އަންދަލުސްގެ ބާޒު – 61

(14 ނޮވެމްބަރ 2025 ގައި ޝާއިއުކުރި ބަޔާ ގުޅޭ)

ބޮޑެތި ގެއްލުންތަކެއް ވުމާއެކުވެސް ފެރްނާންދޯ ހާހެއް ނުވެއެވެ. ބަނޑުހައިހޫނުކަމުގެ ސަބަބުން ރަށުން ބޭރަށް ނުކުމެ ހަމަލަދޭން އިސްލާމުންނަށް މަޖުބޫރުވީކަން އޭނާއަށް ޔަގީނެވެ. ދެތިން ދުވަހެއްގެ ތެރޭގައި އެމީހުންގެ ހިތްވަރު އެލިދާނެކަންވެސް އޭނާއަށް ކަށަވަރުވެއެވެ. އެހެންވީމާ އޭނާ ލަޝްކަރަށް އެނގީ މާ ވަރުގަދަ ހަމަލައެއް ދިނުމުގެ ބަދަލުގައި މަޑުމަޑުން ދިފާއުކޮށްކޮށް ތިބޭށެވެ.

މެންދުރު ނަމާދަށް ފަހު މޫސާ ރަށުގެ ވަށައިގެން އޮތް ލަޝްކަރުގެ ސަފުތައް ތަރުތީބުކޮށްލެއްވިއެވެ. އަދި އެންމެ ފަހުގެ ހަމަލައަށް ތައްޔާރުވާން ލަޝްކަރަށް އަންގަވައިފިއެވެ. [ވަގުތު ޖެހުނީމާ ރަށުގެ ބުރުޒުތަކުގައި ތިބި މީހުން އިޝާރާތްކޮށްލާނަމެވެ. އެ މީހުންގެ އިޝާރަތާއެކު ދުޝްމިނުންގެ މައްޗަށް ހަމަލަދޭންވީއެވެ.]

ތަޖުރިބާކާރު މީހުން ތިބީ އެ ހަމަލައިން ކާމިޔާބީއެއް ލިބިދާނޭކަމުގެ އުއްމީދަކު ނޫނެވެ. އެމީހުން ދުށް ގޮތުގައި އެއީ އަމިއްލައަށް މަރުވުމާ އެއްފަދަ ހަމަލައަކަށް ވާނެއެވެ. ދުޝްމިނުންގެ ތީރުވެރިން ދެމުން ގެންދިޔައީ ވަރަށް ނުރައްކާތެރި ހަމަލަތަކެކެވެ. މީގެ އިތުރަށް މޫސާގެ ލަޝްކަރުގައި ފަހުލަވާނުން ތިބި އަދަދުގެ އަށްގުނަ އިތުރު އަދަދެއް ފެރްނާންދޯގެ ލަޝްކަރުގައި އެބަތިއްބެވެ. މޫސާގެ ލަޝްކަރުގައި އޮތް އެންމެ ވަރުގަދަ ބާރަކީ ފައިމަގުގައި ހަނގުރާމަކުރާ މީހުންނެވެ. އެކަމަކު އެމީހުންނަކަށްވެސް މާ ގިނައިރަކު ހިފަހައްޓައެއް ނުލެވޭނެއެވެ. އެކަމަކު ރައްޔިތުން މޫސައަށް ވަރަށް ބޮޑަށް އިތުބާރުކުރެއެވެ. އެމީހުން ތިބީ މޫސަގެ އިޝާރާތަކަށް އަލިފާންގަނޑެއްގެ ތެރެއަށް ފުންމައިލާންވެސް ތައްޔާރަށެވެ.

ލަޝްކަރަށް އިރުޝާދު ދެއްވުމަށް ފަހު މޫސާ މައި ދޮރާށިން ރަށުތެރެއަށް ވެދެވަޑައިގެންފިއެވެ. އަސްކޮޅުން ފައިބައިވަޑައިގެން ބުރުޒު ދޮށަށް ވަޑައިގެންފިއެވެ. އިރުއިރުކޮޅާ ބުރުޒަށް އަރައިވަޑައިގެން ދުރަށް ބައްލަވައިލައްވައެވެ. ކުރިމަތީން ފެނިވަޑައިގަންނަވާ ހުސްކަމުގެ ސަބަބުން އޭނާގެ މާޔޫސީ ދިޔައީ ބޮޑުވަމުންނެވެ. އޭނާ އެއް ބުރުޒުން އަނެއް ބުރުޒަށް ވަޑައިގެން ފާރަވެރިންގެ ފަރާތުން މައުލޫމާތު ހޯއްދަވަމުން ގެންދެވިއެވެ. އޭނާ ސުވާލުކުރައްވައެވެ. [އަދިވެސް އެއްވެސް ހިލަމެއް ނުވޭ ހެއްޔެވެ؟] ނަފީގެ ގޮތުގައި ޖަވާބު ލިބިވަޑައިގަތީމާ އިސްދަށަށް ޖައްސަވައިލައްވައެވެ.

ދުވާލުގެ ދެވަނަ ދަމަށް އަޅައިގަތް ވަގުތު ފެރްނާންދޯ އިނީ ކަސްތިއްޔާގެ އިސް ފާދިރީއާ ވާހަކަދައްކާށެވެ. [މާތްވެގެންވާ ބައްޕާއެވެ. ދުޝްމިނުން ހަމަލަނުދީ ނުތިބޭނޭގޮތް މެދުވެރިކުރައްވާތޯ ދުއާކޮށް ދެއްވާށެވެ. ބައްޕާގެ ދުޢާ އިޖާބަކުރައްވައިފިއްޔާ މިއަދު މި ހަނގުރާމަ ނިމޭނެއެވެ.] ފާދިރީ މަރިޔަމްގެފާނުގެ ބުދުގެ ކުރިމަތީގައި އިނދެގެން ދުއާކުރަމުން އެބަގެންދެއެވެ.

(5)

މޫސާ ބުރުޒަށް އަރައިވަޑައިގަންނަވަނިކޮށް ކުއްލިއަކަށް ފާރަވެރިޔާ ވަރަށް ބާރަށް ގޮވައިލިއެވެ. [ދުރުން ހިރަފުސް އަރާތަން އެބަފެނެއެވެ. ލަޝްކަރެއް އަންނަނީކަން ނޭނގެއެވެ.]

މޫސާ ދުވެވަޑައިގެން ބުރުޒަށް އަރައިވަޑައިގެން ދުރަށް ބައްލަވައިލެއްވިއެވެ. އަދި ހަރު އަޑުފުޅުން ގޮވައިލެއްވިއެވެ. [އޭނާ ވަޑައިގެންފިއެވެ. އޭނާ ވަޑައިގެންފިއެވެ. އަހަރެމެންގެ ބާޒު ވަޑައިގެންފިއެވެ. ﷲ އަހަރެމެންނަށް ނަސްރު ދެއްވައިފިއެވެ.]

ނަގައިފައި އޮތް ހިރަފުސްގަނޑުގެ ތެރެއިން ސަވާރުން ފެނިވަޑައިގަތީމާ މޫސަގެ ލޯފުޅުން ޝުކުރުވެރިކަމުގެ ކަރުނަފޮދު އޮހޭން ފަށައިފިއެވެ. އޭނާ ބުރުޒުން ތިރިއަށް ބައްލަވައިލައްވައިފައި ހަރު އަޑުފުޅުން ގޮވައިލެއްވިއެވެ. [އަވަހަށް ތައްޔާރުވާށެވެ!]

ފާރުމަތީގައި ތިބި ހަނގުރާމަވެރިން މޫސަގެ އަޑުފުޅު ތިރީގައި ތިބި ހަނގުރާމަވެރިންނަށް ފޯރުކޮށްދީފިއެވެ. އެޔާއެކު މުޖާހިދުން ހަތިރާއެކު ސަމާލުވެލައިފިއެވެ.

މޫސާ ދުވެވަޑައިގެން އަސްކޮޅަށް ސަވާރުވެވަޑައިގެން ބޭރަށް ނުކުމެވަޑައިގެންފިއެވެ.

އަނެއްކޮޅުން ފެރްނާންދޯ ކަސްތިއްޔާގެ އިސް ފާދީރީއާ ދިމާއަށް ބުނަނީއެވެ. [މާތްވެގެންވާ ބައްޕާއެވެ. ބައްޕާގެ ދުއާ އިޖާބަކުރައްވައިފިއެވެ. މަރު އައިސް ދުޝްމިނުންގެ ދޮރާށީގައި ޓަކިޖެހުމުގެ ބޭނުމެއް ނެތެވެ. އެމީހުން އަމިއްލައަށް މަރުގެ އުނގަށް ވެއްޓެނީއެވެ.]

އިރު އޮއްސޭން ރަތްކޮށްލީ ވަގުތު ފެންނާން ފެށީ ސަލީބުގެ އަހުލުވެރިންނާއި ހަނދުފަޅީގެ އަހުލުވެރިންގެ މެދުގައި އަނެއްކާވެސް ހަނގުރާމައެއް ފަށައިގަތް ތަނެވެ. ގްރަނާދާގެ ލަޝްކަރުން ތީރުގެ ހަމަލާތައް ފައްޓައިފިއެވެ. ފެރްނާންދޯ އޭނާގެ ލަޝްކަރަށް ހަމަލަދޭން އަންގައިފިއެވެ. އެޔާއެކު ހަނގުރާމަ ފެށިއްޖެއެވެ.

މޫސާއާއި އަބޫ ޢަބްދުﷲ އާއި އަބޫ މުޙްސިން ގެންދެވީ ރަށުގެ ތިން ދިމާއިން ހަނގުރާމަ ކުރަމުންގެންދާ މުޖާހިދުންނަށް އިރުޝާދު ދެއްވަމުންނެވެ. އެޔާއެކު ފައިމަގުގައި ހަނގުރާމަކުރާ ލަޝްކަރު، ދުޝްމިނުންގެ ތެރެއިން ޚަންދަގަށް ފޭބި މީހުންނާ ހަމަލަދީފިއެވެ. އުތުރު ފަރާތު ދޮރާށްޓާ ދިމާއިން ދުޝްމިނުންގެ ސަފުތައް ފޫއަޅުވައިލައްވައިފައި މޫސަ ކުރިއަށް ޖެހިވަޑައިގެންފިއެވެ. ފެރްނާންދޯ އަހުގައި ކުރިއަށް ދަމުން ގޮވައިލިއެވެ. [ދުޝްމިނުންގެ ލަޝްކަރުގެ އެންމެ މީހަކަށްވެސް އަލުން ރަށުތެރެއަށް ވަނުމުގެ ފުރުސަތު ނުދޭށެވެ. އެމީހުންގެ ފަހަތުން ނުދާށެވެ. އެ މީހުން އަމިއްލައަށް އެނބުރި ދޮރާށްޓާ ދިމާއަށް އަންނާނެއެވެ.]

މޫސަ ފަސް ސަތޭކަ ސަވާރުންނާއެކު ދުޝްމިނުންގެ ލަޝްކަރު ފޫއަޅުއްވައިލެއްވުމަށް ފަހު ވަޑައިގެން ކުރިމަތީގައި އޮތް ބަގީޗާއެއްގެ ގަސްތަކުގެ ތެރެއަށް ވެދެވަޑައިގެންފިއެވެ. ދުޝްމިނުންގެ ލޯމަތީން އެ ލަޝްކަރު ގެއްލިއްޖެއެވެ. އެހެންވީމާ އެ މީީހުން އެނބުރި އަންނާނޭ ވަގުތަކަށް ބަލަބަލައި ތިބީއެވެ. އެކަމަކު މޫސާ ކަންތައް ކުރެއްވީ އެމީހުން ހީކޮށްގެން ތިބި ގޮތަކަށް ނޫނެވެ. އޭނާ ވަށައިގެން ބުރެއް ޖައްސަވައި ރަށުގެ އަނެއް ފަރާތުން، ދުޝްމިނުންގެ ލަޝްކަރުގެ ފުރަގަހަށް ނުކުމެވަޑައިގަތީއެވެ. އެޔާއެކު އުތުރުފަރާތު ދޮރާށްޓާ ދިމާއިން އައު ލަޝްކަރެއް ނުކުމެއްޖެއެވެ. އެ ލަޝްކަރުގެ ޚަބަރެއް އަބޫ މޫސާއާއި އަބޫ މުޙްސިން ނޫން މީހަކަށް ވެފައެއް ނެތެވެ.

ސަރަހައްދީީ ބާޒުގެ މުޖާހިދުން ގްރަނާދާގެ ރައްޔިތުންނަށް އެހީތެރިވާން އައީއެވެ. ބަދްރު ބިން މުޣީރާ ތިން ހާސް އަސްވާރުންނާއެކު ދުޝްމިނުންނާ ކުރިމަތީން ހަމަލަދެއްވައިފިއެވެ. މާ ގިނަ އިރުތަކެއް ނުވެ އެ ދިމައިގައި އޮތް ދުޝްމިނުންގެ ލަޝްކަރު ހަނާކުރައްވައި ނިންމަވައިފިއެވެ. ފެރްނާންދޯ ހަދާނޭގޮތް ބޮޑުވެގެން އޭނާގެ ލަޝްކަރަށް އެންގީ ކަނާތްފަރާތަށް ޖެހޭށެވެ. އެކަމަކު އޭރު އެ ފަރާތުން މޫސަ ހަމަލަދެއްވައިފިއެވެ. މިހާރު ވެފައި އޮތް ގޮތުން ފެރްނާންދޯގެ ލަޝްކަރަށް ޖެހިފައި އޮތީ ކުރތިމަތިން ބަދްރު ބިން މުޣީީރާގެ ލަޝްކަރާ ހަނގުރާމަކުރާށެވެ. ފުރަގަހުން މޫސަގެ ލަޝްކަރާ ހަނގުރާމަކުރާށެވެ. ތިންވަނަ ދިމާއަކަށް ބަލާއިރު، އެ ދިމައިން ފެރްނާންދޯގެ ލަޝްކަރުން ވަނީ އަބޫ ޢަބްދުﷲގެ ލަޝްކަރު ފަހަތަށް ޖައްސައިފިއެވެ. އެކަމަކު ކްރިސްޓިއަނުންނަށް ޖެހުނީ ކުރީން ހީވެސް ކޮށްފައިނެތް ފަދަ ބޮޑު މުސީބާތަކާ ކުރިމަތިލާށެވެ. އެ ދިމާއިން ދެ ހާހެއްހައިި މީހުންގެ ލަޝްކަރެއް ނުކުތްތަން ފެނިއްޖެއެވެ. ކްރިިސްޓިއަނުން ފުރަތަމަ ހީކުރީ އެއީ އެ މީހުންނަށް އައި އެހީތެރިކަމެއް ކަމުގައެވެ. އެކަމަކު ﷲ އަކްބަރުގެ ނަޣަރާގެ އަޑު އިވުނީމާ ދުޝްމިނުން ސަލާމަތްވާންވެގެން ކަނާތްފަރާތަށް ދުއްވައިގެންފިއެވެ. އަބޫ ޢަބްދުﷲގެ ލަޝްކަރަށް މި މަންޒަރު ފެނުނީމާ ހާލަތު އެހެން ގޮތަކަށް ބަދަލުވެއްޖެކަން އެނގިއްޖެއެވެ. އެހެންވީމާ އައު ބާރަކާއެކު ހަމަލާދީފިއެވެ. އެޔާއެކު ފެރްނާންދޯގެ ލަޝްކަރު ރަށުގެ އެއް ފަރާތަކަށް ޖެހި މުޅީން އެކަހެރި ވެއްޖެއެވެ. އެހެން ހުރިހައި ދިމާއަކުން މަގު ބަންދުވެއްޖެއެވެ. ކަނާތްފަރާތާއި ވައަތް ފަރާތުގައި އޮތީ އަބޫ މަންޞޫރުގެ ލަޝްކަރާއި ބަދްރު ބިން މުޣީރާގެ ލަޝްކަރެވެ. ފުރަގަހުގައި އޮތީ އަބޫ މޫސާގެ ލަޝްކަރެވެ. ގްރަނާދާގައި ބާކީ ތިބި މުޖާހިދުން އަބޫ ޢަބްދުﷲއާއި އަބޫ މުޙސްސިނުގެ ގިޔާދަތުގައި ކުރިމަތީން ހަނގުރާމަ ކުރަމުން ގެންދަނީއެވެ. ހަތަރުވަނަ ދިމާއަށް ބަލާއިރު އޮތީީ ހިމޭންކަމާއެކު ދެމިދެމިި އޮތް ކޯރެކެވެ.

ބާރަވިލޭރޭގެ ހަނދު އަރައިފައި ހުރުމުގެ ސަބަބުން އަލިވެފައި އޮތް ނަމަވެސް ހަނގުރާމައިގެ ހޫނުކަމަކަށް ބަދަލެއް ނާދެއެވެ. ދުޝްމިނުންގެ ލަޝްކަރު ދިޔައީ މަޑުމަޑުން ފަހަތަށް ޖެހެމުންނެވެ. މޫސަޔާއެކު ހަނގުރާމަކުރަމުން ދިޔަ މަދު މުޖާހިދުންކޮޅުގެ މަސައްކަތުން އެކަނިވެސް ކާފަރުންގެ ލަޝްކަރު ހުއްޓުވިދާނެއެވެ.

މަންޞޫރު އަސްކޮޅުގައި ދުޝްމިނުންގެ ވަށައިގެ ބުރެއް ޖައްސަވައިލެއްވުމަށް ފަހު ވަޑައިގެން މޫސައަށް ދެންނެވިއެވެ. [މަނިކުފާނުގެ ލަޝްކަރު ވަރަށް އަވަހަށް މި ތަނުން ގެންދަވާށެވެ.]

މޫސަ ވިދާޅުވިއެވެ. [އަޅުގަނޑަށް ފެންނަ ގޮތުގައި މިތަނުން އެމީހުން ފޮނުވައިލުމުގެ ބަދަލުގައި އަހަރެންގެ ލަޝްކަރު އިތުރު ބައެއް މިތަނަށް ގެނައުން މާ ރަނގަޅުވާނެއެވެ. އެމީހުންނަށް ކަނާތްފަރާތުން ނުވަތަ ވާތްފަރާތުން މިތަނަށް އާދެވިދާނެއެވެ. އަހަރެމެން ދުޝްމިނުން ލަވަމުން ފަހަތަށް ޖައްސަމުން ގެންގޮސް ރަށާ ކައިރިއަށް ގެންދިޔައީީމާ ތީރުވެރިންގެ އަމާޒާ ހަމައަށް ގެންދެވިދާނެއެވެ.]

[އެ މީހުން ރަށަށް ވަދެގެންފިއްޔާ ހަދާނީ ކިހިނެއްްތޯއެވެ؟]

[އަހަރެން މި އައީ ދޮރާށިތައް ބަންދުކުރަން އަންގައިފައެވެ.]

[ތިޔައީ ރަނގަޅު ބުއްދިފުޅެކެވެ. އެކަމަކު ފައިމަގުގައި ހަނގުރާމަކުރާ ބަޔަކު ރަށުން ނެރެގެން އެހައި އަވަހަށް މިހިސާބަށް ގެނައުމަކީ ފަސޭހަކަމަކަށް ނުވާނެއެވެ. ދުޝްމިނުންގެ ސަވާރުންގެ އަދަދު އަޅުގަނޑުމެންނަށްވުރެ މާ ގިނައެވެ. އެމީހުން ތިޔަ ވިދާޅުވާ ދެ ފަރާތުން ދާން ކުރާ މަސައްކަތް ހުއްޓުވާން އުޅުނީމާ ބޮޑެތި ގެއްލުންތަކެއް ނުވެއެއް ނުދާނެއެވެ. މިއީ ބަހުސުކުރައްވާންވީ ވަގުތެއް ނޫނެވެ. ލަސްކޮށްފިއްޔާ އަޅުގަނޑުމެންގެ ނުލާހިކު މުހިއްމު ރޭވުމެއް ދުޝްމިނުންނަށް ބޭޒާރުވުމަކީ އެކަށީގެންވާ ކަމެކެވެ.]

މޫސަ ވިދާޅުވިއެވެ. [އެންމެ ރަނގަޅެވެ. ތިޔަ ޚިޔާލަށް ބަދްރުވެސް ތާއީދުކުރައްވާނަމަ އަހަރެންގެ އެއްވެސް މައްސަލައެއް ނެތެވެ.]

[އަޅުގަނޑުމެން ދެ މީހުންގެ ވިސްނުން މުޅީން އެއްގޮތެވެ. މިތަން ދޫކުރައްވައިފައި އެހެން ދިމާއަކަށް ޖެހިވަޑައިގަންނަވާށެވެ. ވަރަށް އަވަހަށް މިކަން ކުރައްވާށެވެ. އެހެން ނޫނީ ދުޝްމިނުން ސަމާލުވެގެންފާނެއެވެ. ވަރަށް ދުރަށް ވަޑައިގެން ދުޝްމިނުންނަށްޓަކައި މައިދާން ހުސްކޮށްލައްވާށެވެ.]

ހަނގުރާމަ މިހާރު ފައިސަލާކުރުވަނިވި މަރުހަލާއަކަށް އަތުވެއްޖެއެވެ. ކްރިސްޓިއަނުން އެ ގެންދަނީ ތިން ފަރާތުން ފިތި، ފަހަތަށް ޖެހޭން މަޖުބޫރުވަމުންނެވެ. ހާލަތު މިފަދަ ގޮތަކަށް ބަދަލުވީމާ ފެރްނާންދޯއަށް މަޖުބޫރުވީ، ކުއްލި ހާލަތަކަށްޓައި ތައްޔާރަށް ބެއިތިއްބި ހަނގުރާމަވެރިން މައިދާނަށް ނެރޭށެވެ. އެމީހުން މިހައިތަނަށް ތިބީ މައިދާނާ ދުރުގައި ޖަހައިފައި ހުރި ފޭލިގެތައް ބަލަހައްޓާށެވެ. ކްރިސްޓިއަނުންގެ ލަޝްކަރު އަނެއްކާވެސް ފައިތިލަ ސާބިތުކުރާން ފަށައިފިއެވެ.

ކުއްލިއަކަށް ހަނގުރާމައިގެ މައިދާނާ ތަންކޮޅެއް ދުރުން، ބޯކޮށް ގަސްހެދިފައި އޮތް ތަނަކުން ސަރަހައްދީ މުޖާހިދުންގެ ތާޒާ ފައުޖެއް ނުކުމެއްޖެއެވެ. އެއީ ގާތްގަނޑަކަށް ސަތޭކައެއްހައި މުޖާހިދުންނެވެ. ދަންމަރު ހިފައިގެން ނުކުތް މި ކުޑަ ލަޝްކަރު މިސްރާބުޖެހީ ހަނގުރާމައިގެ މައިދާނުގެ ބަދަލުގައި ދުޝްމިނުންގެ ފޭލިގެތަކާ ދިމާއަށެވެ. ފޭލިގެތައް ބަލަހައްޓާން ތިބި ކާފަރުންގެ ގިނަ މީހުން މައިދާނަށް ނުކުމެއްޖެއެވެ. ފޭލިގެ ދޮށުގައި ބާކީ ތިބި މަދު މީސްކޮޅު، އެތަނާއި އެތާނގައި ހުރި ތަކެތި ސަލާމަތް ކުރެވޭތޯ ވަރަށް ބޮޑަށް މަސައްކަތްކުރިއެވެ. އެކަމަކު މުޖާހިދުންގެ ލަޝްކަރު ނުކުތް ގޮތަށް ނުކުމެ، ފޭލިގެތަކުގައި ހުޅު ޖަހައިފައި އެ ދިޔަ ގޮތަށް އަނެއްކޮޅުން ނުކުމެއްޖެއެވެ. ކާފަރުންގެ ލަޝްކަރަށް ރަނގަޅަށް ހިންދެމިނުލެވެނީސް، އަނެއް ފަރާތުން މުޖާހިދުންގެ ފައުޖެއް ނުކުމެއްޖެއެވެ.

ހުޅުޖެހި ފޭލިގެތަކުގައި ކަސްތިއްޔާގެ އިސް ފާދިރީގެ އިތުރަށް ތިރީހަކަށް ފާދިރީން މަރިޔަމުގެފާނުގެ ބުދުގެ ކުރިމަތީގައި ތިބެގެން ސަލީބުގެ ކާމިޔާބީއަށް އެދި ދުއާކުރަނީއެވެ. ބޭރުގައި ތިބި ފާރަވެރިން ހަޅޭއްލަވާން ފަށައިފިއެވެ. [މުގައްދަސް ބައްޕަގެ ފޭލިގޭގައި ރޯވެއްޖެއެވެ.]

ފޭލިގޭގެ އިތުރަށް ހިކި ވިނަތަކުގައި ރޯވެގެން އަނދާން ފެށުމުގެ ސަބަބުން ހަނގުރާމައިގެ މައިދާނާ ހަމައަށް އަލިކަން ފެތުރިއްޖެއެވެ. ކްރިސްޓިއަން ހަނގުރާމަވެރިން އެބައިމީހުންގެ ގާއިދުންގެ އަމުރަށް އިންތިޒާރު ކުރުމެއް ނެތި ފޭލިގެތަކަށް ސަމާލުކަން ދީފިއެވެ. އެޔާއެކު ބަދްރު ބިން މުޣީރާގެ މުޅި ލަޝްކަރު އެކީގައި ދުޝްމިނުންނާ ހަމަލަދީފިއެވެ.

ބަލިވެގެން ވިއްސިވިހާލިވެގެން ދިޔަ ކާފަރުންނަކަށް ހަތަރުފަރާތުން އަނދަމުން ދިޔަ ފޭލިގެތަކުގެ ތެރެއިން ވަންނާނޭ އެއްވެސް ތަނެއް ނުފެނުނެވެ. އަލިފާނުގެ އަލީގައި މުޖާހިދުން ގެންދިޔައީ ކާފަރުން ވަށައިލައި މަރުގެ އަނދަވަޅަށް ވައްޓަމުންނެވެ. ހާސްވެގެން ތެޅިފޮޅިގަތް އަސްތަކުގެ ފައި ފޭލިގެތަކުގެ ވައުތަކުގައި މެހި ވެއްޓެމުންދާތަން ފެންނާން ފަށައިފިއެވެ.

ފިލައިގެން ދިއުމުގެ ދުންމާރި ފުމެލަން ފެރްނާންދޯ އޭނާގެ ލަޝްކަރުގެ ގާއިދުންނަށް އަންގައިފިއެވެ. އެޔާއެކު އޭނާގެ ލަޝްކަރުން ބާކީީ ތިބި މަދު މީސްކޮޅު ފޭލިގެތައް ދޫކޮށްފައި ފިލަން ދުއްވައިގެންފިއެވެ. ފައިމަގުގައި ހަނގުރާމަކުރާ މީހުންނަށް މޫސާ އެންގެވީީ ޣަނީީމާ މުދާ ރައްކާތެރިކުރާށެވެ. އަސްވާރުންނަށް އެންގެވީ ފިލަން ދުވާ މީހުންގެ ފަހަތުން ދާށެވެ.

ބަދްރު ބިިން މުޣީރާއާއި މަންޞޫރު ބިން އަޙްމަދުގެ ލަޝްކަރު އޮތީ ކާފަރުންގެ ވައަތްފަރާތާއި ކަނާތްފަރާތުން ބައްދައިގެންނެވެ. ގްރަނާދާގެ ސަވާރުން ގެންދިޔައީ ފަހަތުން ލަވަމުންނެވެ. ފެރްނާންދޯގެ ލަޝްކަރަށް ހުޅުވިފައި އޮތީ ހަމައެކަނި ކުރިމަތީން ފެންނާން އޮތް މަގެވެ.

ތިން ކޯހުގެ ދުރުމިނަށް ދުޝްމިނުންގެ ފަހަތުން ދަތުރުކުރެއްވުމަށް ފަހު ބަދްރު ބިން މުޣީރާ، މޫސާއާ އަރައި ހަމަ ކުރެއްވުމަށް ފަހު ހަރު އަޑުފުޅުން ވިދާޅުވިއެވެ. [މިތަނާ މާ ދުރު ނޫން ހިސާބެއްގައި ކޯރެއް އޮންނާނެއެވެ. ދުޝްމިނުންނަކަށް ކުރިއަކަށް ނުދެވޭނެއެވެ. ލަޝްކަރު މަޑު ކުރުއްވާށެވެ. ދުޝްމިނުން އެ ތިބީ އަޅުގަނޑުމެންގެ މަޅީގައި ރަނގަޅަށް ޖެހިފައެވެ. ތީރުވެރި ސަވާރުން ކުރިއަށް ނެރުއްވާށެވެ. ދުޝްމިނުން ވަރަށް އަވަހަށް އެނބުރި އަންނާނެއެވެ.]

(ނުނިމޭ)