ފަލްސަފާ (86)

( 6 މެއި 2024 ގައި ޝާއިޢުކުރި ބަޔާގުޅޭ )

މުރުތަޟާ ގެޔަށްއައި މަގުމަތީ ، އަރުސަލާންގެ ޚަބަރުބަލައިލުމަށްޓަކައި ތަހުނިޔާމެންގެ ގެޔަށް ވަނެވެ. މަންމައާއި ޠާހިރާ ، ލާހޯރަށް ދިޔަފަހުން ، އެމީހުން އޮފީހަށްދަނީ ، އަރުސަލާނާއި އައިމަލް އެގޭގައި ބައިތިއްބާފައެވެ. އޭނާއަށް ފެނުނީ ، އަރުސަލާން ރޯންއިންތަނެވެ. އޭނާގެ ފަޔަށް ތަދުވާތީއެވެ. އަރުސަލާންއަށް ހިތްވަރު ދެމުން ، ތަހުނިޔާ އަދިވެސް ގެޔަށް ނާންނަނީތޯ މުރުތަޟާ ސުއާލު ކުރިއެވެ. ސާޖިދާއަށް ބުނަންޖެހުނީ ، އަރުސަލާންގެ ފަޔަށް ތަދުވިވާހަކަ ތަހުނިޔާއަށް ފޯނުކޮށްފައި ބުނިކަމަށެވެ. އެކަމަކު ، އަދިވެސް ތަހުނިޔާ ގެޔަށް ނާންނަ ކަމަށެވެ. ތަހުނިޔާގާތު އެވާހަކަ ބުނިތާ މިހާރު ދެގަޑިއިރެއްހާއިރު ވެއްޖެއެވެ.

މުރުތަޟާ ވަގުތުން ، ތަހުނިޔާއަށް ފޯނުކުރިއެވެ. އެކަމަކު ނެޓްވޯކެއް ނުލިބޭތީ ގުޅޭގޮތެއް ނުވިއެވެ. އަރުސަލާންއާއި އައިމަލް ގޮވައިގެން ގެޔަށް ދިއުމަށް މުރުތަޟާ ނިންމިއެވެ. ސާޖިދާއާއި ޢާޞިފް އެތައް ވަރަކަށް ކީމަވެސް ، މަޑުކުރާކަށް ބޭނުމެއް ނުވިއެވެ. އެކަން ވެގެންދިޔައީ ޢާޞިފަށާއި ސާޖިދާއަށް ލިބުނު ވަރަށްބޮޑު ކަންބޮޑުވުމަކަށެވެ. ތަހުނިޔާ ނެތިސް ދެކުދިން ގޮވައިގެން މުރުތަޟާ އެދަނީ ، ތަހުނިޔާ ލަސްވެގެން ، އެކަމާ ހިތްހަމަ ނުޖެހިގެންކަން ސާޖިދާއަށް އެނގުނެވެ.

އިޙްސާނާއި ނޫރުދިޔައީ ރެސްޓޯރެންޓަކަށެވެ. އެތަނުގެ ބޭރުގައި ތައްޔާރުކޮށްފައިވާ ބޮޑު ބަގީޗާއެއްގައި އެދެމީހުން ވާހަކަދައްކަން ތިއްބެވެ. އިޙްސާން ، އޭނާގެ މާޒީ ނޫރުއަށް ސާފުކޮށްދެމުން ގެންދިޔައެވެ. އޭނާގެ ކުރީގެ އަންހެނުން ، ޒަރުނައިން ވަރިކުރިއިރު ، އެދެމީހުންނަށް ލިބުނު އަންހެންދަރިފުޅު ރަމްޝާހުރީ ، ޒަރުނައިން ގާތުގައެވެ. ރަމްޝާ ހުންނާނީ ޒަރުނައިން ގާތުގައިކަމަށް އެދެމީހުން ވަރިވުމަށްފަހު ، އޮތީ ދެމީހުންވެސް އެއްބަސްވެފައެވެ. އިޙްސާނަކީ ، ރަށުގައި މަޑުކުރެވޭ މީހެއްނޫނެވެ. އަބަދުވެސް ، ވިޔަފާރި ދަތުރުތަކުގައި އުޅެންޖެހިފައި އޮންނަނީ ރަށުން ބޭރުގައެވެ. ރަމްޝާ އޭނާގެ މަންމަގާތުގައި ބަހައްޓަންޖެހުނީ ، އިޙްސާނަށް އޮތް އެ މަޖުބޫރުގެ ސަބަބުންނެވެ. އެކަމާބެހޭގޮތުން އެދެމީހުންގެ މެދުގައި އޮތީ އެހެންކަމަކަށްވެސް އެއްބަސް ވެފައެވެ. އެއީ ، ޒަރުނައިން އެހެން ކައިވެންޏެއް ކުރާކަމަށްވަންޏާ ، ރަމްޝާ އައިސް ހުންނަންވާނީ އިޙްސާންގާތުގައި ކަމަށެވެ. އެވަގުތު މިހާރު އެއޮތީ އައިއްސައެވެ. ރަމްޝާ ދެން ހުންނާނީ ނޫރުއާއި އިޙްސާނާ އެކީގައެވެ. އެއީ ، ޒަރުނައިން އެހެން ކައިވެންޏެއްކުރަން ބޭނުންވާތީއެވެ.

ނޫރު އިނީ އެއްވެސް އެއްޗެކޭ ނުބުނެ ، އިޙްސާން ދައްކާ ވާހަކަ އަޑުއަހާށެވެ. އެހެނަސް ، ރަމްޝާ ހުންނާނީ އެމީހުންގެ ގާތުގައިކަމަށް އިޙްސާން ބުނުމުން ، ނޫރު އަކަށް ނީނދެވުނެވެ. އެކަމަށް އެއްބަސްވާން ނޫރުއަށް އުނދަގޫ ވިއެވެ. ރަމްޝާއަކީ ، ގާތްގަނޑަކަށް ނޫރުއާ އެއްފުރައިގެ އަންހެންކުއްޖެކެވެ. އިޙްސާން އަބަދުވެސް އުޅޭނީ ރަށުން ބޭރުގައެވެ. ރަމްޝާ ބެލެހެއްޓުމުގެ ޒިންމާ އޮންނާނީ ނޫރުއަށްކަމުގައި ، އިޙްސާން ހާމަކުރިއެވެ. ރަމްޝާ ގިނައިރު އުޅޭނީވެސް ނޫރުއާ އެކީގައެވެ.

ނޫރުއަކަށް ، ރަމްޝާގެ ޒިންމާއެއް ނުއުފުއްލޭނެއެވެ. އޭނާ އުޅެންޖެހޭނީ އޮފީހުގެ މަސައްކަތުގައި އަވަދިނެތިއެވެ. ގެޔަށް އާދެވޭނީވެސް ވަރަށް ލަސްވާ ފަހުންނެވެ. އެއީ މައްސަލައެއް ނޫންކަމަށާއި ރަމްޝާއަކީ ، މިހާރު ބޮޑުވެފައިހުރި ކުއްޖެއްކަމަށް އިޙްސާން ބުންޏެވެ. އެހެނަސް ، އެޢުމުރަކީ ، ކުދިންގެ މައްސަލަތައް ގިނަވާނެ ޢުމުރެކެވެ. ގެންގުޅެ ބަލަހައްޓަން ދަތިވާނެ ޢުމުރެކެވެ. މަންމައެއްގެ ޙައިޞިއްޔަތުން ، ރަމްޝާގެ ހުރިހާކަމެއް ބަލަހައްޓަންޖެހޭނީ ނޫރުއަށެވެ. ނޫރުއަކީ ، ރަމްޝާގެ ދޮންނަމަވެސް ، މަންމަކަން ޤަބޫލުކުރުމަށް އިޙްސާން އެދުނެވެ. ޙަޤީޤަތަކީ އެއީއެވެ. އެއީ މައްސަލައެއް އޮންނަންޖެހޭނެކަމެއް ކަމަކަށް އިޙްސާނަކަށް ނުފެނެއެވެ. އޭނާ އެމެރިކާއަށް ދިޔައިމަ ، ނޫރު އެކަނިވެރިވާނެއެވެ. އެ އެކަނިވެރިކަން ފިލުވުމަށް ދަރިޔަކު ލިބުނީތީ އުފާކުރުން މާ އަވްލާކަމަށް އިޙްސާން ބުނަމުން ގެންދިޔައެވެ. އެކަމަށް ، ނޫރު ޝުކުރުކުރަން ޖެހޭނެއެވެ.

ކާ އެއްޗެތި ގެނައުމާއެކު އިޙްސާން ކާންފެށްޓިއެވެ. އަދި ، ނޫރުވެސް ކާންފެށުމަށް އިޝާރާތް ކުރިއެވެ. އެހެންނަމަވެސް ، އެވަގުތު އެއީ ނޫރުއަށް އެއްޗެއް ކެވޭކަހަލަ ވަގުތެއްނޫނެވެ. ދެއަތް ދެއަތަށް ބޮނޑިކުރަމުން ، ކާން ނުފެށިފައި ނޫރު އިނެވެ.

ތެޅެމުން ފޮޅެމުން ، ތަހުނިޔާ އައިސް ގެޔަށް ވަނެވެ. އަދި އަރުސަލާންއަށް ގޮވަމުން އޭނާގާތަށް ދިޔައެވެ. ތަހުނިޔާ ލަސްވި ސަބަބުވެސް މުރުތަޟާއަށް ސާފުކޮށްދެމުން ގެންދިޔައެވެ. ތަހުނިޔާ އައިސް ކޮޓަރިޔަށް ވަތްއިރު ، މުރުތަޟާ އިނީ ހިތްހަމަ ނުޖެހިފައިކަން އެނގެއެވެ. އެހެނަސް ، އިރުކޮޅަކުން އޭނާ ހަމަޖެހިލިއެވެ. އަދި ދެތިންދުވަހަށް ޗުއްޓީއެއް ނެގުމަށް ތަހުނިޔާގާތު ބުންޏެވެ. ދެކުދިން ބެލުމަކީ ، މަންމަޔަށް ދެވޭ ވަރަށްބޮޑު ތަކުލީފަކަށް ވާތީއެވެ.

ތަހުނިޔާގެ މަސައްކަތް ހުރިގޮތުން ޗުއްޓީއެއް ނެގޭކަށް ނެތެވެ. މުރުތަޟާއަކަށްވެސް ޗުއްޓީއެއް ނަގާކަށް ފުރުޞަތެއް ނެތެވެ. އެހެންނަމަވެސް ، ދެމީހުންވެސް މާދަމާ ތަންކޮޅެއް އަވަހަށް ގެޔަށް އައުމަށް ނިންމައި އެވާހަކަ ނިންމައިލިއެވެ. ދެމީހުންވެސް އާދެވެން އޮތް އެންމެ އަވަހަކަށް ވަކިވަކިން އަންނާނީއެވެ. ތަހުނިޔާ އައީ އެއްވެސް އެއްޗެއް ނުވެސްކައެވެ. އެހެންކަމުން ، ތަހުނިޔާއަށް ކާއެއްޗެއް އޯޑަރުކޮށްދިނުމަށްފަހު ، މުރުތަޟާ އަރުސަލާންގާތަށް ދިޔައެވެ.

އަމީން އިޙްސާންގެ ގޭތެރެ އެހާ އަމާނެއްނޫނެވެ. ރަމްޝާއާއި އިޙްސާނާ ދެބަފައިންގެ މެދުގައި ފިނިބަހުސެއް ހިނގަމުން ދިޔައެވެ. ރަމްޝާއަށް ޤަބޫލުކުރެވޭގޮތުގައި ، މަންމައާއި ބައްޕަ ވަކިވީ ، ބައްޕަގެ ކުށުންނެވެ. އޭނާއަށާއި މަންޔަށް އެއްވެސް ވަރަކަށް ބައްޕަޔަކަށް ވަގުތެއް ނުދެވެއެވެ. ރަމްޝާއަކީވެސް ކުޑަކުއްޖެއްނޫނެވެ. ދިރިއުޅުމުގެ އެކި ޙާލަތްތައް ވަކިކޮށް ދެނެގަނެވޭވަރަށް އޭނާވެސް އެހުރީ ބޮޑުވެފައެވެ. މަންމައާއި ބައްޕަ ވަކިވުމުގެ ސަބަބުތައް ފެށިގެން ، ކުނިޖެހެމުން ފިޔަވަޅުތައް ކުރިޔަށް އެޅެމުން ދިޔައީ އޭނާގެ ކުރިމަތީގައެވެ. އޭނާގެ މަންމަޔާއި އޭނާއަކީ ، އެކަމުގެ ސަބަބުކަމަށް އިޙްސާން ބުނުމަކީ ، ރަމްޝާއަށް ޤަބޫލުކުރެވޭނެކަމެއް ނޫނެވެ.

އިޙްސާން އޭނާގެ ދަރިފުޅާ އެކަމާބެހޭގޮތުން ޖަދަލުކުރާކަށް ގަސްތެއް ނުކުރިއެވެ. ރަމްޝާއަށް ހީވާގޮތް އެއީ ކޮންމެގޮތެއްކަމަށްވިޔަސް ، އެކަން އޭނާ ޤަބޫލުކުރިއެވެ. އެހެންނަމަވެސް ، ޒަރުނައިންއާއި އިޙްސާންގެ ދިރިއުޅުމުގައި ދިމާވި ހުރިހާކަމެއްގެ ސަބަބަކީ އިޙްސާންކަމަށް ، އޭނާގެ މަންމަ ރަމްޝާއަށް ވިސްނައިދީ ، ސިކުނޑިއާ ކުޅެފައިވާކަން ރަމްޝާއަށް ހަނދާން ކޮށްދިނެވެ. އެކަމަކު ، މިހާރު ރަމްޝާ އެހުރީ އޭނާގެ ގާތުގައެވެ. ބައްޕަ އޭނާދެކެ ލޯބިވަނީ ކިހާވަރަކަށްކަން ، މަޑުމަޑުން ރަމްޝާއަށް ވިސްނައިގަނެވޭނެކަމަށް އިޙްސާން ނިންމިއެވެ. އެކަމަކު ، އެއްކަމެއް އިޙްސާން ހަނދާންކޮށްދިނެވެ. އެއީ ، ޒަރުނައިންގެ ކައިވެންޏަށްފަހު ، ރަމްޝާއަށް ޒަރުނައިންގާތު ނުހުރެވޭނެކަމެވެ. ބައްދަލު ކޮށް ހެދިދާނެއެވެ. މަންމަގާތުގައި ހުންނާކަށް ނުދެވޭނެއެވެ.

ރަމްޝާއަށް އެކަން ޤަބޫލެއް ނުކުރެވުނެވެ. ނޫރު ކަހަލަ ބޭނުމެއް ނެތް އަންހެނަކަށް ، މަންމައާ އެއްގޮތަށް އޭނާއަށް އަޅައި ނުލެވޭނެކަމަށް ރަމްޝާ ބުންޏެވެ. ރަމްޝާއަށް ޤަބޫލު ކުރެވެނީ އެއީ ބައްޕަ ހަދާ ގޯހެއްގެ ގޮތުގައެވެ. އިޙްސާން އޭނާގެ ދަރިފުޅުގެ ގާތަށް ޖެހިލައި ދެކޮނޑުގައި ހިފަހައްޓާލައިގެންހުރެ ، އެއީ ގޯހެއް ނޫންކަމަށާއި ، ޙަޤީޤަތްކަމަށާއި އެކަން ހިތުގެ އަޑިން ޤަބޫލުކުރުމަށް ރަމްޝާގެ ކިބައިން އިޙްސާން އެދުނެވެ. އެދެބަފައިން ދެއްކި ހުރިހާ ވާހަކައެއް އަޑުއިވޭ ހިސާބުގައި ، އެމީހުންނަށް ނުފެންނަ ގޮތަށް ހުއްޓިލައިގެން ނޫރު ހުށްޓެވެ. އެވާހަކަތައް އިތުރަށް އަޑުނާހަން ވެގެން ނޫރު އެތަނުން ދުރަށް ދިޔައެވެ. ރަމްޝާވެސް އައިސްފައިހުރި ރުޅީގައި ބައްޕަގެ އަތް އޭނާގެ ގައިން ފޮޅުވައިލުމަށްފަހު ، އޭނާއަށް ޚާއްޞަކުރެވިފައިހުރި ކޮޓަރިޔާ ދިމާއަށް ހިނގައިގަތެވެ.

ނޫރު ، ކޮޓަރިޔަށް ވަތްގޮތަށް ބޭސްގުޅައެއް ކައިލައިގެން އެނދުމަތީ އިށީނދެއިންދާ އިޙްސާން ވަނެވެ. ނޫރުގާތު އިޙްސާން އިށީނދެލުމާއެކު ، ނޫރު އެތަނުން ތެދުވެގެން ދުރަށްގޮސް ކޮޅަށް ހުއްޓި ހުށްޓެވެ. އޭނާގެ ފްލައިޓް މާދަމާ އޮތްކަން ނޫރުއަށް ހަނދާން ކޮށްލަދީ ، ނޫރުއާއެކު ވަގުތުހޭދަކުރުމަށް ބޭނުންވާކަމުގައި އިޙްސާން ބުންޏެވެ. އަދި ނޫރުއާ ގާތަށް ޖެހިލިއެވެ. އެހިނދު ނޫރުވެސް އަނެއްފަރާތަށް އެނބުރި އިޙްސާނަށް ފުރަގަސް ދިނެވެ. އިރުކޮޅަކު ހުރުމަށްފަހު ، ނޫރު ބޭނުންވާގޮތެކޭ ބުނެ ، ނިދަން އޮށޯތުމަށްޓަކައި އިޙްސާން ، އެނދުގައި ޖައްސައިލިއެވެ.

ނޫރުގެ ހިތުގައި އަޅަމުންދާ ވޭނަށް ކެތްނުވެގެން ، އޭނާއަށް ރޯންފެށުނެވެ. ގިސްލަ ގިސްލާފައި ރޯން އިރުކޮޅަކު ހުރުމަށްފަހު ، ނޫރުވެސް ނިދުމަށްޓަކައި އެތާ ކޮޓަރީގެ އެއްކަނެއްގައިހުރި އެނދެއްގައި ޖައްސައިލިއެވެ. ނިދާ އެނދަށް ގޮސް އިޙްސާންގާތު އޮށޯންނާކަށް ނޫރުގެ ހިތް ހުއްދައެއް ނުކުރިއެވެ.

ހެނދުނުގެ ނާސްތާގެ ގަޑީގައިވެސް ނޫރު އިޚްތިޔާރުކުރީ ، ވަކިން ސައިބުމަށެވެ. ރަމްޝާވެސް އިރުކޮޅަކުން އެތަނަށް ނުކުތުމާއެކު އެތާނގައި އިށީނުމަށް އިޙްސާން އެދުނެވެ. ރަމްޝާގާތު ވާހަކައެއްބުނަން ވެފައި އެބައޮތޭބުނެ ، ރަމްޝާ އެންމެ ގަޔާވާ ކާރަށް އޯޑަރުކުރެވިފައިވާކަމަށް އިޙްސާން ބުންޏެވެ. ގޭގައިހުރި ކާރުތަކުން ، ކޮންމެ ކާރެއްވެސް ، އާކާރު ގެނެވެންދެން ރަމްޝާއަށް ބޭނުން ކުރެވިދާނެއެވެ. އެހެނަސް ، ރަމްޝާއާއެކީ އަބަދުވެސް ޑްރައިވަރު ހުންނަންވާނެއެވެ. ރަމްޝާއަކަށް ޑްރައިވަރެއް ބޭނުމެއްނޫނެވެ. އެހެންނަމަވެސް ، ޑްރައިވަރަކާނުލައި ، ރަމްޝާ އެކަނި ކާރުދުއްވުން އިޙްސާން ހުއްދައެއް ނުކުރިއެވެ. އެއީ ރަމްޝާ ބޭނުންވެގެން ނުވަތަ ބޭނުން ނުވެގެން ކުރާކަމެއް ނޫނެވެ. އެއީ ރަމްސާގެ ރައްކާތެރިކަމާއި ސަލާމަތަށްޓަކައި ކުރާ ކަމެކެވެ. އެއީ ނޫރުލްޢައިނުވެސް ބޭނުންވާނެ ގޮތްކަމަށްބުނެ ، ނޫރުއާ ދިމާއަށް ބަލައިލިއެވެ.

" ބައްޕަ ބުނެގެން އަހަރެން މިހުރީ ބައްޕާގާތަށް އައިހެވެ. އެކަމަކު ، އަހަރެން ކުރާނެކަންކަމާއި ނުކުރާނެކަންކަން އެހެންމީހަކު އަހަރެންނަށް ކިޔައިދީގެން ނުވާނެއެވެ. " ނޫރުއާ ދިމާއަށް ބަލަހައްޓައިގެންހުރެ ރަމްޝާ ބުންޏެވެ.

ނޫރުއަށް ވަމުންދިޔަ އުނދަގޫތަކަށް އިތުރަށް ކެތްނުކުރެވިގެން ، އޮފީހަށްދާން ލަސްވެއޭ ބުނެ އެތަނުން ތެދުވެގެން ހިނގައިގަތެވެ. ނޫރު ދިއުމާއެކު ، ރަމްޝާގެ ކިޔެވުން ކުރިޔަށްދަނީ ކިހިނެއްތޯއާއި ، މުސްތަޤްބަލްގައި އޭނާގެ ވިޔަފާރި ބެލެހެއްޓުމުގެ ޒިންމާއަކީ ރަމްޝާއަށް ކުރަންޖެހޭނެކަމެއްކަން އިޙްސާން ހަނދާން ކޮށްދިނެވެ.

ރަމްޝާ ހަދަމުން ގެންދަނީ ބިޒިނަސް އެވެ. އޭނާ ކުރިޔަށްދާންވީ މަގު ، ރަމްޝާއަށް ވަރަށް ސާފެވެ. ރަމްޝާގެ ވިސްނުންހުރިގޮތް އެނގުމުން ، އެކަމާ އިޙްސާން ވަރަށް އުފާކުރިއެވެ. އެއީ ، އޭނާވެސް އެންމެ ބޭނުންވާގޮތްކަމަށް ވާތީއެވެ.

ނޫރު ، އޭނާގެ އަމިއްލަ ހިތަށް ކުޑަނަމަވެސް ތަސައްލީއެއް ލިބޭތޯ ބައްޕަމެންގެޔަށް ދިޔައިރު ، ގޭގެ މައިދޮރު ހުރީ ތަޅުލާފައެވެ. އޭނާގާތު ނުބުނެ ، ގޭއެންމެން އެދިޔައީ ކޮންތާކަށް ހެއްޔެވެ ؟ ކުޑައިރުކޮޅަކު ވިސްނައިލަން ހުރުމަށްފަހު ، ފޯނު ނަގައި ރައިދާއާ ގުޅިއެވެ. އެމީހުން އޭރު އެއުޅެނީ ބައްޕަގެ ޓެސްޓްތަކެއް ހެދުމަށް ގޮސް ، ހޮސްޕިޓަލުގައެވެ. އެއީ އާދަކޮށް ތިންމަހުން އެއްފަހަރު ހަދާ ޓެސްޓެކެވެ. ކަންބޮޑުވާންވީ އެއްވެސްކަމެއް ނެތްކަމަށާއި އެމީހުންނަށް ގެޔަށް ދެވޭނެއިރެއް ނޭނގޭކަމަށް ރައިދާ ބުންޏެވެ. ރައިދާމެން އަންނަހާ އިރެއްވަންދެން ގޭދޮރުމަތީ ނޫރުއަކަށް ނުހުރެވޭނެއެވެ. އެހެންކަމުން ، ގެޔަށް އައިސް އޭނާއާ ގުޅާލަދިނުމަށް އެދުނެވެ.

ޖެހިގެން އެހުރީ މުރުތަޟާމެންގެ ގެޔެވެ. އެގެޔާދިމާލަށް ބަލައިލައި ، ޑްރައިވަރުގާތު މަޑުކުރަން ބުނުމަށްފަހު ، އެގެޔާ ދިމާލަށް މިސްރާބު ޖެހިއެވެ. އޭރު ، ގޭގައި އުޅެނީ މުރުތަޟާ އެކަންޏެވެ. ކުރީރޭ ތަހުނިޔާއާ ދެމީހުން އެއްބަސްވިގޮތަށް ، މުރުތަޟާ އެއުޅެނީ ، ތަންކޮޅެއްކުރިން ގެޔަށް އައިހެވެ. ތަހުނިޔާއަކަށް އަދި ނާދެވެއެވެ. މުރުތަޟާ އުޅެނީ ، އަރުސަލާނަށް ކާއެއްޗެއް ހަދައިގެން އޭނާއަށް ކާންދޭށެވެ. އައިމަލްއާ ސަމާސާކޮށްލަމުން ، މިޕަރީ ކާނީ ކޮންއެއްޗެއްތޯ މުރުތަޟާ އަހައިލިއެވެ. އެވަގުތު ފަހަތުން އެއިވުނީ ، ބޯނީ ސައިކަމަށާއި ލިބޭނެތޯ މީހަކު ބުނި އަޑެވެ. މުރުތަޟާ އެދިމާއަށް ބަލައިލިއިރު ، އެއީ ނޫރުއެވެ. މުރުތަޟާއަށް ލިބުނީ ޙައިރާންކަމެކެވެ. އެހާ ނުގަޑިއެއްގައި ، ނުމެޢީދަކު ނުމެރޯދަޔަކު ، ނޫރުލްޢައިނު އެގެޔަށް އަންނަންވީ ކޮންސަބަބަކާ ހުރެ ހެއްޔެވެ ؟ އަމްދުން ، ތަހުނިޔާއާއި މަންމަމެން ބޭރުގައި އުޅެނިކޮންނެވެ.

ސައިތަށްޓެއް ބޮއިލުމަށް އައިސް މޭޒުކައިރީ އިށީނުމަށް ނޫރުގެ ކިބައިން މުރުތަޟާ އެދުނެވެ. މޫނުމަތިން އުފާވެރިކަން ފާޅުވުމާއެކު ، ހެމުންހެމުން ނޫރުއައިސް ކާމޭޒުދޮށުގައި އިށީނދެލިއެވެ. މުރުތަޟާ ދިޔައީ ބަދިގެފަރާތަށް ސައިހަދާށެވެ. އައިމަލް އާ ސަމާސާ ކޮށްލައި ، އަރުސަލާންއާ ވާހަކަ ދައްކައިލުމަށްފަހު ، ނޫރުވެސް ބަދިގެފަރާތަށް ދިޔައެވެ. ނޫރު އެގޭތެރެއިން ކުއްލިޔަކަށް ފެނުމުން ، މުރުތަޟާއަށް ލިބުނީ ޙައިރާންކަމެއް ނުވަތަ އުފާކަމެއް ނޭނގޭކަމަށް ނޫރު ބުންޏެވެ.

މުރުތަޟާއަކީ ކުރިން ބަދިގެޔަށް ވަދެއުޅޭމީހެއް ނޫނެވެ. އެކަން ފާހަގަ ކުރެވިފައި އޮތްކަން ނޫރު އަންގައިލިއެވެ. މުރުތަޟާ މިހާރު އެހުރީ ވަރަށްބޮޑަށް ބަދަލުވެފައެވެ. ނޫރުއެހެން ބުނުމުން ، މުރުތަޟާގާތަށް ހިނިއައެވެ. އެއީ ހިނިއަންނަންވީކަމެއް ނޫންކަމަށް ނޫރު ބުންޏެވެ. އެކަމަށް އަޅައިނުލާ ސައިތަށި ހެދުމަށް މުރުތަޟާ އެނބުރިލިއެވެ. އަދި ، ބަދަލުވީ އޭނާ ނޫންކަމަށާއި ބަދަލުއައީ ނޫރުއަށް ކަމަށް މުރުތަޟާ ބުނެލިއެވެ. މުރުތަޟާ އެހުރީ ހަމަ ، ނޫރު އޭނާ ދޫކޮށްލާފައި ދިޔަ ހިސާބުގައެވެ. އެއްވެސް ބަދަލެއް ނާދެއެވެ. މިއީ ހަމަ އެއްކަލަ ، ތާކުންތާކު ނުޖެހޭ ވިސްނުންކޮށި ، ދުރަށް އުއްމީދު ނުކުރާ މުރުތަޟާކަމަށް އޭނާ ބުންޏެވެ. ފަހަތަށް ދޫކޮށްފައިދާ އެއްޗެއްގެ ފަހަތުން ދުވާނެކަމެއް ނެތެއްނޫންހޭ ބުނެ މުރުތަޟާ މަލާމާތް ކޮށްލިއެވެ. އެހެނަސް ، މުރުތަޟާ ދަށްކޮށްލުމަށްޓަކައި ، އެމްޑީއެއްގެ ޙައިޞިއްޔަތުން ، އޭނާއަށްކުރި ޖެއްސުމާއި އުނދަގުލުގެ މަތިން ، ހަނދާންކޮށްލަ ދިނެވެ.

" ތިވީ ކިހިނެއް ހެއްޔެވެ ؟ ލޮލުން ކަރުނައަންނަނީ ކީއްވެ ހެއްޔެވެ ؟ ހުރިހާ އުއްމީދެއް ފުރިހަމަވުމުނުންވެސް ، އެވަރުން ނުފުދިގެން ، ކުރިމަތިވާ ތަކުލީފަށް ކެތްނުކުރެވެނީ ކީއްވެ ހެއްޔެވެ ؟ " މުރުތަޟާ ސުއާލު ކުރިއެވެ.

ނޫރުގެ ލޮލުން ފައިބަމުން އައި ކަރުނަތައް ފުހެލައި އިސްއުފުލައިލިއެވެ. މުރުތަޟާގެ ސުއާލަށް ޖަވާބު ދިނުމަށްޓަކައެވެ. މުރުތަޟާ އެބުނީ ރަނގަޅު ވާހަކަ އެކެވެ. ނޫރުއަކީ ، މުއްސަނދި މަހުޖަނެއްގެ އަނތްބެކެވެ. ދުނިޔޭގެ އެއްވެސް ކަމަކާމެދު ވިސްނާކަށް ނުޖެހެއެވެ. ( ނުނިމޭ )