މާލެ ސިޓީއަކީ، ރާއްޖޭގައި އޮތް އެންމެ ބައިބޯ، އަދި އެންމެ ގިނަ ގެދޮރު ހުރި، އަދި ގެދޮރުގެ މައްސަލަތައް ވެސް އެންމެ ގިނައިން ކުރިމަތިވާ ސިޓީ ކަމަށް މޭޔަރ، އާދަމް ޢާޒިމް ވިދާޅުވެއްޖެއެވެ.
މޭޔަރ ޢާޒިމް މިފަދައިން ވިދާޅުވީ، ކައުންސިލްތަކުން ބާއްވަން، ޤާނޫނުގައި ލާޒިމްކޮށްފައިވާ ރައްޔިތުންގެ ބައްދަލުވުމުގެ ތެރެއިން، މި އަހަރުގެ ދެވަނަ ބައްދަލުވުމުގައި ވާހަކަފުޅު ދައްކަވަމުންނެވެ.
މާލެ ސިޓީ ކައުންސިލް އޮފީސް (ކުރީގެ ތައިސޭކޮށީ)ގެ ގޯތި ތެރޭގައި މިހާރު ކުރިއަށްދާ ބައްދަލުވުމުގައި ވާހަކަފުޅު ދައްކަވަމުން މޭޔަރ ޢާޒިމް ވިދާޅުވީ، މާލެ ސިޓީއަށް ޤާނޫނުން މަތިކޮށްފައިވާ އެންމެ މުހިންމު އެއް މަސައްކަތަކީ، މާލެ ސިޓީގައި ރަށްވެހިކަމުގެ ޚިދުމަތް ދިނުން ކަމަށެވެ. އެހެންކަމުން ރަށްވެހިކަމުގެ ޚިދުމަތް ދިނުމާއެކު މާލެ ސިޓީގައި އަމާން އުފާވެރި މާޙައުލެއް ގާއިމްކޮށް ދިނުމަކީ މާލެ ސިޓީން ވަރަށް ބޮޑަށް އިސްކަންދޭ ކަމެއްކަމަށް މޭޔަރ ވިދާޅުވިއެވެ. އެހެން ނަމަވެސް އަދި ވެސް ގެދޮރުގެ މައްސަލަތަކަށް ހައްލެއް ލިބިފައި ނުވާކަން މޭޔަރ ޢާޒިމްގެ ވާހަކަ ފުޅުގައި ފާހަގަ ކުރެއްވިއެވެ.
މޭޔަރ ޢާޒިމް ވިދާޅުވީ، މާލެ ސިޓީ ކައުންސިލުން ރައްޔިތުންނަށް ދެމުންގެންދާ ޚިދުމަތްތައް އިތުރަށް ފުރިހަމަ ކުރުމަށް ޓަކައި، ކުރަން ހުރި ގިނަ މަސައްކަތް ތަކެއް އެބަހުރި ކަމަށެވެ.
މީގެ އިތުރުން މޭޔަރ ޢާޒިމް ވިދާޅުވީ، މާލެ ސިޓީގެ މޭޔަރުކަމުގެ މަޤާމަށް އެ މަނިކުފާން އިންތިޚާބުވި ދުވަހުން ފެށިގެން، މާލެ ސިޓީކަމަށް ޤާނޫނުގައި ކަނޑައަޅާފައިވާ، މާލެ، ވިލިމާލެ، ހުޅުމާލެ ހިމެނޭހެން، ރައްޔިތުން ގާތަށް ގޮސް، ރައްޔިތުންގެ ޙާލުބަލައި، ރައްޔިތުންގެ އިޙްސާސްތަކާއި އުދާސްތަކުގެ އަޑު އެހުމުގެ މަސައްކަތް މިހާރު ވެސް ކުރަމުން އަންނަ ކަމަށެވެ. އެ ގޮތުން ވަކިވަކި ރައްޔިތުންނާ ބައްދަލުކުރުމުގެ ފުރުޞަތުދީގެން، އެ ބޭފުޅުންގެ ޝަކުވާތަކަށް ވެސް ހައްލު ހޯދައިދެވިފައިވާނެ ކަމަށް ވެސް، މޭޔަރ ޢާޒިމްގެ ވާހަކަ ފުޅުގައި ފާހަގަ ކުރެއްވިއެވެ.