސް ކަނޑުތަކަށް ދިމާވެފައިވާ މައްސަލަތަކެވެ.
އިނގިރޭސި ސަރުކާރަށް ހުށަހެޅި 'ފޯސައިޓް ފިއުޗާ އޮފް ދަ ސީޒް' ރިޕޯޓުގައި ކަނޑުން އިގްތިސާދީ ފައިދާ އިތުރުކުރެވިދާނެ ކަމަށް ވެސް ބުނެފައި ވެއެވެ. ރިޕޯޓުގައި ބުނާ ގޮތުން ކަނޑުން ނެގޭ އިގްތިސާދީ ފައިދާ 2030 ވަނަ އަހަރާ ހަމައަށް ދާއިރު 3 ޓްރިލިއަން އެމިރިކާ ޑޮލަރަށް އަރާނެއެވެ.
އިނގިރޭސި ސަރުކާރުގެ އިސް ސައިންސުވެރިންތަކެއް ސަރުކާރަށް ހުށަހެޅި މި ރިޕޯޓުގައި ވާގޮތުން ޕްލާސްޓިކުގެ ސަބަބުން ކަނޑުތަކަށް ލިބޭ ގެއްލުމުގެ މިންވަރު ދެނެގަނެވިފައި ނުވި ނަމަވެސް އޭގެ އަސަރު ކަނޑުތަކަށް ވަރަށް ބޮޑަށް ކުރެއެވެ. އަދި އީ.ކޮލީ ފަދަ ބެކްޓީރިޔާތައް ފެތުރުމުގައިވެސް ޕްލާސްޓިކު ކުނީގެ ދައުރު ބޮޑެވެ.
ރިޕޯޓު ތައްޔާރުކުރެއްވި ސައިންސުވެރިން ދެކޭގޮތުގައި ދުނިޔޭގެ ކަނޑުތައްވަނީ "މީސްތަކުންގެ ލޯމަތިން ދުރަށްގޮސް، ސިކުނޑިތަކާވެސް ދުރުވެފައެވެ." އަދި ހަނދާއި މާސްގެ ބިމާ ބެހޭގޮތުން ކަނޑުތަކަށްވުރެ ބޮޑަށް މީހުންނަށް އެނގެއެވެ.
ފޯސައިޓް ރިޕޯޓްތަކަކީ މުހިއްމު މައްސަލަތަކާ ބެހޭގޮތުން އިނގިރޭސި މިނިސްޓްރީތަކަށް ދޭތެރެ ދޭތެރެއިން ހުށަހެޅޭ ރިޕޯޓުތަކެކެވެ. ކަނޑުތަކާ ބެހޭ މި ރިޕޯޓު ވަނީ ކަމާ ގުޅުން ހުރި ހަތަރު މިނިސްޓްރީއަކަށް ހުށަހެޅިފައެވެ.
"ކަނޑަކީ އަހަރުމެންގެ އިގްތިސާދީ މުސްތަގްބަލަށް ވަރަށް މުހިއްމު ތަނެއް. ކާނާގެ ވަސީލަތްތައް ހޯދުމަށް 9 ބިލިއަން މީހުން ބަލާނީ ކަނޑަށް. އެހެނަސް، ކަނޑުތަކާ ބެހޭގޮތުން އަހަރުމެންނަށް އެނގެނީ ވަރަށް ކުޑަ އެއްޗެއް." ބީބީސީއާ ވާހަކަފުޅު ދައްކަވަމުން، މިރިޕޯޓު ތައްޔާރުކުރެއްވި ބޭފުޅަކު ކަމުގައިވާ ޕްރޮފެސަރ އެޑްވަޑް ހިލް ވިދާޅުވިއެވެ. އޭނާއަކީ އިނގިރޭސިވިލާތުގެ ނޭޝަނަލް އޯޝިއަނޯގްރާފީ ސެންޓަރުގެ ސައިންސުވެރިއެކެވެ. "ފަޒާއަށް ދަތުރުކުރުމަށް އަހަރުމެން ގިނަ އަދަދެއްގެ ފައިސާ އިންވެސްޓުކުރަމު. އެތާނކު ދިރުމެއް ނެތް. ކަނޑުތަކުގެ އަޑި ވަނީ ދިރުންތަކުން ފުރިފަ. ކަނޑުތަކުގެ އަޑިއަށް އަހަރުމެން ދަތުރުކުރަން ޖެހޭ." އޭނާ އިތުރަށް ވިދާޅުވިއެވެ.
ޕްލާސްޓިކުން ތިމާވެށި ހަލާކުވުން ހުއްޓުވުމަށްޓަކައި، ކަނޑުތަކަށް ޕްލާސްޓިކު ނޭޅޭނެ ގޮތްތައް ހޯދުމާއި، ބަޔޯޑިގްރޭޑަބްލް ޕްލާސްޓިކު އުފެއްދުން އިތުރުކުރުމާއި، ކަނޑުގެ ދިރުން ރައްކާތެރިކުރުމާމެދު އާއްމުން ހޭލުންތެރި ކުރުމުގެ މަސައްކަތް އިތުރުކުރަން ޖެހޭ ކަމަށް ރިޕޯޓުގައި ފާހަގަކޮށްފައި ވެއެވެ.
ގްރީންޕީސް ޖަމާއަތުން ލަފާކުރާ ގޮތުގައި އަހަރަކު 12 މިލިއަން ޓަނުގެ ޕްލާސްޓިކު، ކުނީގެ ގޮތުގައި ދުނިޔޭގެ ކަނޑުތަކަށް އެޅެއެވެ.
ޚަބަރު: ބީބީސީ، ދަ ޑެއިލީ ޓެލެގްރާފް
