ފެށުން
"ވިހަ ތީރު" މިވާހަކަޔަކީ ، ހަތަރު ޒުވާނެއްގެ މާޒީއާ ގުޅިފައިވާ ، އަސަރުގަދަ ، ލޯބީގެ ވާހަކައެކެވެ. އެ ހަތަރު ޒުވާނުންގެ ނާކާމިޔާބު ލޯބީގެ ހިތި ހަނދާންތަކާއެކީ ، މުސްތަޤްބަލް ބިނާކުރުމަށް އުފުއްލަން ޖެހުނު ގޮންޖެހުމާއި ތަކުލީފުތައް މިވާހަކައިގާ ސިފަކޮށްދެވިފައި ވެއެވެ. ކުއްލިޔަކަށް ، އަވަހަށް ، އެހެނަސް ފޮނިކޮށް ، އެހެންމީހެއްގެ ޙަޔާތާ ގުޅި ، މާޒީގެ ފޮނިމީރުކަން ހަނދާން ނައްތާލަން މަޖުބޫރުވާ އަންހެންކުއްޖެއްގެ ޙަޔާތާ ގުޅިފައި އޮންނަ ހަތަރު އިންސާނެއްގެ ހިތި އަދި ފޮނި އިޙްސާސްތައް ، މިވާހަކައިން ، ކިޔުންތެރިންގެ ހިތާ ކުޅެލާނެއެވެ. މިއީ އުރުދޫ ޑްރާމާ ސީރީޒެއްކަމުގައިވާ " ފުޠޫރު " ގެ ވާހަކައިގެ ތަރުޖަމާއެކެވެ. އުރުދޫބަހަކީ ، ވަރަށް ރީތި ފުންމާނަތަކެއް އޭގައި ހިމެނޭ މުއްސަނދި އަދި އެހާމެ ރީތި ، ހިތްގައިމު ބަހެކެވެ. ތަރުޖަމާކޮށްފައިވާނީ ، ވާހަކައިގެ އަޞްލުން ބޭރުނުވާގޮތަށް ، ދިވެހިބަހުގެ ބަސްމޮށުންތެރިކަމަށް ފައްތައި ، ފޮނިތޮށި ކާފޫރުތޮޅިވެސް އަޅައިގެންނެވެ. ކިޔުންތެރިންގެ ހިތާއި ސިކުނޑިއާ ކުޅެލާފަދަ އިޙްސާސްތަކެއް އުފެއްދުމަށްޓަކައެވެ. ވާހަކައިގެ އަސްލު ލިޔެފައިވަނީ ، ޕާކިސްތާނުގެ ލިޔުންތެރިއެއްކަމުގައިވާ ، ޒަންޖަބީލް އާޞިމް ޝާހުއެވެ. އުރުދޫ ބަހުންނެވެ.
ވަފާތެރި ، ތެދުވެރި އަދި ދެގޮތެއްނުވާ ލޯތްބާއި ، ބޮޑެތި ސިއްރުތަކާ އަދި އެސިއްރުތައް ފަޅާއެރުމާއި ، ނުގުޑާފަދަ ހަރުދަނާކަމާ އަދި ދޫނުކުރާ ގޮންޖެހުމާއި ، ހިތްހަލާކުވާފަދަ ހިތްދަތިކަމާ އަދި ކެރިގެން ބަދަލުހިފުމާއި ، ކާމިޔާބީއާއި ނާކާމިޔާބީގެ ފޮނިމީރުކަމުގެ ތަކުލީފުތައް ، ވިހަ ތީރެއްގެ ބީދައިން ސިފަކޮށްދޭ މަންޒަރުތައް ހިތްޕުޅަށް ގެންނަވައި ސިފަކުރައްވަމުން ، ވިލެމުންދާ " އާފަތިސް " ގެ ، މުނިފޫހިފިލުވުމުގެ މާބަގީޗާގައި ، މަޑުކޮށްލައްވާށެވެ!
ވާހަކަޔަކީ ދިގުވެސް ވެދާނެ އެއްޗެކެވެ. ބައެއްފަހަރަށް ފޫހިވެސް ވެދާނެއެވެ. އަނެއްބައި ފަހަރަށް ، ކިޔާހިތުން އިންދާ އެދުވަހުގެ ބައި ނިމިދާނެއެވެ. އާ ބަޔަކަށް ، ދިގު އިންތިޒާރެއްވެސް ކުރަން ޖެހިދާނެއެވެ. މިއީ ، އުރުދޫ ވާހަކައެއްގެ ތަރުޖަމާއެކެވެ. އިރާދަކުރެއްވިއްޔާ ، ކިޔުންތެރިން މާޔޫސްނުވާނެ ގޮތަކަށް ، އަޅުގަނޑުގެ ވިސްނުމާއި ފިކުރާ ޚިޔާލާތު ، އަދި ވަޤުތާއި ޙާލަތު ބަށްޓަންކުރުމަށް މަސައްކަތް ކުރާނަމެވެ. ދިގުވާހަކަ ތަރުޖަމާކޮށް ލިޔުމަކީ ، ވަޤުތާއި ޙާލަތާ ގުޅިފައި އޮންނަ ، ޒާތެއްގެ ނާޒުކު ހުނަރެކެވެ. މިއީ ، އަޅުގަނޑުމެންގެ ނަފްސުގައި ހިފާފައިވާ އަމިއްލަ ޝަޢުޤުވެރިކަމެއްގައި ، ހިލޭސާބަހަށް ހަދިޔާކުރެވޭ ޚިދުމަތެކެވެ. " ވިހަ ތީރު " ތައް ހެރެމުންދާ ، ތަކުލީފުގެ މަންޒިލަކަށް ކިޔުންތެރިން ގެންދިއުމަކީ ، އަޅުގަނޑުމެންގެ ޒިންމާއެކެވެ. މަޑުމައިތިރިކަމާއި ކެތްތެރިކަމުގެ އުފާވެރި މާޙައުލަކަށް ފައްކާކުރެވިފައިވާ ޚިޔާލީ ދުނިޔެއެއްގައި ، ވާހަކަޔައިގެން " އާފަތިސް " އާއެކު ކުރިޔަށް ވަޑައިގަންނަވާށެވެ!
ދިލްނަޝީންއަކީ ، މެދުފަންތީގެ ޢާއިލާއަކަށް ނިސްބަތްވާ ކުއްޖެކެވެ. ޕާޓީތަކަށް ދާން ، ކޮންމެ ފަހަރަކު އާ ހެދުމެއް ލުމަކީ ، ދިލްނަޝީންގެ ދިރިއުޅުމުގެ ޙާލަތު ތަންދޭ ކަމެއްނޫނެވެ. އެއީ ، ދިލްނަޝީންގެ ޢާއިލާގެ ފަޤީރު ޙާލަތު ވަޒަންކޮށްދޭނެ ފާލެކެވެ. އެކަމުގައި އޭނާއަށް އެހީތެރިވަނީ ، މުއްސަނދި ޢާއިލާއަކަށް ނިސްބަތްވާ ދިލްނަޝީންގެ އެންމެ ގާތް ރަޙުމަތްތެރިޔާ ، ރިދާއެވެ. ދެކުދިންނަކީވެސް ، ޔުނިވަރސިޓީގައި އެކުގައި ކިޔަވަމުން އަންނަ ، އެއް އިސްކޮޅެއްގެ އެއްރޫފައެއް ލިބިފައިވާ ދެކުދިންނެވެ. ޕާޓީތަކަށް ދާންވީމާ ، ދިލްނަޝީން ބޭނުންކުރަނީ ، ރިދާގެ ހެދުމެވެ. ޔުނިވަރސިޓީ ނިންމާފައި ނުކުމެގެން އަންނަމުން މިއަދުވެސް ދިލްނަޝީން އެދައްކަނީ އެވާހަކައެވެ. މާދަމާ ދާން އޮތްޕާޓީއަށް ދާން ލާނެ ހެދުމެއް ނެތް ވާހަކައެވެ. އެކަމަށް އޮތް ޙައްލު ހޯދައިދެނީ ރިދާއެވެ. އެއީ ، ރިދާގެ ވަރަށްގިނަ ރައްޓެހިންކުރާ ކަމެކެވެ. ޕާޓީތަކަށް ދާންވީމާ ، އެކުދިން އައުމުން ރިދާގެ ހެދުން އެކުދިންނަށް ދެއެވެ. އެކުދިން ގެންދާ ހެދުން ، އަނބުރާ ނުގެނަޔަސް ރިދާއަށް އެންމެ ރަނގަޅެވެ. ރިދާގެ އަތުގައި ގުނާ ޢަދަދު ނުކުރެވޭވަރަށް ހެދުން ހުރެއެވެ. ދިލްނަޝީންވެސް ބޭނުން ކޮންމެ ހެދުމެއް ނަގައިގެން ލާންވީއެވެ. އެކަމަކު ، އެއީ ދިލްނަޝީންގެ މަންމަ ، އަނީސާއަށް ކަމުދާ ކަމެއްނޫނެވެ. އަނީސާ ޤަބޫލުކުރާގޮތުގައި ، ދިލްނަޝީނަށް އެދެއްކެނީ އެމީހުންނަށް ލިބިފައި ނެތް ޙާލަތެކެވެ. އެމީހުންގައި ނެތް ފެންވަރެކެވެ. ލާނެ ހެދުމެއް ނެތިއްޔާ ދިލްނަޝީން ، އެއިން އެއްވެސް ޕާޓީއަކަށް ނުދިއުންވެސް އަނީސާއަށް މާ ރަނގަޅެވެ. ލިބޭ މިންވަރަށް ޝުކުރު ނުކޮށް ، ތިމާމެންގެ ނެތް ފެންވަރުގައި ދިރިއުޅުމަކީ ، އަނީސާއަށް ކަމުދާގޮތެއް ނޫނެވެ. އެމީހުންގެ އެޙާލަތު ބަދަލުކުރައްވާނީ ކޮންއިރަކުން ކަމެއް ނޭނގެއެވެ. އެއީ ، ﷲ ތަޢާލާގެ އިރާދަފުޅާއި މިންވަރުފުޅުގައި އޮންނަ ކަމެކެވެ. އެމީހުންގެ އެޙާލަތު ބަދަލުކުރައްވައި ، ދިލްނަޝީނަށް ބާއްޖަވެރި އުފާވެރި ޙަޔާތެއް މިންވަރު ކުރެއްވުމަކީ ، އަނީސާވެސް ދުނިޔެއިން އެދޭ އެންމެ ބޮޑު އެދުމެވެ.
ދިލްނަޝީން މިހާރު އެހުރީ ފިރިފުރާވަރަށް އަޅާފައެވެ. ކިޔަވާ ނިމިގެން ދެން އޮންނާނީ ޒަވާޖީ ޙަޔާތެއް ފެށުމެވެ. ފިރިހެންކުދިންގެ ލޮލަށް ތަދުވާވަރަށް ، ދިލްނަޝީން ރީއްޗެވެ. ލޫޅާފަތިކަމުގެ އެންމެ ފުރިހަމަ މިނުގައި ހަމައިސްކޮޅަށް ހެދިހުރި ޝާއްބަ ، ތުނި ހަށިގަނޑެކެވެ. މަސްއަރައި އުފުލިފައިހުރި ކޯތާފަތަކާއި ކުރަނގި ދެލޮލެވެ. ދިހުންކުލަ އަރާ ދިގު އިސްތަށިގަނޑެކެވެ. ދިލްނަޝީނާ ހަތަރުކަޅި ހަމަކޮށްލައި ބަލައިލުމަކީ ، ކޮލެޖްގައިވެސް ، ކޮންމެކޮންމެ ކުއްޖަކަށް ކުޅަދާނަކަމެއްނޫނެވެ.
ދިލްނަޝީނާއި ރިދާގެ ރަޙުމަތްތެރިކަމަކީ ، ޔުނިވަރސިޓީގެ ހުރިހާ ކުދިންނަށްވެސް އެނގޭ ކަމެކެވެ. އެ ރަޙުމަތްތެރިކަމާ ގުޅިފައިވާ ސިއްރުވެސް ، އެއީ ސިއްރެއްނޫނެވެ. ދިލްނަޝީނާއި ރިދާ ގެޔަށްދަނީ ، ރިދާގެ ބޭބެ ، ހަމްޒާގެ އަގުބޮޑުކާރުގައިކަން ހުރިހާ ކުދިންނަށްވެސް އެނގެއެވެ. މިއަދަކީވެސް ، އެދެކުދިން ބަލައި ޔުނިވަރސިޓީއަށް ، ހަމްޒާ އައިސްހުރި ދުވަހެކެވެ. ރަށުގައި ހުރިއްޔާ ކޮންމެ ދުވަހަކުވެސް ، އެދެކުދިން ބަލައި ، ހަމްޒާ އަންނާނެއެވެ. އޭނާގެ މަތިނެތް ރީތި ކާރު ، ދުރުގައި ޕާކުކޮށްލައިގެން ، ކާރުގައި ލެނގިލައިގެން ހަމްޒާ ހުށްޓެވެ. އޭނާ އެހުރީ އިންތިޒާރެއްގައިކަން އެނގެއެވެ. އެ އިންތިޒާރަކީ ، އޭނާގެ ކޮއްކޮ ރިދާއަށް އެކަނި ކުރާ އިންތިޒާރެއްނޫނެވެ. ދިލްނަޝީނަކީ ، ހަމްޒާ އެކުރަމުންގެންދާ އިންތިޒާރުގެ މައިގަނޑު ބަހާއެވެ. ޔުނިވަރސިޓީން ނުކުމެގެން އަންނަމުން ، ދިލްނަޝީނާއި ރިދާ ، ދައްކަމުން އެއަންނަ ވާހަކަތަކުންވެސް އެކަން އެނގެއެވެ.
ދިލްނަޝީން އެބުނާ ޕާޓީއަކަށްދާން އޮތީ މާދަމާއެވެ. އެހެންނަމަވެސް ، ދިލްނަޝީނަށް މާދަމާ އެޕާޓީއަށް ދެވޭނެކަމަކަށް ރިދާއަކަށް ނުފެނެއެވެ. އެކަމުގެ ސަބަބު ބުނެދިނީވެސް ރިދާއެވެ. ދިލްނަޝީންގެ ހިތް ، ހަށިގަނޑުން ވަކިވެކެން އައިސް ، މާދަމާ އުޅޭނީ ރިދާގެ ގޭގައެވެ. ރިދާ އެކޮށްލި ސަމާސާއަކީ ކީއްވެގެން ކުރި ސަމާސާއެއްކަން ދިލްނަޝީނަށް އެނގުނީ ، ޔުނިވަރސިޓީން ބޭރަށް ނުކުތްތަނުންނެވެ. ކާރުގައި ލެނގިލައިގެން ، އެމީހުންގެ އިންތިޒާރުގައިހުރި ހަމްޒާ ފެނުމުންނެވެ. ހަމްޒާ އެއައީ ވަރަށް ގިނަދުވަހު ރަށުންބޭރުގައި ، އިނގިރޭސިވިލާތުގައި އުޅެފައެވެ. ދިލްނަޝީން މާދަމާ އެގެޔަށް ނުގެނެސް ، ހަމްޒާއަކަށް ކެތެއް ނުކުރެވޭނެއެވެ. ލޮލުކޮޅުން ފެނުނީއްސުރެ ، ހަމްޒާ އެހުރީ ކަޅިޖަހައިނުލާ ދިލްނަޝީނުގެ ލޮލަށް ބަލަހައްޓައިގެންނެވެ. ރަކި ހިނިތުންވުމެއްގައި ، ދިލްނަޝީނަށްވެސް ހަމްޒާއާ ދިމާއަށް އިރުއިރުކޮޅުން ބަލައިލެވެއެވެ. ހަމްޒާއާ ގާތަށް އާދެވުނުވަރަކަށް ، ރިދާގެ ފަހަތަށް ވަދެ ނިވާވަމުން ގެންދެއެވެ. އެކަމަކުވެސް ، ރިދާގެ ކޮނޑުމަތިން އިރުއިރުކޮޅާ ، ހަމްޒާއާ ދިމާއަށް ބަލައިލެވެއެވެ.
" އަހަރެންގެ ބޭބެ އެއައީ ވަރަށް ދިގު ފްލައިޓެއްގައި ދަތުރުކޮށްފައެވެ. ބޭބެ ހުންނާނީ ދިލްނަޝީންގެ ވަސް ބަލައިލަން ބޭނުންވެފައެވެ. އެހެންވީމާ ދިލްނަޝީން ، ކުރީ ޝީޓުގައި އިށީންނާށެވެ. " ވައިއަޑުން ރިދާ ބުންޏެވެ.
ކާރަށް އަރައި ދުއްވައިލިފަހުން އެއްވެސް މީހަކު އަނގަޔަކުން ނުބުނެއެވެ. އެމީހުން ހަމަޔަކަށް އަޅުވައިލަން ޖެހުނީ ރިދާއަށެވެ.
އެދެމީހުން ބޭނުމިއްޔާ ، ދެލޯމަރައިލާފައި ދެލޯ ތަގުޅިކޮށްގެން އޮވެ ، އޭނާ ނިދާލައިފާނެކަމަށް ރިދާ ބުންޏެވެ. އަދި ހެޑްފޯން އަޅައިގެން ލަވައަޑުއަހަންވެސް އިނދެފާނެއެވެ. އެވަރުންވެސް ، އެމީހުންނަށް އުނދަގޫވާ ކަމަށްވަންޏާ ، ކައިރީގައިހުރި މޯލްއަކަށް އޭނާ ބޭލިވެސް ދާނެއެވެ. އެދެމީހުންނާއެކީ ރިދާ އިނުމަކީ ، ހަމްޒާއަށް މައްސަލައެއްނޫނެވެ. އަނގަ ގަދަނުކޮށް ، ރިދާ މަޑުން އިނުމުން ފުދޭނެއެވެ. އެކަމާ ލަދުގަންނާނީވެސް ދިލްނަޝީނެވެ. ބޭބެއާ ވާހަކަ ދައްކާކަށް ރިދާއެއް ނޫޅޭނެއެވެ. އޭނާވާހަކަ ދައްކާނީ ، ދިލްނަޝީނާއެވެ. ހަމްޒާ އަންނަ ވާހަކަ ބުނީމަ ، ދިލްނަޝީނަށް ޙައިރާންކަމެއް ނުލިބޭތޯ ރިދާ ސުއާލު ކުރިއެވެ.
ހަމްޒާ އަންނާނީ ކޮންއިރަކުންކަމެއް ދިލްނަޝީނަކަށް ނޭނގެއެވެ. އޭނާ އެއިނީ ލިބުނު ޙައިރާންކަމުގައި ލަދުގެންފައެވެ. ހަމްޒާވެސް ، އޭނާ އެނބުރި ކަރާޗީއަށް އަންނަ ވާހަކަ ، ދިލްނަޝީން ގާތަކު ނުބުނެއެވެ. ހަމްޒާ އައުމުން ، ދިލްނަޝީން އުފަލެއް ނުވޭތޯ ރިދާ ސުއާލު ކުރިއެވެ. އެއީ ، ދިލްނަޝީން އުފާވާކަމަކަށް ވާނީ ކިހިނެއް ހެއްޔެވެ ؟ އެކަމާ އުފާވާކަށް ، ދިލްނަޝީނަކަށް އަދިއެއް ނޭނގެއެވެ. އެއީ ، މީހަކު އުފާވާވަރުގެ ކަމެއްނޫނެވެ. ދެތިން ދުވަހެއްގެ ތެރޭގައި ، އަނެއްކާވެސް ހަމްޒާ ބޭރަށް ނައްޓައިލާނެއެވެ.
ހަމްޒާ އައުމުން ދިލްނަޝީންގެ ހިތުގައި އުފާވެރިކަމެއް ނުއުފެދެއެވެ. އެހެނަސް ، ދެތިން ދުވަހެއްގެ ތެރޭގައި ހަމްޒާ އެނބުރި ދާވާހަކަ ބުނީމަ ، ދިލްނަޝީނުގެ މޫނުމައްޗަށް ވެރިވެގެންދިޔަ މާޔޫސްކަން އެއީ އުފަލާ ގުޅިފައިވާ އެއްޗެއް ނޫން ހެއްޔެވެ ؟ އެހާ ކުއްލި މާޔޫސްކަމެއް ހިތަށް އިޙްސާސްވާނީ ، އުފަލެއްލިބި ، އެއުފާ ބީވެގެންދާ ހިނދުއެވެ.
ދިލްނަޝީންގެ ހިތްތަޅުވައިލަންވެގެން ، ބޭބެ އެކޮށްލީ ސަމާސާއެއްކަމަށް ރިދާ ބުންޏެވެ. ދިލްނަޝީން ، ހަމްޒާދެކެ ލޯބިވަނީ ކިހާވަރަކަށްކަން ބަލައިލަން ، ހަމްޒާ ސަމާސާ ދޮގެއް ހަދައިލީއެވެ. ދިލްނަޝީނަށް ވީ ކިހިނެއްކަމެއް ނޭނގެއެވެ. އޭނާ ގެޔަށް ދާން ބޭނުންވިއެވެ. އެއީ ފަހަރިމެންގޭގައި އޮތް ޙަފުލާއަކަށް ދާން ޖެހިފައި އޮތީމައެވެ. ހަމްޒާވެސް އަދި ރިދާވެސް އެއްފަހަރާ އެކަމަށް އިންކާރު ކުރިއެވެ. އޭނާގެ ބޭބެއެއައީ އިނގިރޭސިވިލާތުންނެވެ. އެހާ ދުވަސްކޮށްފައި އައުމުންވެސް ، ދިލްނަޝީނަށް މުހިންމީ އެ ޙަފުލާތޯ ނުވަތަ ހަމްޒާތޯ ، ރިދާ ސުއާލުކުރިއެވެ. ބޭބެއަށް ޚާއްޞަކޮށްލަން ދިލްނަޝީނަށް ، ވަގުތުކޮޅެއް ނުހޯދެންވީ ސަބަބެއް ރިދާއަކަށް ނުވިސްނުނެވެ. ރިދާ ، އޭނާގެ ގޮތް ދުލެއް ނުކުރިއެވެ. އެގެޔަށްގޮސް ، ކައިބޮއެ ހަދައިގެން އިރުކޮޅެއްކޮށްލާފައި ، ދިލްނަޝީން ގެޔަށްދާނީކަމަށް ރިދާ ބުންޏެވެ. އެހެންނަމަވެސް ، މިއަދު އެއީ ދިލްނަޝީނަށް ކުރެވެންއޮތް ކަމެއްނޫނެވެ. މަންމަވެސް އަދި ފަހަރިވެސް އެކަމާ ރުޅިއަންނާނެއެވެ. ކާރުދުއްވަން އިނީ ހަމްޒާއެވެ. ކާރުހުއްޓޭނީ ހަމްޒާ ހުއްޓިއްޔާއެވެ. އެމީހުން ދާނީ ހަމްޒާގެ ގެޔަށްކަމުގައި ، ރިދާވެސް އަދި ހަމްޒާވެސް ނިންމިއެވެ.
ގެޔަށް އައިސް ، ހަމްޒާއާއި ދިލްނަޝީން ، ސިޓިންގރޫމަށް ދޫކޮށްލާފައިރިދާ ދިޔައީ ، ދިލްނަޝީނަށް ހެދުމެއްބަލައި ކޮޓަރިޔަށެވެ. ހަމްޒާ އައިސް ދިލްނަޝީނާ ރަނގަޅަށް ސަމާސާ ކޮށްނުލެވިގެން އުޅެނިކޮށް ، ހެދުންތަކެއް ހިފައިގެން ރިދާ އަތުވެއްޖެއެވެ. އެތަނުން ދިލްނަޝީން ގަޔާވާ ހެދުމެއް ނެގުމަށް ރިދާ ބުންޏެވެ. އެހާ ގިނަ ހެދުންތަކެއްގެ ތެރެއިން ވަކި ހެދުމެއް ނެގުމަކީ ދިލްނަޝީނަށް އުނދަގޫ ކަމަކަށް ވިއެވެ. އޭނާ ގެންގުޅެނީ ދެތިން ހަތަރު ހެދުމެވެ. ރިދާއަށް އެންމެ ރަނގަޅުހެންހީވާ ހެދުމެއް ނަގައިދިނުމަށް ދިލްނަޝީން އެދުނެވެ. ދިލްނަޝީނަށް ހެދުން ދީފައި ރިދާ އަނެއްކާވެސް ދިޔައީ ، އެއްޗެހި ބަދަލުކުރާށޭ ކިޔާފައި އެނބުރި ކޮޓަރިޔަށެވެ. ރިދާ މަސައްކަތް ކުރަމުން އެގެންދަނީ ، ހަމްޒާ އާއި ދިލްނަޝީނަށް އަމިއްލަ ވަގުތުކޮޅެއް ދެވޭތޯއެވެ. ހަމްޒާއާއި ދިލްނަޝީންގެ މެދުގައި އެއްވެސް ގުޅުމެއް އޮތްކަމެއް ، މަންމައާއި ބައްޕަޔަކަށް އަދި ނޭނގޭނެއެވެ. އެކަން އެނގެނީ ހަމައެކަނި ރިދާ އަށެވެ. މަންމައާއި ބައްޕަ ގެޔަކު ނޫޅެއެވެ. އެދެމީހުންނަށް މިނިވަންކަމާއެކު ވަގުތުކޮޅެއް ލިބޭނީ އެކަހަލަ ހަނި ފުރުސަތަކުންނެވެ.
" އަޞްލުވެސް ، އަހަރެން އައިމަ އުފަލެއް ނުވޭ ހެއްޔެވެ ؟ " ހަމްޒާ ސުއާލު ކުރިއެވެ.
ދިލްނަޝީނު ، ވަކި އެއްޗެކޭ ނުބުނެއެވެ. އެހެނަސް ، ދިލްނަޝީންގެ ލޮލުން ފާޅުވަމުންއެދާ ޖަޒުބާތީ އަސަރުތަކުން ، ހަމްޒާއަށް އޭނާގެ ސުއާލުގެ ޖަވާބު ލިބުނެވެ. ފުރުސަތުގެ ބޭނުން ހިފައި ، ހަމްޒާއާ ގާތަށް ދިލްނަޝީން ދަމައިލިއެވެ. ދިލްނަޝީންގެ ނޭވާގެ އަސަރު ފޯރާ ހިސާބަށެވެ. ދިލްނަޝީން ޖަހައިގެންހުރި މީރުވަސްދުވާ ސެންޓްގެ މީރުކަން ޙަމްޒާއަށް އިޙްސާސްކޮށްލެވުނެވެ. އެއީ ޖަރުމަނަށް ކުރިދަތުރެއްގައި ، ސެންޓް ފިހާރަޔަކަށް ވަދެ ، ހަމްޒާއަށް މީރުވަސް ދުވައިގެން ، ކޮއްކޮއާއި ދިލްނަޝީނަށް ގެނެސްދިން ސެންޓް ފުޅިއެއްގެ ވަހެވެ. ދުވާ މީރުވަހުން ، ސިކުނޑިޔަށް އަސަރުކޮށް ، ދެލޯމަރައިލެވޭވަރު ވެއެވެ. އެދެމީހުންނަށް ބައްދަލުވެލަން ލިބޭ އެފަދަ ހަނި ފުރުސަތުގައި ، ވާހަކަ ދައްކަނީ ހަމައެކަނި ހަމްޒާއެވެ. ދިލްނަޝީނަށް އެއްވެސް އެއްޗެކޭ ބުނާކަށް ނުކެރެއެވެ. ދިލްނަޝީންގެ ހިތުގައި ހުންނަ ވާހަކަތައް ހަމްޒާ ކިޔަން ޖެހެނީ ދިލްނަޝީންގެ ލޮލުންނެވެ. އިތުރަށް އެއްޗެއް އެނގެނީ ، ހަމްޒާގެ ލޯބީގެ ވާހަކަތަކުން ، ލަދުގަނެގެން ލަދުގަހެއްގެ ފަތްތައް ފަދައިން ، ދިލްނަޝީން މޯޅިވެ އޮޅިގެންއެދާ ލޯބި ޙަރަކާތުންނެވެ.
ދިލްނަޝީނަކީ ވާހަކަ ނުދައްކާ ކުއްޖެއްނޫނެވެ. ރިދާއާ ޖެހިއްޖިއްޔާ އަނގަތަޅާވަރުން ހީވާނީ އެހެންފަދަ ކަމެއް ހެންނެވެ. އެހެނަސް ، އެގޭގެ އެހެން އެއްވެސް މީހަކާ ދިލްނަޝީން ވާހަކައެއް ނުދައްކާނެއެވެ. އެއީ އޭނާގެ ފެންވަރު ނޫންކަން އެނގެނީ ކަމަށް ވެދާނެއެވެ. ހަމްޒާގެ ބައްޕައާއި މަންމަވެސް ، ދިލްނަޝީނަށް ވަރަށް ހިތް ހެވެވެ. ރިދާގެ މަންމަ ، ކުލްސޫމް ވަކިންބޮޑަށް ދިލްނަޝީނަށް ހެޔޮކޮށް ހިތައެވެ. ހީސަމާސާކޮށް ހަދައެވެ. އެއީ ، ރިދާގެ އެންމެ ގާތް ރަޙުމަތްތެރިޔާކަމަށްވާތީ ކަމަށްވެސް ވެދާނެއެވެ. އެމީހުންގެ މުއްސަނދިކަމުގެ ތެރެއިންލާފައި ، ދިލްނަޝީނަށް ވަރަށް ހަދިޔާވެސް ލިބެއެވެ. އެކަމަކު ، އޭގެތެރެއިން ގިނަވާނީ ، ކުލްސޫމްގެ ނަމުގައި ހަމްޒާދޭ ހަދިޔާއެވެ. ދިލްނަޝީންގެ މަންމަޔަށް އޮޅުވާލަން ވެގެންނެވެ. ހަމްޒާ ބޭރަށްގޮސް އަންނައިރުވެސް ، ރިދާ ކޮއްކޮއަށް ގެންނަ ކޮންމެ ހަދިޔާއަކަށް ، ދިލްނަޝީނަށްވެސް ހަދިޔާއެއް ގެނެސް ދެއެވެ. އެހުރިހާކަމެއްވެސް އެނގެނީ ހަމައެކަނި ރިދާއަށެވެ. އެހެން އެއްވެސް މީހަކަށް އެއިންކަމެއްގެ ހިލަމެއްވެސް ނުވެއެވެ. ހަމްޒާވެސް ، އޭނާގެ މައިންބަފައިންގާތު ، ދިލްނަޝީންގެ ވާހަކަ ނުބުނެ މަޑުކޮށްގެން އެހުންނަނީ ، ދިލްނަޝީން ކިޔަވައި ނިމޭނެ ދުވަހަކަށެވެ. ކުރުނަމަވެސް ، އެ ދިގު އިންތިޒާރަށް ދެމީހުންވެސް އެތިބެނީ ކެތްމަދުވެފައެވެ.
(ނުނިމޭ)
ވަރަށް ރީތިވާނެހެންހީވޭ،
ތިބާ ތިކުރާ މަސައްކަތުގަ ﷲތަބާރަކަ ވަތަޢާލާ ބަރަކާތް ލައްވާށިއެވެ.
ވަރަށް ރީތި ޝުކުރަން
Alhugandu varah ufaavey tharujama vaahakathah 😊kiyaalan libeythee..shukran
މިވެސް ވަރަށް ރީތި ހިތްގައިމު ވާހަކައަކަށް ވާނެ ކަމާއި މެދަކު ޝައްކެތް ނުކުރަމެވެ. ފާރޫގުގެ ކޮންމެ ވާހަކައަކީވެސް ހިތްގައިމު ޗާލު ވާހަކަ ތަކެވެ. އަދި ވަކިން ޚާއްޞަ ކޮށް މިކަހަލަ ތަރުޖަމާ ތަކަކީ އަހަރުމެން ދިވެހިންގެ ހިތުގެ ވިންދާވެސް ގުޅިފައި ހުންނަ ވާހަކަ ތަކެވެ. މާތްﷲ ފާރޫގުގެ ތިޔަ ޢިލްމީ ކެރިއާގަ ބަރަކާތް ލައްވާ އުމުރު ދިގު ކުރައްވާށިއެވެ. އާމީން... ❤️👋👋