( 5 ނޮވެމްބަރ 2025 ގައި ޝާއިޢުކުރި ބަޔާގުޅޭ )
މަރިޔަމްއަށް އަލްވަދާޢު ކިއުމަށްޓަކައި އެއްވެފައިވާ މެހެމާނުންގެ ތެރޭގައި ، މުރުތަސިމާގާތުގައި ހުރެވޭތޯ ޙަޔާ ގެންދިޔައީ މަސައްކަތް ކުރަމުންނެވެ. މީރަބް ނެތަސް އޭނާ އެހުރީ މުރުތަސިމާއެކީގައިކަމަށް ޙަޔާ ބުނަމުން ގެންދިޔައެވެ. ޙަޔާ ދައްކާ އެއްވެސް ވާހަކައެއް މުރުތަސިމް އަޑެއް ނާހައެވެ. އަނީލާ އައިސް އެތަނަށް ވަނުމާއެކީ ، މީރަބް ނެތީމަ އެތަނަށް ލިބިފައި އޮތް ފަޅުކަމުގެ ވާހަކައިން ، އަނީލާ ލަދުގަންނުވައިލުމަށް ޙަޔާ މަސައްކަތް ކުރިއެވެ. އަނީލާއެއް ޙަޔާއަކަށް ޖަވާބެއް ނުދެއެވެ. ފަހަރެއްގައި މިތަނުން ކޮންމެވެސް ތާކު މީރަބް ހުރެދާނެކަމަށް އަނީލާ ބުނުމާއެކީ ، ޙަޔާގެ މޫނުމައްޗަށް ކުނިބިހެއް ޖެހިފަދައެވެ. ކުއްލިޔަކަށް އެފެނުނީ ، ޚާނަމް މަންމައާއި މީރަބާ ދެމީހުން މަރިޔަމް ގޮވައިގެން އެތަނަށް އައިސް ވަތްތަނެވެ. ޙަޔާގެ އަނގަ ތައްމިނަށް ހުޅުވުނެވެ.
މީރަބް މަޑުމަޑުން އައިސް މުރުތަސިމްގެ ބުރަކަށީގައި އަތް ޖައްސައިލިއެވެ. ޙަޔާއޭ ބުނެ މުރުތަސިމް ފަހަތަށް އެނބުރިލިއިރު ، އޭނާގެ ކުރިމަތީގައި އެހުރީ މީރަބެވެ. ހަޔާގާތަށްއައި ރުޅީގައި އެތަނުގައި ނުހުންނަންވެގެން ، އޭރު ގޭތެރެޔަށް ހިނގައްޖެއެވެ. މީރަބްގެ މޫނަށް ބަލަހައްޓައިގެން އެތައް އިރަކު މުރުތަސިމަށް ހުރެވުނެވެ. މީރަބްވެސް މުރުތަސިމްގެ ލޮލުން އޭނާގެ ކަޅި ކައްސާލައިގެން ދިޔަކަ ނުދެއެވެ.
" އަހަރެންނަށް މަޢާފު ކުރާށެވެ ! މުރުތަސިމްގެ ފަހަތުގައި ، މުރުތަސިމާއެކީ އަހަރެންނަށް ހުރެވުނީ އޮޅުމަކުންނެވެ. ފަހަރެއްގައި ، މުރުތަސިމް އިންތިޒާރު ކުރަމުން ގެންދިޔައީ ޙަޔާއަށްކަމުގައި ވެދާނެއެވެ. " ފެންކަޅިވެފައިހުރެ ، މީރަބް ބުންޏެވެ.
ރޮހޭލް ކޮބައިތޯ މުރުތަސިމް ސުއާލު ކުރިއެވެ. އޭނާއަށް އެތަނުން ރޮހޭލް ނުފެންނަކަމަށާއި ، މީރަބާއެކީ ރޮހޭލް ނުގެންނަންތޯ މުރުތަސިމް ސުއާލު ކުރިއެވެ. ޙަޤީޤަތުގައި ، އޭނާ އަންނަން ޖެހޭނީ ރޮހޭލާއެކީކަމަށް މީރަބް ބުންޏެވެ. އަތާ އަތް ގުޅުވާލައިގެންނެވެ. ރޮހޭލްގެ އަތާ މީރަބްގެ އަތް ގުޅުވައިލެވޭނީ ، ރޮހޭލްގެ އަތް ވަކިނުވެ އޮވެގެންކަމަށް މުރުތަސިމް ބުންޏެވެ.
ރޮހޭލް ގޭތެރޭގައި އުޅެނިކޮށް ، ބޭރުދޮރުގެ ރަނގަބީލު ވުމާއެކީ ، ދޮރު ހުޅުވައިލިއިރު މީހަކު ހުއްޓެވެ. މުރުތަސިމްޚާން އޭނާއަށް ސަލާމް ފޮނުވާކަމަށް އެމީހަކު ބުންޏެވެ. އެއީ މުރުތަސިމްމެން ގޭގެ އިސް ސަރުދާރު ބަޚްތިޔާރެވެ. ރޮހޭލާ ސަލާމް ކުރުމަށްޓަކައި ދިއްކޮށްލެވިފައިވާ ބަޚްތިޔާރުގެ އަތުގައި ހިފައި ، ސަލާމް ކޮށްލުމާއެކީ ، ބަޚްތިޔާރު އޭނާ ކޮޓަރިތެރެޔަށް ވައްޓައިލިއެވެ. އަދި ބަޚްތިޔާރާއެކީ އައިސް ތިބިމީހުން ކޮޓަރިޔަށް ވައްދައި ދޮރުތަޅުލުމަށްފަހު ، ރޮހޭލަށް އަނިޔާ ކުރަން ފެއްޓިއެވެ.
މުރުތަސިމް މިހާރު އެކުރީ ކޮންކަމެއްތޯ މީރަބް ސުއާލު ކުރިއެވެ. އޭނާ ، އެއްވެސްކަމެއް ނުކުރާ ކަމަށާއި ، ހަމައެކަނި އޭނާގެ ސަލާމް ، ރޮހޭލަށް ފޮނުވީކަމަށް މުރުތަސިމް ބުންޏެވެ. އެހެންފަހަރުތަކެކޭ އެއްގޮތަށް ، މުރުތަސިމަށް މިހާރުވެސް އެހުރެވެނީ ، މީރަބާމެދު ގޯސްކޮށް ވިސްނައިގެންކަމަށް މީރަބް ބުންޏެވެ. މީރަބް ހިނގައިގަތްތަނާ ކުރިމަތިން އައި މީހެއްގެ ގައިގައި އަޅައިގެންފައި އޭނާ އަތުގައި ހުރި ޖޫސްތަށި މީރަބްގެ ހެދުމަށް ބަންޑުން ވިއެވެ. އެހެންކަމުން ، ހެދުން ބަދަލު ކޮށްލުމަށްޓަކައި މީރަބް ގޭތެރެޔަށް ވަދެގެން ދިޔައެވެ. އިރުކޮޅަކުން ، އެތަނުގައހުރި ކުޑަކުއްޖަކު އައިސް ، މުރުތަސިމްގެ އަތަށް ކަރުދާސްކޮޅެއް ދިނެވެ. އޭގައި ލިޔެފައި އޮތީ ، ކޮޓަރީގައި އޭނާގެ އިންތިޒާރުގައި ހުރި ކަމަށެވެ. މުރުތަސިމްވެސް އައިސް ކޮޓަރިޔަށް ވަދެ ، މީރަބަށް ގޮވައިލިތަނުން ، ފަހަތުން އައިސް މުރުތަސިމްގެ ގައިގައި މީހަކު ބައްދައިލިއެވެ. އެވަގުތަކީ ، ފާޚާނާއަށް ވަދެ ހެދުން ދޮވެލުމަށްފަހު މީރަބް ނުކުތް ވަގުތެވެ. މުރުތަސިމްގެ ގައިގައި ޙަޔާ ބައްދާލައިގެން ހުރިތަން މީރަބަށް ފެނުނެވެ. އެވަގުތު ، އޭނާގާތަށް މީރަބް އަންނާނެކަން އޭނާއަށް އެނގެޔޭ ބުނެ ، މުރުތަސިމް ފަހަތަށް އެނބުރިލިއިރު ، އޭނާގެ ގައިގައި ބައްދާލައިގެން ހުރީ ޙަޔާއެވެ. ތަންކޮޅެއް ދުރުގައި އެ މަންޒަރުބަލަން މީރަބް ހުއްޓެވެ. މީރަބަށް ، ބޭއިޚްތިޔާރުގައި މުރުތަސިމަށް ގޮވައި ލެވުނެވެ. މުރުތަސިމް ހުރީ ހަދާނެގޮތް ބޮޑުވެ ، ދެލޯ މުދުނަށް އަރައި އަނގަ ހުޅުވިފައެވެ.
" މީރަބެވެ ! އަހަރެން ހީކުރީ ފަހަތުން އައިސް އަހަރެންގެ ގައިގައި ބައްދައިލީ މީރަބް ކަމަށެވެ. ކަރުދާސްކޮޅެއް ދީފައި އަހަރެން ކޮޓަރިޔަށް އައިސް ދިނުމަށް ބުނީ މީރަބެއް ނޫން ހެއްޔެވެ ؟ " މުރުތަސިމަށް ބުނެވުނެވެ.
މީރަބް ހުރީ ރުޅިއައިސް ރަތްވެފައެވެ. ޙަޔާއާ ދިމާލަށް ދެލޯ އަޅައިގެންނެވެ. ޙަޤީޤަތާއި މަންޒަރު ބަދަލުކުރުމަށް މަސައްކަތް ކުރުމުގެ ބޭނުމެއް ނެތްކަމުގައި މުރުތަސިމާ ދިމާލަށް ދެލޯ އަޅައިގެންހުރެ ، މީރަބް ބުންޏެވެ.
މުރުތަސިމް އަންނަން ބުނީ ޙަޔާނޫންހޭ ބުނެ ، މީރަބް ، ޙަޔާއާ ސުއާލު ކުރިއެވެ. އެހުރިހާކަމެއްކުރީ ޙަޔާތޯ މުރުތަސިމް ، ޙަޔާއާ ސުއާލުކޮށް ހަޅޭއްލަވައިގަތެވެ.
" މުރުތަސިމެވެ ! މުރުތަސިމްގެ ލޯބީގައި އަހަރެން މިހުރީ ކަނުވެފައެވެ. މީރަބް ގެޔަށް އައިތަން ފެނިފައި އަހަރެންނަށް ކެތް ނުކުރެވުނީއެވެ. އެތާ ނުހުރެވިގެން ، އެތާހުރި ކުއްޖެއްގެ އަތަށް މުރުތަސިމް ކޮޓަރިޔަށް އައިސްދިނުމަށް ލިޔެ ، ކަރުދާސްކޮޅެއްދީފައި ، މުރުތަސިމަށް ދޭން ބުނެފައި އަހަރެން މިކޮޓަރިޔަށް ވަދެ ފިލާމިހުރީ އެހެންވެގެންނެވެ. " ޙަޔާ ބުންޏެވެ.
އަހަރެން މިތަނަށް އަންނަންބުނީ ޙަޔާކަމަށް ބުނުމަށް މުރުތަސިމް ބުންޏެވެ. ޙަޔާގެ ލޯތްބަށް މުރުތަސިމް އެއްވެސް ޤަދަރެއް ނުކުރާކަމަށް ބުނެ ޙަޔާ އަޑުގަދަ ކޮށްލުމާއެކީ ، މުރުތަސިމްވެސް ޙަޔާއާ ދިމާލަށް ހަޅޭއްލަވައިގަތެވެ.
" މުރުތަސިމެވެ ! ތިކަމުގައި ޙަޔާއާ ދިމާލަށް އަޑުގަދަކޮށް ، އެކަކު އަނެކަކަށް ޒުވާބު ކުރުމުގެ ބޭނުމެއް ނެތެވެ. މުރުތަސިމްދެކެ ޙަޔާ ވާލޯބި ނިކަން ދެކިބަލާށެވެ ! ޙަޔާގެ އެންމެ ޢިޝާރާތަކަށް މުރުތަސިމް ތިހުރީ ، ކޮއްކޮގެ ކައިވެންޏަށްފަހު ، އެންމެ ފަހުގެ ވަދާޢީ ޙަފްލާ ދޫކޮށްލާފައި ، ކެތް ނުވެގެން ކޮޓަރިޔަށް އައިހެވެ. " މީރަބް ބުންޏެވެ.
މީރަބް ގާތަށް މުރުތަސިމް ޖެހިލިއެވެ. މީރަބަށް އެހުރީ އޮޅުން އަރާފައި ކަމަށާއި ، މީރަބަށް އެފެނުނު މަންޒަރަކީ ޙަޤީޤަތެއް ނޫންކަމަށް މުރުތަސިމް ބުންޏެވެ. އޭނާ އެއައީ ، މީރަބް އޭނާއަށް ދިން ކަރުދާސްކޮޅެއްކަމަށް ބަލާފައެވެ. އެ ކަރުދާސްކޮޅު ކޮބައިތޯ މީރަބް ސުއާލު ކުރިއެވެ.
" ކަރުދާސްކޮޅެއް މިހާރަކު އަހަރެންގެ އަތަކު ނެތެވެ. އެކަމަކު އަހަރެން މިހަދަނީ ތެދެވެ. އަހަރެންނަކީ މީރަބަށް ދޮގުހަދާނެ މީހެއްނޫނެވެ. އަހަރެންގެ ވާހަކަ ޤަބޫލު ކުރާށެވެ ! އާދޭސް ކޮށްފައި ބުނަމެވެ. އަހަރެންނަށް އިތުބާރު ކުރާށެވެ ! " މުރުތަސިމް ބުންޏެވެ.
ޙާޔާގާތު ހުރިހާ ވާހަކައެއް ތެދަށް ބުނުމަށް މުރުތަސިމް އެދުނެވެ. އަދި ، ތެދަށް ނުބުނެފިނަމަ ، ޙަޔާއަށް ހަދާނެގޮތް އެނގޭނީ އޭނާއަށް ކަމުގައި މުރުތަސިމް ބުންޏެވެ. މުރުތަސިމްގެ ސުއާލަށް ޖަވާބު ނުދީ ، މުރުތަސިމް ގޮވަގޮވާ އޮއްވައި ޙަޔާ އެތަނުން ނުކުމެގެން ދިޔައެވެ. މީރަބް އައިސް މުރުތަސިމްގެ ކުރިމަތީ ހުއްޓުނެވެ.
" ވަރަށް ރީތި ފުރިހަމަ މަންޒަރެކެވެ. ޙަޔާހުރީ މުރުތަސިމްގެ ގައިގައި ބައްދާލައިގެންނެވެ. މުރުތަސިމް ހުރީ މުރުތަސިމްގެ ގައިގައި ބައްދައިލުމަށް ޙަޔާއަށް ފުރުޞަތު ދީގެންނެވެ. އެ މަންޒަރުގައި ގޯހެއް އުޅޭނަމަ ހެދުނު ގޯހެއް ހެދުނީ އަހަރެންނަށެވެ. އެއީ ، އަހަރެންނަށް މިތަނަށް އައިސް ވަދެވުމެވެ. " މީރަބް ބުންޏެވެ.
މުރުތަސިމަށް އިތުބާރު ކުރުމަށް ، މީރަބަށް މުރުތަސިމް އާދޭސް ކުރިއެވެ. ހުރިހާ ކަމެއް އެނގިއްޖެކަމަށާއި ، އަދި އެއްފަހަރު އެ މަންޒަރު ތަކުރާރު ކޮށްލުމަށްޓަކައި ޙަޔާ ގެންނަމާ ހެއްޔޭ ބުނެ ، މީރަބް ހިނގައިގަތުމާއެކީ ، މީރަބްގެ އަތުގައި މުރުތަސިމް ހިފެހެއްޓިއެވެ. މީރަބް އެނބުރިލާފައި ، މުރުތަސިމްގެ ކަންކަށިމަތީ އޭނާގެ އަތުގައި ހުރިބާރެއްލާފައި އެތިފަހަރެއް އަޅުވައިލިއެވެ.
" ރޮހޭލް އަހަރެންގެ އަތުގައި ހިފައިލިކަމަށްޓަކައި ، ބަދަލު ހިފުމުގެ ގޮތުން ، މުރުތަސިމް ، ޙަޔާގެ ގައިގައި ބައްދާލައިފީމުއެވެ. ޢިއްޒަތާއި ޤަދަރު އުފުލިގެންވާ މުރުތަސިމް ޚާނަކީ ، އަންހެން ކަނބަލުންނަށް އިޙްތިރާމްކުރާ ، ހުވަފަތް އަންހެނުންގެ މަދަދުޤާރެވެ. މިއަދު މި ފެނުނީ ، މުރުތަސިމްޚާންގެ އަސްލު ސިފައެވެ. އަހަރެން ތިޔަމޫނަށް ކުޅުޖަހަންވެސް ލަދުގަނެއޭ ބުނެ ، މުރުތަސިމްގެ މޫނަށް މީރަބް ކުޅުޖެހިއެވެ. މުރުތަސިމްޚާނެވެ ! އެނގޭ ހެއްޔެވެ ؟ ކައިވެނީގެ ކުރިން އެއްކަލަ އެގްރީމެންޓްގައި އަހަރެންނަށް ސޮއިކުރެވުނީ ހަމަ ރަނގަޅަށެވެ. އެއީ މުރުތަސިމް ޚާނަށް ޙައްޤު އަދަބެކެވެ. " މީރަބް ބުންޏެވެ.
މީރަބް ވާހަކަ ދައްކަމުން ގެންދިޔައިރު މުރުތަސިމްވެސް ހުރީ ރުޅިއައިސް ތުރުތުރު އަޅައަޅައެވެ. އެހެނަސް ، މީރަބަށް އެއްވެސް އަނިޔާއެއް ދޭކަށް ، މުރުތަސިމަކަށް ނުކެރުނެވެ. މީރަބް ހިނގައިގަތްތަނާ ، މީރަބްގެ އަތުގައި މުރުތަސިމް ހިފެހެއްޓިއެވެ. މީރަބް އެބުނާ އެގްރީމެންޓާއި ، މުރުތަސިމްޚާންގެ އަގަކީ ކޮބައިކަން މީރަބަށް ދައްކައިލާނެކަމަށް މުރުތަސިމް ބުންޏެވެ. އަދި ، ޖެހިގެންހުރި ކޮޓަރިޔަށް ވަދެ ކޮޓަރި ތަޅުލިއެވެ. ޙަޔާ ގެންދިޔައީ ، މުރުތަސިމާއި މީރަބަށް ފާރަލަމުންނެވެ. ދޮރުކައިރިޔަށް ޖެހިލައި ދޮރުގައި ކަންފަތް ޖެހިއިރުވެސް ، މީރަބާއި މުރުތަސިމް ޒުވާބުކުރާ އަޑެއް ނީވެއެވެ. އެކަމާ ޙަޔާ ހުރީ އަޖައިބުވެފައެވެ.
މަރިޔަމް އޭނާގެ ފިރިމީހާޔާއެކީ ގެއިން ނުކުމެގެން ދިޔައިރުވެސް ، އޭނާ އެންމެ ދެކެން ބޭނުންވި މުރުތަސިމް ބޭބެވެސް އަދި މީރަބެއްވެސް ނެތެވެ. މުރުތަސިމް ދިޔައީ ، ދަނޑުގައި އުޅުނު މުއައްޒަފަކަށް ބަޔަކު ޙަމަލާދީގެން ކުއްލިޔަކަށް ދަނޑަށް ދާންޖެހިގެންކަމަށް ބުނެ ޙަޔާ ދޮގު ހެދިއެވެ. ޙަޔާ ބުނިގޮތުގައި މީރަބް އޭނާގެ ކޮޓަރިތެރޭ އެބައިނެވެ. މީރަބް އައުމުން އަނެއްކާ އަނެއް އާފާތް ، އެޢާއިލާއަށް ކުރިމަތިވީކަމަށް ބުނެ ، ޚާނަމް މީރަބަށް އެއްޗެތި ކިޔައިގަތެވެ. ޙަޔާ އެހަދަނީ ދޮގުކަން މަރިޔަމަށް އެނގުނުނަމަވެސް ، ޙަޔާއަކަށް ރައްދެއް ނުދެއެވެ.
މީރަބްވެސް އަދި މުރުތަސިމްވެސް ، އެކަކުއަނެކަކު ދެކެ ފޫހިވެފައި ތިއްބެވެ. ދެމީހުންގެ ހިތުގައިވެސް އެކަކު އަނެކަކަށް އޮތީ ރުޅިވެރިކަމެވެ. ވާހަކަ ދައްކައިލައިގެން ހަމަޖެހިލާކަށް އެކަކުވެސް ބޭނުމެއް ނުވިއެވެ. އެހެންނަމަވެސް ، ރޭވެ ދުނިޔެއަށް ލިބުނު ހަމަހިމޭންކަމާއެކީ ، ދެމީހުންގެ ހިތަށްވެސް ހަމަޖެހުން ލިބި ، އަރައިގެންފައިތިބި ރުޅި މައިތިރިވާން ފެށިއެވެ.
މުރުތަސިމަށްވެސް އޭނާގެ އަމިއްލަ ނަފްސު ކޮންޓްރޯލް ނުކުރެވުނުކަމުގެ އިޙްސާސް ލިބުނެވެ. މީރަބް އެއައީ ، އޭނާއަށް އިތުބާރު ކޮށްފައެވެ. ޙަޔާ އެކުރިކަމަކުން ، މީރަބަށްވެސް އަދި އޭނާއަށްވެސް އެލިބުނީ ވޭނާއި ތަކްލީފެވެ. އަމިއްލަ ނަފްސު ކޮންޓްރޯލްކޮށް ، މީރަބް ހަމަޔަކަށް އަޅުވަން ، އޭނާ މަސައްކަތް ކުރަންޖެހޭނެކަމަށް މުރުތަސިމަށް އިޙްސާސް ވިއެވެ.
މީރަބަށް ޤަބޫލު ކުރެވުނު ގޮތުގައި ހުރިހާ ގޯހެއްހެދީ ޙަޔާއެވެ. ޙަޔާއާ ހުރެ ، އޭނާއަށް މުރުތަސިމާ އިނދެގެން ނުއުޅެވޭނެކަމުގެ އިޙްސާސް މީރަބަށް ލިބުނެވެ. އެކަމަކު ، މުރުތަސިމްވެސް އޭނާއަކަށް އިތުބާރެއް ނުކުރެއެވެ. އެހެންނޫންނަމަ މުރުތަސިމް ޢަމަލުކުރާނީ އެގޮތަކަށް ނޫނެވެ. ޙަޔާ އޭނާގެ މަޤާމުގައި ، މުރުތަސިމާ ދުރުގައި ބަހައްޓާނެއެވެ. ޚާނިމްވެސް މީރަބް އެގެޔަށް އެގެނައީ ހަމައެކަނި މަރިޔަމަށްޓަކައެވެ. މީރަބާއި މުރުތަސިމަށް ހެވެއް އެދިގެންނެއްނޫނެވެ. މަރިޔަމްވެސް ، މިހާރު އެގެޔަކު ނެތެވެ. އެގޭގައި އޭނާއަށް ޙައްޤު ދަރަޖައާއި މަޤާމް ލިބުމަކީ ، ޙަޔާއާއި ޚާނަމް އެގޭގައި އުޅޭހާ ހިނދެއްގައި ކުރެވޭނެ ކަމެއްނޫނެވެ. އެންމެފަހުން ، އެގެއިން ނުކުމެގެންދާން މީރަބް ނިންމިއެވެ. މީރަބްދާނީ ކޮންތާކަށްކަމެއް ، ޚުދު އޭނާއަކަށްވެސް ނޭނގެއެވެ. ހަމަ ގައިމުވެސް ކަރާޗީއަށް ބައްޕަމެންގެޔަކަށް އޭނާ ނުދާނެއެވެ. އެގެޔަށް ދާއިރަށް ކޮންމެވެސް ބަހަނާއެއް ދައްކާފައި ޚާނަމް އެހެންޏާ މުރުތަސިމް އޭނާގެނެސް މިގެޔަށް ލާނެއެވެ.
މީރަބް ހުސްއަތާ ގެއިން ނުކުމެގެން ދާން ދޮރާ ހަމަޔަށްގޮސް ، ގޭޓް ހުޅުވަން ދޮރވާނުގާތު ބުނިނަމަވެސް ، ރޭގަނޑުގެ ލަސްގަޑިއެއްކަމަށް ވާތީ ، ދޮރުހުޅުވަން ދޮރުވާނު އިންކާރު ކުރިއެވެ. މީރަބްހުރި ޙާލަތު ފެނުމުންވެސް އެއީ އޭނާ ކުރަން ހެޔޮވާވަރުގެ ކަމެއްނޫންކަން ދޮރުވާނު ދެނެގަތެވެ. އެހެނަސް ، މީރަބްގާތަށް ރުޅިއައިސް އޭނާއަކީ މުރުތަސިމްޚާންގެ އަންހެނުންކަމަށްބުނެ ، ގޭޓް ހުޅުވަން އެންގުމުން ، އެހެން ގޮތެއްނެތިގެން ގޭޓް ހުޅުވައިދިނުމާއެކީ ، މީރަބް ނުކުމެގެން ހިނގައިގަތެވެ. އޭގެ ކުރިން ، މުރުތަސިމް ބޭރަށްދާން އައުމުން ، ދޮރުވާނުވަނީ ، މުރުތަސިމަށް ގޭޓް ހުޅުވައިދީފައެވެ. މުރުތަސިމް ގެއިން ނުކުމެގެން ދިޔަތަން ޙަޔާއަށް ފެނުނެވެ.
ދޮރުވާނު ކަންބޮޑުވެފައިހުރެ ، ގެޔަށް ފޯނުކުރިއެވެ. ގޭތެރެއިން ފޯނުނެގީ ޙަޔާއެވެ. މީރަބް ، ނުގޮތަކަށް ގެއިން ނުކުމެގެން ދިޔަވާހަކަ ދޮރުވާނު ބުނުމާއެކީ އެއަޑު ނީވޭކަމަށް ހަދައި ފޯނަށް ޖަވާބުނުދީ ޙަޔާ ހުއްޓެވެ. އެއީ ، އޭނާ އެންމެ ބޭނުންވި ކަންތަކެވެ. މީރަބް އެގެއިން ނުކުމެގެން އެދިޔައީ އަމިއްލަޔަށެވެ. އެހިސާބުން މީރަބްގެ ކަންތައް އެނިމުނީކަމަށް ޙަޔާއަށް ފެނުނެވެ. ދެން އޮތީ މުރުތަސިމް މައިތިރި ކުރުމެވެ. މަޑުމަޑުންގޮސް އެކަންވެސް ޙަޔާ ކުރާނެއެވެ. މީރަބް އަމިއްލަޔަށް ގެއިން ނުކުމެގެން ދިޔައިމަ ، ޚާނަމްގެ ބޮލަށް ވަދެގެން މުރުތަސިމާ ކައިވެނި ކުރުމުގެ ކަންތަކާ ދިމާކުރާނީއެވެ. އެކަމުގެ ތެރެޔަށް ވަންނަން މަރިޔަމެއްވެސް މިހާރަކު ގެޔަކު ނެތެވެ. މުޅި އެގެ އެއްކޮށް އެއޮތީ ޙަޔާގެ ހިތަކަށް ލިބިފައެވެ. މީރަބްގެ ކިބައިން ބަދަލު ހިފުމަށްޓަކައި ، މުރުތަސިމްވެސް ، ޙަޔާއާ އެއްބައި ވާނެއެވެ.
ނޮރޭޒްގެ ގެޔަށްގޮސް ، އެރޭ ، މަރިޔަމާއި ނޮރޭޒް މިނިވަންކަމާއެކީ ބައްދަލުވުމަށް ލިބުނު ފުރަތަމަ ފުރުޞަތުގައި ، މަރިޔަމް އޭނާގެ ވާހަކަތައް ނޮރޭޒަށް ކިޔައިދޭން ނިންމިއެވެ.
އޭނާއަށް ، އެހެންމީހަކު ދެކެ ލޯބިވެވިފައިވާކަމުގައި މަރިޔަމް ބުންޏެވެ. އެމީހަކީ މަލިކު ޒުބޭރެވެ. މަލިކު ޒުބޭރުގެ ރޭވުމަކަށްވީ އޭނާގެ ބޭބެ ، މުރުތަސިމްގެ ކިބައިން ބަދަލު ހިފުމެވެ. އޭނާއާއި މީރަބަށް އޮޅުވާލައިގެން ، މަލިކު ޒުބޭރުވަނީ ، މަރިޔަމްގެ ޙަޔާތް ބަރުބާދުކޮށްލާފައެވެ. ނޮރޭޒުގެ ކައިވެންޏަށް އާނބަސް ބުނުމަށް މަރިޔަމްއަށް ޖެހުނީ ، މަންމަ އެކަމަށް މަޖްބޫރު ކުރުމުގެ ސަބަބުންނެވެ. މަރިޔަމްގެ ނިޔަތަކީ ، ނޮރޭޒަށް އެއްވެސް ގެއްލުމެއް ދިނުމެއްނޫނެވެ. އަދި ނޮރޭޒްގެ ހިތަށް އުނދަގޫވާކަހަލަ އެއްވެސް ކަމެއް ކުރުމެއްވެސް ނޫނެވެ. މަރިޔަމްގެ ވާހަކަ ގޯސްކޮށް ނުނެގުމަށް މަރިޔަމް އެދުނެވެ. އޭނާގެ ކައިވެނި ކޮންމެ ޙާލަތެއްގައި ކުރެވުނު ކަމަށްވިޔަސް ، އެކައިވެނީގެ ޒިންމާއާއި މަސްއޫލިއްޔަތު ފުރިހަމަޔަށް އުފުއްލާނެއެވެ. ނޮރޭޒްގެ ހިތަށް އުނދަގޫވާނެ އެއްވެސްކަމެއް އޭނާއެއް ނުކުރާނެއެވެ. ( ނުނިމޭ )
