(23 ސެޕްޓެމްބަރ 2026 ގައި ޝާއިޢުކުރި ބަޔާގުޅޭ)
" އަހަރެންގެ ގެޔަށްވެސް މިހާރު ވަނީ ހެއްޔެވެ ؟ ކުރީ ދުވަހު ކެފޭއަށް ދިޔައިމަ އަހަރެން ދެއްކި ވާހަކައިން އެއްޗެއް ނުވިސްނުނީ ދޯއެވެ ؟ އަހަރެންގެ ކޮއްކޮ އެހާ ކުޑަވެފަ ބޭބެ އެހާ ބަލިވީމަ ، ތިބާއަށް އެކަމުގެ ފައިދާ ނެގޭނެހެން ހީވަނީ ހެއްޔެވެ؟ އެހެންނެއް އެކަމެއް ނުވާނެއެވެ. " ރާބިޔާ ހިތްހަމަ ނުޖެހިފައިހުރެ ބުނަމުން ގެންދިޔައެވެ.
ތޮއްޔިބު އެއްޗެކޭ ބުނަން އަނގަހުޅުވައިލިތަނާ ، އޭނާ އަނގަ ހިމޭނުން ލައިގެން ހުންނާށޭ ، ތޮއްޔިބާ ވާހަކަ ދައްކާނީ ފަހުންކަމަށް ބުނެ ރާބިޔާ ، ޔޮއްޔިބުގެ އަނގަ ބަންދު ކޮށްލިއެވެ.
" ކައިވެނީގެ ވާހަކަ ދައްކަން ، އަހަރެން މިގޮތަށް އައުމަކީ ރަނގަޅުކަމެއް ކަމަކަށް އަހަރެންނަކަށްވެސް ނުފެނެއެވެ. އެހެންނަމަވެސް ރާބިޔާއަށްޓަކައި އަހަރެންގެ ހިތުގައި އުފެދިފައިވާ އިޙްސާސްތައް ޠޯހިރުވެފައި ސާފެވެ. އަހަރެންގެ ގޯސް އެއްވެސް ނިޔަތެއް ނެތެވެ. " މުދައްސިރުވެސް ރާބިޔާއާ މުޚާތަބު ކުރިއެވެ.
މުދައްސިރަށް ރައްދުދޭން ރާބިޔާ އަނގަ ހުޅުވައިލިތަނާ ، ނުޢުމާން އޭނާ ހުއްޓުވިއެވެ. އަދި ތަންކޮޅެއް ހަމަޖެހިލައިގެން ވާހަކަ ދެއްކުމަށް ރާބިޔާގާތު ބުނެ ، މުދައްސިރު އިށީނުމަށް ޢިޝާރާތް ކުރިއެވެ.
މުދައްސިރު ބޭންދުމަށްފަހު ، ރާބިޔާގެ އަތުގައި ހިފައިގެން ގޮވައިގެންގޮސް ކައިރީގައިހުރި ކޮޓަރިޔަކަށް ވައްދައި ދޮރު ބަންދު ކުރިއެވެ.
" ރާބިޔާގެ ގޮތްދޫ ނުކުރުމާއި މާބޮޑަށް ގަދަކަން ދެއްކުމަށް ހުރިހާ ވަގުތެއް ކަމަކު ނުދާނެއެވެ. މިހާރު އަހަރެމެންނަށް ކުރިމަތިވެފައި މިއޮތް ޙާލަތަކީ އެންމެ ދިހަ ދުވަހުގެ ޙާލަތެކެވެ. ދިހަވަނަޔަށްވާ ދުވަހު ، އެ ގުންޑާ ޖާވިދު އައިސް އަހަރެމެންނަށް ހަދާނެ ގޮތެއް ހަދާފައ ރާބިޔާ ނަގައި ގަނެގެން ގެންދާނެއެވެ. އެއީ ، ޝައްކެއްވެސް އޮތްކަމެއް ނޫނެވެ. ﷲ ގެ ކުޅަދުންވަންތަ ކަމުން މިކަހަލަ ފުރުޞަތެއް ލިބޭނީ މަދު ފަހަރަކު އެވެ. ގެޔަށް އައިސް އެއިނީ ރަނގަޅު މީހެކެވެ. " ނުޢުމާން އާދޭސް ކުރަމުން ގެންދިޔައެވެ.
މުދައްސިރާ ގުޅިގެން އޭނާ ނުޢުމާނުގާތު ދެއްކި ހުރިހާ ވާހަކައެއް ރާބިޔާއަށް ކިޔައިދިނެވެ. އެހެނަސް ، ނުޢުމާނުގެ ވާހަކައިން އެންމެ ތަންކޮޅެއްވެސް ޤަބޫލު ކުރާކަށް ރާބިޔާ ތައްޔާރެއް ނޫނެވެ. ކައިވެނީގެ ދަޢުވަތު ހިފައިގެން އައިސް ފިރިހެނުން ކަނޑާނެ ފޮނިތަކުގެ މަތިން ރާބިޔާ އޭނާގެ ބޮޑުބޭބެޔަށް ހަނދާން ކޮށްދިނެވެ. އެއީ ކޮން ޚާންދާނެއްގެ ކިހާވަރެއްގެ މީހެއްކަމެއް ނޭނގެއެވެ. އޭނާ ދައްކާހާ ވާހަކައެއް ޤަބޫލުކުރާކަށް ނުޖެހޭކަމަށް ރާބިޔާ ބުނަމުން ގެންދިޔައެވެ.
ނުޢުމާން އޭނާގެ ތުނބުޅީގައި ހިފައިލިއެވެ. އަދި ބުންޏެވެ.
" އަހަރެންގެ ތުނބުޅީގައި ޖަހާފައި މިހިރަ ނުރަޔަކީ ، އެންމެ ދުވަހަކުން ރީއްޗަކަށް ޖަހާފައިހުރި އެއްޗެއް ނޫނެވެ. އޭނާގެ މާތްކަމާއި ރިވެތި އަޚުލާޤު އޭނާގެ ލޮލުންނާއި މޫނުމަތިން އަހަރެންނަށް އެބަ ފެނެއެވެ. އޭނާ މިގެޔަށް އައިސް މިވީ ދިހަވަރަކަށް މިނިޓްގެ ތެރޭގައި އަހަރެންނަށް އެ ފެންނަ ކަންކަން އޭނާގެ ފަރާތުން އެބަ ކަށަވަރު ވެއެވެ. " ނުޢުމާނު ބުންޏެވެ.
އޭނާގެ މާތްކަމާއި ނިޔަނެތިކަމަކީ ރާބިޔާއަށް މުހިންމު ކަމެއްނޫންކަމަށް ރާބިޔާ ބުންޏެވެ. އަދި ، ބޮޑުބޭބެ ގޮސް އޭނާ ގެއިން ފޮނުވައިލުމަށް ރާބިޔާ އެދުނެވެ. އެހެން ނޫނީ ، އޭނާގޮސް އެތިވަރު ގޮވައިގެންފައި އޭނާ ގެއިން ފޮނުވާލައިފިއްޔާ ، ބޭބެ އެހާ ހިތްހަމައެއް ނުޖެހޭނެއެވެ.
އެމީހުންނަށް ﷲ ބައްލަވައި ވޮޑިގެންފިއެވެ. މިއަދު އެ ފޮނުއްވި ރަޙުމަތާމެދު ނުވިސްނައި ، އެ ފުރުޞަތު ދޫކޮށްލައިފިނަމަ ، އެ މީހުން އަމިއްލަޔަށް އެ ހުށަހެޅެނީ ، ދިހަދުވަހުގެ ތެރޭގައި ކުރިމަތިވާން އޮތް މުޞީބާތަކަށް ކަމުގައި ބުނެ ، ނުޢުމާން ރާބިޔާއަށް ނަޞޭޙަތް ދެމުން ގެންދިޔައެވެ. އެހެންނަމަވެސް ، އެއިންކަމަކަށް ވިސްނާކަށް ރާބިޔާ ބޭނުމެއް ނޫނެވެ.
" ތިޔައީ އަންހެން ކުއްޖެކެވެ. އަންހެންކުދިންގެ ޟަޢީފުކަމާމެދު ވިސްނުން ހުއްޓެވެ. އެކަން ހަނދާން ނައްތައި ނުލާށެވެ ! ރާބިޔާ ބިރެއް ނުގަނެއެވެ. އެކަމަކު ، އަހަރެން ބިރުގަނެއެވެ. ދިހަދުވަސްފަހުން ، އެ ގުންޑާ ކަލޭގެ މިތަނަށް އައިސް ، އަހަރެންނާ ތޮއްޔިބަށް އަނިޔާކޮށްފައި ރާބިޔާ ގޮވައިގެން ދިޔައިމަ ، އަހަރެމެން ވަންނާނީ ކޮންތާކަށް ހެއްޔެވެ ؟ އަހަރެންގެ ބަލިޙާލު ހުރިގޮތުން ، ރާބިޔާ ކީއްކުރަން ހެއްޔެވެ ؟ އަހަރެންގެ އަމިއްލަ ނަފްސުވެސް އެ ގުންޑާގެ އަނިޔާއިން ސަލާމަތެއް ނުކުރެވޭނެއެވެ. ކަން އޮތްގޮތް ޤަބޫލު ނުކުރަން ތިއުޅެނީ ކީއްވެގެން ހެއްޔެވެ ؟ " ރޮވިފައި އިނދެ ނުޢުމާނު ސުއާލު ކުރިއެވެ.
ނުޢުމާން ތެދުވެގެންގޮސް ، ރާބިޔާގެ ފައިބުޑުގައި އިށީނދެ އޭނާގެ ބަސް ޤަބޫލުކުރުމަށް އެދި ރާބިޔާއަށް އާދޭސް ކުރަމުން ގެންދިޔައެވެ. ރާބިޔާ މީހަކާ ދެވާފައި ފިރިމީހާޔާ ޙަވާލު ކުރުމުގެ އުފާއޭނާއަށް ދިނުމަށް އެދުނެވެ. އެހެން ނޫންކަމަށް ވަންޏާ ، މަރުވެފައިވާ އޭނާގެ ކޮއްކޮއަށް ، ރާބިޔާމެންނާ ބެހޭގޮތުން ދޭނީ ކޮން ޖަވާބެއްތޯ ސުއާލު ކުރިއެވެ. ރާބިޔާ އެހުރީ ފިރިފުރާވަރަށް އަރާފައެވެ. އެހިސާބަށް އޭނާ ބަލައި ބޮޑު ކުރުމަށްފަހު ، ދެން ކުރިމަތިވާނެ ގޮންޖެހުންތައް ބޮޑުވާނެއެވެ. އެމީހުންފަދަ ނިކަމެތި ބަޔަކަށް ގުންޑާއިންނާއި ބާރުގަދަ ފައިސާވެރިންގެ މައްޗަށް އޮންނާނީ އިތުރަށް ނިކަމެތި ވުމެވެ.
ރާބިޔާގެ މަންމަ މިއާދޭސް މިގޮތަށް ރާބިޔާއާ ކޮށްފިއްޔާވެސް އެކަމަށް ކުރާނީ އިންކާރުތޯ ނުޢުމާން ސުއާލު ކުރިއެވެ. އެ ހިސާބުން ރާބިޔާއަށް ހުއްޓުން އެރިއެވެ. ބޮޑުބޭބެ އެދައްކާ ވާހަކައިގައި ހަމައެއް އޮތްކަން ރާބިޔާއަށް ވިސްނައި ގަނެވުނީ އެހިސާބުންނެވެ. ބޮޑުބޭބެޔާއެކީ ރާބިޔާވެސް އެ ކޮޓަރިން ނުކުތެވެ. އޭރު އޭނާވެސް ހުރީ ފެންކަޅި ވެފައެވެ. އަދި ނުޢުމާނުވެސް ހުރީ ރޮއިފާކަން އެނގެއެވެ.
" އަހަރެންނާ ކައިވެނި ކުރަން ތިއުޅެނީ ކޮން މަޤްޞަދެއްގައިކަން ސާފުކޮށްދީފާނަން ހެއްޔެވެ ؟ އަހަރެން ތިބާއާ ކައިވެނި ކުރުމަކީ އަހަރެންގެ ބޮޑުބޭބެގެ އެދުމެއް ކަމަށްވާތީ ، އެކަމާމެދު ވިސްނައިލަން އަހަރެންނަށް މަޖުބޫރު ވީއެވެ. އެކަމަކު ، ކައިވެންޏަށް އާނއެކޭ ބުނުމުގެ ކުރިން ، އަހަރެން ކަހަލަ ނިކަމެތި ފަޤީރެއްގެ ކައިވެއްޏަށް އެދިގެން ތިއައި މަޤްޞަދު ، އަހަރެންނަށް ސާފުވާން ބޭނުމެވެ. " ރާބިޔާ ބުންޏެވެ.
މާގިނަ ސުއާލު ކުރިމަތި ނުކުރުމަށް ނުޢުމާން ބުނުމާއެކީ ، އޭނާ އެކުރި ސުއާލުތަކުގެ ޖަވާބު އޭނާއަށް އެނގުން މުހިންމު ކަމުގައި ރާބިޔާ ބުންޏެވެ. ކުރިން ބައްދަލުވެފައި ނެތް ، އަދި އެއްވެސް ވަރަކަށް ނޭނގޭ ބީރައްޓެހި ސަހަރެއްގެ ނުދަންނަ ފިރިހެނަކާ ކައިވެނީގެ ގުޅުމަކުން ގުޅޭއިރު ، އެއްވެސް އެއްޗެއް ނޭނގިހުރެ އެފަދަ ކަމެއް ކުރާނީ ކިހިނެއްތޯ ރާބިޔާ ސުއާލު ކުރިއެވެ. ރާބިޔާ އެ ދައްކާ ވާހަކަތަކަށް މުދައްސިރުވެސް އެއްބަސް ވިއެވެ. އެ ސުއާލުތަކުގެ ޖަވާބު އެނގުން އެއީ ރާބިޔާގެ ޙައްޤެކެވެ.
" ތިގޮތަށް އަމިއްލަ ނަފުސަށް ވިސްނައިދީ އަމިއްލަ ނަފުސަށް ޔަޤީންކަން ހޯދުމަކީ އަހަރެން ވަރަށް ގަޔާވާ ކަމެކެވެ. އެއީ ވިސްނުންތެރިންގެ ކަމެކެވެ. ތިޔައީ ވަރަށް ސާދާ ކުއްޖެކެވެ. ބުނަންވާ އެއްޗެއް ބުނަން ޖެހިލުމެއް ނުވަމުއެވެ. އެކަހަލަ އިންސާނުންނަށް އަހަރެން ވަރަށް ޤަދަރު ކުރަމެވެ. ފަޤީރުކަމާއި މުއްސަނދިކަމުގެ ތަފާތަކީ ، އަހަރެންނަށް މައްސަލައެއް ނޫނެވެ. އަހަރެމެން އެންމެންނަކީވެސް އިންސާނުންނެވެ. ފަސް އިނގިލި އެއްވަރެއްވެސް ނޫނެއްނޫން ހެއްޔެވެ ؟ އަމާނާތްތެރިކަމާއި ތެދުވެރިކަމާ އަދި ހިތްވަރާއެކީ މަސައްކަތްކުރާ ކޮންމެ އިންސާނަކަށްވެސް ، ﷲ މަގު ދައްކަވާނެއެވެ. ރާބިޔާ ތި ހިންގަނީ ކުޑަ ކެފޭ އެއްގެ ވިޔަފާރިއެކެވެ. އަހަރެންނަކީ ވަރަށް ބޮޑު ކުންފުންޏެއްގެ މެކެނިކަލް އިންޖިނިއަރ އެއްގެ ވަޒީފާ އަދާކުރާ މީހަކީމެވެ. އަހަރެމެން ދެމީހުންގެ އެއްގޮތް ކަންތައްތަކެއް އެބަ ހުއްޓެވެ. އެއީ ، އަމާނާތްތެރިކަމާއި ތެދުވެރިކަމާއެކީ ހިތްވަރާއެކީ ބުރަކޮށް މަސައްކަތް ކުރުމެވެ. އެ ކަމުގައި އަހަރެމެން ދެމީހުން އެއްވަރެވެ. އަހަރެންނަށް ރާބިޔާ ވަރަށް ކަމުދެއެވެ. އަހަރެންގެ އަނބިމީހާގެ ކިބައިގައި ހުންނަން އަހަރެން ބޭނުންވާ ހުރިހާ ސިފަތަކެއް ރާބިޔާގެ އެބަ ހުއްޓެވެ. " މުދައްސިރު ބުންޏެވެ.
މުދައްސިރު ވާހަކަ ދައްކަމުން ގެންދިޔަ އިރު އެއްވެސް މީހަކު އަނގަޔަކުން ނުބުނެއެވެ. އެންމެންވެސް ތިބީ ، މުދައްސިރު އެ ދައްކާ ވާހަކަ ކަނުލައި އަޑުއަހާށެވެ. އަނެއްކާވެސް ވާހަކަ ދައްކަން ފެއްޓީ މުދައްސިރެވެ. އޭނާގެ އަނތްބެއްގެ ގޮތުގައި ، ޤަދަރާއި ޢިއްޒަތާ އަދި އިޙްތިރާމާއެކީ ، ރާބިޔާ ބަލައިގަނެ ، އޭނާގެ ޙަޔާތުގެ ބައިވެރިޔަކަށް ރާބިޔާ ހަދަން ، ބޭނުންވާ ކަމުގައި މުދައްސިރު ބުންޏެވެ. އެކަމުގައި ގޮތް ނިންމާނީ ރާބިޔާއެވެ. އެއްވެސް މީހެއްގެ ނުވަތަ އެއްވެސް ކަމެއްގެ ނުފޫޒުން ރާބިޔާއަށް އެކަމުގައި އާނއެކޭ ބުނަން މަޖުބޫރު ނޫންކަން މުދައްސިރު ހަނދާން ކޮށްދިނެވެ. ރާބިޔާ ބޭނުންވާ ގޮތެއް ނިންމަން ފުރިހަމަ އިޚްތިޔާރު ރާބިޔާއަށް ލިބިގެން ވެއެވެ. ނުޢުމާން ބޭބެވެސް ތޮއްޔިބު ކޮއްކޮވެސް ، ރާބިޔާއަށް މަޖުބޫރު ނުކުރަން މުއްދަސިރު އެދުނެވެ. އެއީ ރާބިޔާގެ ޙަޔާތެވެ. ގޮތް ނިންމާނީ ރާބިޔާއެވެ.
" މައްސަލައެއް ނެތެވެ. އެކަމަކު އަހަރެންގެ ޝަރުތެއް އެބަ އޮތެވެ. " ރާބިޔާ ބުންޏެވެ.
އެންމެންވެސް ސިހިގެން ދިޔައެވެ. އަދި އެންމެންގެ މޫނުމަތި އަލިވެ އުޖާލާވެގެން ދިޔައެވެ.
*********************************
ޝޭރުދިލް ބަލިވެ އުޅޭތީ ޑޮކްޓަރަށް ދެއްކުމުން ވިހައިގެ އަސަރު އޭނާގެ ލެއިން ފާޅުވިއެވެ. އަދި އެކަމާބެހޭ ފަރުވާ މިހާރު އޮތީ ފައްޓާފައެވެ. އެވާހަކަ ބީބީޖާނަށް ސިއްރު ކުރުމަށް ޝޭރުދިލްގެ އަންހެނުންނާއި ޙިޖާޒީ އަދި އަވީގެ ކިބައިން ޝޭރުދިލް އެދުނެވެ. މަންމަޔަށް އެކަން އެނގިއްޖިއްޔާ ކަނބޮޑުވެގެންގޮސް އަވަދި ވެދާނެއެވެ. އެގެޔަކީ މާގިނަބަޔަކު ބަދިގޭގައި މަސައްކަތްކުރާ ގެޔެއް ނޫނެވެ. ބޭރު މީހަކަށް އުޅެނީ ޅަވަރެއްގެ ޚާދިމާއެކެވެ. އެ ޚާދިމާގެ މައްޗަށް އަވީ ވަނީ ކުރިން ޝައްކުތަކެއް ކޮށްފައެވެ. އެއީ ޖާވީދު ގެންގުޅޭ މީހަކާ ރައްޓެހިވެގެން އުޅޭ ކުއްޖެކެވެ. ޖާވީދުގެ މީހާ އެ ކުއްޖާޔާ ރައްޓެހިވެގެން އުޅެނީ ، އެގޭތެރޭގައި ހިނގާ ކަންކަމުގެ މަޢުލޫމާތު ހޯދުމަށްކަމަށް ބުނެ ، އެކަމަށް ޖާވީދުގެ ހުއްދަ އޮތީ ހޯދާފައެވެ. އެހެންކަމުން އެ ކަމާ އެކުއްޖާޔާ ކޮންމެވެސް ވަރެއްގެ ގުޅުމެއް އެބައޮތްކަމަށް އެންމެންވެސް ޤަބޫލު ކުރެއެވެ. ބަދިގޭގައި ދެން އުޅެނީ ޝޭރުދިލްގެ އަންހެނުންނެވެ. ދޭތެރެޔަކުން އަވީވެސް ބަދިގެޔަށް ވަދެލައެވެ. އެކަމަކު ، ޝޭރުދިލްގެ ކާ ތަކެއްޗަށް ޒަހަރުލާނީ ، ޚާދިމްކުއްޖާ ނޫން އެހެންކާކުކަން އެމީހުންނަށް ހޯދައި ގަންނާކަށް ނޭނގުނެވެ.
ޝޭރުދިލްއަކީ އެ ޢާއިލާގެ އެންމެ ހިންގުންތެރި އަދި ކަންކަމަށް ބަސްކިޔައި ގޮތްކިޔައި އުޅޭ މީހާއެވެ. ޙިޖާޒީއަކީ އެ ޢާއިލާގައި އެންމެ ހަގަށް ހުންނަ ކުއްޖާކަމަށް ވާތީ ، ޝޭރުދިލްއަށް ގޮތެއް ވެއްޖެނަމަ ، އެ ގެޔާއި ޤަބީލާ އަދި އެމީހުންގެ ދަނޑުބިންތަކުގެ ހުރިހާ ކަމެއް ބެލެހެއްޓުން ބަދަލުވެގެންދާނީ ޙިޖާޒީގެ މައްޗަށެވެ. ޝޭރުދިލްއާއި ޙިޖާޒީއަކީ ޖާވީދު ބަލާގޮތުގައި އޭނާގެ އެންމެ ބޮޑު ދުޝްމަނުންނެވެ. ޝޭރުދިލް ނެތުމަށްފަހު ޙިޖާޒީ އެހުރިހާ ޒިންމާއެއް ނެގުމަށް ޙިޖާޒީގެ ކިބައިން ވަޢުދު ކުރުވިއެވެ. ޝޭރުދިލް އަދި ޙިޖާޒީ އެވާހަކަ ދައްކަން ތިއްބާ ، ދަނޑުބިމުގެ ކަންކަމާ ޙަވާލުވެ ހުންނަ އިސްމީހާ ދުވަމުން ދުވަމުން އެތަނަށް އައެވެ. އަދި ދިލް ނަވާޒް ޚާނާއި ގުލްރޭޒްޚާން ޤަތުލުކޮށްފި ކަމަށް ބުންޏެވެ.
******************************
ކައިވެނީގެ ގުޅުންފަދަ ގުޅުންތަކަކީ ، ޝަރުތުތަކެއްގެ މައްޗަށް ޤާއިމްކުރުން ރަނގަޅު ގުޅުން ނޫންކަމަށް ނުޢުމާން ބުންޏެވެ. ރާބިޔާ އެ ކައިވެންޏަށް ރުހެންޏާ އޭނާވެސް އެކަމަށް ރުހި ޤަބޫލެވެ. އޭނާގެ އެއްވެސް ޝަރުތެއް ނެތެވެ. ނުޢުމާން ބޭނުންވަނީ ، ﷲ އަށް ވަކީލުކޮށްފައި ، އެ ގުޅުން ޤާއިމް ކުރުމަށެވެ. އެހެނަސް ، މުދައްސިރު ބޭނުންވީ ރާބިޔާ ބުނަން ބޭނުންވާ ވާހަކައެއް އަޑުއަހާށެވެ. ރާބިޔާގެ ޝަރުތަކީ ކޮބައިތޯ އޭނާ ސުއާލު ކުރިއެވެ.
އަނެއްކާވެސް ނުޢުމާން އެދެމެދަށް ވަނެވެ. އެއްވެސް ޝަރުތެއް ނުއޮންނާނެކަމަށް ބުނަމުން ، ތިންވަޔަށްވާ ދުވަހަކީ ހުކުރު ދުވަސްކަމަށް ވާތީ ، ހުކުރު ދުވަހު ކައިވެނި ކުރަން ފެންނަ ކަމަށް ނުޢުމާން ބުންޏެވެ. ތިންދުވަހަކީ މުދައްސިރަށް އަވަސް މުއްދަތެކެވެ. އޭނާގެ ދައްތަ ، އޭނާގެ ކައިވެންޏަށް ގެނައުމަކީ އޭނާ މާކުރީއްސުރެ ދެކެމުން އަންނަ ހުވަފެނެކެވެ. ދައްތަ ޔޫއޭއީއަށް ދިޔަފަހުން އަދި މުދައްސިރަކާ ދިމަލެއް ނުވެއެވެ. ވާހަކަ ދައްކައި އުޅެނީ ވީޑިއޯ ކޯލް މެދުވެރި ކޮށެވެ. ދައްތަ ނޫން އެހެންމީހަކު އޭނާގެ ނެތްއިރު ، ދައްތަ އެ ރަސްމިއްޔާތުގައި ބައިވެރި ވުމަކީ މުދައްސިރުގެ ވަރަށް ބޮޑު އެދުމެކެވެ.
*****************************
ޖާވިދު އޭނާގެ މަންމައަށް ޝޭރުދިލްކުރި މަލާމާތުގެ ބަދަލު ހިފައިފިންކަމަށް ، ފޯނުކޮށްފައި ބޭބެގާތުގައި ބުންޏެވެ. ޝޭރުދިލްގެ ދެމީހުން އޭނާ ދެންމެއަކު އެއައީ މަރާލައިފައެވެ. އެކަމަށް ބޭބެ ، އައްސަރިބަހާ ސާބަސް ދިނެވެ. އަދި ، ޝޭރުދިލްމެންނަށް އެންމެ ތަންފުކެއްވެސް ދޫނުކުރުމަށް ބުނެ ޖާވިދަށް ހިތްވަރު ދިނެވެ. ޝޭރުދިލްގެ އަތުން އޭނާއަށް ޙައްޤުވާ ބައިގެ އިތުރަށްވެސް މުދަލާއި ތަކެތި އަތުލާނެކަމަށް ޖާވިދު ބުންޏެވެ.
އޭނާގެ ހިތަށް ހަމަޖެހުމެއް ލިބޭނީ ޝޭރުދިލްމެންގެ ހުރިހާ ކުދިން މަރާފައި ، ގަރްހް ޢަލީޚާން ނިސްބަތްވާ ޤަބީލާގެ ސަރުދާރަކަށް ، ޖާވިދުވީ ދުވަހަކުންކަމަށް ބޭބެ ބުންޏެވެ. އެކަން އެގޮތަށް ކުރާނެކަމަށް ޖާވިދުވެސް ބުނެ ބޭބެޔަށް ވަޢުދު ވިއެވެ. (ނުނިމޭ)
