ޣައްޒާ ހިފުމަށް ޓްރަމްޕް ދެކޭ ހުވަފެން

އެމެރިކާގެ 45 އަދި 47 ވަނަ ރައީސް ޑޮނަލްޑް ޓްރަމްޕަކީ ، އެމެރިކާގެ ތާރީޚު ކަޅުކޮށްލި ރައީސެއްކަމަށް ދުނިޔެ ހެކި ދެއެވެ. ހުސްވި ޖެނުއަރީ މަހުގެ 20 ވަނަދުވަހު ، ރަޢިސްކަމުގެ ހުވާކުރުމަށްފަހު ، ފުރަތަމަ ދެއްކި ވާހަކަތަކާގުޅިގެންވެސް އެއީ މޮޔައެއްނޫންބާއޭ ހީވާވަރަށް ، އެމެރިކާގެ ސިޔާސީ މަޝްރަޙުގައި ބަހުސް ކުރެވެމުން ދިޔައެވެ.

ޓްރަމްޕަށް އެދުވަހު ދެއްކުނު އެއްވާހަކަޔަކީ ، ޣައްޒާގެ އުސްބިންތަކަކީ ، " އަޖައިބެއްފަދަ ތަނެއް " ގެ ގޮތުގައި ސިފަކުރެވި ހޭލާހުއްޓާ ފެނުނު ހުވަފެނެއްފަދައިން ، " ވަރަށް ހިތްގައިމު ކަންތައްތަކެއް އެތަނުގައި ކުރެވިދާނެ " ކަމަށް ބުނި ބުނުމެވެ.  ޓްރަމްޕް ބުނިގޮތުގައި ، އެމެރިކާއިން ދިގުމުއްތަކަށް ޣައްޒާގެ މިލްކުވެރިކަން ހޯދާނެއެވެ. އަދި ފަލަސްތީނުމީހުން އެތަނުން ފައިބަން ލޯބިކުރާނެއެވެ. މެދުއިރުމަތީގެ ، ރީތި ބަގީޗާއެއްފަދަ ސުވަރުގެޔަކަށް އެތަން ހަދާނެއެވެ. އެއަށްފަހު ، ޖެނުއަރީ 26 ވަނަދުވަހު ، ރިޕޯޓަރުންނާ ކުރިމަތިލައި ބުނެވުނީ ، " ޣައްޒާގެ ބިން ހުސްކޮށް ސާފުކޮށްލުމަށްޓަކައި " ފަލަސްތީނުގެ ރައްޔިތުން މިޞްރަށާއި އުރުދުންއަށް ބަދަލުކުރަންޖެހޭ ވާހަކައެވެ.

ނިދާފައި އޮންނަމީހަކަށް ، ދެބަދޭތެރޭގައި ދެއްކޭކަހަލަ ވާހަކައެއްގެ ބީދައިން ، ޓްރަމްޕަށް އެގޮވުނު ހާސަރަކީ ، ނައިފަރު ދޮހޮއްކޮގެ ލަވައެއްގައި ކިޔާފަދައިން ، " ނަނާ ހުވަފެންދުށީމޭ " އަދި " ނޭނގުނޭ ތިޔަވިދާޅުވިބަހުގެ މާނައެއް " ފަދަ ޚިޔާލީ ފޮލާއަކަށް ވެއްޖެއެވެ. ނިރުބަވެރި އިޒްރޭލުން އެމެރިކާ އެހީވެދީގެން ، ޣައްޒާގެ ނިކަމެތި ރައްޔިތުންގެ ގެދޮރު ސުންނާފަތިކޮށްލައި އެތައްހާސް ބަޔަކު ޝަހީދުކޮށް ، މުޅި ޣައްޒާ އެކޮޅުކޮޅުން ޖަހައި ، މަތިން ބޮންއަޅައި ބިމުން ޙަމަލާދީ ޣައްޒާ ބިމާހަމަކޮށްލުމަށްފަހު ، އެމެރިކާއިން މިހާރު އެދައްކަނީ ، ގެދޮރުގެއްލި ބިކަޙާލުގައި ޖެހިފައިވާ ފަލަސްތީނުގެ ރައްޔިތުން ، ޣައްޒާގެ ބިމުން ފައްސާލާ ވާހަކައެވެ. ބައިނަލްއަޤްވާމީ ޤާނޫނުތަކާ ޚިލާފަށް ، ނަސްލެއް ނައްތައިލުމަށް ކޮށްލެވުނުވަރު އަދިވެސް ކުޑައީއެވެ. ފަލަސްތީނުގެ ބިމުން ، އެތަނުގެ އަހުލުވެރިން ނެރެ ބޭރުކޮށް އެހެންތާކަށް ގެންދެވޭނީ ވަގުތީގޮތުންކަމެއް ނުވަތަ ދާއިމީކޮށް ކަމެއް ބުނެދޭކަށް ޓްރަމްޕަކަށް ނޭނގުނެވެ. ދެއްކޭ ނުދެއްކޭ ވާހަކައެއްވެސް ނޭނގެނީބާވައެވެ. އެމެރިކާގެ ރައްޔިތުންކުރެ ، ޓްރަމްޕަށް ވޯޓުދިންމީހުންވެސް އެތިބީ ލަދުންގޮސް މަރުވާ ވަރުވެފައެވެ. އޭގެތެރެއިން ، ބައެއްމީހުންގެ ބަހުރުވައިންނަމަ ، މޮޔައެއްގެ އަތަށް ކަނޑިދިނީމަ ވާނެ ހައެތި އެއޮތީ ވެފައެވެ.

ޓްރަމްޕްގެ އެ ނިންމުމަށް ، ސުޢޫދީ ޢަރަބިއްޔާއިންވަނީ ދެކޮޅު ހަދާފައެވެ. އދ އިންވަނީ އެއީ ޤާނޫނާޚިލާފްކަމެއްގެ ގޮތުގައި ސިފަކޮށްފައެވެ. ޣައްޒާގައި ދިރިއުޅޭ ފަލަސްތީނުގެ އަހުލުވެރިންވަނީ ، ޓްރަމްޕްގެ ޣައްޒާ ހިފުމުގެ ވާހަކަޔަކީ ހެއްވާ މަޖާ ވަހަކަޔަކަށް ހަދައި ހީފައެވެ.

އޭގެފަހުން ، ފެބްރުއަރީމަހުގެ 4 ވަނަދުވަހު ، ނިރުބަވެރި އިޒްރޭލުގެ އަނިޔާވެރި ބޮޑުވަޒީރު ނަތަންޔާހޫއާ ދެމީހުން " ހުދުގެ" ތެރޭގައި ނޫސްވެރިންނާ ބައްދަލުކޮށް ، ކުރިޔަށްވުރެ ބޮޑު މޮޔައެއް ގޮވައިފިއެވެ. " އެމެރިކާއިން ޣައްޒާ ހިފައި އެތަން އަމިއްލަ ކުރާނެ " ކަން އިޢުލާން ކުރީއެވެ. ފަލަސްތީނުގެ ރައްޔިތުން އެހެން ޤައުމަކަށް ދާންވީއެވެ. ނަސްލެއް އެއްކޮށް ނައްތައިލެވޭނީ އޭރުންނެވެ. އޭރުން ، މުޅި ފަލަސްތީނުގެ ބިން އެއްކޮށް ، ނިރުބަވެރި ޔަހޫދީންނަށް ހިތަކަށް ލިބުނީއެވެ. މިއީ އަޅެފަހެ ، ހޭބުއްދި ސަލާމަތުންހުރި އިންސާނަކު ދައްކާކަހަލަ ވާހަކައެއް ހެއްޔެވެ ؟

ޓްރަމްޕްގެ ޕްރެސް ސެކްރެޓަރީ ކެރޮލިން ލީވިޓް ، ފެބްރުއަރީ 4 ގައި ނޫސްވެރިންގާތު ބުނެފައިވަނީ ، ޣައްޒާއަށް އެމެރިކާ ސިފައިން ފޮނުވުމާމެދު ޓްރަމްޕް އަދި ގޮތެއް ނުނިންމާ ކަމުގައެވެ. އަދި ޣައްޒާގައި ދިރިއުޅޭ ފަލަސްތީނުގެ ރައްޔިތުން އެހެން ތާކަށް ވަގުތީގޮތުން ބަދަލުކުރުމާމެދުވެސް " މުޅިން " ގޮތެއް އަދި ނުނިންމާކަމެކެވެ.

ފަލަސްތީނުގެ ރައްޔިތުން ، ފަލަސްތީނުގެ ބިމުން ބޭލުމަކީ ، ފަލަސްތީނާ އިންވެގެން އޮންނަ މިޞްރާއި އުރުދުން އިން އަދި ސުޢޫދީ ޢަރަބިއްޔާއާއި ، ޢަރަބިދުނިޔޭގެ އެހެންޤައުމުތަކާ އަދި ދުނިޔޭގެ ބައެއް ޤައުމުތަކުން ، ކަނޑައެޅިގެން ދެކޮޅުހަދާ ކަމެކެވެ. ޣައްޒާއިން މީހުންބާލައި ހުސްކުރުމުގައި ޓްރަމްޕްގެ ޙަޤީޤީ ބޭނުމާއި މަޤްޞަދު އޮތީ ، ޅެމުގެ މާނަ ޅެންވެރިޔާގެ ބަނޑުގައި އޮންނަގޮތަށް ، ނޭނގުމެއްގެ ތެރޭގައެވެ. ހަކުރު އަޑުބާގައިވެސް ދެކޮޅު އޮވެއެވެ. ޓްރަމްޕްގެ މިވާހަކައިގާ ފެށުމުގައިވެސް އަދި ނިމުމުގައިވެސް ކޮޅެއް މެދެއް ނެތެވެ. ޓްރަމްޕްގެ ހިތުގައި އޮތްއެއްޗެއް ދެނެވޮޑިގެންވާނީ ﷲ އެވެ.

ޙަމާސް އިން ބުނެފައިވަނީ ، ޓްރަމްޕްގެ ނިންމުމަކީ ، ޢުދުވާނީ ތޫފާނެއްގެ ފެށުންކަމަށާއި ، ޣައްޒާގެ އަހުލުވެރިން އެބިމުން ނުފައިބާނެކަމުގައެވެ. އަދި ، ޓްރަމްޕް އެއަޅަނީ އަނދައަނދާހުރި އަލިފާންގަނޑަކަށް ތެލެވެ. ޣައްޒާއަކީ ، ގަނެވިއްކާ މީހެއްގެ ބިމެއް ނޫންކަމުގައެވެ. ސުޢޫދީ ޢަރަބިއްޔާއިން ބުނެފައިވަނީ ، ފަލަސްތީނުގެ މިނިވަން ދައުލަތަކާނުލައި ، އިސްރާއީލާއެކު އެއްވެސް ގުޅުމެއް ނުބާއްވާނެކަމުގައެވެ.

ފަލަސްތީން ލިބަރޭޝަން އޮގަނައިޒޭޝަންއިން ބުނެފައިވަނީ ، ފަލަސްތީނުގެ ރައްޔިތުން އެބައިމީހުންގެ އަމިއްލަ ބިމުން ނެރުމަށް ކުރެވޭ ކޮންމެ ކަމަކަށް ދެކޮޅުހަދާ ކަމުގައެވެ. ހަމައެއާއެކީ ، ޣައްޒާއިން ފަލަސްތީނުގެ ނަސްލު ނައްތައިލުމަށް ، އެމެރިކާގެ ކުރީގެ ރައީސް ޖޯ ބައިޑަން ހިންގި ޢުދުވާނީ އަނިޔާވެސް ޕީއެލްއޯ އިން ކުށްވެރި ކުރިއެވެ. ނިރުބަވެރި ޔަހޫދީ ދައުލަތުން 15 މަސްވަންދެން ޣައްޒާގައި ހިންގި ޢުދުވާނުގެ މޭސްތިރިޔަކީ ޖޯ ބައިޑަންއެވެ. އެއަނިޔާވެރިކަމުގެ ބިންގާ ، ޔަހޫދީ ދައުލަތަށް އަޅައިދިނީ ބައިޑަން އެވެ. އެމެރިކާގެ ރައީސްކަމުން ބައިޑަން ވަކިވުމަށްފަހު ، ޣައްޒާއަށް ދެންހަދަންވީގޮތް އެ ބުނެދިނީ ، ދެންއައި ރައީސް ޓްރަމްޕެވެ. އެއީ އެކަން ރޭވިފައި އޮތްގޮތެވެ. ޓްރަމްޕަށް ތާއީދުކުރި ސިޔާސީ ފަރާތްތަކަށް ޤަބޫލުކުރެވުނު ގޮތުގައި ، ޓްރަމްޕަކީ ، ޣައްޒާގެ ހަނގުރާމަ ފިނިކޮށް ، ނުބައި މަޤްޞަދެއްގައިނަމަވެސް އެ ހަނގުރާމަ ހުއްޓުވާނެ މީހެއްކަމަށެވެ.

ޓްރަމްޕަކީ ، ގެދޮރުބިނާކުރުމުގެ ވިޔަފާރިކުރާ މީހެކެވެ. ނަތަންޔާހޫއާ ބައްދަލުވި ފުރަތަމަ ފަހަރުވެސް ، ޓްރަމްޕް އެނިންމީ ، ޣައްޒާއަކީ ، ގެދޮރުބިނާކުރުމަށް ، ނަތަންޔާހޫ ތަނަވަސްކޮށްދިން ބިމެއްކަމުގައެވެ. ނަތަންޔާހޫ ލައްވާ ބައިޑަން އެހެދީ ޣައްޒާއަކީ ޢިމާރާތްތައް ބިމާހަމަކޮށްފައިވާ ކޮންސްޓްރަކްޝަން ސައިޓަކަށެވެ. އެސައިޓް ދެން އެ ޙަވާލުކުރީ ޓްރަމްޕާއެވެ. ޣައްޒާއަކީ ، އެމެރިކާގެ މިލްކަކަށް ހަދާފަ ، އެތަން އާބާދުކުރަން ޓްރަމްޕް  އެ ނިންމީ " މެދުއިރުމަތީގެ ރައްޔިތުންނަށް " ޓަކައެވެ. މާނަޔަކީ ، ނިރުބަވެރި ޔަހޫދީ ދައުލަތުން އެ ޤައުމުގައި އާބާދުކުރާ ޔަހޫދީ އާބާދީއަށެވެ.

ނިރުބަވެރި ޔަހޫދީ ދައުލަތުގެ ބޮޑުވަޒީރު ، އެމެރިކާއަށް ކުރި ދަތުރު ނިންމާފަ ވޮޝިންގޓަނުން އެފުރީ ، އެންމެންނަށް ހީވެފައި އޮތްގޮތަށް ، ހަނގުރާމަ ނިންމުމުގެ ޢަޒުމާއެކީގައެއްނޫނެވެ. އަދި ކިއެއްތަ ؟ އެމެރިކާއިން ލަފާދިންގޮތަށް ، ހަނގުރާމަ ނުހުއްޓައި ކުރިޔަށް ގެންދިއުމުގެ ލައިސަންސާ އެކީގައެވެ. އެ ލައިސަންސް ދޫކުރީ ޓްރަމްޕެވެ.

ޓްރަމްޕްގެ ނިންމުމާގުޅިގެން ، ޔަހޫދީ ދައުލަތުގެ ކުރީގެ ޤައުމީ ސަލާމަތާބެހޭ ވަޒީރުވަނީ ، ނަތަންޔާހޫގެ ގުޅިފައިވާ ސަރުކާރާ އެއްބައިވުމަށް ނިންމާފައެވެ. އޭނާހުރީ ، ޓްރަމްޕްގެ ނިންމުން ތަންފީޒުކުރަން ނަތަންޔާހޫގެ ސަރުކާރާ އަލުން ގުޅެން ތައްޔާރަށެވެ.

ޓްރަމްޕް އެންމެފަހުން ބުނެފައިވަނީ ، ޣައްޒާގެ ހަނގުރާމަ އެއްކޮށް ނިމިފައި އޮތުމަކީ ނާދިރުކަމެއް ކަމުގައެވެ.  ޓްރަމްޕްގެ ނިންމުމާގުޅިގެން ، ޣައްޒާގެ ހަނގުރާމަ ނިންމުމަށް ވެފައިވާ ޞުލްޙައިގެ އެއްބަސްވުން ދެމިއޮތުމާމެދުވެސް މިހާރުވަނީ ޝައްކު އުފެދިފައެވެ. ޣައްޒާގެ ހަނގުރާމަ ނުހުއްޓި ކުރިޔަށް ހިނގައިދާނެކަމުގެ ސިގްނަލްތައް އެކިފަރާތްތަކުން ލިބިލިބިނހުއްޓާ ، ޙަމާސްގެ އަތްދަށުގައިވާ އިސްރާއީލުގެ ޔަހޫދީން ދޫކޮށްލުމުގެ މާނައެއް އޮތްކަމަކަށް ، ޙަމާސްއަކުން ނުދެކެއެވެ. އިސްރާއީލުގެ އިތުރަށް އެމެރިކާގެ އިތުބާރުވެސް ، ދުނިޔޭގެ ކުރިމަތީގައި މިހާރަކު ނެތެވެ. ޣައްޒާއާބެހޭގޮތުން ، ޓްރަމްޕް ނިންމާފައިވާ ނިންމުމަކީ ، ޔޫރަޕަށްވެސް ނުރައްކާތެރިކަން އޮތް ނިންމުމެކެވެ. ފަލަސްތީނުގެ ކަނޑުގެ ސަރަޙައްދުގެ މޫނުމައްޗަކީ މެޑިޓްރޭނިއަން ސަރަޙައްދެވެ.

ޣައްޒާއިން ފަލަސްތީނުގެ ރައްޔިތުންވަނީ ކުރިންވެސް ފައްސައި ބޭރުކުރެވިފައެވެ. ޣައްޒާއިން ފަލަސްތީނުގެ ރައްޔިތުން ގަދަކަމުން ބޭރުކުރުމުގެ އަޞްލު ބޭނުމަކީ ، އެތާރީޚު އިޢާދަ ކުރުމެވެ. 1948 ގައި ، ޔަހޫދީން ކުރިންވެސް އެކަންކުރީ ، ދުނިޔޭގެ ޤާނޫނުތަކާ ޚިލާފަށް ، އެމެރިކާގެ މަދަދާއި ވާގިވެރިކަމާއެކީގައެވެ. 1967 ގައިވެސް ޣައްޒާ ހުސްކުރަން އިސްރާއީލުން މަސައްކަތް ކުރިއެވެ. މިފަހަރު އެކަންކުރަން އެނިންމީ ޚުދު އެމެރިކާއިންނެވެ. ޣައްޒާއަކީ ، އެމެރިކާގެ މިލްކަކަށް ހަދައިގެންނެވެ. މިފަހަރު ޣައްޒާއިން ފަލަސްތީނުގެ ރައްޔިތުން ބާލާނީ ، އެމެރިކާއާއި ޔަހޫދީން އެކުގައި ޢަމަލީގޮތުން ބައިވެރިވެގެންނެވެ.  ފަލަސްތީނުގެ ރައްޔިތުން ޣައްޒާއިން ފައިބަނީ " ވޮލަންޓަރީ " ކޮށް ކަމަށް ޔަހޫދީ ދައުލަތުން ބަލާފާނެއެވެ. އެމެރިކާއިން ބަލާނީ " ރިއަލް އިސްޓޭޓް " ވިޔަފާރިއެއް ކަމުގައެވެ. އެހެނަސް ، ޙަޤީޤަތަކީ ، އެއީ ފަލަސްތީނުގެ ޢަރަބި ނަސްލު ނައްތައިލުމެވެ.

ފަލަސްތީނުގެ ކޮންމެ ރައްޔިތަކަށްވެސް އެކަން އެނގޭނެއެވެ. އެހެންކަމުން ، ޓްރަމްޕްގެ ނިންމުމާ އެއްގޮތަށް ، ފަލަސްތީނުގެ ރައްޔިތުންކުރެ އެކަކުވެސް ޣައްޒާގެ ބިމަކުން ނުފައިބާނެއެވެ. އެހެންކަމަށް ވެއްޖެނަމަ ، 15 މަސްވަންދެން ނިރުބަވެރި ޔަހޫދީން ޣައްޒާގެ ރައްޔިތުން ޝަހީދުކުރަމުންކުރަމުންގޮސް ، އެމުއްދަތުގައި  ޤަތުލުކޮށް ،  ޝަހީދުކޮށްލި ފަސްދޮޅަސް އެއް ހާހަށްވުރެ ގިނަބަޔެއްގެ ބަދަލުގައި ، ޣައްޒާގެ ރައްޔިތުންކުރެ ، އެބިމުން ނުފައިބާތިބި އެންމެން އެއްދުވަހުން ޝަހީދުކޮށް ނިންމައިލާނެއެވެ. ޣައްޒާގެ ބިން އެއްކޮށް ހުސްކޮށްލާނެއެވެ. ޓްރަމްޕްގެ ބޭނުމާއި މަޤްޞަދަކީ އެއީއެވެ.

ކުރިންވެސް ، ފަލަސްތީނުގެ ރައްޔިތުން އެމީހުންގެ ވަޒަނުން ފައްސައި ބޭރުކުރަން ، އެމެރިކާގެ ވާތްގާއެކީ އިސްރާއީލުން އެކިފަހަރުމަތިން ، ކުރި ހުރިހާ މަސައްކަތެއްވަނީ ފެއިލްވެފައެވެ. މިފަހަރުވެސް އެކަން ކާމިޔާބެއް ނުވާނެއެވެ. 4 އަހަރުގެ ރިޔާސީ ދައުރެއް ނިންމުމަށްފަހު ، ޓްރަމްޕަށް ޖެހޭނީ ، ހޭލާހުރެ ހުވަފެނެއް ދެކެދެކެހުރެ ވެރިކަމުން ފައިބާށެވެ. ފަލަސްތީނުގެ ރައްޔިތުން އެމީހުންގެ ވަޒަނުގައި ޣައްޒާގައި ދެމިތިބޭނެއެވެ. ﷲ ގެ މިންވަރުފުޅާއެކީ ، ނިރުބަވެރި ޔަހޫދީންގެ މައްޗަށް ، ޢަރަބި މުސްލިމުން ގަދަވެގަންނާނެއެވެ.