ޖަލުހުކުމެއް ތަންފީޒު ކުރައްވަމުން ދަނިކޮށް ބޭސްފަރުވާއަށް ރާއްޖެއިން ބޭރަށް ވަޑައިގެން ތިއްބެވި ކުރީގެ ރައީސް މުހައްމަދު ނަޝީދާއި، ޖުމްހޫރީ ޕާޓީގެ ލީޑަރު ގާސިމް އިބްރާހީމް ރާއްޖޭގެ ކަންކަމާބެހޭ ގޮތުން ވާހަކަ ދެއްކެވުމުގެ ބަދަލުގައި ފުރަތަމަ ހުކުމް ތަންފީޒު ކުރެއްވުމަށް ތިމާވެއްޓާ ބެހޭ ވަޒީރު އެބޭފުޅުންނަށް ގޮވައިލައްވައިފިއެވެ.
"ރާއްޖެ ވަޑައިގެން ފުރަތަމަ އެބޭފުޅުންގެ ޖަލުހުކުމް ތަންފީޒު ކުރައްވާފައި ދެން ރާއްޖެއާބެހޭ ވާހަކަ ދައްކަވާ. ދެން މިހާރު ބޭރުގައި ތިބެގެން މިދައްކަވާ ވާހަކަ އަޑުއަހާނެ ބައެއްވެސް މިހާރުނެތް،" މިނިސްޓަރ ވިދާޅުވިއެވެ. މިނިސްޓަރ އެހެން ވިދާޅުވީ މިއީ އިންޑިއާ އިސްވެ ރާއްޖެއާމެދު ފިޔަވަޅުއަޅައި ގެއްލެމުންދާ ޑިމޮކްރަސީ އިޔާދަ ކުރުމަށް ޑރ. ޖަމީލް އިންޑިއާގެ ނޫހެއްގައި ވިދާޅުވުމުން އެމަށް ރައްދު ދެއްވަމން މިނިސްޓަރ ވިދާޅިވި ވާހަކައެވެ.
ވަޒީރު ތާރިގު އިބްރާހީމް ވިދާޅުވީ ކުރީގެ ނާއިބު ރައީސް ޑރ. މުހައްމަދު ޖަމީލްވެސް ހިމެނޭ ގޮތުން ރާއްޖެއިން ބޭރަށް ގޮސްތިބި ސިޔާސީ ބޭފުޅުން ދައްކަވާ އެއްވެސް ވާހަކައެއް ދިވެހި ރައްޔިތުން މިހާރު އައްޑުނާހާކަމަށެވެ. އެހެންވެގެން ބޭރު މީހުންގާތު ކޮންމެވެސް އެއްޗެހިތަކެއް އެބޭފުޅުން ވިދާޅުވަމުން ގެންދަވަނީ ކަމަށް ވަޒީރު ވިދާޅުވިއެވެ.
ޑރ. ޖަމީލް އިންޑިއާގެ ނޫހަކަށް ދެއްވައިފައިވާ މައުލޫމާތު ތަކާބެހޭ ގޮތުން މިނިސްޓަރި ވިދާޅުވީ ޖަމީލް ރާއްޖެއިން ބޭރުގައި ހުންނަވާތާ ވަރަށް ދުވަސް ވެޖެކަމަށެވެ. އެހެންވީމާ ރާއްޖޭގެ ކަންކަން ހިނގާގޮތެއް އެބޭފުޅާއަށް މާރަނގަޅަށް އެނގިވަޑައި ނުގަންނަވާނެ ކަމަށެވެ.
"މިހާރު އެ ހުންނަވަނީ އިދިކޮޅު ފަރާތްތަކަށްވެސް ނުވަދެވި ސަރުކާރަށް ވެސް ނުވަދެވި މެދު ތެރޭގައި. އަބަދުވެސް ބޭނުންފުޅުވަނީ ކޮންމެވެސް ގޮތަކުން ކޮންމެވެސް ވާހަކައެއް ޑިމޮކްރަސީއޭ ކިޔައިގެން ދައްކަވަން،" ތާރިގު ވިދާޅުވިއެވެ.
ބޭރުގައި ތިއްބަވައިގެން އެ ހައްދަވަނީ ދޮގު ކަމަށްވެސް ވަޒީރު ވިދާޅުވިއެވެ.
