ފަލްސަފާ (83)

( 28 އެޕްރީލް 2024 ގައި ޝާއިޢުކުރި ބަޔާގުޅޭ )

މުރުތަޟާގެ ކުރީގެ ބޮސް ، ފާރޫޤުގެ ކުއްލި އެޕޮއިންޓްމަންޓަކަށް މުރުތަޟާ އެދުނެވެ. ބައްދަލުވުން ފެށީ މުރުތަޟާއެވެ. މުރުތަޟާ ބޭނުންވީ އޭނާގެ ވަޒީފާއިން އިސްތިޢުފާ ދިނުމަށެވެ. އެހާ ކުރު ނޯޓިސްއަކާއެކު ، ވަޒީފާއިން ވަކިވާން އެދެން ޖެހުނީތީ މުރުތަޟާ މަޢާފަށް އެދުނެވެ. ފާރޫޤުގެ ތަޖުރިބާއަށް ބަލާފައި މުރުތަޟާއަށް ލަފާދިނީ ، އެކަމާމެދު އިތުރަށް ވިސްނައިލުމަށެވެ. މުރުތަޟާގެ މަޤާމުގެ ގޮތުން ، މަސައްކަތުގައި ، މުރުތަޟާއަށް ގޮންޖެހުންތަކާ ކުރިމަތިވާނެކަން އޭނާއަށްވެސް އެނގެއެވެ. އެއީ ޢާންމު ކަމެކެވެ. އެހެނަސް ، މުރުތަޟާއަށް ޤަބޫލުކުރެވޭގގޮތުގައި ، އޭނާގެ މަސައްކަތުގެ އަގު ރަނގަޅަކަށް ވަޒަނެއް  ނުކުރެވެއެވެ. އެންމެފަހުން ، ކުންފުނިން ޙަވާލުކުރި ޕްރޮޖެކްޓްވެސް ،  ވަގުތަށް ނިންމުމަށްޓަކައި ، އަންހެނުންނާއި ދަރިފުޅާވެސް އަޅާނުލައި ، މުރުތަޟާވަނީ މަސައްކަތަށް ވަޤުތުދީފައެވެ. އެވަރުންވެސް ، އޭނާއާ ދިމާލަށް މީސްމީހުންގެ އިނގިލި ދިއްކުރެވޭކަމަށް ވަންޏާ އެއީ އިންސާފެއްނޫނެވެ. އެކަން ، އޭނާއަކަށް ތަޙައްމަލެއް ނުކުރެވޭނެއެވެ.

މިޒަމާނުގައި ، އިސްމަޤާމުތަކުގައި ތިބޭމީހުންނަށް ، ބޮހުންގެ ބާރުވަރަށް ބޮޑުވާނެކަމަށް ބުނެ ، ފާރޫޤު ނަސޭޙަތްދިންނަމަވެސް ، މުރުތަޟާއަށް ދިމާވެފައި އޮތްގޮތުން ، އެކަން އޭނާއަކަށް ޤަބޫލެއް ނުކުރެވުނެވެ. އޭނާއާމެދު އެކުރެވެނީ ޒާތީގޮތުން ، ބޭއިންސާފުން ކުރެވޭ އުނދަގުލެކެވެ.

މުރުތަޟާއަށް އެމައްސަލަ އެދިމާވަނީ ، ނޫރުލްޢައިނަކީ އިޙްސާންގެ އަންހެނުންނަށްވެފައި ، މޮޅެތިމީހުންނަކީ ، އެހެންމީހުންގެ އިޙްސާސްތައް ދެނެގަންނަން ފަސޭހަބަޔަކަށް ނުވާތީކަމަށް ފާރޫޤަށް ފެނުނެވެ. އެހެނަސް ، ނޫރުގެ ޙަޤީޤަތް އެންމެ ރަނގަޅަށް އެނގޭނީވެސް މުރުތަޟާއަށެވެ. އެކަން ، ފާރޫޤަށް ނޭނގި އޮވެދާނެއެވެ. ނޫރުލްޢައިނަކީ ، މެދުފަންތީގެ ޢާއިލާއަކަށް ނިސްބަތްވާ އަންހެނެކެވެ. ކުޑައިރުއްސުރެ ، މުރުތަޟާ ދަންނަ އަންހެނެކެވެ. އެއީ ، މުރުތަޟާއާ ދުރުތާ ތިމާގެ މީހެކެވެ. އެކަން ، ފާރޫޤަށް އެނގުމާއެކު ކުއްލި ސިހުމެއް އޭނާއަށް ލިބުނެވެ. އެވާހަކަ ، މީގެ ކުރިން މުރުތަޟާ އޭނާގާތު ބުނެފައެއް ނެތެވެ. ބުނަން ފުރުސަތު ނެތިފައި އެވާހަކަ ބުނަން މުރުތަޟާ ބޭނުން ނުވީއެވެ.

ވަޒީފާއިން ވަކިވުމަށް މުރުތަޟާ ނިންމި ނިންމުން ، ފާރޫޤަކަށް ޤަބޫލެއް ނުކުރެވުނެވެ. އެ ވިސްނުން ދޫކޮށްލުމަށް މުރުތަޟާއަށް ނަސޭޙަތް ދިނެވެ. އަމީން އިޙްސާނާއެކު ބައްދަލުވުމަށް ، އެރެޔަށް ދަޢުވަތު ލިބިފައި އޮތްކަމަށާއި ، މުރުތަޟާވެސް އެ ބައްދަލުވުމަށް އަމީން އިޙްސާންގެ ގެޔަށް އައުމަށް ފާރޫޤު އެދުނެވެ.

އައިމަލް ގޮވައިގެން ، ތަހުނިޔާ އޭނާގެ މަންމަގާތަށް ދިޔަ ދުވަހެކެވެ. އައިމަލް ބަހައްޓާފައި ، ތަހުނިޔާ އިސްލާމްއާބާދަށް ދިއުން އެއީ ސާޖިދާ ވަރަށް ހިތްހަމަ ނުޖެހުނު ކަމެކެވެ. އެވާހަކަ ފެށުމުން ތަހުނިޔާ ހިތްހަމައެއް ނުޖެހުނެވެ. އަދި ، އޭނާގެ މުސްތަޤްބަލަށް މަންމަވެސް ނުވިސްނާކަމަށް ބުނެ ، ޝަކުވާ ކޮށްގަތެވެ. އެންމެފަހުން ، ސާޖިދާ އޭނާގެ ވާހަކަ ބަދަލުކޮށްލިއެވެ. ތަހުނިޔާއަށް ލިބުނު ކާމިޔާބީ ފާހަގަ ކުރުމަށްޓަކައި އެރޭ ، ރޭގަނޑުގެ ކެއުމަކަށް ބޭރަށް ދިއުމަށް ނިންމިއެވެ. ބައްޕައަށްވެސް ގުޅާފައި އަވަހަށް އަންނަން ބުނާނެވާހަކަ ބުނެ ، މުރުތަޟާވެސް ތަންކޮޅެއް އަވަހަށް އެރޭ ގެޔަށް އައުމަށް އެދުމަށް ތަހުނިޔާގާތު އެދުނެވެ.

އަނެއްކޮޅުން ، ހަވީރުއްސުރެ ، މުރުތަޟާ އޮފީހުގައި އަވަދިނެތި އުޅެމުން އެގެންދަނީ ، ނޫރު ޙަވާލުކޮށްފައި އޮތް ޕްރޮޖެކްޓްގެ މަސައްކަތް ނިންމުމަށެވެ. ތަހުނިޔާގެ މަންމައާއި ބައްޕަ ގޮވައިގެން ރެސްޓޯރެންޓަށް ކާންގޮސް އެތައް އިރެއްވީއިރުވެސް މުރުތަޟާއެއް ނައެވެ. މުރުތަޟާއަށް ފޯނުކޮށްކޮށް ފޯނެއް ނުނަގައެވެ. އެންމެފަހުން ، ތަހުނިޔާއަށް މުރުތަޟާގާތު އެވާހަކަ ބުނަންޖެހުނީ މެސެޖަކުންނެވެ. މުރުތަޟާ ލަހެއްނުވެ އަންނާނެކަމުގައި ތަހުނިޔާ ބުންޏެވެ. އައިމަލްވެސް ގޮވައިގެން ގޮސް އުޅޭތީ ، އެހާ ގިނައިރެއްވެސް ނުކުރެވޭނެއެވެ. އެކަން މުރުތަޟާއަށްވެސް އެނގެން ޖެހޭނެއެވެ.

ފަހަރެއްގައި މުރުތަޟާއަށް މެސެޖް ނުކިޔެނީކަމަށް ވެދާނެކަމަށް ޢާޞިމް ބުންޏެވެ. އަދި އެއްފަހަރު މުރުތަޟާއަށް ގުޅައިލުން ރަނގަޅުކަމަށް ޢާޞިމަށް ފެނުނެވެ. ބައްޕަގެ ބަހަށް ފޯނުކޮށްލުމަށްޓަކައި ތަހުނިޔާ ނުކުތީ ބޭރަށެވެ. އެވެސް ، ތަހުނިޔާގެ ބޯބޮޑުކަމުން ކުރިކަމެކެވެ. މުރުތަޟާއާ ދިމާއަށް އެއްޗެއް ބުނަންޖެހި ، އެއަޑު ބައްޕަމެންނަށް އިވިދާނެތީއެވެ.

އޮފީހުގެ މަސައްކަތުގައި މުރުތަޟާ އިންދާ ފޯނެއް އައެވެ. އެއީ ފާރޫޤުގެ ފޯނެކެވެ. މުރުތަޟާ ލަސްވެގެން ގުޅީއެވެ. މުރުތަޟާ އެއުޅެނީ އޮފީހުގައި މަސައްކަތުގައި ކަމަށް ބުންޏެވެ. އެވަގުތު ، އަމީން އިޙްސާން އެފޯނު އަތުލައި ، މުރުތަޟާއާ ވާހަކަ ދެއްކިއެވެ. އަދި މަސައްކަތް ބަހައްޓާފައި ، އެބައްދަލުވުމަށް މުރުތަޟާ އައުމަށް އެދުނެވެ.

ފޯނު ބޭއްވިތަނާ އިތުރުފޯނެއް މުރުތަޟާއަށް އައެވެ. އެއީ ތަހުނިޔާއެވެ. މުރުތަޟާއަށް އިންތިޒާރުކޮށްގެން ، ބައްޕަމެން އެބަތިބިކަމަށް ތަހުނިޔާ ބުންޏެވެ. ފޯނުން ނުގުޅިގެން ، މެސެޖެއް ފޮނުވިކަމަށާއި މެސެޖް ނުފެންނަނީތޯ ތަހުނިޔާ ސުއާލު ކުރިއެވެ. އަދި ވީހާއަވަހަކަށް އެތަނަށް މުރުތަޟާ އައުމަށް އެދުނެވެ. އެހެނަސް ، ރަސްމީ ކެއުމަކަށް ދާޏްޖެހޭތީ އެރޭ ދެވެންނެތްކަމަށް މުރުތަޟާ ބުނުމާއެކު ، ދަނީ ކޮންތާކަށްތޯ ތަހުނިޔާ ސުއާލުކުރިއެވެ. މުރުތަޟާއެދަނީ އަމީރު އިޙްސާންގެ ގެޔަށް ކަމަށް ބުނުމާއެކު ، ތަހުނިޔާގެ މޫނުމަތީގެ ކުލަވަރު ބަދަލުވެގެން ދިޔައެވެ. އެހެން އެކަން އޮތިއްޔާ މުރުތަޟާއަށް އެރޭ އެތަނަށް އަންނާނެ ފުރުސަތެއް ނުލިބޭނެކަން ، ތަހުނިޔާއަށް އެނގުނެވެ. ތަހުނިޔާގެ ލޮލުން ފާއްދާލި ކަރުނައިގެ އަސަރު ފޮރުވަމުން ، ހިންދިރުވާލާފައި މަންމަމެންގެ ގާތަށް ދިޔައެވެ. މަންމަމެންގާތު ބުނާނީ ކީކޭކަމެއް ތަހުނިޔާއަކަށް ނޭނގުނެވެ. މުރުތަޟާއަށް އެހެން ކެއުމަކަށް މާކުރިން ދަޢުވަތު ލިބިފައި އޮތީމާ ، މިރޭ އާދެވެން ނެތްކަމަށް ބުނެ ޙުއްޖަތެއް ދެއްކިއެވެ. އަދި ، އެހެން ދުވަހަކުން ކެއުމަށް އަންނާނީ ކަމަށް ބުންޏެވެ.

އެއީ ، އެއްވެސްކަމެއް ނޫންކަމަށް ޢާޞިމް ބުންޏެވެ. އަދި އެމީހުން އޯޑަރުކޮށްލައިގެން މިރޭވެސް ދާނީ ކައިގެންކަމަށް ޢާޞިމް ނިންމިއެވެ.

މުރުތަޟާގޮސް އަމީން އިޙްސާންގެ ގެޔަށް ވަތްއިރު ، އިޙްސާނާއި ފާރޫޤު އޭނާގެ އިންތިޒާރުގައި ތިއްބެވެ. ނޫރު އިނީ ބައްދަލުވުމާ ދުރުގައި ، ސިޓިންރޫމުގައި އިށީނދެލައިގެންނެވެ. އެންމެފަހުން ، މުރުތަޟާއާ ޙަވާލުކުރި ޕްރޮޖެކްޓްގެ ހުރިހާކަމެއް އޮތީ ނިމިފައެވެ. ހަމައެކަނި ބޭނުންވަނީ ، އަމީން އިޙްސާންގެ ހުއްދައެވެ. މުރުތަޟާގެ ލެޕްޓޮޕުން ، ޕްރޮޖެކްޓްގެ ލިޔުންތައް އިޙްސާނަށް ދެއްކުމާއެކު ، މުރުތަޟާގެ މަސައްކަތަށް ، އަމީން އިޙްސާން ތަޢުރީފް ކުރިއެވެ. ނޫރުލްޢައިނުވެސް ، މުރުތަޟާގެ މަސައްކަތާއި  މުރުތަޟާގެ ހީވާގިކަމާއި ވިސްނުމަށް ތަޢުރީފް ކުރާކަމަށް އިޙްސާން ބުންޏެވެ.

މުރުތަޟާގެ މަސައްކަތަށް ، އިޙްސާންގެ އަންހެނުން އެހާ ގަޔާވެދާނެކަމަކަށް މުރުތަޟާއަކަށް ޤަބޫލެއް ނުކުރެވެއެވެ. އެކަމާ ނޫރުލްޢައިނު ހިތްހަމަ ނުޖެހިފައިހުރިކަމަށް މުރުތަޟާ ބުންޏެވެ. މުރުތަޟާ އެހެންބުނިއަޑު ، ދުރުގައި އިންނަމަވެސް ، ނޫރުއަށް އިވުނެވެ. އަދި ވަށްކަޅިޔަކުން މުރުތަޟާއާ ދިމާއަށް ބަލައިލިއެވެ.

ބައްދަލުވުން ނިންމާލައިފާ ، މުރުތަޟާ ނުކުންނަނިކޮށް ނޫރު ، މުރުތަޟާއާ މުޚާތަބު ކުރިއެވެ. އެ ބައްދަލުވުމަށް ، މުރުތަޟާ އަތުވެދާނެކަމަކަށް ނޫރު ހިއެއް ނުކުރެއެވެ. ދުވާލު މަސައްކަތުގައި އިން އިރުވެސް ، މުރުތަޟާ އިނީ ކޮންމެވެސް ކަމަކަށް ގެއްލިފައެވެ. މަސައްކަތަށް ވިސްނުން ގެންގުޅެވޭވަރަށްވުރެ ކަންބޮޑުވެފައެވެ. އެކުންފުނީގެ އެމްޑީގެ މަޤާމަށް ނޫރު ކަމުނުދަނީތޯ އާއި އަދިވެސް ބަލަމުން އެގެންދަނީ ކުރީގެ ނޫރުލްޢައިނު ހޯދަންތޯ ، ނޫރު ސުއާލު ކުރިއެވެ. މުރުތަޟާއަށް ނޫރުގެ ސުއާލަށް ވަގުތުން ޖަވާބެއް ނުދެވުނެވެ. ޖަވާބުދޭން ކުޑައިރުކޮޅެއް ނެގިއެވެ. ނޫރުއަށް އެ ވިސްނެނީ ރަނގަޅަކަށް ނޫނެވެ. މުރުތަޟާ އެހުރީ ސަލާމަތުންނެވެ. އެއްވެސްކަމެއްގެ އުނދަގުލެއް ، އޭނާގެ މަސައްކަތަށް ހުރަސްއެޅޭގޮތަށް ، އޭނާއާ ކުރިމައްޗެއް ނުވާނެއެވެ. ވިސްނޭގޮތް ގޯސްވެގެން އެއުޅެނީ ނޫރުލްޢައިނުގެ ކަމަށް މުރުތަޟާ ބުންޏެވެ.

" އަހަރެންނަށް ހީވާގޮތުގައި ، ގޯސްކޮށް ވިސްނޭމީހުން ، ކުރާ މަސައްކަތުގައި އެހެންކަންކަމަށް ގެއްލޭނެއެވެ. މުރުތަޟާއަށް ތިވާފަދައިންނެވެ. އަހަރެންނަށް ވަކިކަމެއް ވަކިގޮތަކަށް ގޯސްކޮށް ވިސްނޭކަމަކަށް ނުފެނެއެވެ. " ނޫރު ބުންޏެވެ.

މުރުތަޟާއާއި ނޫރުލްޢައިނުގެ ޝަކުވާއާއި ބަހުސްތައް ނިމޭނީ ކޮން އިރަކުންތޯ މުރުތަޟާ ސުއާލުކުރިއެވެ. މޮޅުވާމީހަކާއި ބަލިވާމީހަކު ބަލައި ވާދަކޮށްގެން ،  ނުކުންނާނެ ނަތީޖާއަކީ ކޮބައިހެއްޔެވެ ؟ ނޫރު އިޚްތިޔާރުކުރި ދިރިއުޅުމުގައި ނޫރު ، ކުރިޔަށް ދާންވީ ނޫންހެއްޔެވެ ؟ އޭނާގެ އަމިއްލަ ޙާލަށް މުރުތަޟާ ދޫކޮށްލަންވީ ނޫންހެއްޔެވެ ؟ ދެމީހުންނަށް ދިމާވެފައި އޮތް ނަސީބުގައި ދެމީހުންނަށް ކުރިޔަށް ނުދެވިގެން އެއުޅެނީ ކީއްވެގެން ހެއްޔެވެ ؟

ނޫރު އެހޯދި ކާމިޔާބަކީ ނޫރުކުރި އުއްމީދާ ނުބައްދަލު އެއްޗެކެވެ. ކުޑަދުވަސްކޮޅެއްގެ ތެރޭގައި ކުންފުންޏެއްގެ އެމްޑީގެ މަޤާމަށް އައުމަކީ ، ފަސޭހަކަމެއްނޫނެވެ. ފިރިމީހާގެ ތައްޕާހުންނަމަވެސް ، ނޫރުއަށް އެހިސާބަށް ދެވުނީމާ ، ހިތް ނުފުރިގެން ، ކަންކަމާ ޝަކުވާ ކުރުމަށްވުރެ ، މިންވަރަށް އީމާންވެ ސާބިތުވުން ބުއްދިވެރިނޫންތޯ މުރުތަޟާ ސުއާލު ކުރިއެވެ. ކުރިޔަށް ދާން އުއްމީދުކުރާ މީހާ ، ވަށްކަޅިޔަކުންވެސް ފަހަތެއް ނުބަލާނެއެވެ. ކާމިޔާބީ ޙާޞިލްކުރާ މީހުން ، ނާކާމިޔާބީގެ ހިތްދަތިކަން އިޙްސާސްކުރާ މީހުންނާ ދިމާއަކަށް ނުބަލާނެއެވެ.

" ބަލާނެއެވެ ! އެންމެންނަކީ އެއްގޮތަކަށް އުޅޭނެ ބައެއްނޫނެވެ. ބައެއްމީހުންނަކީ ، އެހާ ކެތްގަދަވެފައި ، ހިތްހަރުމީހުންނެއްނޫނެވެ. " ނޫރު ބުންޏެވެ.

ނޫރުގެ ހިތް އެހާ ބަލިކަށިވިކަމެއް މުރުތަޟާއަކަށް ނޭނގެއެވެ. ނޫރުގެ ދިރިއުޅުމުގައި ، ރަނގަޅު ވަގުތުގައި އެހާ އަވަހަށް އެއެޅި ފިޔަވަޅަކީ ، ހިތްބަލިމީހަކަށް އަޅަން ކެރޭނެ ކަހަލަ ފިޔަވަޅެއްނޫނެވެ. ނޫރު ، އިސްއުފުލާލައި ، މުރުތަޟާއާ ދިމާއަށް ބަލައިލިއެވެ. ތެދުވެގެން އައިސް ، މުރުތަޟާއާ ގާތަށް ޖެހިލިއެވެ.

" އަހަރެންގެ ހިތަށް މުރުތަޟާގެ ފަރާތުން ލިބުނު  ޒަޚަމްތަކުގެ އިޙްސާސް ވީހިސާބުންނެވެ. އެ އިޙްސާސްތަކުން  ހިތަށް ލިބުނު ކެކުޅުމުގައި ރޮއެ ކަރުނަ އަޅައި ، އެ ރުއިމާއި ރިހުން ހިތުން ފިލުވައިލަން އުނދަގޫވި ހިސާބުން ، އަހަރެންނަކީ ހިތްބަލި މީހަކަށް ވިއެވެ. ދުނިޔެ ، އެކޮޅުކޮޅުން ޖެހުނެވެ. އެއަށްފަހު ، އަހަރެންނަކީ ހިތްހަރު މީހަކަށް ވީއެވެ. " ނޫރު ބުންޏެވެ.

އިތުރު ވާހަކައެއް ނޫރުއެއް ނުދައްކައެވެ. މުރުތަޟާއާ ހަތަރުކަޅި ހަމަކޮށްލައިގެން ހުރިއިރު ، ނޫރުގެ ލޮލުން ފާއްދާލި ކަރުނަ މުރުތަޟާއަށް ފެނުނެވެ. މުރުތަޟާހުރީ ، ނޫރު ދާންވީ މަގަށް ހުރަސްއަޅައިގެންނެވެ. މުރުތަޟާގެ ފަޔަށް ނޫރު ބަލައިލިއެވެ. އޭގެ މާނަޔަކީ ، ނޫރުދާން ބޭނުންވެފައިހުރިކަންކަމުގައި މުރުތަޟާއަށް ވިސްނި ، އެއްފަރާތަކަށް ޖެހިލިއެވެ. ނޫރު ، އެހުރިގޮތަށްހުރެ ، ކުރިޔަށް ހިނގައިގަނެ ، ގޭތެރެޔަށް ވަދެގެން ދިޔައެވެ.

މުރުތަޟާ އެނބުރިގެޔަށްގޮސް ، ކޮޓަރިޔަށް ވަތްއިރު ތަހުނިޔާހުރީ ، ކޮޓަރި ތެރޭގައި ދެކޮޅަށް ހިނގާލަ ހިނގާލައެވެ. ކޮޓަރީގެ ދޮރުހުޅުވައިލުމަށްފަހު ، އެތެރެޔަށް ނުވަދެ ދޮރުކަނީގައި ހިފާލައިގެން މުރުތަޟާއަށް ހުރެވުނެވެ. މުރުތަޟާއަށް ކިހިނެއްވީތޯ ތަހުނިޔާ ސުއާލު ކުރިއެވެ. މުރުތަޟާއަށް ޖަވާބު ދެވުނީ ތަހުނިޔާގެ ސުއާލަކަށް ނޫނެވެ. މުރުތަޟާއަށް ބުނެވުނީ ، މަންމައާއި ދައްތަ އެނިދީ ހާދަ އަވަހަކަށޭއެވެ. އޭރު ގަޑިން ބާރަ ޖެހީއެވެ. ގަޑިދިޔަގޮތެއްވެސް މުރުތަޟާއަކަށް ނޭނގުނެވެ. އެހާ ގިނައިރުވެއްޖެކަމަކަށް އޭނާއަކަށް ހިއެއް ނުކުރެވެއެވެ.

ނޫރުލްޢައިނުއާ ދިމާވީމާ ، ދުވާލެއް ރޭގަނޑެއް މުރުތަޟާއަކަށް މިހާރަކު ވަތްކެއް ނުވެއެވެ. އަނތްބަކާ ދަރިޔަކު ހުންނަކަމެއްވެސް ހަނދާނެއް ނުހުރެއެވެ. ނޫރުލްޢައިނުގެ މަލާމާތުގެ ބަސްތަކާއި ، މަސައްކަތުގެ އުނދަގުލުގައި ބޯހާސްވެގެން ގެޔަށް އައިސް ވަތްތަނުން ތަހުނިޔާ އެކޮށްގަތް ޝަކުވާއަށް މުރުތަޟާއަކަށް ކެތެއް ނުކުރެވުނެވެ. ހިތްހަމަ ނުޖެހިފައިހުރެ ، އެނބުރިގޮސް ތަހުނިޔާގެ ދެއަތުގައި ބާރަށް ހިފައިލިއެވެ. އަދި ނޫރުލްޢައިނުގެ ނަން އަބަދު ކިޔަންޖެހެނީ ކީއްވެތޯ ތަހުނިޔާއާ ސުއާލުކުރިއެވެ. މުރުތަޟާ ނޫރުމެންގެ ގެޔަށްގޮސް ލަސްވުމާއި ، ބައްޕަމެން އިންތިޒާމްކުރި ކެއުމަށް މުރުތަޟާ ނައުމާގުޅިގެން ، ތަހުނިޔާއަށް ކޮށްފައިވާ އަސަރާއި ، މުރުތަޟާގެ ފަރާތުން އެފެނުނު ރުޅިވެރިކަމާގުޅިގެން ތަހުނިޔާގެ ހިތަށް އަސަރުކޮށް ، ލޮލުން ކަރުނަ އައެވެ. މުރުތަޟާ އެކަމަކަށް އަޅައެއް ނުލައެވެ. ތަހުނިޔާގެ އަތުން އަތްދޫކޮށްލުމަށްފަހު ، ނިދަން ތައްޔާރުވުމަށްޓަކައި ފާޚާނާއަށް ވަނެވެ.

ހެނދުނު އޮފީހަށްގޮސް ތަހުނިޔާ އޭނާގެ މަސައްކަތުގައި އުޅެނިކޮށް މުޙުސިނާ ގުޅާފައި ތަހުނިޔާ އައުމަށް އެދުނެވެ. މުޙުސިނާގާތަށް ތަހުނިޔާ ދިޔައިރު ، އެތަނުގައި ނޫރުއައިސް އިނެވެ. އެހިސާބަށް އައިސްފައި ، އެތަނަށް ޖައްސައިލީކަމަށް ނޫރު ބުންޏެވެ. މުޙުސިނާމެންވެސް އެ ހިންގަނީ އަމީން އިޙްސާންގެ ވިޔަފާރިއެކެވެ. އެހެންކަމުން ، ނޫރު އެތަނަށް ޒިޔާރަތްކުރުން ވެގެންދިޔައީ މުޙުސިނާއަށް ލިބުނު ވަރަށްބޮޑު އުފަލަކަށެވެ. އެތަނުގައި އުފައްދާފައިހުރި ތަކެތިން ، ނޫރުގެ ވޯޑްރޯބަށް ބޭނުންވާ ބައެއްތަކެތި ނެގުމަށް ނޫރު ބޭނުންވިއެވެ. ނޫރު ބޭނުން އެއްޗެއް އެތަނުން ހިލޭ ނެގިދާނެއެވެ. އެއީ ، މުޙުސިނާއަށްވެސް ލިބޭ އުފަލެކެވެ. އެމީހުންނާއެކީ ތަހުނިޔާވެސް އައުމަށް މުޙުސިނާ އެދުނެވެ. ނުދާން ހުރެފައިވެސް ތަހުނިޔާ އެމީހުންނާއެކީ ދިޔައެވެ. ނޫރު އެނެގިހެދުންތަކެއް ނެގުމަށްފަހު ، އެތަކެތި ގެޔަށް ފޮނުވާލަދޭށޭ ބުނެ ، މުޙުސިނާއާ ސަލާމްކޮށްލުމަށްފަހު ނޫރު އެތަނުން ދިޔައެވެ. ޖެހިގެންހުރި ތަހުނިޔާއާ ދިމާއަށް ބަލައިވެސް ނުލައެވެ. ނޫރު އެތަނަށް އެއައީ ، ތަހުނިޔާއަށް ، ނޫރުގެ ބޮޑުކަން ދައްކައި ތަހުނިޔާ ލަދުގަންނުވައިލުމަށެވެ. ތަހުނިޔާ އެހުރީ ނޫރުގެ ނޯކިރީގައި ، ނޫރުގެ ދަށުވެފައިކަން އަންގައިލުމަށްކަން ތަހުނިޔާއަށް އެނގުނެވެ. ތަހުނިޔާއަކީ ކޮންފެންވަރެއްގެ މީހެއްކަން އަންގައި ލުމަށެވެ. ( ނުނިމޭ )