އެންމެ އިސްކަމެއްދީގެން ކުރެވޭ މަސައްކަތަކީ ފެނުގެ ޔަގީންކަން ކަށަވަރުކުރުމަށް ކަމުގައި އެމްޑަބްލިޔުއެސްސީގެ މެނޭޖިން ޑިރެކްޓަރ އަބްދުލް މަތީން މުހައްމަދު ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުން މަތީން ވިދާޅުވީ އެމްޑަބްލިޔުއެސްސީން ހުޅުމާލޭގައި ޤާއިމްކުރާ 5000 ޓަނުގެ ފެން އުފެއްދޭ ނިޒާމުގެ މަސައްކަތް ނިންމާ އަންނަ މަހު ބޭނުންކުރަން ފެށޭނެކަމަށެވެ.
މިދިޔަ އަހަރުގެ ތެރޭގައި 5000 ޓަނުގެ ޕްރޮޑަކްޝަން ކެޕޭސިޓީ އިތުރުކުރެވިފައިވާ ކަމަށާއި އިތުރު 5000 ޓަނުގެ ޕްރޮޑަކްޝަން ކެޕޭސިޓީގެ މަސައްކަތް ހުޅުމާލޭގައި ހިނގަމުން އަންނަކަމަށް ވެސް ވިދާޅުވިއެވެ. އަދި މަހެއްހާ ދުވަހުގެތެރޭގައި ނިންމާފައި ބޭނުން ކުރަން ފެށޭނެ ކަމަށް އުއްމީދުކުރައްވާ ކަމަށް ވެސް ވިދާޅުވިއެވެ.
މަތީން އިތުރަށް ވިދާޅުވީ ޕްރޮޑަކްޝަން ކެޕޭސިޓީއަށް އިތުރުކުރެވިގެންދާ 10000 ޓަނާއެކު ސްކޫލް ހުޅުވުމާއި ރޯދަމަހާއި އެކު ފެނަށް އޮންނަ ޑިމާންޑަށް ކޭޓަރ ކުރެވޭނެ ކަމަށެވެ.