( 26 ނޮވެމްބަރ 2025 ގައި ޝާއިޢުކުރި ބަޔާގުޅޭ )
މީރަބަށް ޑޮކްޓަރ ލިޔެދިން ބޭސްސިޓީ ކޮބައިތޯއާއި ބޭސްނަގަން ލަސްކޮށްގެން ނުވާނެކަމަށް ރުޤިއްޔާ ބުންޏެވެ. މީރަބް އަތަކު ބޭސްސިޓީއެއް ނެތެވެ. ފަހަރެއްގައި ފާރޫޤު އަތުގައި އޮވެދާނެކަމަށް މީރަބަށް ފެނުނެވެ. ބޭސްސިޓީ ބަލައިދާން ރުޤިއްޔާ ހިނގައިގަތުމާއެކީ މީރަބް އެކަން މަނާކޮށް ، ބޭސްސިޓީ ހޯދަންދާނީ އޭނާކަމަށް މީރަބް ބުންޏެވެ. އަދި ގެއިން ނުކުމެ ބަލައިލިއިރު ، ފާރޫޤެއް ގޭދޮށުން ފެންނާކަށް ނެތެވެ. ކައިރި ގޯޅިއެއްގެ ކަންމަތީ މަޑުކޮށްލައިގެން އިނދެދާނެކަމަށް ބަލައި މީރަބް ކުރިޔަށް ހިނގައިގަތެވެ.
މަގުގެ އެއްފަރާތުން މީރަބް ހިނގަމުން ދަނިކޮށް ، އިރުކޮޅެއް ވީތަނާ ، ޕޮލިސް ޖީޕެއް އައިސް މީރަބް ހުރިހިސާބާ ކައިރިޔަށް މަޑުކޮށްލިއެވެ. ގަތްބިރުން ކުއްލިޔަކަށް ، މީރަބް އޭނާގެ މޫނު ނިވައިކޮށްލިއެވެ. އޭރު ޖީޕުން ދެ މީހަކު ފައިބައިފިއެވެ. މީރަބް ގަތީކީ އަމަށަކު ބިރެއް ނޫނެވެ. މީރަބް ހޯދުމަށްޓަކައި ، މުރުތަސިމް ނުކުރާނެ ކަމެއް ނޯންނާނެކަން މީރަބަށް އެނގެއެވެ. ކަންބޮޑުވެފައި ހުއްޓާ ، ކުރޮޅީގައި ކުއްލިޔަކަށް އެތަނަށް އައިސް އެމަޑުކޮށްލީ ފާރޫޤެވެ. ފާރޫޤަށް އެހިސާބަށް އެ އާދެވުނީ ، މީރަބްގެ ނަޞީބު ރަނގަޅުކަމުންނެވެ. އަވަހަށް ކުރޮޅިޔަށް އެރުމަށް ، އަތުގެ ޢިޝާރާތުން މީރަބަށް ފާރޫޤު އެންގިއެވެ. މީރަބް ގެންގޮސް ގެޔަށް ވައްދައި ބޭރަށް ދާން ފާރޫޤު ހިނގައިގަތްތަނާ އޭނާއަށް މީރަބް ގޮވައިލިއެވެ.
" މުރުތަސިމާއި އަހަރެންގެ ކައިވެނި ކުރެވުނީ ، އަހަރެންގެ ނުރުހުމުގައެވެ. އަހަރެންނަށް މަޖްބޫރު ކުރުވައިގެންނެވެ. " މީރަބް ބުންޏެވެ.
ފާރޫޤާ މުރުތަސިމާ ބައްދަލުވިކަމަށް ފާރޫޤުވެސް ބުންޏެވެ. އޭނާއަށް ހީވާގޮތުގައި އެއީ ، އެހާ ގޯސްމީހެއްނޫނެވެ.
" އެއީ ގޯސްމީހެއްނޫނެވެ. ގޯހީ އަހަރެންނަށް އުޅެން މަޖްބޫރުވި ޙާލަތެވެ. " މީރަބް ބުންޏެވެ.
މީރަބަށް މުރުތަސިމް ކަމުނުދާކަމަށް ވަންޏާ ކައިވެނި ކުރުމުގެ ކުރިން ނޫނެކޭ ބުނުމުގެ ޙައްޤު އޮންނާނެކަމަށް ފާރޫޤު ބުންޏެވެ. އެވަގުތު މީރަބް ފިލައިގެން ދިއުން މާ ޖާއިޒެވެ. ފާރޫޤު އެބުނީ ރަނގަޅަށް ކަމަށް މީރަބްވެސް އެއްބަސްވިއެވެ. އޭނާ ފިލައިގެންދާން ޖެހޭ ވަޤުތަކީ އެއީއެވެ. އޭރު ، އެފިޔަވަޅު އެޅުނުނަމަ ، މިހާރު އެއުޅެންޖެހޭ ޙާލަތެއް މީރަބަކަށް ކުރިމައްޗެއް ނުވީހެވެ. މީރަބް އެހެދީ ގޯހެއްކަމަށް ފާރޫޤު ބުންޏެވެ. ފަހަރެއްގައި އެއީ އޭނާގެ ހިތަށް އަންނަ ، ގޯސް ވިސްނުމަކަށްވެސް ވެދާނެއެވެ. ޙަޤީޤަތް އެނގޭނީ މީރަބަށެވެ. ރަނގަޅު ފިރިޔަކާއި ރަނގަޅު ޢާއިލާއެއް އަދި ރަނގަޅު ގެޔެއް ލިބުމަކީ ، އަންހެންކުއްޖަކަށް ލިބޭނެ އެންމެ ބޮޑު ނިޢުމަތެވެ. އެހުރިހާ އެއްޗެއް މީރަބް އެހުރީ ދޫކޮށްލައިގެންނެވެ. އޭނާގެ އެއްވެސް އެއްޗެއް ނެތްކަމަށް މީރަބް ބުންޏެވެ. އޭނާގެ މަންމައެއް ނެތެވެ. ބައްޕައެއްވެސް ނެތެވެ.
" ވާހަކައެއް އަހައިލަން ހެއްޔެވެ ؟ މީހަކަށް އޭނާގެ ބައްޕަޔަކީ އަސްލު ބައްޕަނޫންކަން އެނގިއްޖިއްޔާ ވާނީ ކިހިނެއް ހެއްޔެވެ ؟ ކުރެވޭނީ ކޮންކަހަލަ އިޙްސާސެއް ހެއްޔެވެ ؟ މަންމަޔަކީވެސް އަސްލު މަންމައެއްނޫނެވެ. ގެޔަކީވެސް އަސްލު އޭނާގެ ގެޔެއްނޫނެވެ. މަތީ ތަޢުލީމު ޙާޞިލް ކުރުމަކީ އޭނާގެ ހުވަފެނެކެވެ. އެންމެ ހިނދުކޮޅަކުން އެހުރިހާ އުއްމީދެއް ވެއްޔާ މޮޑެވުނެވެ. ކަރާޗީން އަޙްމަދުއާބާދަށް އޭނާ ގެންދެވުނެވެ. އޭނާ ގެންދެވުނު މާޙައުލުގައި އޮންނަނީ އެމީހުންގެ އަމިއްލަ ޤާނޫނާއި ހަމަތަކެވެ. އެއީ ، އޭނާއަށް ކުރިން އެނގިފައިނެތް އެއްޗެކެވެ. އަހަރެންނަކީ އެފަދަ މީހެކެވެ. އަހަރެން މިއައީ އެހުރިހާ އެއްޗެއް ދޫކޮށްލާފައެވެ. " މީރަބް ، އޭނާގެ ވާހަކައިން ތަންކޮޅެއް ކިޔައިދިނެވެ.
މީރަބާއި ފާރޫޤު ، ވާހަކަ ދައްކަން ތިއްބާ އެގޭގެ ދޮރުގައި ބަޔަކު ތަޅައިގަނެ ، އެއީ ފުލުހުންކަމަށާއި ދޮރުހުޅުވުމަށް އެންގިއެވެ.
މީރަބްގޮސް ، ގޭތެރެޔަށް ވަންނަން އަންގާފައި ފާރޫޤު ގޮސް ދޮރުހުޅުވައިލިއެވެ. ދޮރުހުޅުވައިލުމާއެކީ ، އެގެ ފާސްކުރަންޖެހޭކަމަށް ބުނަމުން ، ބަޑިހިފާފައިތިބި ފުލުހުންތަކެއް ގޭތެރެޔަށް ވަދެގަތެވެ. އެމީހުންގެ ފަހަތުން ، މުރުތަސިމްވެސް އައިސް ގެޔަށް ވަނެވެ. މުރުތަސިމަށް ފާރޫޤު ފެނުމާއެކީ ، އެއީ ކުރީދުވަހު ސަބާމެންގޭދޮށުން ދިމާވި ކުރޮޅި ޑްރައިވަރުކަން މުރުތަސިމަށް ފާހަގަ ކުރެވުނެވެ.
ކޮން އެއްޗެއްތޯ އެހޯދަނީ ބުނެ ފާރޫޤު ، މުރުތަސިމާ ސުއާލު ކުރިއެވެ. ވަރަށް އަގުބޮޑު އެއްޗެއްކަމަށް ބުނެ ، މުރުތަސިމް ގޭތެރެޔަށް ވަނެވެ. މާގިނަވާހަކަ ދައްކާކަށް ނުހަދައެވެ. މުރުތަސިމަށް އިޙްސާސްވި ގޮތުގައި އޭނާ އަންނަންވީތަނަށް އަދިކިރިޔާ އެ އާދެވުނީއެވެ. މުރުތަސިމްގޮސް މީރަބް ހުންނަ ކޮޓަރިޔަށް ވަނެވެ. އެތަނުގައި އެއްވެސް މީހަކު ނޫޅެއޭ ބުނަމުން ފާރޫޤުވެސް ފަހަތުން ވަނެވެ. މުރުތަސިމަށް މީރަބްގެ އިޙްސާސް ކުރެވުނުނަމަވެސް ، އެކޮޓަރިން އެއްވެސް މީހަކު ނުފެނުނެވެ. މުރުތަސިމް އައިސް ކޮޓަރީގެ ކިޑިކީދޮރުކައިރީ ހުއްޓިލައިގެން ހުރިއިރު ، އަތްދިއްކޮށްލީމާ އަތްޖެހޭ ހިސާބުގައި ކޮޓަރިން ބޭރުގައި ، ނޭވާ ހިފަހައްޓާލައިގެން މީރަބް ހުއްޓެވެ. ފާރޫޤަކަށްވެސް އެކޮޓަރިން މީރަބެއް ނުފެނުނެވެ. މީރަބް އެދާނީ ކޮންތާކަށްބާއޭ ފާރޫޤުގެ ހިތަށްވެސް އެރިއެވެ.
މުރުތަސިމް ނުކުމެގެން ދަނިކޮށް ، ގޮނޑިމަތީ އޮތް ބޭސްސިޓީއެއްގައި އޭނާ އަޅައިގަތެވެ. އަދި ، އެއީ ކާކުގެ ބޭސްސިޓީއެއްތޯ މުރުތަސިމް ސުއާލު ކުރިއެވެ. އެއީ ، އޭނާގެ ބޭސްސިޓީއެއްކަމުގައި ފާރޫޤު ބުންޏެވެ. ފިރިހެނަކު ބަލިވެ އިންނާނީ ކިހިނެއްތޯ މުރުތަސިމް ސުއާލު ކުރިއެވެ. މުރުތަސިމްގެ ސުއާލުގައި މަލާމާތާއި ފުރައްސާރައާއި ތަޙްޤީޤީ އަސަރު އެކުލެވިފައި ހުއްޓެވެ. މުރުތަސިމަށް ދޭނެ ޖަވާބެއް ، ކުއްލިޔަކަށް ފާރޫޤަކަށް ނޭނގުނެވެ. މީނާ އެވަރުން ޖަވާބެއް ނުދޭނެއޭ ބުނެ ، ޕޮލިސް އޮފިސަރަކު އައިސް ، ޕޮލިސް ޖީޕަށް ފާރޫޤު ލުމަށް އަމުރުކުރިއެވެ.
އެއީ އޭނާގެ އަންހެނުންގެ ބޭސްސިޓީއެއްކަމަށާއި ، ގެންފައިހުރި ބިރެއްގެ ސަބަބުން ، އޭނާއަށް އަނގަ އޮޅި ، ދޫފުރޮޅިގެން އެހެން ބުނެވުނީކަމުގައި ފާރޫޤު ބުނަމުން ގެންދިޔައެވެ. އަދި އޭނާ ދޫކޮށްލުމަށް މުރުތަސިމަށް އާދޭސް ކުރަމުން ގެންދިޔައެވެ. އޭނާގެ އަންހެނުންވީ ރުޅިއައިސްގެން އޭނާ ދޫކޮށްލާފައި ، ގެއިން ނުކުމެގެން ގޮސްކަމަށްވެސް ފާރޫޤަށް ބުނެވުނެވެ.
އޭނާ ދޫކޮށްލުމަށް މުރުތަސިމް އެންގުމާއެކީ ، ފުލުހުން ފާރޫޤު ދޫކޮށްލިއެވެ. މުރުތަސިމް ނުކުންނަމުން ، ފާރޫޤާގާތަށް ޖެހިލިއެވެ.
" އަންހެނުން މަސަލަސް ކޮށްގެން ރުއްސައިގެން ގެޔަށް ގެންނާށެވެ! ދެމަފިރިން އެކުގައި ތިބުމަކީ މުހިންމު ކަމެކެވެ. " މުރުތަސިމް ބުންޏެވެ.
މުރުތަސިމްގެ ވާހަކަތައް މީރަބަށް ސާފުކޮށް އަޑުއިވުނެވެ. މުރުތަސިމް ނުކުމެގެން ދިއުމާއެކީ ، މީރަބް ކޮބައިތޯ ބަލަން ފާރޫޤު އަވަސްވެގަތެވެ. އެވަގުތު މީރަބްވެސް ދޮރުހުޅުވާލާފައި ކޮޓަރިތެރެޔަށް ވަނެވެ.
" އެއީ މީރަބްގެ ފިރިމީހާއެވެ. މުރުތަސިމް އެއައީ ، ރުޅިއައިސްގެން ގެއިން ނުކުމެގެންދިޔަ އަނބިމީހާ މަސަލަސްކޮށްގެން ގެޔަށް ގެންދާށެވެ. މިއަދު އަހަރެން ފަޅާއެރިނަމަ ، މުރުތަސިމް އަހަރެން ދޫކޮށެއް ނުލާނެއެވެ. ދިރިހުއްޓާ އަހަރެން ވަޅުލާނެއެވެ. މުރުތަސިމަށް މަރުޙަބާ ކިޔައި އޭނާ ބައްޕަޔަކަށްވާން އުޅޭ ވާހަކަ ބުނާނަމޭ އަހަރެންގެ ހިތަށް އެރިއެވެ. " ފާރޫޤު ބުންޏެވެ.
އެވާހަކަ މުރުތަސިމްގާތު ނުބުނީ ކީއްވެތޯ މީރަބް ސުއާލު ކުރިއެވެ. މީރަބަށް ކުރިމަތިވެފައި އެއޮތް މުޞީބާތުގައި ގޭގައިވެސް ހުރެވޭކަށް ނެތެވެ. މަގެއްގެ މައްޗަށްވެސް ނުކުމެވޭކަށް ނެތެވެ. ކަރާޗީގެ އެއްގެޔަކަށް ފަހު އަނެއް ގެޔަކަށް ފުލުހުންނާއެކު ވަދެ ފާސްކުރަމުން ، މުރުތަސިމް އެގެންދަނީ މީރަބް ހޯދަމުންނެވެ.
ވަރުބަލިކަންމަތީ ، މުރުތަސިމް ގެޔަށް އައިސް ކޮޓަރިޔަށް ވަތްއިރު ، ޙަޔާ އެ ކޮޓަރިތެރޭ ހުރިތަން ފެނިފައި ، އެ ކޮޓަރިޔަށް ނުވަނުމަށް ޙަޔާގާތު ކިތައްފަހަރު ބުނެވިއްޖެތޯ މުރުތަސިމް ސުއާލު ކުރިއެވެ. މީރަބްގެ ތަކެތީގައި އަތް ޖައްސާލައިގެންވެސް ނުވާނެކަމަށް ބުނެ ، މުރުތަސިމް ނުރުހުން ފާޅުކުރިއެވެ.
" ޙަޔާއެވެ ! މީރަބްގެ ދަރަޖަ ، ޙަޔާއަށް ޙާޞިލެއް ނުކުރެވޭނެއެވެ. އަހަރެންގެ ހިތުންވެސް އަދި ވިސްނުމާއި ފިކުރުންވެސް އެ ޖާގަ ޙަޔާއަކަށް ނުލިބޭނެއެވެ. މިތަނުން ނުކުމެގެން ދާށެވެ ! " ނުރުހުމާއެކީ މުރުތަސިމް ހަޅޭއްލަވައިގަތެވެ.
މީރަބްގެ ޖާގަ ލިބެން އޭނާ ބޭނުންނުވާ ކަމަށާއި އެ ޖާގަ އޭނާ ނުހޯދާކަމަށް ޙަޔާ ބުންޏެވެ. އޭނާގެ ފިރިމީހާ ދޫކޮށްލާފައި ، ހިލޭ ފިރިހެނަކާއެކީ ފިލައިގެންނެއް ނުދާނެއެވެ. މީރަބްގެ ޖާގަޔަކީ އެއީއެވެ. މީރަބްގެ އެޖާގަ ޙަޔާ ބޭނުމެއް ނެތެވެ.
އެތަނުން ނުކުމެގެންދާށޭ ބުނެ ، އަނެއްކާވެސް މުރުތަސިމް ހަޅޭއްލަވައިގަތެވެ. މުރުތަސިމަށް ޙަޤީޤަތް ޤަބޫލުކުރުމުގެ ޤާބިލްކަން ނެތްކަމަށް ޙަޔާ ބުންޏެވެ. އެހާ މަތީ މަޤާމަކަށް އުފުލައިގެން މީރަބް ގެންގުޅެވުނު މޮޔަ ހިތަކަށް ނާރާތޯ ޙަޔާ ސުއާލު ކުރިއެވެ.
ޙަޔާއަށް އޭނާގެ ދަރަޖަ އޮޅިފައިވާ ކަމަށާއި ، ތިމާގެ ފެންވަރުގައި ހުރުމަށް ބުނެ ، ހަޅޭއްލަވައިގަތުމާއެކީ ، މުރުތަސިމް ، ޙަޔާގެ އަތުގައި ހިފައި ދަމާ ކޫއްތާފައި ގެންގޮސް ، އެކޮޓަރިން ބޭރަށް ، ޙަޔާ ހޫރައިލިއެވެ.
" އަހަރެން މިހުރީ ، އަހަރެންގެ ފެންވަރުގައެވެ. އެއީ ، މީރަބަށްވުރެ މަތީ ފެންވަރެކެވެ. މުރުތަސިމް ދޫކޮށްލާފައި މީރަބް ހިނގައްޖެއެވެ. އަހަރެން އަދިވެސް މިހުރީ މުރުތަސިމާ އެކީގައެވެ. ޤަބޫލު ކުރާށެވެ ! މުރުތަސިމް ދޫކޮށްލާފައި މީރަބް ފިލައިގެން އެދިޔައީ ހިލޭ ފިރިހެނަކާ އެކީގައެވެ. " ޙަޔާވެސް މުރުތަސިމަށް ރައްދު ދިނެވެ.
ޙަޔާގެ އަނގަ ބަންދުކުރުމަށްބުނެ ، ޙަޔާއާ ދިމާލަށް މުރުތަސިމް އަނެއްކާވެސް ހަޅޭއްލަވައިގަތެވެ. އެވަގުތު ، ޚާނަމް އެތަނަށް އައިސް ، ބަންދު ކުރަންވީ ، ކޮންކޮންބަޔެއްގެ އަނގަތޯ އަހައި މުރުތަސިމާ ސުއާލު ކުރިއެވެ. އެމީހުން އަނގައިން ނުބުނެ ތިބީމަ ، އޭގެ މާނަޔަކީ ، މުޅިދުނިޔެ އޮޅުވައިލުމެއްގެ ތެރޭގައި ބޭއްވޭނެ ކަމެއްނޫނެވެ. މުޅި ދުނިޔެއަށްވެސް ޙަޤީޤަތް އެނގެއެވެ. މުރުތަސިމް އަނގައިން ނުބުނެހުރެ ، ގެއިން ނުކުމެގެން ދިޔައެވެ. މޮޔަވެގެން މުރުތަސިމާ އަޅައިގަނެގެން ޙަޔާ ނުއުޅުމަށް ބުނެ ، ޙަޔާއާ ދިމާލަށް ޚާނަމްވެސް ހަޅޭއްލަވައިގަތެވެ.
" އަހަރެންގެ އަމިއްލަ ނަފްސަށް އެކަން ވިސްނައިދޭނީ ކިހިނެއް ހެއްޔެވެ ؟ " ޙަޔާ ސުއާލު ކުރިއެވެ.
ޙަޔާއަށް ރަނގަޅު ކުއްޖަކު ހޯދައިދީގެން ގެނެސް ކައިވެނިކޮށްދޭނެކަމަށް ޚާނަމް ބުންޏެވެ. ޙަޔާ ބޭނުންވަނީ ކައިވެނި ކޮށްގެން އެގޭގައި ، ޚާނަމްމަންމަގާތު ހުރުމަށެވެ. އެއްވެސް މީހަކަށް އެކަމެއް ނުވިސްނެއެވެ. ޚާނަމްމަންމަވެސް ، އިރުއިރުކޮޅުން އެވާހަކަ އެބަ ބުނެއެވެ. މުރުތަސިމާއި މީރަބްގެ ކައިވެނި ކުރެވުނީ ، ޝާހްނަވާޒްގެ ވަޞިއްޔަތް ފުރިހަމަ ކުރުމަށްޓަކައެވެ. އެ ދެމީހުން ކުޑައިރު ، އެކަން ނިމިފައި އޮތީމައެވެ. ކައިވެނި ކުރުވި އިރުވެސް ، ކައިވެންޏެއްކުރަން މީރަބް ބޭނުންނުވާކަން ، ޚާނަމަށް އެނގެއެވެ. އެކަމަކުވެސް ، ޙަޔާގެ ޙައްޤު ، މީރަބަށް ދިނީކަމުގައި ޙަޔާ ބުންޏެވެ. ޙަޔާއަކީ ، ކުޑައިރުއްސުރެ ، މުރުތަސިމްދެކެ ލޯބިވަމުން އައި މީހެކެވެ. މީރަބްގެ މަތިން މުރުތަސިމް ހަނދާން ނައްތައިނުލާނެކަމަށާއި ، އެކަން ޙަޔާ ޤަބޫލުކުރުމަށް ޚާނަމް ބުންޏެވެ. މުރުތަސިމްގެ ހިތުގައި މީރަބްގެ މައްޗަށް އޮތް ޖާގަ ، ޙަޔާއަކަށް ނުލިބޭނެއެވެ. އެ ޙަޤީޤަތް ޤަބޫލުކުރުމަށް ޚާނަމް ، ޙަޔާއަށް ނަޞޭޙަތްތެރި ވިއެވެ. އެހެންނަމަވެސް ، އޭނާގެ ޙައްޤު ، ކޮންމެވެސް އެއްދުވަހަކުން ދޭން ، މުރުތަސިމަށް މަޖްބޫރުވާނެކަމުގައި ޙަޔާ ބުންޏެވެ.
ގެއިން ނުކުތްގޮތަށް މުރުތަސިމް ދިޔައީ ، ޢާންމުކޮށް އޭނާދާ ، ކޯރުގެ އައްސޭރިޔަށެވެ. ކޯރުގެ ފެންގަނޑަށް ބަލަހައްޓައިގެންހުރެ ، އޭނާގެ އަމިއްލަ ނަފްސާ މުރުތަސިމް ވާހަކަ ދައްކަމުން ގެންދިޔައެވެ. މީރަބްގެ ހަނދާންތައް އާކުރަމުން ގެންދިޔައެވެ. އޭރު ރޭގަނޑުގެ ވަރަށް ލަސްވެއްޖެއެވެ. އެކަން ، މުރުތަސިމަށް ބަޚްތިޔާރު ހަނދާން ކޮށްދިނެވެ.
" ސާޅީސް ތިންހާސް ދުއިސައްތަ މިނިޓެވެ. ހަތްސަތޭކަ ވިހި ގަޑިއެވެ. ބަޚްތިޔާރެވެ. ބަރާބަރު ތިރީސް ދުވަސް ވީއެވެ. މީރަބްގެ އެއްވެސް ޚަބަރެއް ނުވެއެވެ. ރޭގަނޑު އެކަންޏެއްނޫނެވެ. އަހަރެންގެ ޙަޔާތުގެ ވަގުތުވެސް ވަރަށް ލަސްވެއްޖެއެވެ. " މުރުތަސިމް ބުންޏެވެ.
އެ ތިރީސްދުވަހުގެ ރޭގަނޑު ، މުރުތަސިމް ލޮލުފިޔައެއް ނުޖަހާކަމުގައި ބަޚްތިޔާރު ބުންޏެވެ. މީރަބް އެދިޔައީ ، އޭނާގެ ނިދި ހިފައިގެންކަމަށާއި ، މީރަބްގާތަށް ނިދިއަތުވެދާނެތޯ މުރުތަސިމް ސުއާލު ކުރިއެވެ. އެ ސުއާލަށް ދޭނީ ކޮން ޖަވާބެއްކަމެއް ބަޚްތިޔާރަކަށް ނޭނގުނެވެ. ބަޚްތިޔާރު ނިދަން ފޮނުވައިލާފައި މުރުތަސިމް އެތާ މަޑުކުރުމަށް ނިންމިއެވެ. އޭނާ އެމީހަކަށްޓަކައި ގެޔަށްދާނެ މީހަކު އެގެޔަކު ނެތެވެ. ބަޚްތިޔާރުދާނީ ކާކުގާތަށްތޯ ބަޚްތިޔާރު ސުއާލު ކުރިއެވެ. އޭނާގެވެސް ، މުރުތަސިމް ފިޔަވައި އެހެންމީހަކު ނެތެވެ. މީރަބް ހޯދިއްޖެނަމަ ، މީރަބާއެކީ ދިރިއުޅުން ދެން ބިނާކުރާނީ ކިހިނެއްތޯ ، ބަޚްތިޔާރު ސުއާލު ކުރިއެވެ. ދިރިއުޅުމަކީ ލޯބީގެ މައްޗަށް ބަރޯސާވާ އެއްޗެއްކަމުގައި މުރުތަސިމް ބުންޏެވެ. އިންތިޒާރަކީ ، ޙަޤީޤީ ލޯތްބެއްގެ މައްޗަށް ދެމިގެންދާ އެއްޗެކެވެ. އަނެކާގެ އިޙްސާސްތަކުގެ އިންތިޒާރެވެ. ހަތަރުކަޅި ހަމަކޮށްލުމަށް ކުރެވޭ ފޮނި އިންތިޒާރެވެ.
" ފަހަރެއްގައި އަހަރެންގެ ލޯތްބަކީ ، ހަމައެކަނި ލޯބިކަމަށް ނުވެ ހިނގައިދާނެއެވެ. އަހަރެންގެ އެތެރެހަށި އަނދަމުން އެބަ ދެއެވެ. އަހަރެންނާއެކީ އުޅެންހަދައިގެން ބަޚްތިޔާރުވެސް އަނދައި އަޅިޔަށް ވެދާނެއެވެ. ދާށެވެ ! ގޮސް ނިދައިލާށެވެ ! އަހަރެންގެ މި އެކަނިވެރިކަމަށް ވަގުތުދޭން އަހަރެން ބޭނުން ވެއެވެ. " މުރުތަސިމް ބުންޏެވެ.
ހެނދުނު ކާއެއްޗެތި ހިފައިގެން މުރުތަސިމްގެ ކޮޓަރިޔަށް ދިއުމުން ، ޙަޔާއާ ދިމާލަށް ހަޅޭއްލަވައިގަނެ ކާއެއްޗިއްސާއެކީ ، އެކޮޓަރިން ޙަޔާ ބޭރުކޮށްލިއެވެ. ރޮވިފައިހުރެ ، ޙަޔާ އެކޮޓަރިން ނުކުމެގެން ދިޔައީ ޚާނަމްމަންމަ ގާތަށެވެ. އެއްވެސް އެއްޗެއް މުރުތަސިމް ނުކޭ ވާހަކައާއި ، މީރަބްގެ އަވާގައިޖެހި މުރުތަސިމް އެހުރީ މޮޔަވެފައި ކަމުގައި ޙަޔާ ބުންޏެވެ.
އެއީ ، ވަރަށް ފުން ޒަޚަމެއްކަމަށާއި ، އަނބިމީހާ ހިލޭ ފިރިހެނަކާއެކީ ފިލައިގެން ދިއުމުން ، ފިރިޔެއްގެ ހިތަށް ލިބޭނެ ތަކްލީފު އެހެންމީހަކަށް އިޙްސާސް ނުކުރެވޭނެކަމަށް ޚާނަމް ބުންޏެވެ. އެހެންނަމަވެސް ، މުރުތަސިމް އެއްދުވަހަކުން ރަނގަޅުވެގެން ، ހިނިތުންވެލާތަން ފެންނާނެކަމަށް ޚާނަމްކުރާ އުއްމީދު ނަގައެއް ނުލައެވެ.
މީރަބްގެ ބަނޑުން މިހާރު އެނގެން ފަށައިފިއެވެ. މީރަބަށް ލިބިފައިވާ ހިތާމައާއި ތަކްލީފަކީ ، އޭނާގެ ބަޑުގައި އޮތް ދަރިފުޅުގެ ޞިއްޙަތަށް ރަނގަޅުކަމެއްނޫންކަން މީރަބަށްވެސް އެނގެއެވެ. އެހެނަސް ، އެހިތާމައާއި ތަކްލީފަކީ ، އޭނާގެ ޙަޔާތުން ، އަދި އަމްދުން މިހާރު ، އޭނާއާ ދުރުކުރެވެން އޮތް އިޙްސާސްތަކެއް ނޫނެވެ. ﷲ އީ އިންސާނާގެ ހިތުގައިވާ ހުރިހާކަމެއް މޮޅަށް ދެނެވޮޑިގެންވާ އިލާހެވެ. އެކަލާނގެއީ މުޢުޖިޒާތްތަކުން އިންސާނުންގެ ޢަޤީދާ ކަށަވަރުކޮށް ވަރުގަދަ ކުރެއްވުމަށްވެސް އިރާދަ ކުރައްވާ އިލާހެވެ. އެކަލާނގެ ، ކޮންމެކަމެއް މޮޅަށް ދެނެވޮޑިގެން ވެއެވެ.
" އަހަރެމެން މި ހަނގުރާމަކުރަނީ ، ކޮންވިސްނުމެއްގައިތިބެ ކަމެއްވެސް އަހަރެމެންނަކަށް ނޭނގެއެވެ. އަހަރެމެން ކުރާކަމެއް މިކުރަނީ ، މިކުރެވެނީ ރަނގަޅުކަމެއްކަން އަދި ގޯސްކަމެއްކަންވެސް ނޭނގި ތިބެއެވެ. މީރަބަށް ހީވަނީ ކިހިނެއްކަމަށް ހެއްޔެވެ ؟ އަހަރެންނަށް މިކުރެވެނީ ރަނގަޅުކަމެއްކަން އެނގޭ ހެއްޔެވެ ؟ އެވާހަކަ އަހައިލާނީވެސް ކާކުގާތުގައި ހެއްޔެވެ ؟ " މީރަބް އޭނާގެ އަމިއްލަ ނަފްސާ ވާހަކަ ދައްކަމުން ގެންދިޔައެވެ.
މީރަބާއި މުރުތަސިމް ވަކިވުމުގެ މަގު އިޚްތިޔާރުކުރީ ، ޚުދު މުރުތަސިމެވެ. އެމަގުން ހިނގަމުންހިނގަމުން އައިސް ، މިހާރު މިއޮތީ ، މޫލައިފައެވެ.
މުރުތަސިމަށް ހެނދުނުގެ ނާސްތާ ތައްޔާރުކުރުމަށްފަހު ، މުރުތަސިމް ހޯދަމުންގޮސް ޙަޔާއަށް ފެނުނުއިރު ، ގޭގެ ތަނބެއްގައި ލެނގިލައިގެން ސިނގިރެޓެއް ބޯން މުރުތަސިމް ހުއްޓެވެ. ކާން ތައްޔާރުކުރިވާހަކަ ޙަޔާ ބުނުމާއެކީ ، ޙަޔާގެ ވާހަކަ ނުނިމެނިސް ، އޭނާ ބަނޑުހައިނުވާކަމަށް މުރުތަސިމް ބުންޏެވެ. ނުކައި ނުބޮއި ދުންފަތުގެ އިސްތިޢުމާލްކޮށް ހެދުމުން ހަށިގަނޑަށް ބޮޑަށް ގެއްލުންލިބި ، މުރުތަސިމްގެ ފުރާނަޔަށްވެސް ނުރައްކާވެދާނެކަމަށް ޙަޔާ ބުންޏެވެ.
" އޭރަށް އަދި މާ ރަނގަޅެއް ނޫންހެއްޔެވެ ؟ އަހަރެންވެސް ނިމުނީއެވެ. މައްސަލަވެސް ނިމުނީއެވެ. " މުރުތަސިމް ބުންޏެވެ.
އަންވަރު ބޭބެ އުޅެނީ ބަލިވެއެވެ. އެއީ ، ދުވަސްވީ މީހެކެވެ. ވައްޤާސް ބޭބެ ، އޭނާގެ ދަރިފުޅުގެ އެ ޢަމަލާގުޅިގެން ހިތާމަކޮށް މިދުނިޔެއާ ވަކިވެއްޖެއެވެ. އަންވަރު ބޭބެ ، އެމީހުންނާ އެކީ މިދުނިޔޭގައި ހުންނާނީ ކިހާ ދުވަހަކުކަމެއް ނޭނގެއެވެ. ދެންހުރީ މުރުތަސިމެވެ. މީރަބްގެ ހިތާމައިގާ ، އަމިއްލަ ނަފްސު ޤުރުބާން ކުރަނީއެވެ. ފިރިމީހާޔާ އެކީގޮސް ، މަރިޔަމް އެހުރީ ދުރުގައެވެ. އެގެޔަށް ދެން އަންނާނެކަމެއްވެސް ނޭނގެއެވެ. އަނީލާ އެހުރީ ، އެޢާއިލާގެ އެންމެންނާ ގުޅުން ކަނޑާލައިގެންނެވެ. މީރަބް ފިލައިގެން ހިނގައްޖެއެވެ. ހިލޭ ފިރިހެނަކާ ހިތާވެގެން އެމީހާއާ އެކީގައެވެ. ދެންހުރީ ކާކު ހެއްޔެވެ ؟ ޙަޔާއާއި ޚާނަމް މަންމައެވެ. އެމީހުން ދިރިއުޅޭނީ ކާކުގެ އެހީތެރިކަމަކާ އެކީ ހެއްޔެވެ ؟ އެދެމީހުން އެތިބީ ، މުރުތަސިމްގެ އެހީތެރިކަމަށް އުއްމީދު ކޮށްގެންކަމުގައި ޙަޔާ ބުންޏެވެ. މުރުތަސިމް ނެތިއްޖިއްޔާ އެދެމީހުންނަށް ވާނީ ކިހިނެއްތޯ ޙަޔާ ސުއާލު ކުރިއެވެ. ޙަޔާ ބޭނުންވަނީ މުރުތަސިމް ދިރިހުންނަންތޯ މުރުތަސިމް ސުއާލު ކުރިއެވެ. ޙަޔާ ބޭނުންވަނީ ، އެމީހުންނާއެކީ އަބަދުވެސް މުރުތަސިމް ހުރުމަށެވެ. ޙަޔާ އެތަނުން ދިއުމަށް މުރުތަސިމް ބުނުމާއެކީ ، މުރުތަސިމް ނުކަނިސް އޭނާގެ ގޮތް ދޫނުކުރާނެކަމަށް ޙަޔާ ބުންޏެވެ. ޙަޔާ އެތަނުން ދިއުމަށާއި އޭނާ ފަހުން ކާނަންކަމުގައި ބުނެ ، މުރުތަސިމް ހަޅޭއްލަވައިގަތެވެ. ( ނުނިމޭ )
