( 9 ޖުލައި 2025 ގައި ޝާއިޢުކުރި ބަޔާގުޅޭ )
ރޮހޭލަށް މީރަބްގެ ޚަބަރެއް ނުވާތާ އެތައް ދުވަހެއް ވެއްޖެއެވެ. ރޮހޭލްގެ ކޮއްކޮ ، ސަބާލައްވާ އެގޮތްމިގޮތަށް ބަލައިގެންވެސް މީރަބްގެ ޚަބަރެއް ނުވިއެވެ. އެންމެފަހުން ، މީރަބްގެ ގެޔަށް ދިއުމަށް ނިންމައި ސަބާވެސް ގޮވައިގެން މީރަބާ ބައްދަލުކުރުމަށް އެގެޔަށް ދިޔައެވެ. ސަބާއަކީ ، މީރަބާ އެކީ އުޅޭ ކުއްޖެއްކަން އަނީލާއަށް އެނގެއެވެ. މީރަބް ކައިވެނިކޮށްފިކަން ، އެގެޔަށް ދިޔަތަނުން ރޮހޭލަށް އެނގެއެވެ. ވައްޤާސްއާއި ރޮހޭލާދެމެދު ދެކެވުނު ވާހަކައިގައި ، މީރަބް ކައިވެންޏެއް ނުކުރާނެކަމަށް ރޮހޭލަށް ބުނެވުނެވެ. އަދި ، މީރަބް އޭނާދެކެ ލޯބިވާ ވާހަކަވެސް ރޮހޭލް ބުންޏެވެ. ރޮހޭލްގެ ވާހަކަ އިވިފައި ވައްޤާސް އާއި އަނީލާއަށް ޙައިރާންކަންލިބި ، އެކަކު އަނެކަކަށް ބަލަހައްޓައިގެން އެތައް އިރަކު ތިއްބެވެ. އެއީ އެކަށީގެންވާ ކަމެއްނޫނެވެ. މީރަބަކީ ، ވަރަށް މިނިވަން ކުއްޖެކެވެ. އެއްވެސް ފިރިހެން ކުއްޖަކުދެކެ މީރަބް ލޯބިވާނަމަ ، އެވާހަކަ އަނީލާއާއި ވައްޤާސްގާތު ބުނާނެއެވެ. އެމީހުންގާޓު މީރަބް އެވާހަކަ ނުބުނާނީ ، ރޮހޭލާމެދު މީރަބްގެ ހިތުގައި ލޯތްބެއް ނެތީމައެވެ. މީރަބްގެ ހިތުގައި ރޮހޭލްގެ މައްޗަށް ލޯތްބެއް އޮތްނަމަ ، މީރަބް އެކުރީ ވަރަށް ދެރަ ކަމެކެވެ. އޭނާގެ މައިންބަފައިންނަށް ، އޮޅުވާލީއެވެ.
މުރުތަސިމް ގެޔަށް ވަތްތަނުން ، ރޮވިފައިހުރެ މީރަބް ، މުރުތަސިމްގާތަށް ދިޔައެވެ. އޭނާ ގަދަވެސަލާމަތުން ލައްވާތޯ ދުޢާކުރިކަމަށް މީރަބް ބުންޏެވެ. މުރުތަސިމްގާތަށް ހުރީ އިންތިހާއަށް ރުޅި އައިއްސައެވެ. އޭނާގެ ފިސްތޯލައިން ވަޒަންނެގީ މީރަބްކަން މުރުތަސިމަށް އެނގެއެވެ. މީރަބްގެ ބޭނުމަކީ ، އޭނާ މަރައިލުންކަމަށް މުރުތަސިމަށް ޤަބޫލު ކުރެވުނެވެ. އޭނާ މަރުނުވިނަމަވެސް ، މީރަބްގެ ސަބަބުން ކުށެއްނެތް އިންސާނެއްގެ ގަޔަށް ވަޒަންއަރައި ، އެއޮތީ މަރުގެ ތުންފަތްމަތީގައެވެ.
މީރަބަށް އެކުރެވުނުކަމަކުން ، މުރުތަސިމްގެ ފުރާނަ ނުދިޔައީ ކިރިޔާއެވެ. މީރަބް ބޭނުންވެގެން އެއުޅެނީ ކޮންކަމެއްތޯ މުރުތަސިމް ސުއާލު ކުރިއެވެ. އެ ވަޒަންތައް ނެގުމުގައި މީރަބްގެ މަޤްސަދަކީ ، މުރުތަސިމްގެ އަތުން އެއްވެސް މީހެއްގެ ފުރާނަ ދާން ބޭނުން ނުވުންކަމުގައި މީރަބް ބުންޏެވެ. މީރަބްގެ ވާހަކަ ޤަބޫލުކުރާކަށް މުރުތސިމް ބޭނުމެއް ނުވިއެވެ. އަދި ، މީރަބަށް ކުރެވުނު އިތުބާރުވެސް ގެއްލިއްޖެކަމަށް ބުންޏެވެ.
ރޮހޭލްގެ ވާހަކަތަކުން ހިތަށް އުނދަގޫވެގެން ، އަނީލާއާއި ވައްޤާސް ، އަޙްމަދުއާބާދަށްގޮސް ، މީރަބާ ބައްދަލުކޮށް ، ރޮހޭލް އެބުނާ ވާހަކައެއް ސާފުކުރުމަށް ނިންމިއެވެ. ވައްޤާސްމެންނަށް ދެވުނުއިރު ، މީރަބްވެސް އަދި މުރުތަސިމްގެ ގެޔަކު ނޫޅެއެވެ. ޚާނަމް ބުނިގޮތުގައި ، ކައިވެނީގެފަހުން ، މުރުތަސިމަށް ބަދަލުތަކެއްވަނީ އައިއްސައެވެ. މުރުތަސިމް އޭނާއަކާ ރަނގަޅަކަށް ވާހަކައެއް ނުދައްކައެވެ. މީރަބްގެ ހިތުގައި އޮތް ބަދަލުހިފުމުގެ ރޫޙު ، ރަނގަޅަށް އެބަ މަސައްކަތް ކުރެއެވެ. އެކަމަކު ، ވައްޤާސްއާއި އަނީލާ ، އެދެމީހުންގެ ދަރިފުޅާ ވާހަކަ ދައްކައި ، މީރަބްގެ ގެ އާބާދުކޮށްގެން ރަނގަޅު ދިރިއުޅުމެއް އުޅުމަށް މަސައްކަތް ކުރުމަށް މީރަބަށް ނަސޭޙަތް ދިނުމަށް ޚާނަމް އެދުނެވެ. ޚާނަމްގެ ހިތްހަމަ ނުޖެހުމާ ކުރިމަތިލާން ލަދުން ، މާގިނައިރަކު ، ވައްޤާސްމެންނަކަށް އެތާ ތިބޭކަށް ނުކެރުނެވެ.
ޚާނަމް ، ބޭރަށް ނުކުންނަން އައިއިރު ، ވައްޤާސްއާއި އަންވަރު މާ އޮލަވާހަކައެއްގައި ، ގޯތިތެރޭގައި ތިބިތަންފެނިފައި ދޮރުކައިރީ މަޑުކޮށްލިއެވެ. ޚާނަމަށް އިވެނީ އެމީހުން ދައްކާ ވާހަކައިން ބަޔެކެވެ. ދެމީހުންވެސް ތިބީ ހިތްހަމަ ނުޖެހިފައެވެ. އެމީހުން އެދައްކަނީ މީރަބާބެހޭ ވާހަކައެއްކަން ، ޚާނަމްއަށް އެނގުނެވެ.
އަންވަރާ ގޯތިތެރެއިން ދިމާވިއިރު ، ވައްޤާސްމެން ކުއްލިގޮތަކަށް އަންގައިވެސް ނުލާ ، މީރަބްވެސް ގޭގައި ނޫޅޭއިރެއްގައި އައުމުން ، ދިމާވެގެން އުޅެނީ ކޮންކަމެއްތޯ އަންވަރު ސުއާލު ކުރީއެވެ. ވައްޤާސްގެ ހިތްހަމަނުޖެހުމާއި ކަންބޮޑުވުން ގުޅިފައިވަނީ މީރަބާކަން އެނގޭ ހިސާބުން ، އޭނާއަށްވެސް އެކަން އެނގުން މުހިންމުކަމުގައި އަންވަރު ބުންޏެވެ.
ވައްޤާސްގެ ގެޔަށް ރޮހޭލްއައިސް އެދިމާވި ކަންކަމުގެ ވާހަކަ ، ވައްޤާސް ، އަންވަރަށް ކިޔައިދިނެވެ. ޚާއްޞަކޮށް ، ރޮހޭލުދެކެ މީރަބް ލޯބިވާވަހަކަ ބުނުމާއެކީ ، އަންވަރުވެސް ވައްޤާސްއެކޭ އެއްގޮތަށް ކަންބޮޑުވިއެވެ.
ޚާނަމް ދޮރުމަތީ ހުއްޓާ އަނީލާއަށްވެސް އެތަނަށް އާދެވުނެވެ. މީރަބްގެ ދެބައްޕައިން އެހާ ކަންބޮޑުވެފައިތިބެ ، އެދައްކަނީ ކޮންވާހަކައެއްތޯ ، އަނީލާކުރެން ޚާނަމް އެހިއެވެ. އެކަން އެނގޭކަމަށް ހަދާކަށް އަނީލާއަކަށް ނުކެރުނެވެ. އެހެންނަމަވެސް ، ދުރުދުރުން ލަވަމުންގޮސް ، އެމީހުން އެހާ ކުއްލިގޮތަކަށް މީރަބްދެކެން އެއައި އަސްލު ސަބަބު ، ޚާނަމްގާތު ހޯދިއެވެ.
ވައްޤާސް އެއައީ ، މީރަބާ އެކަމާބެހޭގޮތުން ސުއާލު ކުރުމަށެވެ. އެހެންނަމަވެސް ، އެކަން ނުކުރުމަށް އަންވަރު އެދުނެވެ. ރޮހޭލް އެހަދަނީ ދޮގަކަށްވެސް ވެދާނެއެވެ. މީރަބަށް ނޭނގި ރޮހޭލަށް މީރަބްދެކެ ލޯބިވެވުނީކަމަށްވެސް ވެދާނެއެވެ. މީރަބްގެ ހިތުގައި ރޮހޭލްގެ މައްޗަށް ލޯބީގެ އިޙްސާސެއް ނެތިވެސް ހިނގައިދާނެއެވެ. ކައިވެނިކުރެވުނު ވަގުތު ، މީރަބްގެ ހިތުގައި އެކަން އޮތްނަމަ ، މީރަބް ބުނާނެކަމަށް ، އަންވަރު ބުންޏެވެ. މީރަބަކީ ، ހިތުގައި އޮންނަ އެއްޗެއް ސިއްރުކުރާނެ ކުއްޖެއްނޫނެވެ.
އެކަމާބެހޭގޮތުން މީރަބާ ވާހަކަ ދައްކައިފިނަމަ ، އިތުރު މައްސަލަތަކެއް އުފެދުން ނޫންކަމެއް ނުވާނެއެވެ. ވައްޤާސްވެސް އެއީ ނޭނގޭކަމަކަށް ހަދައި އެހިސާބުން އެވާހަކަ ނިންމައިލުމަށް އަންވަރު ބުންޏެވެ. މީރަބް އެއުޅެނީ މިހާރު ، މީހަކާ އިނދެގެންނެވެ. މީރަބްގެ ޙަޔާތުގައި ކުރިންވެސް އެހެން މީހަކު ނުވެއެވެ. ފަހަކުންވެސް ނުއަންނާނެއެވެ. މީރަބް ދިރިއުޅޭނީ ، މުރުތަސިމާއެކު ކުރެވުނު ކައިވެނިމަތީގައި އެގޭގައެވެ. އަންވަރު އެކަން ހަމަޖައްސާނެކަމަށް އަންވަރު ބުންޏެވެ.
މީރަބަށް ޚިދުމަތް ކުރުމަށްޓަކައި ، ޚާދިމަކު ގެނެވި މަސައްކަތް ދަސްކޮށްދިނުމަށް ، އެގޭގައި އިސްކޮށް އުޅޭ ޚާދިމާ ޙަވާލު ކުރެވުނެވެ. އެއީ ، މީރަބް ބުނެގެން ގެނެވުނު މީހެއްނޫނެވެ. އެއީ ، މުރުތަސިމްގެ އެންގުމަށް ގެނެވުނު އަންހެނެކެވެ. އެކަމާ ހިތްހަމަ ނުޖެހިގެން މުރުތަސިމުދެކެ ، މީރަބްހުރީ ހިތްހަމަ ނުޖެހިފައެވެ.
ޖިމް ނިންމާފައި މުރުތަސިމް ނުކުތްތަނުން ، މީރަބްގޮސް އެކަމާބެހޭގޮތުން ، މުރުތަސިމާ ސުއާލުކުރަން ފެއްޓިއެވެ. މުރުތަސިމް ބުނިގޮތުގައި އޭނާ ކުރާނީ އޭނާ ބޭނުންކަމެކެވެ. އެ އަންހެނާ އެގެޔަށް ގެންނަންޖެހުނީ ، މީރަބްގެ ސަބަބުންނެވެ. މުރުތަސިމް ރުޅިއައިސް އެހުންނަނީ ، މުރުތަސިމްގެ ފިސްތޯލައިން ، މީރަބް ވަޒަންތައް ނަގައި ހުއްކޮށްލި މައްސަލައިގައެވެ. މީރަބާ ވާހަކަ ދައްކާކަށްވެސް ، މުރުތަސިމް ބޭނުމެއް ނުވެއެވެ. މީރަބް އެކަންކުރީ ، މީހަކު މަރާލައިގެން މުރުތަސިމް ޖަލުގައި އޮންނަން ބޭނުންނުވާތީ ، ރަނގަޅަކަށް ކަމުގައި މީރަބް ބުނަމުން ގެންދިޔައެވެ.
ޔުނިވަރސިޓީގައި މީރަބް ކިޔެވީ ކޮން އެއްޗެއްތޯއާއި ކިހާ ދުވަހަކު ކިޔެވިންތޯ މުރުތަސިމް ސުއާލު ކުރިއެވެ.
" އަހަރެން ، ޔުނިވަރސިޓީން ކިޔެވީ މުޖުރިމުންނާ ދެކޮޅަށް ތެދުވުމުގެ ފިލާވަޅުތަކެވެ. ނުކިޔަމަންތެރި އަސް ، ލަގަނަށް ކިޔަމަންކުރުވާ ، ރުޅިގަދަމީހުން މައިތިރިކޮށް ، އަމިއްލަ ނަފްސު ދިފާޢު ކުރުމުގެ ފިލާވަޅުތަކެވެ. އަހަރެން ، ހަތަރު އަހަރު ދުވަހު ކިޔެވީމެވެ. އަހަރެން ކިޔެވި އެއްޗެއްގައި އަހަރެންނަކީ މާހިރަކީމެވެ. ތިކަހަލަ ރުޅިގަދަ އިންސާނުން މައިތިރިކުރަން އަހަރެންނަށް ވަރަށް ރަނގަޅަށް އެނގެއެވެ. " މީރަބް ބުނަމުން ގެންދިޔައެވެ.
މުރުތަސިމް މީރަބާ ގާތަށް ޖެހެމުން ގެންދާ ވަރަކަށް މީރަބްވެސް ފަހަތަށް ޖެހެއެވެ. އެދެމީހުން ވާހަކަ ދައްކަންތިބީ ފަތާފެންގަނޑު ކައިރީގައެވެ. މީރަބަށް ހުރެވުނީ ފެންގަނޑުގެ ގާފޮޅުމަތީގައެވެ. އެނބުރިލިތަނުން ، މީރަބް ފެންގަނޑަށް ވެއްޓެންދިޔަތަނާ ، މުރުތަސިމް ކުއްލިޔަކަށް މީރަބްގެ އަތުގާ ހިފެހެއްޓިއެވެ. ހަތަރު އަހަރު ދޯއޭ ބުނެ ، މުރުތަސިމްގެ އަތް މީރަބްގެ އަތުން ދޫކޮށްލުމާއެކީ ، ފަތާ ފެންގަނޑުގެ ތެރެޔަށް ، އިދިކޮޅުވަތަށް މީރަބް ވެއްޓުނެވެ.
މުރުތަސިމް އިށީނދެލިއެވެ. މީރަބް ހަތަރު އަހަރުން ކިޔެވި އެއްޗެއް ، އޭނާ ދަސްކުރީ އަމިއްލަޔަށް ކަމަށްބުނެ ، މިހާރު އޮންނާނީ ފިލާވަޅެއް ލިބިފައިކަމަށް މުރުތަސިމް ބުންޏެވެ. އަދި ފެންގަނޑުން މީރަބް ނެގުމަށްޓަކައި ، މުރުތަސިމްގެ އަތް ދިއްކޮށްލިއެވެ. މީރަބްގެ މޫނުމައްޗަށް ނުބައިފާޑެއްގެ ހިނިތުންވުމެއް ވެރިވިއެވެ. މަޑުމަޑުން ފެންގަނޑުގައި ހިނގަމުން އައިސް މުރުތަސިމްގެ އަތުގައި ހިފައި ދަމައިގަތެވެ. މީރަބްގެ ބޭނުމަކީ ، ހަމަ އެ ފެންގަނޑަށް މުރުތަސިމް ވައްޓައިލުންކަމެއް މުރުތަސިމަށް ވިސްނައެއް ނުލެވުނެވެ. މީރަބް ދަމައިގަތްލެއް ބާރުކަމުން އެދިޔަގޮތަށްގޮސް ، މުރުތަސިމް ޖެހުނީ ފެންގަނޑުގެ މެދަށެވެ. މުރުތަސިމަށްވެސް އޭނާ އެ ނަގައިދިނީ ފިލާވަޅެއްކަމަށް ބުނެ ، މަޑުމަޑުން ފެންގަނޑުން އަރައިގެން މީރަބް ދިޔައެވެ. މީރަބްގެ ހުޝިޔާރުކަމަށް މުރުތަސިމްގެ ވިސްނުން ހުއްޓި ، މީރަބާ ދިމާލަށް ކަޅިއަޅައިގެން ، މުރުތަސިމަށް އެތައް އިރަކު ހުރެވުނެވެ. މުރުތަސިމްގެ ހިތުގައި އަނދަމުންދިޔަ ރުޅިވެރިކަމުގެ އަލިފާންގަނޑު ހައްތާދިޔައީ ގަދަވަމުންނެވެ.
ފެންވަރައި ރީތިވެގެން ސައިބޯން އައިސް ، މުރުތަސިމް ގެނައި ޚާދިމާ ، ނާއިލާއަށް ގޮވައިގެން މީރަބް ގެނައެވެ. ނާއިލާ ހުރީ އަދިވެސް ރޮވިފައެވެ. ނާއިލާ ބޭނުންވަނީ އޭނާގެ އަމިއްލަ ގެޔަށް ދާށެވެ ! މުރުތަސިމާ ވާހަކަ ދައްކައިގެން އެކަން ކޮށްދިނުމަށް މީރަބްގާތު ނާއިލާ އެދުނެވެ.
މުރުތަސިމް ބޭނުންވަނީ ، އޭނާގެ މީހުންކުރެމީހަކާ ނާއިލާ ދެވާށެވެ. އެކަން ހަމަނުޖެހެނިސް ، ނާއިލާއަކަށް އެގެޔަކުން ނުދެވޭނެއެވެ.
" އެއީ ކޮންކަހަލަ އިންސާފެއް ހެއްޔެވެ ؟ އަހަރެމެންގެ ކައިވެނި ކުރެވުނީ އަހަރެމެން ދެމީހުންގެވެސް ރުހުމާ އެކީގައެއްނޫނެވެ. އޭގެ މާނަޔަކީ ، އެހެންމީހުންގެ ކައިވެނި ގަދަކަމުން ކުރުވުމެއްނޫނެއް ނޫންހެއްޔެވެ. ނާއިލާގެ ކުށަކީ ކޮބައި ހެއްޔެވެ ؟ " މީރަބް ބުންޏެވެ.
އޭނާގެ އަންހެނުންގެ ކުށަކީ ކޮބައިތޯ މުރުތަސިމް ސުއާލު ކުރިއެވެ. މީރަބަށް އެމީހުންގެ ދަނޑަށް ވަދެވުނީ ނޭނގިއެވެ. މީރަބް ގަދަކަމުން ގެންގޮސް ، ޒުބޭރު އަންނަންދެން ގުދަނެއްގައި ބަންދުކުރީ ކީއްވެގެން ހެއްޔެވެ ؟ އެކަންކުރި ތިންމީހުންނަށް އަދަބު ދިނުމަކީ އެކަމުގެ ޙައްލުކަމަށް މީރަބް ބުންޏެވެ. ނާއިލާއަށް އެކަމުގެ އަދަބު ދޭންވީ ސަބަބެއް މީރަބަކަށް ނޭނގެއެވެ.
އެ ތިންމީހުންނަށް ވަނީ އަދަބު ލިބިފައެވެ. އެ ކުރިމަތިލުމަކީ ، ނަފްސުގެ އިޙްތިރާމާ ގުޅިފައި އޮތްކަމެއްކަން ހަނދާން ކުރުމަށް މުރުތަސިމް ބުންޏެވެ.
އެކަމުގައި ، މީރަބް ޝާމިލްވެއެވެ. މީރަބް ބޭނުންވަނީ އެހިސާބުން އެކަން ނިންމައިލުމަށެވެ. ނަފްރަތާއި ރުޅިވެރިކަމުގެ ޖަޒުބާތުގައި ، ދެމިގެންދާނެކަމަކަށް އެކަން ނުހެދުމަށް މީރަބް އެދުނެވެ. އަދި ، އެކަންކުރި އެންމެންނަށް މާފުކުރުމަށްވެސް މީރަބް ބޭނުންވިއެވެ.
މާފުކުރަން ، މީރަބަކީ ކާކުތޯ މުރުތަސިމް ސުއާލު ކުރިއެވެ. އެކަން ހިނގީ އޭނާގެ ބާރުގެ ދަށުގައިވާ ، އޭނާގެ އަމިއްލަ ދަނޑުބިމުގައެވެ. އެއީ އޭނާގެ މީހުންނެވެ. އޭނާ ޢަމަލުކުރާނީ ، ޢާއިލީގޮތުން އައިސްފައިވާ ، އުސޫލުތަކަކާއި ހަމަތަކާ އެއްގޮތަށެވެ. މާފުކުރާނީ މުރުތަސިމެވެ. އަދަބު ދޭނީވެސް އޭނާއެވެ. އެންމެ ރަނގަޅުގޮތަކީ ، އެކަމަށް މީރަބް ގޮތް ނުކިއުމެވެ.
މީރަބް އެކަމަށް ގޮތެއް ވިސްނިއެވެ. ނާއިލާގެނެސް ، ލާރިކޮޅެއް ދީފައި އެގެއިން ނުކުމެގެން ފިލައިގެން ދިއުމަށް ނާއިލާއަށް ނަސޭޙަތް ދިނެވެ. މީރަބްގެ ބޭނުމަކީ ނާއިލާއަށް އެހީތެރިވުމެވެ. މުރުތަސިމްގެ ނިންމުން ބަދަލެއް ނުކުރާނެއެވެ. ފިލައިގެން ގޮސްގެން ނޫނީ ، މުރުތަސިމްގެ އަތްދަށުން ނާއިލާއަކަށް ސަލާމަތެއް ނުވެވޭނެއެވެ.
ނާއިލާ ފިލައިގެންދާނީ ކޮންތާކަށް ހެއްޔެވެ ؟ ފިލައިގެން ދިޔަޔަސް ، މާލިކު މުޚްތާރު އޭނާ ހޯދާނެއެވެ. އަދި ، އަލުން މުރުތަސިމާ އޭނާ ޙަވާލު ކުރެވޭނެއެވެ. އޭނާގެ އަމިއްލަ ގެޔަށް ދިޔަޔަސް ، އެގޭގައިވެސް ހިނގާނީ މާލިކުގެ އަމުރެވެ. މުރުތަސިމަށް ފިލައިގެން ދިއުމަކީ ، އެހެން ހުރިހާކަމަކަށްވުރެ ބޮޑު ނުރައްކާތެރި ކަމެއްކަމަށް ނާއިލާ ބުންޏެވެ. އެކަމަކު ، މުރުތަސިމްގެ ރުހުމުގައި ނާއިލާއަށް އޭނާގެ ގެޔަށް ދެވިއްޖެނަމަ ، އެއްވެސް ނުރައްކަލެއް ނުއޮންނާނެއެވެ.
މާދަމާގެ ކުރިން ، ނާއިލާ އެގެއިން ފިލައިގެން ނުގޮއްސިނަމަ ، ނާއިލާގެ ކައިވެނި މާދަމާ ކުރެވޭނެއެވެ.
" އަހަރެމެން ، އަންހެނުންނަށް ކުރިމަތިވެފައި މިއޮންނަނީ ކޮންފަދަ މުސީބާތެއް ހެއްޔެވެ ؟ އެއްޖަލުގައި ބަންދުވެފައި ނެރެވިގެން އަނެއްޖަލަށް ބަދަލު ކުރެވެއެވެ. ދިރިއުޅުމާއި ނަފްސުގެ އެއްވެސް މިނިވަންކަމެއް ނެތެވެ. " ނާއިލާ ބުންޏެވެ.
މީރަބްގެ ރޭވުމުގައި ބައިވެރިވުމުގެ ވިސްނުމެއް ނާއިލާގެ ނެތެވެ. ދެގޮތުގައިވެސް އޭނާއަށް އޮތީ ހިތްދަތިކަމެވެ. ދެގޮތުންކުރެ އެއްގޮތެއްގައިވެސް ހަމަޖެހުމެއް ނެތެވެ. މާދަމާ ހެނދުނު އެކަމާ މުރުތަސިމާ ، އިތުރަށް ކުރިމަތިލުމަށް މީރަބް ނިންމިއެވެ.
ހެނދުނު ހެނދުނާ މީރަބްގެ މަސައްކަތް ފެށިއެވެ. ނާއިލާގެ ކައިވެނި ކުރެވެނީ ކާކާކަމެއްވެސް އެއްވެސް މީހަކަށް ނޭނގެއެވެ. އެކައިވެނި އެއީ ކުރެވިގެންވާނެ ކައިވެންޏެއްނޫންކަމަށް މީރަބް ބުންޏެވެ.
" މަނާކުރަން އެއީ މީރަބްގެ ކައިވެންޏެއްނޫނެވެ. ކައިވެނީގެ ޙަފުލާއިން ތެދުވެގެންގޮސް ، ތާކުންތާކު ނުޖެހޭ ޝަރުތުތަކެއް ކުރާ ކައިވެންޏެއްހެން ކުރެވޭ ކައިވެންޏެއްނޫނެވެ. " މުރުތަސިމް ބުންޏެވެ.
އެކައިވެނި ކުރިޔަ ނުދޭނެކަމަށް މީރަބް ބުންޏެވެ. އެއީ މުރުތަސިމަށް އާކަމެއްނޫނެވެ. މީރަބަކީ މުރުޔަސިމަށް އާ މީހެއްނޫނެވެ. އެކައިވެނި ހުއްޓުވަން އެއްވެސްކަމެއް ، މީރަބް ކޮށްފިނަމަ ، އެކަމުގެ ޒިންމާ އުފުއްލަންޖެހޭނީ މީރަބްކަމުގައި މުރުތަސިމް ބުންޏެވެ. އެއީ ، ސަމާސާއަކަށް މުރުތަސިމް ބުނާ ވާހަކައެއް ނޫންކަން ، މީރަބަށް ވިސްނައިދިނެވެ.
އަވަށްޓެރިންކުރެ ، ކަމުވޮށިވެގެންވާ ބަޔަކާއެކު ، ނާއިލާގެ ކައިވެނީގެ ރަސްމިއްޔާތު ބާއްވަން މުރުތަސިމްގެ ގޭގެ ގޯތިތެރޭގައި ތައްޔާރު ކުރެވުނެވެ. ކައިވެނިލައިދޭ މައުޛޫނާއި ހެކިވެރިންވެސް ޙާޟިރުވެ ތިއްބެވެ. ރަސްމިއްޔާތު ފެށެން ތައްޔާރުވީތަނާ ، ކުއްލިޔަކަށް ، ނާއިލާ ގޮވައިގެން މީރަބް އެތަނަށް އައިސް ، އެކައިވެނި ނުކުރެވޭނެކަން އިޢުލާން ކުރިއެވެ. ( ނުނިމޭ )
