މިއަދަކީ ، އެގްރޯނެޓްގެ ޙަޔާތުގައި ވަރަށް ޚާއްޞަ ދުވަހެކެވެ. އެކުންފުނީގެ މަސައްކަތްތައް ހަރުދަނާކޮށް ، އަމިއްލަ މާލީ ފުދުންތެރިކަން ހޯދައިގަތުމަށްޓަކައި ކުރަމުންގެންދާ ބުރަ މަސައްކަތުގެ ތެރެއިން ، އެއްދުވަހެކެވެ. ދަނޑުވެރިންގެ އުފެއްދުންތައް އުފުއްލައި ، ތާޒާކަމާއެކީގައި އަވަހަށް މާރުކޭޓަށް ގެނެސްދިނުމުގެ އަގުހުރި ޚިދުމަތަށް ، އެގްރޯނެޓުން ބަންނަންފެށި ދެބޯޓުގެ ތެރެއިން އެންމެ ބޮޑުބޯޓު " އެގްރިބޯޓް " ބާލައި ، ރަސްމީގޮތުން ބޯޓު ޙަވާލުކުރުމުގެ އިޙްތިފާލު ބޭއްވުނު ތާރީޚީ ދުވަހެވެ.
މިރަސްމިއްޔާތު ބޭއްވުނީ ، ހުޅުމާލޭގެ ހުޅަނގު ބަނދަރުމަތީގައެވެ. ރަސްމިއްޔާތު ބޭއްވެމުންދިޔައިރު ، އެއްއަރިމަތީ " އެގްރިބޯޓް " ބޭއްވިފައި އޮތެވެ. ކަނޑަށް ގަދަ ، އާ ބަށްޓަމަކަށް ފަރުމާ ކުރެވިފައިވާ މިބޯޓު ބަނުމުގެ މަސައްކަތް ކުރީ ، ފިކްސް އިން މެރިން މޯލްޑިވްސް އިންނެވެ. ބޯޓު ފަރުމާކޮށްފައިވަނީ ، މޯލްޑިވްސް ޕޮލިސް ސަރވިސަސް އިންނެވެ. ބޯޓު ބަނދެވުނީ ، މޯލްޑިވްސް ޕޮލިސް ސަރިސަސްގެ ފުރިހަމަ ބެލުމުގެ ދަށުންނެވެ.
ދަނޑުވެރިންގެ އުފެއްދުންތައް ތާޒާކޮށް ބަހައްޓައިގެން އުފުލުމަށްޓަކައި ، މިބޯޓުގައި ދެ ކޯލްޑް ސްޓޯރޭޖް ބެހެއްޓިފައި ވެއެވެ. އާދައިގެ ދުވެލީގައި ގަޑިޔަކު 15 މޭލަށް ދުވާ އަދި 20 މޭލަށް ދުއްވޭ މިބޯޓަކީ ، އިރުގެ ދޯދިން ކަރަންޓް އުފެއްދޭގޮތަށް އިންތިޒާމް ކުރެވިގެން ، ރާއްޖޭގެ ދަތުރުފަތުރުގެ ނިޒާމަށް ގެނެވުނު އިންޤިލާބެކެވެ.
މިބޯޓު ރަޖިސްޓަރީ ކުރެވިފައިވަނީ ، އެގްރޯ ނެޝަނަލް ކޯޕަރޭޝަން ، އެގްރޯނެޓްގެ ނަމުގައެވެ. އެގްރިބޯޓް ، ރަސްމީގޮތުން ލޯންޗް ކުރުމަށް ، މިއަދު ބޭއްވުނު ޙަފުލާގައި ، އދ ގެ އެސިސްޓެންޓް ސެކްރެޓަރީ ޖެނެރަލް އަދި ރީޖަނަލް ޑިރެކްޓަރ ފޯރ އޭޝިއާ އެންޑް ދަ ޕެސިފިކް ، ކަނި ވިގްނަރާޖާ އާއި ޖަޕާނު ސަރރުކާރުން ، ރާއްޖެޔަށް ކަނޑައަޅުއްވާފައި ހުންނަ އެމްބެސެޑަރ މިދޯރީ ޓަކޫޗީ އަދި ، ރާއްޖޭގައި ހުންނަވާ ޔޫއެންޑީޕީގެ ރެސިޑެންޓް ކޯޑިނޭޓަރ މރ. އެންރީކޯއާއި ، އެގްރޯނެޓްގެ މެނޭޖިންގ ޑިރެކްޓަރާއި އެކުންފުނީގެ އިސްވެރިން ބައިވެރިވެ ވަޑައިގަތެވެ.
އެގްރިބޯޓަކީ ، ޔޫއެންޑީޕީ މާލޭއޮފީސް މެދުވެރިކޮށް ، ޖަޕާނު ސަރުކާރުން ރާއްޖެޔަށް ހަދިޔާކުރި އުޅަނދެކެވެ. މިރަސްމިއްޔާތު ޝަރަފްވެރިކޮށްދެއްވީ ، މިނިސްޓަރ އޮފް ސިޓީސް ، ލޯކަލް ގަވަރމަންޓް އެންޑް ޕަބްލިކް ވޯރކްސް އަލްފާޟިލް އާދަމް ޝަރީފް ޢުމަރެވެ.
އެގްރޯނެޓަކީ ، ޚާއްޞަކޮށް ރާއްޖޭގެ ދަނޑުވެރިކަމުގެ ރަށްރަށުގެ ދަނޑުވެރިންގެ ދޫމަތީ އޮންނަ ޢާންމު ނަމެކެވެ. އެގްރޯނެޓްގެ އެހީތެރިކަން ނުލިބޭ އަދި އެގްރޯނެޓްގެ ނަންނުކިޔޭ ، ދަނޑުވެރި އެއްވެސް ރަށެއް ރާއްޖެޔަކު ނެތެވެ. އެގްރޯނެޓްގައި ހުރިވަރަށް ރާއްޖޭގެ ދަނޑުވެރިންނާއި ދަނޑުވެރިކަމާބެހޭ މަޢުލޫމާތު އެއްކުރެވިފައިހުރި އެއްވެސް އޮފީހެއް ނުވަތަ ތަނެއް ނުހުންނާނެއެވެ. އެގްރޯނެޓަކީ ، ސަރުކާރުގެ ސަތޭކަ އިންސައްތަ ޙިއްޞާވާ ، ސަރުކާރުގެ ކުންފުންޏެކެވެ. އެގްރޯނެޓަކީ ، ރާއްޖޭގެ ދަނޑުވެރިންނަށްޓަކައި ، އުފެއްދުނު ކުންފުންޏެކެވެ. އެގްރޯނެޓް އުފެއްދުނީ ، ދަނޑުވެރިކަމުގެ ވިޔަފާރި ފުޅާކޮށް ތަރައްޤީ ކުރުމާއެކު ، އެހެން އެއްވެސް ފަރާތަކުން ފުރިހަމަ ކޮށްދެވިފައިނުވާ ، ޚިދުމަތްތަކެއް ދަނޑުވެރިންނަށް ތަނަވަސް ކޮށްދިނުމުގެ މަތިވެރި މަޤްޞަދުގައެވެ. އެއްވެސް ސަރުކާރަކަށް ކުރެވިފައިނުވާކަމެއް ފުރިހަމަކުރުމުގެ މަތިވެރި ޢަޒުމުގައެވެ.
އެގްރޯނެޓް އުފަންވީ ، ވަރަށް ޚައްޞާޞް ދަނޑިވަޅެއްގައި ، ވަރަށް މުހިންމު މަޤްޞަދުތަކެއް ޙާޞިލްކުރުމަށް ކަނޑައެޅުނު އަމާޒު ތަކަކާ އެކީގައެވެ. އެގްރޯނެޓް އުފަންވީ ، 2020 ވަނައަހަރުގެ އެޕްރީލްމަހުގެ 21 ވަނަ ދުވަހުއެވެ. އެގްރޯނެޓްގެ މައިގަނޑު ޒިންމާއާއި މަސްއޫލިއްޔަތަކީ ، ރާއްޖޭގެ ދަނޑުވެރިކަން ޞިނާޢަތެއްގެ ގޮތުގައި ކުރިއަރުވައި ތަރައްޤީކޮށް ކޮޅަށްޖެހުމެވެ. އެކަމަށް ބޭނުންވާ ، ފަންނީ އަދި އިދާރީ ލިޔާޤަތާއި ޤާބިލިއްޔަތުކަން އުފައްދައި ، ދިވެހި ދަނޑުވެރިކަން ތަރައްޤީކޮށް ، އައު ހަރުފަތްތަކަކަށް ވާޞިލްކޮށްދިނުމެވެ. ދިވެހި ދަނޑުވެރިން ހައްދާތަކެތި ވިއްކާނެ ހަރުދަނާ ނިޒާމެއް ޤާއިމްކޮށްދިނުމަކީވެސް ، އެގްރޯނެޓާ މަތިކުރެވިފައިވާ ޒިންމާއެކެވެ. އޭގެ އިތުރަށް ، ރާއްޖެޔަށް ކާބޯތަކެތި އިމްޕޯޓްކުރެވޭ ޢަދަދު ދަށްކުރުމާއި ، ޒަމާނީ ދަނޑުވެރިކަމަށް ، ރާއްޖޭގެ ދަނޑުވެރިން އަހުލުވެރި ކުރުވުންވެސް ހިމެނެއެވެ.
އެގްރޯނެޓް އުފެދުނު ދުވަހު ، މުޅިދުނިޔެ އޮތީ ، ކޯވިޑް-19 އިން ކުރިމަތިވި ޢާލަމީ ވަބާގެ ތުންފަތްމަތީގައެވެ. ރާއްޖެފަދަ އިމްޕޯޓަށް ބަރޯސާވާ ޤައުމެއްގެ ރައްޔިތުން ، ގޭބަންދުގައި ތާށިވެ ، ރިޒޯޓްތަކުގައި ވަޒީފާއަދާކުރަމުން ގެންދިޔަ ޒުވާނުން ، އެކުދިންގެ ވަޒީފާއިން މަޙުރޫމުވެ ، އާމްދަނީ ހޯދުމަށްކުރާ ، ރައްޔިތުން ކުރަމުންގެންދިޔަ މަސައްކަތްތައް ހުއްޓި އޮތުމަށް މަޖުބޫރުވި ، ބިރުވެރި ޙާލަތުގައި ، ރާއްޖޭގެ ދަނޑުވެރިކަމުގެ މަސައްކަތްކުރެވިދާނެކަމަށް ފެނުނު ، ހަމަ ކޮންމެ ރަށަކަށް އެގްރޯނެޓުން ދަތުރުކުރިއެވެ. އެ ނުރައްކާތެރި ޙާލަތުން ، ރައްޔިތުން ސަލާމަތްކޮށް ، ކާބޯތަކެތީގެ ޔަޤީންކަން ކަށަވަރުކޮށްދިނުމަށް ކުރިމަތިވި ގޮންޖެހުންތަކާ ، އެގްރޯނެޓުން ކުރިމަތިލީ ، ފިސާރި ކެރިގެންނެވެ. ދަނޑުވެރިންގެ މުލައްދަނޑިޔަށް ބާރުލައި ، އުދެލީގައި ހިފުމަށް ހިތްވަރު ދިނެވެ. ރާއްޖޭގެ ، ފިސާރިކެރޭ އަންހެންވެރިން ، އާނދޮގޭއޭ ބުނެ ، ދަނޑުތަކަށް ވަންނަން މަޖުބޫރު ކުރުވިއެވެ. ހޭލުންތެރިކަން އުފައްދައި ، ވިސްނައިދީ ނަޞޭޙަތްތެރި ވެގެންނެވެ. އެތައްފަހަރަކު ކިޔައިދީގެން ، ދަނޑުވެރިނަފާއަށް ހިތްޖައްސައިދިނެވެ. ކޯވިޑްގެ ޢާލަމީ ވަބާއިން ރާއްޖޭގެ ރައްޔިތުންނަށް ކުރިމަތިވި ، ނަފްސާނީ ބަލިމަޑުކަމަށް އެގްރޯނެޓުން ހޯދައިދިން ފަރުވާއަކީ ތާރީޚު ހެކިކޮށްދޭނެ ޙަޤީޤަތެކެވެ. އަދި ، ދަނޑުވެރިންނަށް ޝިފާއެއް ހޯދައިދިން ހަމައެކަނި ކުންފުންޏެވެ. އެދުވަހު ، ދަނޑުވެރިންނަށް ހިތްވަރެއް ލިބުނު ހަމައެކަނި ވަޞީލަތެވެ.
މުޅިދުނިޔެ އޮތީ ހުއްޓިފައެވެ. ކާންބޯންކުރާ މަސައްކަތާއި ޞިނާޢީ މަސައްކަތްތައް އޮތީ ހުއްޓިފައެވެ. މާދަމާވެސް ، ބަނޑުފުރާނަ މުއްތިކުރާނެގޮތެއް ނޭނގޭ ޙާލުގައި މީސްތަކުންތިބީ ގޭގައި ބަންދުވެފައެވެ. ހުރިހާ ޤައުމެއްގެ ބޯޑަރު ބަންދުކުރެވި ، އެއްޤައުމުން އަނެއްޤައުމަށް ދަތުރުކުރުން އޮތީ ނުކުރެވޭކަމަކަށް ވެފައެވެ. ދުނިޔޭގެ ކާބޯތަކެތި އުފެއްދުމުގެ ނިޒާމްވެސް އޮތީ ހުއްޓިފައެވެ. ހެޔޮއެދޭ ޤައުމަކުން ، ކާބޯތަކެތި ފޮނުވައިދޭން އެއްބަސްވިޔަސް ، އެއްޤައުމުން އަނެއްޤައުމަށް ކުރާ އާގުބޯޓުގެ ދަތުރުތައްވެސް އޮތީ ހުއްޓިފައެވެ. އެއްޤައުމުން އަނެއްޤައުމަށް ، މުދާ އުފުލޭނެ ދޮރު އޮތީ ބަންދުވެފައެވެ. އެފަދަ ޙާލަތެއްގައި ސަރުކާރަކަށް އެންމެ މުހިންމުވާނީ ، ރައްޔިތުންގެ ކާބޯތަކެތީގެ ޔަޤީންކަން ކަށަވަރު ކޮށްދިނުމެވެ. ބަނޑަށް ޖެހުމުގެ ބިރުވެރި ޙާލަތުން ، ރައްޔިތުން ސަލާމަތްވާނެ ގޮތްތައް ހޯދައިދީ ، ރައްޔިތުން ބާރުވެރި ކުރުވުމެވެ.
އެގްރޯނެޓް އުފެއްދުމުގެ އެންމެ މުހިންމު އެއް މަޤްޞަދަކީ ، ރާއްޖޭގެ ކާބޯތަކެތީގެ ކަށަވަރުކަން ރައްޔިތުންނަށް ޔަޤީންކޮށްދިނުމަށްޓަކައި ، އެވަގުތަށް ކުރެވެންއޮތް ކޮންމެކަމެއް ކުރުމެވެ. ކޯވިޑްގެ ޢާލަމީ ވަބާގައި ވަޒީފާ ގެއްލި ، ރަށްފުށުގައި ތާށިވެފައިތިބި ޒުވާނުންނާއި ދަނޑުވެރިންގެ އަތުގައި ހިފައި ، ކޮޅަށްޖަހައި ، ދަނޑުވެރިކަމުގެ މަސައްކަތަށް ހިތްވަރުދީ ، ދަނޑުމައްޗަށް އެބައިމީހުން ނެރުމެވެ. ކޯވިޑްގެ ދަތިޙާލަތުގައި ، ދަތުރުފަތުރަށް ކުރިމަތިވެފައި އޮތް ގޮންޖެހުންތަކާ ކެރިގެން ކުރިމަތިލައި ، ދަނޑުވެރިކަން ކުރެވިދާނެކަމަށް ފާހަގަކުރެވުނު ހުރިހާ ރަށަކަށް އެގްރޯނެޓުން ޒިޔާރަތް ކުރިއެވެ. ދަނޑުވެރިން ދަނޑުމައްޗަށް ނެރުނެވެ. ދަނޑުވެރިކަމަށް ޝަޢުޤުވެރިވާ ޒުވާނުން ދަނޑުމައްޗަށް ނެރެ ، ދަނޑުވެރިންނަށް ހެދިއެވެ. ދަނޑުވެރި ރަށްރަށުގައި ، ހިކި ހަނަފަސްވެފައި އޮތް ދަނޑުބިންތަކަށް ފެހިކަން ގެނެސްދިނެވެ. ދަނޑުވެރިކަމަށް ޚާއްޞަ 37 ރަށަކަށް ޒިޔާރަތްކޮށް ، އެރަށްރަށުގެ ދަނޑުވެރިންގެ އަތުގައި ހިފައި ، އެބައިމީހުން ދަނޑުމައްޗަށް ނެރުނެވެ. ދަތުރުފަތުރުގެ ނިޒާމަށް އެދުވަހު އެޅިފައިވާ ހުރަސްތަކާ ގުޅިގެން ، ދަނޑުވެރިކަމުގެ ބާވަތްތައް ވިއްކަން އުނދަގޫވާވަރަށް އެތަކެތި އުފައްދައި ބާޒާރަށް ނެރުނެވެ. ކޯވިޑްގެ ބިރުވެރިކަމުން ހިތްނުތަނަވަސްވެފައި ތިބި ރައްޔިތުންގެ މޫނުމައްޗަށް ހިނިތުންވުން ، ގެނެސްދިނެވެ.
ކޯވިޑްގެ ޢާލަމީ ވަބާގެ ތެރޭގައި އެގްރޯނެޓުން ހިތްވަރުކޮށްފައި ކުރި މަސައްކަތުގެ ފޮނި ނަތީޖާ ދާދިއަވަހަށް ފެނިގެންދިޔައެވެ. އެގްރޯނެޓްގެ ޚިދުމަތް ފާހަގަކޮށް ، އިތުރު ރަށްރަށުގެ ކައުންސިލްތަކުން ، އެގްރޯނެޓްގެ ޚިދުމަތަށް އެދުނެވެ. އެގްރޯނެޓްގެ އެ ކާމިޔާބީގެ އެއް ބަހާއަކީ ދަނޑުވެރިކަމުގައި އެރަށްރަށުގެ ރައްޔިތުންނަށް އެހީތެރިވުމަށް ، ކައުންސިލްތަކުން އެދުނު ރަށްރަށުގެ ޢަދަދު މަތިވަމުން ދިއުމެވެ. ރާއްޖޭގެ 60 އަށްވުރެ ގިނަރަށަށް ، އެއްފަހަރަށްވުރެ ގިނަފަހަރަށް ގޮސް ، ރައްޔިތުން ހޭލުންތެރި ކުރުވައި ، ދަނޑުވެރިންނަށް ޚައްޞަކުރެވުނު އެހީތެރިކަމާއި ޚިދުމަތް އެގްރޯނެޓުން ފޯފުކޮށްދީފައި ވެއެވެ.
އެގްރޯނެޓްގެ ދަނޑުވެރިންގެ ދަފްތަރުގައި ރަޖިސްޓަރީ ކުރެވުނު ދަނޑުވެރިންގެ ޢަދަދު ދެހާހަށްވުރެ މައްޗަށް އެރިއެވެ. ދަނޑުވެރިން ، ދަނޑުމައްޗަށް ނެރުމުގެ ކުރިން ، އެއްފަހަރަށްވުރެ ގިނަފަހަރަށް ތަމްރީންކޮށް ، ދަނޑުވެރިކަމަށް އަހުލުވެރި ކުރުވިފައި ވެއެވެ. އެ މުއްދަތުގައި ދެހާހަށްވުރެ ގިނަ ދަނޑުވެރިންނަށް އެތައް ފަހަރެއްގެ މަތިން ތަމްރީން ދެވިފައި ވެއެވެ.
ކޯވިޑްގެ ޙާލަތުގައި ، ދަނޑުވެރިންނަށް މާލީގޮތުންނާއި ޢަމަލީ މަސައްކަތުގައި ކުރިމަތިވެފައި އޮތް ގޮންޖެހުންތަކަށް ޙައްލު ހޯދައިދެވުނެވެ. ސްޓާޓަރޕެކްގެ ނަމުގައި ، ދަނޑުވެރިންނަށް ޕެކެޖެއް ތައްޔާރުކޮށް ، ދަނޑުވެރިކަން ކުރުމަށް ބޭނުންވާނެ ތަކެތި ފޯރުކޮށް ދެވުނެވެ. ދަނޑުވެރިކަމުގައި ބޭނުންކުރެވޭ އުދަލިން ފެށިގެން އިރިގޭޝަން ސިސްޓަމަށް ބޭނުންވާ އާލާތާއި ސާމާނު ، އެ ލިސްޓްގައި ހިމަނައިގެން ، ދަނޑުވެރިން ބޭނުންވާ ތަކެތި ފޯރުކޮށްދެވުނެވެ. އޮށާއި މުޑުވަށް ހިލޭ ދޫކުރެވުނެވެ. ދަނޑުބިންތަކަށް ކުރިމަތިވަމުންދިޔަ ބަލިތަކަށް ފަރުވާ ހޯދައިދީ ، ބޭހާއި ކާނާގެ ޚިދުމަތް ދެވުނެވެ. މުޑުވަށް ކުރުމުން ފެށިގެން ގޮވާން ކެނޑުމާ ހަމަޔަށް ދަނޑުވެރިންގެ މަސައްކަތް މޮނީޓަރ ކޮށް ، ބެލެހެއްޓުނެވެ.
އެގްރޯނެޓުން ދަނޑުވެރިންގެ ޚިދުމަތަށް ކުރިމަތިލީ ، މިޒަމާނުގެ ބަހުރުވައިންނަމަ " ޓޯޓަލް ސޮލިއުޝަން " އަކާ އެކީގައެވެ. ކޮންޓްރެކްޓް ފާރމިންގެ ނިޒާމުގެ ދަށުން ، ދަނޑުވެރިންގެ ދަނޑުބިން ރަޖިސްޓަރީ ކުރާހިސާބުން ، ދަނޑުވެރިން ތަމްރީންކޮށް ، ދަނޑުސާފުކޮށް ގަސްއިންދައި ، ގަސް ބަލަހައްޓައި ފަރުވާދީ ، ގޮވާން ކެނޑުމުން އެތަކެއްޗާ ޙަވާލުވެ ، އޭގެ ހަމައަގު ދީގެންނެވެ. ދަނޑުވެރިންނަށް ކުރިމަތިވެދާނެ ކޮންމެ ތަކުލީފެއް ، އެގްރޯނެޓުން ލުއިކޮށްދީ ދަނޑުވެރިންނަށް އެހީތެރިވެ ދިނެވެ.
އެގްރޯނެޓްގެ މި ކާމިޔާބީގެ އަސަރު ، މުޅިރާއްޖެއިން މިހާރުވެސް ފެންނަމުން އެބަދެއެވެ. އެގްރޯނެޓުން އުފެއްދި ދަނޑުވެރިންގެ އުފެއްދުންތަކުން ، ދިވެހި އުފެއްދުންތަކުގެ ބާޒާރު ފަޅުފިލުވިގެން ދިއުމަކީ ، ޤައުމީ ފެންވަރެއްގައި އެގްރޯނެޓުން ހޯދި ފަޚުރުވެރި ކާމިޔާބީއެކެވެ. އޭގެ ހެޔޮ އަސަރު ޒަމާންތަކަކަށް ދެމިގެންދާނެ ޚިދުމަތެކެވެ.
ރާއްޖޭގެ ދަނޑުވެރިކަމުގެ ޞިނާޢަތުގައި ޒަމާނުއްސުރެ ކުރިމަތިވެފައި އޮތް ގޮންޖެހުންތަކުގެ އަސަރު ، އެގްރޯނެޓްގެ މަސައްކަތަށްވެސް ފޯރަމުން ދިޔައެވެ. އެހެންނަމަވެސް ، އެފަދަ ގޮންޖެހުންތަކުން އަރައިގަތުމަށްޓަކައި ، އެގްރޯނެޓްގެ ޚިދުމަތްތައް އަބަދުވެސް އައީ ބަދަލުކޮށް ތަރައްޤީކޮށް ، ކުރިމަގަށް މަގުކޮށަމުންނެވެ. ރައްޔިތުންނަށް ފޯރުކޮށްދެވޭ ކޮންމެ ޚިދުމަތަކީ އަގުހުރި އެއްޗެކެވެ. އޭގެ ބަދަލު ފުރިހަމަޔަށް ވަގުތުން ނުލިބުނަސް ، ދަނޑުވެރިކަމުގެ ޞިނާޢަތުގައި އެގްރޯނެޓްގެ ޚިދުމަތްތަކުގެ އަގާއި ޚަރަދަކީ ، ޤައުމީ ފެންވަރުގައި އޭގެ ލާބައާއި މަންފާ މުޅި ޤައުމަށް ލިބެމުންދާ އެއްޗެއްކަމަށް ، ރާއްޖޭގެ ކޮންމެ ދަނޑުވެރިޔަކުވެސް ހެކިވާނެއެވެ. ކުންފުނީގެ ޚަރަދަކީ ، ފައިސާއިން ބަދަލު ނުލިބުނަސް ، މުޅި ޤައުމަށް އޭގެ ލާބައާއި މަންފާ ލިބިލިބިހުރި އެއްޗެކެވެ. ދަނޑުވެރިންތަކެއް އުފައްދައި ، ދަނޑުވެރިން އުފައްދާ ތަކެތި ބާޒާރުން އިތުރުވެގެންދާ މަންޒަރު ފެނުމަކީ ، އެގްރޯނެޓްގެ ޚިދުމަތުގެ ހެޔޮ ފާލެކެވެ. ރާއްޖޭގެ އިޤްތިޞާދަށް އެގްރޯނެޓްގެ މަސައްކަތުން ލިބިގެންދިޔަ ކުރިއެރުމެކެވެ.
ޞިނާޢަތެއްގެ ގޮތުގައި ރާއްޖޭގެ ދަނޑުވެރިކަން ކޮޅަށްޖަހައި ، ތަރައްޤީކުރުމަކީ ، އެގްރޯނެޓާ ޙަވާލުކުރެވިފައި އޮތް މަސްއޫލިއްޔަތެކެވެ. އެގްރޯނެޓުން ގެންދަނީ ، އެންމެ ފުރިހަމަގޮތުގައި އެ ޒިންމާ އުފުއްލަމުންނެވެ. ޒަމާނީ ދަނޑުވެރިކަމަށް ، ރާއްޖޭގެ ދަނޑުވެރިކަން ބަދަލުކުރުމުގެ މަސައްކަތަށް އެގްރޯނެޓު އޮތީ ފައްކާވެފައެވެ.
ރާއްޖޭގެ ނުވަ ސަރަޙައްދެއްގައި ، ދަނޑުވެރިން އުފައްދާ ތަކެތި ކޮށާރުކުރުމަށް ކޯލްޑް ސްޓޯރޭޖްވަނީ ޤާއިމް ކުރެވިފައެވެ. އެއްތަނުން އަނެއްތަނަށް އެތަކެތި އުފުއްލުމަށް ، " އެގްރިބޯޓް " ގެ ނަމުގައި ދެބޯޓެއް ބަނުމުގެ މަސައްކަތް ފަށައި އެއްބޯޓު މިހާރު އެއޮތީ މޫދަށް ބާލައިފައެވެ. ބިންބޮޑެތި ރަށްރަށުން ، ދިގުމުއްދަތަށް ބިންހޯދައި ، ޖަމާޢަތުގެ ދަނޑުވެރިކަމުގެ ނިޒާމެއް ޤާއިމްކުރުމުގެ ޢަމަލީ މަސައްކަތް ކުރެވެމުން އެބަދެއެވެ. ހައްދުންމަތީ ގާދޫގައި ، ދަނޑުވެރިކަމުގެ މަސައްކަތް ފައްޓައިގެން ކުރިޔަށް އެބަ ގެންދެވެއެވެ. ރާއްޖޭގެ ދަނޑުވެރިކަމުގެ ޞިނާޢަތަށް އިންވެސްޓް ކުރުމަށް ޝަޢުޤުވެރިވާ ، ބޭރުގެ އިންވެސްޓަރުން ހޯދައި ، އެ ފަރާތްތަކާ ގުޅިގެން ، ރާއްޖޭގެ ދަނޑުވެރިކަމުގެ ޞިނާޢަތަށް ގެނެސްދެވޭނެ ތަރައްޤީއާއި ކުރިއެރުމުގެ ފުރުޞަތުތައް ، އެގްރޯނެޓުން މިހާރުވަނީ ހޯދާފައެވެ. މިހާރުވެސް އެގްރޯނެޓް އެއޮތީ ، ބޭރުގެ އިންވެސްޓަރުންނާ ގުޅިގެން ، މިހާރުންމިހާރަށް ފެށިދާނެ އެތައްކަމެއް އަތްމަތި ކޮށްފައެވެ.
ރާއްޖޭގައި އެއްވެސް ޒަމާނެއްގައި އެއްވެސް ސަރުކާރަކަށް ، ރައްޔިތުންނަށް ދެވިފައިނުވާ އެތައް ޚިދުމަތްތަކެއް ، އެގްރޯނެޓުންވަނީ ރައްޔިތުންނަށް ފޯރުކޮށްދީފައެވެ. އަދި ހަމަ އެއާއެކު ، އެއްވެސް ފަރާތަކުން ދަނޑުވެރިކަމުގެ ޞިނާޢަތުގެ ކުރިއެރުމަށް ކޮށްފައިނުވާ އެތައް މަސައްކަތެއް އެގްރޯނެޓުންވަނީ ފައްޓާފައެވެ. ދަނޑުވެރިކަމުގެ ޞިނާޢަތުގެ ކުރިމަގު ބަށްޓަން ކުރުމަށް ކުރިމަތިލާފައިވާ މިފަދަ ކުންފުންޏެއްގެ ތަޞައްވުރަކީ ، ޤައުމީ ފެންވަރުގައި އަގުކުރެވިގެންދާނެ ޚިދުމަތެކެވެ. އަމިއްލަ ފައިމައްޗަށް ތެދުވެ ހިންދެމިލުމަށްޓަކައި ، އެގްރޯނެޓުން ހަމައިސްކޮޅަށް ދެމިލުމަށް ކުރަމުންގެންދާ އަގުހުރި މަސައްކަތަކީ ، ވަރަށް ބޮޑު ޤައުމީ ގޮންޖެހުމެކެވެ. އެއީ ، އެއްދުވަހަކުން ދެދުވަހަކުން ޙާޞިލް ކުރެވޭވަރަށްވުރެ ، އުނދަގޫ މަސައްކަތެކެވެ. އެއީ ޤުދްރަތީ ނިޒާމެކެވެ. އެއްލާރިން ދެލާރި އުފައްދަން ވަގުތު ނަގާނެއެވެ. ބިންމައްޗަށް ވެއްޓުމުން ، ވެލިފޮޅައިލާފައި ތެދުވާންޖެހޭ އެތައް ޙާލަތެއް ކުރިމަތިވާނެއެވެ. ދިރުންހުރި އުއްމީދަކުން ހިތްވަރުލާފައި ހިންދެމިލާންޖެހޭ އެތައް ގޮންޖެހުމަކާ ކުރިމަތިލާން މަޖުބޫރުވާނެއެވެ. އެހެންކަމުން ، އެގްރޯނެޓްގެ މަސައްކަތާގުޅުންހުރި ހުރިހާ މަސްދަރަކާއި ގުވަނަކުން އޭގެ އަގުވަޒަންކޮށް ، އެކަމަށް އެގްރޯނެޓަށް ފުރުޞަތުދީ ހިތްވަރުދޭންޖެހެއެވެ. މި ދާއިރާއަކީ ، ލިބޭ ހިތްހަމަ ނުޖެހުމުގައި މޫނު އަނބުރައިލާން ހިތަށް އަރާވަރަށްވުރެ ، މުހިންމު ދާއިރާއެކެވެ. މީހުން މީހުންނަށްވާނީ ، މީހުންނަށް ހެދީމައެވެ.
މިވޭތުވެދިޔަ 4 އަހަރުދުވަހުގެ ތެރޭގައި އެގްރޯނެޓްގެ މަސައްކަތަށް އެހީތެރިވެދިން އެންމެގާތް އެކުވެރިޔަކީ ޖަޕާނު ސަރުކާރާއި އޫއެންޑީޕީއެވެ. އެގްރޯނެޓުން ކާމިޔާބުކަމާއެކީ ހިންގައި ނަތީޖާ ނެރެފައިވާ ގިނަމަސައްކަތްތައް ކުރެވިފައިވަނީ ، ޖަޕާނު ސަރުކާރުންނާއި ޔޫއެންޑީޕީ އިންނެވެ. ދިވެހިސަރުކާރުން އެގްރޯނެޓަށް ކަނޑައަޅާ އަހަރީ ބަޖެޓްގެ ދެބައިކޮށްފަ އެއްބައިވެސް އެއްވެސް އަހަރެއްގައި އެކުންފުންޏަށް ލިބިފައެއް ނުވެއެވެ. ސަރުކާރުން ޚަރަދުކޮށްފައިވަނީ ، މުއައްޒަފުންގެ މުސާރައާއި ތަނުގެ ކުއްޔަށް ދައްކަންޖެހޭ މިންވަރެކެވެ. އެހެންހުރިހާ ޚަރަދެއް އެގްރޯނެޓުން ހަމަޖައްސާފައިވަނީ ، އެކުންފުނީގެ މުއައްޒަފުންގެ ހީވާގި މަސައްކަތުންނާއި ކުރިން ދެންނެވި ދެފަރާތުގެ އެހީގައެވެ.
އެގްރޯނެޓްގެ މިހާރުގެ ޙާލަތަށް ބަލާއިރު ، އަމިއްލަ ފައިމައްޗަށް ތެދުވެ ހިންދެމިލައި ، އެހެން އެއްވެސް ފަރާތަކަށް ބަރޯސާނުވެ ، ކުންފުނި ހިންގޭނެ އާމްދަނީ ލިބޭގޮތަށް މަޝްރޫޢުތަކެއް ރާވައިގެން އުއްމީދީ މަސައްކަތްތަކެއް ކުރެވެމުން އެބަދެއެވެ. ރާއްޖޭގެ ދަނޑުބިންތަކަށް ކުރިމަތިވާ ޤުދްރަތީ މޫސުމީ ގެއްލުމާއި ، ކަނޑުތަކުގައި އުފެދި އުފެލުމުންދާ ބިޔަރާޅުތަކާ ހަނގުރާމަކޮށް ، 188 މުއައްޒަފުންނާއެކީ ، އެގްރޯނެޓް ކުރަމުންގެންދާ ދަތުރަކީ ، ފަސޭހަ އަދި އަމާން ދަތުރެއްނޫނެވެ. އެހެންނަމަވެސް ، ކުރިމަތިވާ ގޮންޖެހުންތަކާ ކުރިމަތިލައި ، އެގްރޯނެޓުން އަމާޒު ހިފައިފައިވާ ދަނޑުދަނޑިތަކަށް ވާޞިލްވުމަށްޓަކައި ، ރާއްޖޭގެ ހީވާގި ދަނޑުވެރިންނާއި ސަރުކާރުގެ މުއައްސަސާތަކުގެ އެހީތެރިކަމާއި އެއްބާރުލުން ނިހާޔަތަށް ބޭނުންވެއެވެ. އެގްރޯނެޓްގެ އަޑު އަހައިލައި ، އެއީ ކޮންކަމެއްކުރާ ކޮންބައެއްތޯ ބަލައި ، ކުރެވިފައިހުރި ކާމިޔާބު މަސައްކަތްތަކާއި ، ޒިންމާއާއި މަސްއޫލިއްޔަތު އަދާކުރުމުގައި ހުރި ދަތިތަކާއި ގޮންޖެހުންތަކުގެ ވާހަކަ ދައްކައި ، ކުރިޔަށް ރޭވިފައިހުރި މުހިންމު މަޝްރޫޢުތަކުގެ މަޢުލޫމާތު ހޯދައި ، އެގްރޯނެޓްގެ ޙާލު ބަލައިލަން އެބަޖެހެއެވެ.
އެގްރޯނެޓްގެ ޚިދުމަތްތައް ، ދަނޑުވެރިންނަށް އެންމެ ފައިދާހުރިގޮތުގައި ފޯރުކޮށްދިނުމަށްޓަކައި އެގްރޯނެޓުން ކުރަމުންގެންދާ މަސައްކަތުގައި ، ޔޫއެންޑީޕީ އާއި ޖަޕާން ސަރުކާރުގެ ޙިއްޞާއާއި މާލީ ، ހިލޭ އެހީތެރިކަމަކީ ، އެގްރޯނެޓްގެ ކުރިއެރުމާ ގުޅިފައި އޮތް އެންމެ އަގުހުރި ބަހާއެވެ. އޭގެ އިތުރަށް ، ދިވެހި ސަރުކާރުގެ އެހީތެރިކަމާއި އެގްރޯނެޓްގެ މުއައްޒަފުންގެ ބަދަލެއްނުވާ ޢަޒުމުގައި އެގްރޯނެޓްގެ އިސްވެރިންނާއި މުއައްޒަފުންގެ ސާބިތުކަން އެއީ ، އެގްރޯނެޓްގެ އެންމެ އަގުހުރި ރައުސްމާލެވެ. އަދި ، ޚާއްޞަކޮށް ، މިހާރަށް އެގްރޯނެޓުން ހިފާފައިވާ ، ދަނޑުވެރިކަމުގެ ތަރައްޤީގެ އަމާޒާއި ލަނޑުދަނޑިތައް އެއީ މިސްރާބުން ކައްސާލާ ވަރަށްވުރެ ހަރުދަނާ ނަތީޖާތަކެއް ނެރެވިދާނެ އުއްމީދީ ކަންތައް ތަކެކެވެ. ނޭފަތުކުރިޔަށްވުރެ ދުރަށް ބަލައި އިޚްލާޞްތެރި ވިސްނުމަކުން ، ދުރުބަލައިލަން މަޖުބޫރު ކުރުވާފަދަ ، ސާފު ލަނޑުދަނޑިތަކެއް ތަޞައްވުރު ކުރެވޭ ޙަޤީޤަތެކެވެ. އަމާންކަމާއި ހަމަޖެހުމުގެ ވިއުގައެއްގެ މައްޗަށް ބިނާވެފައި އޮތް ، ދެކޮޅަށް ދުއްވާ ސާފު ތެދުމަގެކެވެ. ނަތީޖާ ނެރެ ، ނަތީޖާ ދައްކާ ޤާބިލް ކުންފުންޏަކަށް އެގްރޯނެޓް ހެދުމަށް ކުރެވެމުންދާ މަސައްކަތްތަކުގައި ބަރަކާތް ލައްވާށިއެވެ. އުއްމީދުން ފުރިގެންވާ ، ދިރުންހުރި އުއްމީދުގެ ހުޅުކޮޅަކުން ، އެގްރޯނެޓްގެ މުސްތަޤްބަލް އަލިކުރައްވައި އުޖާލާ ކުރައްވާށިއެވެ.
