(21 ސެޕްޓެމްބަރ 2025 ގައި ޝާއިޢުކުރި ބަޔާގުޅޭ)
މަލިކު ޒުބޭރުގެ ރޭވުން ކާމިޔާބު ވިއެވެ. އަނަސްއާ ކައިވެނިކުރަން މަރިޔަމް ބޭނުންކަމަށް ވަންޏާ ހަމައެކަނި އޮތް ޙައްލަކީ ، އަނަސްއާ އެކީ މަރިޔަމް ފިލައިގެން ގޮސް ، ކައިވެނި ކުރުމެވެ. އެނޫންގޮތެއް ނެތެވެ. އެހެން ނޫންކަމަށްވަންޏާ ، އޭނާގެ މަތިން ހަނދާން ނައްތައިލުމަށް އަނަސް ބުންޏެވެ. އަނަސްއަކީ ، މަލިކު ޒުބޭރުކަމެއް މަރިޔަމްއަކަށް ނޭނގެއެވެ. އޭގެކުރިން ، މަރިޔަމްއަކަށް މަލިކު ޒުބޭރު ފެނިފައެއް ނުވެއެވެ. އަދި ، މީރަބަކަށްވެސް މަލިކު ޒުބޭރު ފެނިފައެއް ނުވެއެވެ. މުރުތަސިމްގެ ޢާއިލާގެ އެއްވެސް އަންހެނަކު ، މަލިކު ޒުބޭރު ފެންނަ ހިސާބަށް ދިއުމަކީ ، މުރުތަސިމްގެ ފުރާނަ ހުއްޓާ ކުރެވޭނެ ކަމެއްނޫނެވެ. އެހެންނަމަވެސް ، މަރިޔަމް ކޮލެޖަށްލާން ދިޔަ ދުވަހެއްގައި ، ޙަޔާއަށް އެކާރުގައި އިނދެވުނީތީ ، މުރުތަސިމާއި ޒުބޭރާ ދެމެދު ހިނގި ޒުވާބެއްގައި ، ޙަޔާއަށް އޮތީ މަލިކު ޒުބޭރު ފެނިފައި ވެއެވެ. އެދުވަހު ، އޭނާއާ ޒުވާބު އެކުރީ މަލިކު ޒުބޭރުކަމަށް ، ޙަޔާގާތު މުރުތަސިމް އޮތީ ބުނެފައެވެ. އެހެންކަމުން ، އެގޭގެ އަންހެނުންކުރެ ، މަލިކު ޒުބޭރާ ދިމާވެފައިވަނީ ހަމައެކަނި ޙަޔާއާއެވެ. އެވެސް ، މުރުތަސިމްގެ ޙިމާޔަތުގައި މުރުތަސިމާއެކީ ހުއްޓައެވެ.
އަނަސްއާއި މަރިޔަމްގެ ކައިވެނި ކުރެވޭކަށް މީރަބް ފިޔަވައި އެގޭގެ އެއްވެސްމީހަކު ނޭދެއެވެ. އެހެންކަމުން ، އެގޭގެ އެންމެންނާ ދެކޮޅަށް މަސައްކަތް ކުރުމަކީ ، މީރަބަށް މިވަގުތަށް މަޖުބޫރުވެފައިވާ ކަމެކެވެ. މީރަބް ، މުރުތަސިމަށް ބާރުއަޅަމުންގެންދަނި ، އެންމެ ފަހަރަކު ނަމަވެސް އަނަސްއާ ބައްދަލު ކޮށްލުމަށެވެ. އެހެނަސް ، އަނަސްއާ ބައްދަލުކުރާކަށް ، މުރުތަސިމް ބޭނުމެއް ނުވެއެވެ. އަނަސްގެ މަންމަ އެގެޔަށް އައިސް އެއުޅުނުގޮތުން ، އެއީ އެއްވެސް އަޚްލާޤެއް ނެތްތާނގައި ، އަދަބެއް ސަދަބެއްވެސް ހުރި ބައެއްނޫނެވެ. އެވަރުގެ އަންހެނެއްގެ ދަރިޔެއްގެ ޙާލު އަދިވަކިން ބޮޑުވާނެއެވެ. މަލިކު ޒުބޭރު އެގެންދަނީ ، އެ ކައިވެންޏަށް ، މުރުތަސިމް ނޫނެކޭ ބުނާނެހާ ކަމެއްކރަމުން ، މަރިޔަމްގެ ހިތަށް ވަސްވާސް ވައްދައިގެން ، މަރިޔަމް ފިލައިގެން އަންނާނެ ހުރިހާ ކަމެއް ރާވައި ހިންގަމުންނެވެ. މުރުތަސިމް މަސައްކަތް ކުރަމުން ގެންދަނީ ، މަރިޔަމްގެ ކައިވެނީގެކަންކަމުގައި މީރަބް ނުބެހި އުޅުމަށެވެ. އެކަމަކު ، މަރިޔަމްއަށްޓަކައި ، އެއީ މީރަބަށް ކުރަން މަޖުބޫރުވެފައި އޮތް ކަމެކެވެ. މަރިޔަމްގެ އެކަނިވެރި ޙާލަށް ދޫކޮށްލުމަކީ ، އޭނާއަށް ކުރެވޭވަރުގެ ކަމެއްނޫނެވެ. މަރިޔަމްއަކީ ، މީރަބްގެ ފަހަރި ކޮއްކޮއެއްނަމަވެސް ، މީރަބް މިހާރު މަސައްކަތް ކުރަމުން އެގެންދަނީ ، މަރިޔަމްގެ ގާތް އަންހެންކުއްޖެއްގެ ގޮތުގައެވެ.
ޚާނަމްގެ ބޯ ބޮޑުކަމުން ، މަރިޔަމްގެ އަތުގައި އޮތް ފޯނުވެސް އަތުލައިފިއެވެ. އެހެންކަމުން ، އަނަސްއާ ގުޅޭނެ އެއްވެސް ގޮތެއް މަރިޔަމްއަކަށް މިހާރަކު ނެތެވެ. އެކަންވެސް ހަމަޖައްސައިދިނީ މީރަބެވެ. މީރަބްގެ ފޯނު މަރިޔަމްއަށް ދީގެންނެވެ. ފޯނު ދިނުމަށްފަހު ، އެކަން އެއްވެސްމީހަކަށް ނޭންގުމަށް މީރަބް އެދުނެވެ. ޚާނަމް މަންމަޔަށް އެކަން އެނގިއްޖިއްޔާ ދެމީހުންގެ ދުވަސް އެއްފަހަރާ ދާނެއެވެ. ޙަޔާއަށް އެކަން އެނގުނަސް އެހިސާބުން ، އެދެމީހުންގެ ދުވަސް ދިޔައީއެވެ.
މުރުތަސިމް އުޅެނީ މީރަބާ ދުރުދުރުންނެވެ. ބޭރުގައި އެއުޅޭ ތަނެއްގައި އުޅުމަށްފަހު ، ރޭގަނޑު ނިދަން އަންނަނީވެސް ވަރަށް ލަހުންނެވެ. ބޭރަސްދަނީވެސް ވަރަށް ސެންޓް ޖަހައިގެންނެވެ. އެއީ ، މީރަބަށް އަޅައިގަތް ކަމެއްނަމަވެސް ، މީރަބްގެ ހިތަށް އެކަމުން އުނދަގޫވާކަން ދައްކާކަށް ބޭނުމެއްނޫނެވެ. މުރުތަސިމްވެސް ، އޭނާގެ ޒުވާން ދުވަސްވަރު ، އުފާވެރިކަމުގެ ހިތްހަމަޖެހުންތައް ޙަޔާތުން ނެތިދާކަށް ބޭނުމެއްނޫނެވެ. އެހެން ނޫނަސް ، މުރުތަސިމަކީ ، އޭނާގެ ފިރިމީހާކަމަށް ، މީރަބް ބަލަނީކީވެސް ނޫނެވެ. މުރުތަސިމް ކޮންމެ ގޮތަކަށް އުޅުނަސް ، މީރަބަކާ ކޮންބެހޭ ކަމެއް ހެއްޔެވެ ؟
މުރުތަސިމް މާގިނައިން ބޭރަށްދާތީ އެއްދުވަހަކު ، މީރަބް އޭނާއަށް ފާރަލަމުން ފަހަތުން ދިޔައެވެ. މުރުތަސިމް ވަތްގެއިން މީރަބާ ދިމާވީ ދެފިރިހެންކުދިންނާ އަދި މެދުޢުމުރުގެ އަންހެނަކާއެވެ. މީރަބް ވަތްގޮތަށް ވަދެ ، މުރުތަސިމާ ދިމާލަށް އެއްޗެތިކިޔަން ފެއްޓިއެވެ. އެއަންހެންމީހާ އިނީ ހަދާނެގޮތް ބޮޑުވެފައެވެ. އެންމެފަހުން ، މީރަބް ނުކުންނަން ހިނގައިގަތްތަނާ ، އެއަންހެނާ މީރަބަށް ގޮވާލާފައި ، މުރުތަސިމަށް ތަޢުރީފްކޮށް ، މުރުތަސިމާ ދޭތެރޭ ގޯސްގޮތްގޮތަށް ނުވިސްނުމަން ބުންޏެވެ. އެ އަންހެނާއަކީ ، މުރުތަސިމްގެ ދަނޑުގައި މަސައްކަތްކުރާ މީހެއްގެ އަނތްބެކެވެ. މުރުތަސިމްއާއެކީ އެ ފިރިހެނާ މަސައްކަތްކުރާތީ ، މުރުތސިމާ ދެކޮޅު ބަޔަކު އައިސް އެ ފިރިހެނާ މަރައިލުމާ ގުޅިގެން ، ހުވަފަތްވުމުން އޭނާގެ ދެކުދިންނާއި އޭނާއަށް އާޅާލައި އެ ޢާއިލާއަށް އެހީތެރިވަމުން ގެންދަނީ މުރުތަސިމެވެ. މުރުތަސިމަކީ ، އެތިންމައިންނަށް ﷲ ފޮނުއްވި ރަޙުމަތެއްކަމުގައި އެ އަންހެނާ އަންނަނީ ބަލަމުންނެވެ. މުރުތަސިމް ދޫކޮށްލާފައި ނުދިއުމަށް ، އެއަންހެނާ މީރަބްގެ ކިބައިން އެދުނެވެ. މުރުތަސިމް ވަރުގެ ހިތްހެޔޮ އެހީތެރި އިންސާނަކު މީރަބަށް ނުލިބޭނެކަމަށް ބުންޏެވެ. އޭނާފަދަ ، ހުވަފަތް އެތައް އަންހެނުންނަކާއި ، ޔަތީމުންނާއި ފަޤީރުންނަށް މުރުތަސިމް އަންނަނީ އެހީތެރިވަމުނެވެ.
މުރުތަސިމަށް ޝައްކުކޮށް ، މީރަބަށް ކުރެވުނީ ކުށްހީއެކެވެ. ބައެއް ހީއަކީ ފާފައެކެވެ. މުރުތަސިމާމެދު އެފަދަ ގޮތަކަށް ހީކުރެވުނީތީ ، މުރުތަސިމްގެ ކިބައިން މީރަބް މަޢާފަށް އެދުނެވެ. އަދި ، މީރަބްގެ ހިތުގައި މުރުތަސިމާމެދު އޮތް ވިސްނުން ރަނގަޅުވަމުން ދިޔައެވެ. ގަޔާވާގޮތް ވިއެވެ. އެހެނަސް ، މުރުތަސިމްދެކެ އޭނާ ލޯބިވުމަކީ ދުވަހަކުވެސް ވާނެކަމެއްނޫންކަމަށް މީރަބް ޤަބޫލު ކުރެއެވެ. މުރުތަސިމް ޤަބޫލުކުރާ ގޮތުގައި ، ލޯތްބަކީ ވާ އެއްޗެއް ނޫނެވެ. އެއީ ، ނޭނގިހުއްޓާ ވެވޭ އެއްޗެކެވެ. މީރަބަށްވެސް އެހެންވުމަކީ އެކަށީގެންވާ ކަމެކެވެ.
ނޮރޭޒާއި މަރިޔަމްގެ ކައިވެންޏަށް ދެންއޮތީ އެންމެ ހަތަރު ދުވަހެވެ. މީރަބް އެތައް ވަރަކަށް ކިޔައިގެން ، އެންމެފަހުން ، އަނަސްއާ ބައްދަލު ކުރުމަށް އަނަސްދީފައިވާ އެޑްރެހަށް ދާން މުރުތަސިމް އެއްބަސްވިއެވެ. މުރުތަސިމަށް ޤަބޫލު ކުރެވުނުގޮތުގައި ، މީރަބަކީ މަރިޔަމްގެ އުއްމީދެވެ. އެހެނަސް ، އަނަސްއާ ބައްދަލު ކުރުމަށްފަހު ، އަނަސްގެ މަންމަގެ ޢަމަލުތައް ހުރިގޮތަށް ، އަނަސްގެ ޢަމަލުތައް ހުރެއްޖެނަމަ ، އެކައިވެންޏަށް އެއްބަސް ނުވުމަށް މުރުތަސިމް ނިންމިއެވެ. އެކަމުގައި އެންމެ ފަހުބަސް އޮތީ ، މުރުތަސިމްގެ ކިބައިގާކަން މީރަބަށް އެނގެއެވެ.
މީރަބް އެދުނުގޮތުގެ މަތިން ، އަނަސްއާ ބައްދަލުކުރުމަށްޓަކއި ، އަނަސްދީފައިވާ އެޑްރެހަށް މުރުތަސިމް ދިޔައެވެ. އެތަނުން އޭނާއާ ބައްދަލުކުރިމީހާ ބުނިގޮތުގައި ، ސީމާވީ ޑުބާއީއަށް ގޮހެވެ. އެތަނަކީ ، ޅަފިރިހެނުންގެ ހިތްކަތިލާ ތަނެއްކަމުގައި އޭނާ ބުންޏެވެ. މުރުތަސިމް ބޭނުންވާ ކޮންމެ ޢުމުރުފުރަޔަކުންވެސް އެތަނުން ކުދިން ލިބޭނެއެވެ. ވަށައިގެންވާ ގޮނޑިތަކުގައި ޅަ ފިރިހެނުން ޢަމަލުވެފައި ތިއްބެވެ. އަދި ، ކުރިމަތީގައި ޅަ އަންހެންކުދިން އޮރިޔާން ހެދުމުގައި ނަށާލަ ނަށާލަ ތިއްބެވެ. މުރުތަސިމް ހުރީ ބުނާނެ އެއްޗެއްވެސް ނޭނގިފައެވެ. މުރުތަސިމް އެތަނަށް އަންނަކަން މަރިޔަމްގެ ފަރާތުން ޒުބޭރަށް އޮތީ އެނގިފައެވެ. އެހެންކަމުން ، އެތަނުގައި ދެކެވޭ ވާހަކައާއި ހިނގާ ކަންކަން ، އޭނާއަށް ވަގުތުން އެނގޭނެގޮތަށް ، ޒުބައިރުވަނީ އިންތިޒާމް ކޮށްފައެވެ.
ގެޔަށް އައިސް ވަތްއިރު ، މުރުތަސިމްހުރީ ރުޅިއައިސް ރަތްވެފައެވެ. ގެޔަށް ވަތްގޮތަށް މުރުތަސިމް ދިޔައީ ، މަރިޔަމްގެ ކޮޓަރިޔަށެވެ. އަދި ، އަނަސްއަކީ ކާކުތޯ މަރިޔަމްކުރެން އަހައި ސުއާލު ކުރިއެވެ. ބޭބެ އޭނާއާ އެކުރިމަތިކުރި ސުއާލުގެ ބާރުކަމާއި ، މުރުތަސިމްގެ މޫނުމަތިން ފެންނަންހުރި ، ރުޅިވެރިކަމުގެ އަސަރުން ، މަރިޔަމް ކަންބޮޑުވިއެވެ. އޭނާއިނީ ބޭބެގެ ސުއާލަށް ދޭނެ ޖަވާބެއް ނޭނގިފައެވެ. މީރަބް ވާހަކަ ދައްކަން ފެށުމުން ، އެކަމުގެ ތެރެޔަށް މީރަބް ނުވަނުމަށް މުރުތަސިމް އެންގިއެވެ. މަރިޔަމްހުރީ ބޭބެގެ ސުއާލަށް ދޭނެ ޖަވާބެއް ނޭނގި ކަންބޮޑުވެފައެވެ.
" މީގެ ފަހުން ދުވަހަކުވެސް ، އަނަސްއާ މަރިޔަމް ބައްދަލުކޮށްގެން ނުވާނެއެވެ. އަނަސްގެ ނަންވެސް މި ގޭތެރޭގައި އަޑުއިވިގެން ނުވާނެއެވެ. މަރިޔަމްގެ ލޮލުން އެންމެ ކަރުނަ ތިއްކެއްވެސް ، އަނަސްއަށްޓަކައި ފާއްދާލައިގެން ނުވާނެއެވެ. ހަމަޖެހިފައި އޮތްގޮތަށް ، މަރިޔަމްގެ ކައިވެނި ކުރެވޭނީ ނޮރޭޒާ އެވެ. " މުރުތަސިމްގެ އަޑުގައި ހުރި ބާރެއްލާފައި މަރިޔަމްއަށް އަމުރު ކުރިއެވެ.
މުރުތަސިމް ދިއުމާއެކީ ، އަނަސްގެ ނަންބަރަށް ގުޅައި ، އަނަސްއާ ވާހަކަ ދައްކަން މަރިޔަމްއަތަށް ފޯނުދީފައި ، މުރުތަސިމާ ކުރިމަތިލުމަށްޓަކައި މީރަބް އެތަނުން ނުކުތެވެ. އަނަސް ފޯނު ނެގުމާއެކީ ، އޭނާއަކީ ކާކުތޯ މަރިޔަމް ސުއާލު ކުރިއެވެ.
މުރުތަސިމް ހުރީ އައިސްހުރި ރުޅީގައި ކޮޓަރިތެރޭ ދެކޮޅަށްދެކޮޅަށް ހިނގާލަހިނގާލައެވެ. މީރަބްގޮސް ، މުރުތަސިމަށް ވެގެން އެއުޅެނީ ކީއްތޯ ސުއާލު ކުރިއެވެ. އަނަސްއަކީ ކާކުތޯ މީރަބާވެސް ، މުރުތަސިމް ސުއާލު ކުރިއެވެ. އަނަސްއަކީ ، މަރިޔަމްގެ ރައްޓެއްސެކެވެ. މީރަބާ އަނަސްއާ ބައްދަލުވެފައިވަނީ އެންމެ ފަހަރަކުއެވެ. އެއީ ، ރަނގަޅު މީހެއްހެން މީރަބަށް ހީވިއެވެ. މުރުތަސިމްގެ ސުއާލުތަކުން އޭނާ އެއައީ ، އަނަސްއާ ބައްދަލުކުރަން ގޮސްފައިކަން މީރަބަށް އެނގުނެވެ.
އޭނާ އެދިޔަތަނުގައި އަނަސް ކިޔާމީހަކުވެސް އަދި ސީމާކިޔާ މީހަކުވެސް ނެތްކަމަށް މުރުތަސިމް ބުންޏެވެ. އެއީ ، ނާސިގެޔެކެވެ. އެތަން އެއީ މުރުތަސިމްފަދަ ޤަދަރުވެރިން ވަންނަ ކަހަލަ ތަނެއް ނޫނެވެ. އެތަނަށް މުރުތަސިމް ދިޔައީ ހަމައެކަނި ، މީރަބަށްޓަކައި މީރަބް ބުނެގެންނެވެ. އެތަނަށް ވަދެފައި ނުކުންނަ އަންހެނާގެ ޢިއްފަތެއް ނުހުންނާނެއެވެ. އެފަދަ ތަނަކަށް މަރިޔަމް ފޮނުވައިގެން ، އޭނާގެ ޒިންމާއާއި މަސްއޫލިއްޔަތު ، އެކޮޅުކޮޅުން ޖަހަންވީތޯ ، މުރުތަސިމް ސުއާލު ކުރިއެވެ. މުރުތަސިމްގެ ވާހަކަތަކުން ، މީރަބްވެސް ހުރީ ޙައިރާން ވެފައެވެ.
މުރުތަސިމް ނުކުމެގެން ދިއުމާއެކީ ، މަރިޔަމްގެ ކޮޓަރިޔަށް މީރަބް ދިޔައިރު ، މަރިޔަމްއިނީ އަނަސްއާ ވާހަކަ ދައްކާށެވެ. ފޯނުއަތުލުމަށްފަހު ، މުރުތަސިމާ ބައްދަލު ނުކުރީ ކީއްވެތޯ މީރަބް ސުއާލު ކުރިއެވެ.
އޭނާއާ ބައްދަލުކުރަން މުރުތަސިމް ނާންނަކަމުގައި އަނަސް ބުންޏެވެ. މަންމަވެސް އޭނާއާއެކީ ގޭގައި އެބަ އުޅެއެވެ. މުރުތަސިމް ދިޔައީ ، އެހެންތަނަކަށް ކަމަށް ވެދާނެކަމަށް އަނަސް ބުންޏެވެ. މުރުތަސިމް ދޮގު ނުހަދާނެކަމަށާއި ، އޭނާ ދިޔައީ އަނަސްގެ މަންމަދިން އެޑްރެހަށްކަމުގައި އަނަސް ބުންޏެވެ.
" މަރިޔަމްއެވެ ! އަހަރެމެންގެ ކައިވެންޏަކަށް މުރުތަސިމެއް އެއްބަހެއް ނުވާނެއެވެ. އަހަރެންގެ ފަޤީރުކަމަކީ އެކަމުގެ އެއް ސަބަބެވެ. އަނެއް ސަބަބަކީ ، މަރިޔަމްގެ ޢާއިލާއިން ބޭރުމީހަކަށް އަހަރެން ވުމެވެ. މަރިޔަމްއަށް އޮތީ ދެގޮތެކެވެ. އެއްގޮތަކީ ، ފިލައިގެން އައިސް އަހަރެންނާ ކައިވެނި ކުރުމެވެ. އަނެއް ގޮތަކީ އަހަރެންގެ މަތިން ހަނދާން ނައްތައިލުމެވެ. މުރުތަސިމް ، އޭނާގެ ގޮތެއް ދުލެއް ނުކުރާނެއެވެ. " އަނަސް ބުނަމުން ގެންދިޔައެވެ.
މުރުތަސިމަށް އެދެވުނީ ނުބައި އެޑްރެހަކަށްކަމަށް ބުނެ ، މުރުތަސިމާ ސުއާލު ކުރުމަށް ދާން މީރަބް ނިންމިއެވެ. އެހެނަސް ، އެކަން ، މަރިޔަމް ހުއްޓުވިއެވެ. މުރުތަސިމްގެ ނިންމުން އެއްވެސް ޙާލެއްގައި ބަދަލެއް ނުކުރާނެއެވެ.
" މިހާރު މިއޮތީ ވަޢުދު ފުއްދުމުގެ ވަގުތު އައިއްސައެވެ. އެންމެ ފަހުގެ ނިންމުމާ ހަމަޔަށް ދިޔައީއެވެ. އެނޫންގޮތެއް ނެތެވެ. މީރަބް އަހަރެންނާއި އަނަސްއަށް ވީ ވަޢުދުގެ މަތިން ހަނދާން އެބަހުރި ނޫން ހެއްޔެވެ ؟ އެ ވަޢުދު ފުއްދައިދޭށެވެ ! " މަރިޔަމް ބުންޏެވެ.
މީރަބް ، އޭނާވީ ވަޢުދުގެމަތިން ހަނދާން ކޮށްލިއެވެ. އެކައިވެންޏަށް މުރުތަސިމް އެއްބަސް ނުވެއްޖިއްޔާ ، އަނަސްއާއެކީ ، މަރިޔަމް ފިލައިގެންދާން އެހީތެރިވެދޭނެކަމަށް ، މީރަބް އޮތީ ވަޢުދު ވެފައެވެ.
އަވަސް އަރުވައިލާފައި މުރުތަސިމް އެނިންމި ނިންމުމާ ބެހޭގޮތުން މުރުތަސިމާ އިތުރަށް ވާހަކަ ދެއްކުމަށް މީރަބް ނިންމިއެވެ.
މީރަބް ޤަބޫލުކުރާ ގޮތުގައި ، މީހަކުދެކެ ލޯބިވުމަކީ ކުށެއްނޫނެވެ. މުރުތަސިމް ޤަބޫލުކުރާގޮތުގައި ، ގޯސްމީހަކު ދެކެ ލޯބިވުމަކީ ކުށެކެވެ.
" އެހެންކަމަށް ވަންޏާ ، އަހަރެންދެކެ މުރުތަސިމް ލޯބިވުމަކީ ގޯހެކެވެ. އަހަރެންނަކީ ގޯސްމީހެކެވެ. " މީރަބް ބުންޏެވެ.
އޭނާގެ ލޯބި ، މީރަބް ޤަބޫލުކުރަންތޯ މުރުތަސިމް ސުއާލު ކުރިއެވެ. މުރުތަސިމް އޭނާދެކެވާ ލޯތްބަކީ ، މީރަބް ޤަބޫލުކުރާ ލޯތްބެއް ނޫނެވެ. އެހެނަސް ، އެކަން ޔަޤީންކަމާއެކީ އޭނާއަށް އެނގެއެވެ. އެދެކަމުގައި އުޑައިބިމާހާ ތަފާތު ހުންނާނެއެވެ.
" އަހަރެން ދެކެ މުރުތަސިމްވާ ލޯބި އަހަރެން ޤަބޫލުކުރާނީ ، މުރުތަސިމް އަހަރެންދެކެ ލޯބިވާވަރަށް ، އަހަރެންނަށް މުރުތަސިމް ދެކެ ، ލޯބި ވެވުނު ދުވަހަކުންނެވެ. " މީރަބް ބުންޏެވެ.
އޭނާދެކެ ލޯބިވުމަށް ، މީރަބަށް އޮތް ހުރަހަކީ ކޮބައިތޯ މުރުތަސިމް ސުއާލު ކުރިއެވެ. މުރުތަސިމް ދެކެ މީރަބް ލޯބިވުމަށް ހުރަހަކަށްވާ އެތައްކަމެއް އެބަހުއްޓެވެ. އެކަމަކު ، މިވަގުތަށް އޭނާއަށް އެންމެ މުހިންމީ ، މަރިޔަމް އެކުރަމުންގެންދާ ހިތާމަތަކުން މަރިޔަމް ސަލާމަތްކޮށްދިނުމެވެ. އޭނާއާ މީރަބާ ދެމެދު އޮތް ހުރިހާ ހުރަހެއް މަރިޔަމްގެ ނަންމައްޗަށް ނުޖަހައި ، އެ ހުރަސްތައް ނައްތައިލުމަށް މުރުތަސިމް ބުންޏެވެ. އެހެންނަމަވެސް ، އެއީ މީރަބަށް ކުރެވެން އޮތްކަމެއްނޫނެވެ. މީރަބް އޮތީ ، އެކައިވެނި ކޮށްދޭނެކަމަށް ، މަރިޔަމްއަށް ވަޢުދުވެފައެވެ. މީރަބްގެ އެ ވަޢުދަކީ ، މުރުތަސިމާއި މީރަބް ދުރުކޮށް ދެމީހުންގެ ދޭތެރޭ އަބަދުގެ އަބދަށް އޮންނާނެކަމެއްކަމެއްކަމެއް މީރަބަށް ނޭނގެއެވެ.
" އެހެންކަމަށް ވަންޏާ ، މުރުތަސިމްގެ ނިންމުމާއި އަހަރެންގެ ވަޢުދަކީ ، ދެމިސްރާބެއްގައި ދެކޮޅަށް މަސައްކަތްކުރާނެ އެއްޗެކެވެ. މިއަދުން ފެށިގެން އެ ހަނގުރާމަ މިފެށުނީއެވެ. " މީރަބް ބުންޏެވެ.
މީރަބްގެ ވަޢުދު އުވައިލުމަށް މުރުތަސިމް ނަޞޭޙަތް ދިނެވެ. މީރަބް ނަޞޭޙަތްދިނީ ، މުރުތަސިމްގެ ނިންމުން ބަދަލު ކުރުމަށެވެ. އެހެންނަމަވެސް ، އޭނާގެ ފުރާނަ ހަށިގަނޑުގައި ހުރިހާ ހިނދަކު ، އޭނާގެ ނިންމުން ބަދަލު ނުކުރާނެކަމަށް މުރުތަސިމް ބުންޏެވެ. މީރަބްވެސް އެއްވެސް ޙާލެއްގައި އޭނާގެ ވަޢުދު ދޫކޮށްނުލާނެކަމަށް ބުންޏެވެ.
މީރަބް އެ ހިނގަނީ ގޯސް މަގަކުން ކަމަށާއި ، އެކަމުގައި އެދެމީހުންގެ ދިރިއުޅުން ބަރުބާދުވުމުގެ އިތުރަށް ، މަރިޔަމްގެ ދިރިއުޅުންވެސް ކަފުން ކުރެވިގެންދާނެކަމަށް ބުނެ ، މުރުތަސިމް ދެމުންގެންދިޔަ ނަޞޭޙަތް އަޑުއަހާކަށް މީރަބް ބޭނުމެއް ނުވިއެވެ. މުރުތަސިމްގެ ނިންމުން ޤިޔާމަތަށް ދާނދެން އެގޮތުގައި އޮންނާނެއެވެ. މީރަބްގެ ވަޢުދުވެސް ، އެ ވަޢުދު ފުދެންދެން އެހެންނޫނީ އޭނާގެ އެންމެ ފަހު ނޭވާޔާ ހަމަޔަށް ދެމިއޮންނާނެއެވެ. ( ނުނިމޭ )
